Faatomuaga o Anomea

Mauaina o le Malamalama Faaleagaga, Vaega 1

Faatino i le Faatuatua

O se tasi o faamoemoega o le atamai i aoaoga faavae o le aoao lea e faaaoga mataupu faavae o le mauaina o le malamalama faaleagaga e fesoasoani e atiae ai lou faavae ia Iesu Keriso. O lenei lesona e mafai ona fesoasoani ia te oe e faatino ai le faatuatua ia Iesu Keriso a o e sailia tali i fesili ma atugaluga i lou olaga.

O lelei pe leaga ia fesili?

Mafaufau po o fea o tali nei e faatatau i le fesili lenei:

• O le fea o nei mafuaaga e ono i ai ni fesili a se tasi e uiga i le talalelei po o le Ekalesia a Iesu Keriso?

  1. E lei i ai lava sa latou molimau o le talalelei.

  2. E lava lo latou popole e uiga i le talalelei e mafua ai ona mananao ia malamalama atili.

  3. Latou te masalosalo i le faatuatua sa ia i latou muamua.

  4. Atonu e musuia i latou e le Atua e mafaufau e uiga i se mea e finagalo o Ia e aoao atu ia i latou.

     O le tali e faalagolago i uiga ma mafuaaga a tagata taitoatasi mo le faia o fesili. Faitau le palakalafa 3 o le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022), ma vaavaai pe mafai faapefea e lo tatou taulimaina o fesili o le talalelei ona faamalosia pe faavaivaia lo tatou faatuatua ia Iesu Keriso.

• O le a se mea o tulaga ese ia te oe i lenei parakalafa? Aisea?

E tofu tagata uma ma fesili ma atugaluga. E tatau ona tatou faaeteete ia aua nei faamasinoina le faatuatua o isi pe a i ai ni a latou fesili, ma e le tatau ona tatou masalosalo i lo tatou lava faatuatua pe a i ai ni a tatou fesili. O lo tatou faatuatua ia Iesu Keriso ma la tatou molimau i le talalelei toefuataiina e mafai ona faamalosia pe faavaivaia e faalagolago i le auala tatou te taulimaina ai a tatou fesili ma atugaluga. A o e suesue i le asō, mafaufau e uiga i le matafaioi a au fesili i lou alualu i luma faaleagaga. O a ni au fesili o i ai e uiga i le talalelei po o le Ekalesia a Iesu Keriso? O e lagonaina e faapea o au fesili o loo faalatalata atili atu ai oe i le Faaola ma Lana Ekalesia?

Mauaina o le malamalama faaleagaga

I le faagasologa atoa o lou aafiaga atoa i le seminare, o le a e maua ai le avanoa e faataitai ai ona faaaoga mataupu faavae o le mauaina o le malamalama faaleagaga. O mataupu faavae nei e tolu e mafai ona fesoasoani ia te oe e faalatalata atili atu ai ia Iesu Keriso pe a tulai mai ni fesili po o ni atugaluga i lou olaga:

1. Faatino i le faatuatua.

2. Iloilo manatu faavae ma fesili faatasi ai ma se vaaiga e faavavau.

3. Saili le malamalama atili e ala mai punaoa paia ua filifilia.

O le vaega o totoe o lenei lesona o le a taulai atu i le mataupu faavae o le faatinoina i le faatuatua ia Iesu Keriso.

Faitau palakalafa 5–7 o le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae, ma vaavaai mo ni nai auala e mafai ona e faaumaina ai le fuaiupu lenei.

Pe a tulai mai ni fesili po o ni atugaluga, e mafai ona tatou faatino i le faatuatua ia Iesu Keriso e ala i le… .

1. Tali mai ia le itiiti ma le lua o fesili nei:

   • O fea o auala na e filifilia e te manatu e sili ona faatatau i le autalavou i aso nei po o lou olaga foi? Aisea?

   • E mafai faapefea e le filifili e faatino i le faatuatua i lenei auala ona aafia ai le sootaga a se tasi ma le Faaola?

   • O ai e te iloa na faatinoina le faatuatua a o feagai ai ma fesili po o atugaluga? O le a le mea na ia faia?

Mafaufau e matamata le vitio “Act in Faith: The Stonemason”“ (4:57), o loo maua i le ChurchofJesusChrist.org. Vaavaai pe na faapefea e le autalavou i le vitio ona faatino i le faatuatua i le Faaola ina ua latou feagai ma fesili ma atugaluga taua.

Faatino i le Faatuatua: O Le Vanemaa

Afai e le talafeagai se aoaoga faavae po o se aoaoga i le puipui maa o a tatou molimau, tatou te lafoai ea le puipui ma savavali ese?

Faataitaiga mai tusitusiga paia

O loo i ai i tusitusiga paia le tele o tala o i latou sa feagai ma fesili faigata po o atugaluga i le faatuatua ia Iesu Keriso. O se tasi o i latou nei o le perofeta o Nifae. Faitau faataitaiga nei mai le olaga o Nifae, ma vaavaai pe na faapefea ona ia faatino i le faatuatua ia Iesu Keriso ao feagai ma fesili ma isi faafitauli.

