Ko Hono Maʻu ʻo e ʻIlo Fakalaumālié, Konga 3

Fekumi ki ha Mahino Lahi Ange ʻo Fakafou ʻi he Ngaahi Maʻuʻanga Tokoni Kuo Fokotuʻu Fakalangí

Ko e taha ʻo e ngaahi taumuʻa ʻo e fakataukei fakatokāteliné ke tokoniʻi koe ke ke ako mo fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié. ʻE lava ke tokoni atu ʻa e lēsoni ko ʻení ke mahino kiate koe ʻa e mahuʻinga ʻo e fekumi ki he moʻoní mei he ngaahi maʻuʻanga tokoni kuo ʻomi ʻe he Tamai Hēvaní mo Sīsū Kalaisí ʻi he ʻofa.

ʻOku mahuʻinga e ngaahi maʻuʻanga tokoní

Fakakaukau siʻi ki he mahuʻinga ʻo e vaí ʻi hoʻo moʻuí.

• Ko e fē taimi ʻoku mahuʻinga taha ai kiate koe hono maʻu ha vai?

• Ko e hā ʻoku mahuʻinga ai ʻa e maʻuʻanga vai ʻokú ke inu aí?

ʻE lava ke hangē ʻa e fekumi ki he moʻoní ko ha vai inu: ʻoku mahuʻinga e maʻuʻanga tokoní. Fakakaukau ki he ngaahi maʻuʻanga tokoni ʻokú ke tafoki ki ai ʻi he taimi ʻokú ke maʻu ai ha ngaahi fehuʻi pe hohaʻa. Ko e hā ʻa e lahi ʻo hoʻo loto falala ʻoku ʻoatu ʻe he ngaahi maʻuʻanga tokoni ko ʻení ha ngaahi tali ʻoku moʻoní?

ʻE malava ke hoko ha liliu mahuʻinga ʻi hono kumi e ngaahi talí mei he ngaahi maʻuʻanga tokoni falalaʻangá ʻi heʻetau ʻilo e faikehekehe ʻi he vahaʻa ʻo e moʻoní pea mo hano kākaaʻi ʻe he ngaahi fakakaukau halá. Mahalo he ʻikai ke tau fakatokangaʻi maʻu pē ʻa e taimi ʻoku ʻi ai ai ha fakamatala hala ʻi he ngaahi maʻuʻanga tokoní. ʻOku ʻi ai ha ngaahi maʻuʻanga tokoni ʻe niʻihi ʻe ala fokotuʻutuʻu lelei ke ne fakatupu ha taʻefalala, ilifia, mo ha veiveiua. ʻOku finangalo e Tamai Hēvaní ke tali hoʻo ngaahi fehuʻi fakamātoató pea kuó Ne ʻomi ha ngaahi maʻuʻanga tokoni falalaʻanga ke ne tataki koe. ʻOku fakataumuʻa e lēsoni ko ʻení ke tokoniʻi koe ke ke ako mo fekumi ki he ngaahi talí ʻo fakafou ʻi he ngaahi maʻuʻanga tokoni kuo fokotuʻu fakalangí.

Fekumi ki he moʻoní

ʻI he Tohi ʻa Molomoná, naʻe fehangahangai ai ha tangata ko Seialemi mo Sēkope, ko e tokoua ʻo Nīfaí, ʻi haʻane feinga ke “fakaʻauha [e] tui [ʻa Sēkopé]” (Sēkope 7:5). Naʻe pehē ʻe Seialemi naʻe akoʻi ʻe Sēkope ha tokāteline hala fekauʻaki mo Sīsū Kalaisi: “ʻOku ʻikai ʻiloʻi ʻe ha tangata ʻe toko taha ʻa e ngaahi meʻa peheé; he ʻoku ʻikai te ne faʻa lava ʻo fakahā ʻa e ngaahi meʻa ʻe hokó” (Sēkope 7:7). Naʻe tali ia ʻe Sēkope ʻaki ʻene fakahā ange ʻa e founga naʻá ne ʻiloʻi ʻaki ʻa e moʻoni fekauʻaki mo e Fakamoʻuí ʻi he kahaʻú.

