“Ko e Fakamoʻoni ‘a Siosefa Sāmita ki he Tohi ‘a Molomoná: “Liliu … ʻi he Foaki mo e Māfimafi ʻo e ʻOtuá,” Tohi ʻa Molomoná - Tohi Lēsoni ʻa e Tokotaha Akó (2024)
“Ko e Fakamoʻoni ‘a Siosefa Samita ki he Tohi ʻa Molomoná,” Tohi ʻa Molomoná - Tohi Lēsoni ʻa e Tokotaha Akó
Ngaahi Peesi Fakafeʻiloaki ʻo e Tohi ʻa Molomoná
Ko e Fakamoʻoni ‘a Siosefa Sāmita ki he Tohi ‘a Molomoná
“Naʻe liliu ia ʻi he … foaki mo e māfimafi ʻo e ʻOtuá”
© 1998 David Lindsley
Naʻe anga fēfē ʻa e ʻomi e Tohi ʻa Molomoná? Naʻe founga fēfē hono liliu ia ‘e Siosefa Samita mei ha lea fakafonua ʻoku ʻikai ke ne ʻiloʻi ki he lea faka-Pilitāniá? ʻE tokoni e lēsoni ko ʻení ke mahino lelei ange ki he kau akó pea nau fakamatalaʻi e founga naʻe ʻomi ai e Tohi ʻa Molomoná “ʻi he foaki mo e māfimafi ʻo e ʻOtuá” (Tokāteline mo e Ngaahi Fuakava 135:3).
Ko hono ʻomi ʻo e Tohi ʻa Molomoná
-
Toe fakamanatu ʻa e ngaahi fakatātā ko ʻeni ʻokú ne fakahaaʻi e ngaahi meʻa naʻe hoko lolotonga hono ʻomi ʻo e Tohi ʻa Molomoná. Fokotuʻutuʻu kinautolu ʻi hono fakahokohoko totonu ʻo e ngaahi meʻa ne hokó. ʻI hoʻo vakai ki he ngaahi ʻata ko ʻení, fakakaukauloto ki he ongo naʻe mei maʻu ‘e Siosefa Samita ʻi he ngaahi meʻa takitaha ko ʻení.
ʻOku hiki e ngaahi tali tonú ʻi he ngataʻanga ʻo e lēsoní.
-
A.
-
E.
-
F.
-
H.
-
I.
-
“ʻI he foaki … mo e māfimafi ʻo e ʻOtuá”
Fakakaukau ki ha taha ʻokú ke ʻiloʻi ʻe ʻaonga ki ai haʻo ako lahi ange fekauʻaki mo hono ʻomi ʻo e Tohi ʻa Molomoná. Mahalo ko ha taha ʻoku ʻikai ko ha mēmipa ʻo e Siasí, pe mahalo ko ha mēmipa ʻo e Siasí ʻoku fefaʻuhi mo ʻene tuí. Fakamatalaʻi nounou honau ngaahi tūkungá ʻi hoʻo tohinoa akó pea feinga ke ʻilo lahi ange ki he ʻuhinga ʻe ʻaonga ai kiate kinautolu ʻa hono ʻomi ʻo e Tohi ʻa Molomoná.
ʻI hoʻo akó, fekumi ki ha fakamoʻoni ʻo e moʻoni ko ia naʻe ʻomai ʻe Siosefa Sāmita ʻa e Tohi ʻa Molomoná ʻi he foaki mo e māfimafi ʻo e ʻOtuá (vakai ki he peesi talamuʻaki ʻo e Tohi ʻa Molomoná mo e Tokāteline mo e Ngaahi Fuakava 135:3).
Naʻe tohi ‘e Siosefa Sāmita fekauʻaki mo e meʻa naʻá ne aʻusia lolotonga hono ʻomi ʻo e Tohi ʻa Molomoná.
Lau ʻa e “Ko e Fakamoʻoni ʻa e Palōfita ko Siosefa Sāmitá” mei he ngaahi peesi talateu ʻo e Tohi ʻa Molomoná. Fakaʻilongaʻi e ngaahi fakakaukau pe fakaikiiki te ke lava ʻo vahevahe mo e tokotaha naʻá ke fakakaukau ki ai kimuʻá. Kapau ʻokú ke maʻu ha ngaahi folofola fakaʻilekitulōnika, mahalo te ke fie fanongo ki he leá pea muimui ki ai ʻi hoʻo folofolá.
-
Ko e hā e ngaahi fakamatala naʻá ke maʻu ʻokú ne fakahaaʻi naʻe ʻomi ʻa e Tohi ʻa Molomoná ʻi he meʻafoaki mo e māfimafi ʻo e ʻOtuá?
-
ʻOkú ke pehē ko e hā naʻe fili ai ‘a Siosefa Sāmita ke liliu ʻa e Tohi ʻa Molomoná, kae ʻikai ko ha tangata poto ʻiloa ʻi he vahaʻataimi ko ʻení?
-
Ko e hā naʻá ke ako fekauʻaki mo hono ʻomi ʻo e Tohi ʻa Molomoná te ke vahevahe mo e tokotaha naʻá ke fakakaukau ki aí?