• 1 Nifae 2:16—O nisi o e pele ia te ia sa feitai i le mea na fai atu ai lona tamā, le perofeta o Liae, ia i latou e fai.

• 1 Nifae 3:7—Sa talosagaina o ia e faia se mea faigata.

• 1 Nifae 9:5–6—Na poloaiina o ia e le Alii e fai se mea mo mafuaaga na te lei malamalama i ai.

• 1 Nifae 10:17; 11:1–5—Sa manao o ia i sana lava molimau i mea na aoao mai e lona tamā, le perofeta.

• 1 Nifae 11:17—Na te lei iloaina atoa le tali i se fesili na fesiligia ai o ia e uiga i le talalelei.

• O a elemene o le faatinoina i le faatuatua na sili ona faataitaia e Nifae?

2. Faamaea mea nei:

Faamatala se fesili po o se popolega faaonapo nei e mafai ona aafia ai le faatuatua o se tasi ia Iesu Keriso po o Lana Ekalesia. E faapefea e se tasi ona faatino i le faatuatua pe a feagai ma lena fesili po o le faafitauli?

• E ono mafai faapefea e le filifili e faatino i le faatuatua pe lē faatinoina i le faatuatua ona aafia ai lana sootaga ma le Faaola?

• O le a se mea e sili ona e manao e faaaoga i lou olaga mai mea sa e suesueina i le asō? E faapefea ona fesoasoani lenei mea ia te oe i lou olaga?

Tuu i le Faitalia: O e Manao e Aoao Atili?

E afaina le i ai o ni fesili e uiga i le talalelei?

Sa aoao mai Peresitene Dieter F. Uchtdorf, o le sa avea ma uso o le Au Peresitene Sili:

O se mea masani le i ai o fesili—o sina fatu itiiti o le fesili faamaoni ua tele lava ina tupu ae ma ola ma avea ma se laau mafalā o le malamalama. O loo i ai ni nai tagata o le Ekalesia o e, po o le a lava le taimi mai lea taimi, e lei tauivi lava ma ni fesili matuia pe maaleale. O se tasi o faamoemoega o le Ekalesia o le fafaga ma faafailele le fatu o le faatuatua—e oo lava i nisi o taimi i eleele matutu o le masalosalo ma le le mautonu. O le faatuatua o le faamoemoe lea mo mea e le vaaia ae ua moni.

O le mea lea, ou uso e ma tuafafine pele—au uo pele—faamolemole, ia muai ona e masalosalo i ou masalosaloga ae e te lei masalomia lou faatuatua. Ia le tatau lava ona tatou faatagaina le masalosalo e faapagotaina i tatou ma taofia ai i tatou mai le alofa paia, filemu, ma meaalofa ia e oo mai e ala i le faatuatua i le Alii o Iesu Keriso. (Dieter F. Uchtdorf, “Sau, Auai Faatasi ma i Matou,” Liahona, Nov. 2013, 23)

Na faamatala mai e Peresitene Russell M. Nelson:

Ua na o se mafaufau magafagafa e mafai ona aoao e le Alii. (Russell M. Nelson, i le M. Russell Ballard, “What Came from Kirtland” [Brigham Young University devotional, Nov. 6, 1994], 8, speeches.byu.edu)

O le a se mea e tatau ona ou faia pe afai o o’u tauivi ai ma ni masalosaloga e uiga i le Atua po o le Ekalesia?

Na saunoa mai Peresitene Russell M. Nelson:

Filifili e talitonu ia Iesu Keriso. Afai e i ai ni ou masalosaloga i le Atua le Tama ma Lona Alo Pele, po o le moni o le Toefuata’iga po o le moni o le valaauga paia o Iosefa Samita o se perofeta, filifili e talitonu ma tumau i le faatuatua. Avatu au fesili i le Alii ma isi punaoa faatuatuaina. Su’esu’e faatasi ai ma se manao ia talitonu nai lo le faamoemoe e mafai ona e maua se aleu i le soifuaga o se perofeta po o se mea o faaletonu i tusitusiga paia. Taofi le faateleina o ou masalosaloga e ala i le talanoaina ma isi tagata masalosalo. Faataga le Alii e taitai oe i lau faigamalaga o le sailiiliga faaleagaga. (Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 103.)

Na saunoa Elder Ronald A. Rasband o le Korama a Aposetolo e Toasefululua:

Ou te fautuaina outou i le taimi lenei, ia manatua aemaise lava i taimi o faigata, le taimi na e lagona ai le Agaga ma le malosi o lau molimau; manatua ia faavae faaleagaga na e fausia. Ou te folafola atu a outou faia lenei mea, ma aloese mai mea e le fausia ma faamalosia ai lau molimau po o mea e ulagia ai ou talitonuga, o le a e toe manatua i lou mafaufau na taimi taua na tuputupu ae ai lau molimau e ala i le tatalo lotomaualalo ma le anapogi. Ou te faamautinoa atu ia te oe o le a e toe lagona le saogalemu ma le mafanafana o le talalelei a Iesu Keriso. (Ronald A. Rasband, “Ne’i Galo ia te Oe,” Liahona, Nov. 2016, 114)