Ngaahi fakaikiiki fakahisitōlia
Hili hono maʻu ‘e Siosefa Sāmita ‘a e ‘ū lauʻi peletí, naʻá ne liliu ʻa e Tohi ʻa Molomoná ‘aki ‘a e meʻafoaki mo e māfimafi ʻo e ʻOtuá. “Taimi ʻe niʻihi naʻe liliu ʻa Siosefa ʻaki ʻene sio ki he ongo meʻa liliu leá [ʻa e ʻŪlimí mo e Tūmemí] pea lau ʻi he lea faka-Pilitāniá ʻa e ngaahi mataʻitohi ʻi he ʻū lauʻi peletí. Naʻe ʻi ai ha ngaahi taimi naʻe faʻa tokoni ai e foʻi maka kikité ke toe faingamālie ange. Naʻá ne faʻa faʻo e foʻi maka kikité ʻi hono tataá, ʻai hono matá ki he loto tataá ke taʻofi e hū ki loto ha māmá, peá ne sio leva ki he foʻi maká. ʻE ulo mai ʻa e maama mei he foʻi maká ʻi he fakapoʻulí, ʻo fakahā ʻa e ngaahi lea naʻe tala-kae-tohi ʻe Siosefá” (Kau Māʻoniʻoní: Ko e Talanoa ʻo e Siasi ʻo Sīsū Kalaisí ʻi he Ngaahi ʻAho Kimui Ní, voliume 1, Ko e Fuka ʻo e Moʻoní, 1815–1846 [2018], 61).
Ko e Ngaahi ʻAho ʻo e Faaitahá
Mamata tonu ʻi he aʻusia ʻa ʻŌliva Kautele ʻi heʻene hoko ko e tangata tohi ʻa Siosefa Sāmitá lolotonga e liliu ʻo e Tohi ʻa Molomoná.
Lau ‘a e lea ko ʻeni ʻa Palesiteni Tāleni H. ʻOakesi ʻo e Kau Palesitenisī ʻUluakí. Te ke lava foki ʻo mamata ʻi he foʻi vitiō “Fehangahangai ʻi he Meʻa Kotoa Pē” ʻi he ChurchofJesusChrist.org mei he taimi 8:18 ki he 9:24.
Opposition in All Things
Elder Oaks teaches how various forms of opposition in mortality help to further our growth.
Hili e kakato hono liliu ʻe Siosefa Sāmita e Tohi ʻa Molomoná, naʻá ne kumi ha tokotaha faipulusi. Naʻe ʻikai ke faingofua ʻeni. Ko e faingataʻá he naʻe fuʻu lōloa e tohí, totongi hono pākí mo hono fakatahatahaʻi ha tatau ʻe lauiafé, ne fakalotosiʻi. Ne ʻuluaki ʻalu ʻa Siosefa kia E. B. Kulenitini, ko ha tangata fai paaki mei Palemaila, ka naʻe ʻikai ke ne tali. Naʻá ne toe feinga ki ha tangata fai paaki ʻe taha ʻi Palemaila, ka naʻe ʻikai pē ke ne tali. Naʻá ne fononga leva he maile ʻe 25 (40 km) ki Lōsesitā, ki ha tangata fai pulusi ʻiloa ʻi he feituʻu fakahihifo ʻo Niu ʻIoké, ka naʻe ʻikai pē ke ne tali. Ne tali ia ʻe ha tangata fai pulusi ʻe taha ʻi Lōsesitā, ka naʻe ʻikai ke feʻunga e ngaahi tūkunga ne fiemaʻú.
Hili ha ngaahi uike, pau pē naʻe puputuʻu ʻa Siosefa ʻi hono fakafepakiʻi e ngāue ne ʻoange kiate ia ʻe he ʻOtuá. Naʻe ʻikai ke ʻai ʻe he ʻEikí ke faingofua, ka naʻá Ne ʻai ke malava. ʻI he feinga hono nima ʻa Siosefá, ʻa ia ko e tuʻo ua ia ʻene ʻalu ki he faipulusi mei Palemaila ko Kulenitiní, ne toki tali e kolé. (Dallin H. Oaks, “Fehangahangai ʻi he Meʻa Kotoa Pē,” Liahona, Mē 2016, 116)
-
Tali e ngaahi fehuʻi ko ‘ení:
-
ʻOku tākiekina fēfē hoʻo ngaahi ongo fakatāutahá ʻe he ngaahi fakaikiiki fakahisitōlia ko ʻeni fekauʻaki mo e Tohi ʻa Molomoná?
-
Ko e hā ʻoku akoʻi atu ʻe hono ʻomi ʻo e Tohi ʻa Molomoná fekauʻaki mo e Tamai Hēvaní mo Sīsū Kalaisí?
-
Ko hono fakamatalaʻi e ʻomi ʻo e Tohi ʻa Molomoná
-
Fakakakato e ngaahi meʻa ko ʻení:
Fakakaukau ki he tokotaha naʻá ke fakakaukau ki ai ʻi muʻa angé pe ko hai ʻe ʻaonga ki ai ʻene ʻilo lahi ange ki he founga naʻe ʻomi ai ʻa e Tohi ʻa Molomoná. Hiki ha fakamatala fakanounou maʻana. Fakakau ha ngaahi fakaikiiki ʻe ala tokoni ke tali ha ngaahi fehuʻi te ne ala maʻu. Ko e hā ʻoku akoʻi mai ʻe he ngaahi meʻa ko ʻeni naʻe hokó fekauʻaki mo e Tamai Hēvaní mo Sīsū Kalaisí? Fakakaukau ke fakakau hoʻo fakamoʻoni fakataautaha ki he Tohi ʻa Molomoná mo e founga naʻe liliu ai ia ʻi he meʻafoaki mo e māfimafi ʻo e ʻOtuá.
Ko e hokohoko totonu ʻo e ngaahi ʻata ʻi he kamataʻangá ko e H, F, E, A, I.