Lau ʻa e Sēkope 7:8–12, ʻo kumi e ngaahi maʻuʻanga tokoni naʻe tokoni kia Sēkope ke ne ʻilo fekauʻaki mo Sīsū Kalaisí.

• ʻOkú ke pehē ko e hā naʻe falala ai ʻa Sēkope ki he ngaahi maʻuʻanga tokoni ko ʻení ke maʻu ʻa e moʻoní?

Lau ʻa e palakalafi 1, 11-12 ʻi he konga “Maʻu ʻo e ʻIlo Fakalaumālie” ʻi he Fakamatala ki he ʻElito ʻo e Fakataukei Fakatokāteliné, (2022), ʻo kumi ha fakamatala fekauʻaki mo e ngaahi maʻuʻanga tokoni ki he ʻiló. Fakakaukau ke fakaʻilongaʻi e ngaahi lea pe kupuʻi lea ʻoku ʻuhingamālie kiate koé.

1. Tali e ngaahi fehuʻi ko ʻení ʻi hoʻo tohinoa akó:

• Ko e hā naʻe makehe kiate koe ʻi he ngaahi palakalafi ko ʻení?

• ʻE fakahoko fēfē ʻe he ngaahi maʻuʻanga tokoni ʻokú ke fakaʻaongaʻí ha liliu ʻi he fakamatala ʻokú ke maʻú?

• ʻOku fakahaaʻi fēfē ʻe he ngaahi maʻuʻanga tokoni kuo fokotuʻu fakalangí ʻa e ʻofa ʻa e Tamai Hēvaní mo Sīsū Kalaisi kiate kitautolú?

Ko hono ngaue ʻaki ʻo e ngaahi maʻuʻanga tokoni kuo fokotuʻu fakalangí.

Tohi ʻa Molomoná – Tohi Lēsoni ʻa e Faiakó(2024)—“Ko Hono Maʻu ʻo e ʻIlo Fakalaumālié, Konga 3”

Naʻe fakafeʻiloaki ʻe ha lēsoni kimuʻa ʻa ʻAtelī, ʻa ia naʻá ne fai e fehuʻi “Kapau ʻoku ʻi ai moʻoni ha ʻOtua ʻofa, ko e hā te Ne tuku ai ke faingataʻaʻia e kakaí?” Ke akoako fekumi ki he moʻoní mei he ngaahi maʻuʻanga tokoni kuo fokotuʻu fakalangí, fakaʻaongaʻi ha ngaahi miniti siʻi ke fakakakato ai ha ʻekitivitī ʻe ua pe lahi ange mei heni. Lekooti ʻa e meʻa ʻokú ke akó ʻi hoʻo tohinoa akó.

1. Ngaahi mātuʻá mo e kau taki ʻo e Siasí: ʻAve e fehuʻi ʻa ʻAtelií ko ha pōpoaki telefoni ki ha mātuʻa pe taki ʻo e Siasí pea fakamatalaʻi ange ʻokú ke aleaʻi e fehuʻi ʻi he seminelí mo fie ʻilo pe ko e hā ʻenau fakakaukau ki aí.

2. Lotú: ʻI ha lotu fakalongolongo fakataautaha, kole ki he ʻEikí ha fakahinohino mo ha ueʻi fakalaumālie mei he Laumālie Māʻoniʻoní ki he fehuʻi ko ʻení. Hiki e ngaahi fakakaukau mo e ngaahi ongo ʻokú ke maʻú.

3. Ngaahi Folofolá: Kumi e ngaahi potufolofola ʻe ala tokoni kia ʻAtelií Hangē ko ʻení, ʻe lava ke ke lau fekauʻaki mo e kakai ʻo ʻAlamaá ʻi he Tohi ʻa Molomoná ʻa ia ne nau aʻusia ʻa e faingataʻaʻia ʻi he nofo pōpula fakatuʻasinó (vakai, Mōsaia 23:21–23; 24:8–15).

4. Ko e kau palōfita ʻa e ʻEikí: Kumi ha fakamatala fakaepalōfita ʻe ala tokoni kia ʻAtelī. Hangē ko ʻení, lau e fakamatala ko ʻeni naʻe fai ʻe ʻEletā Siosefa B. Uefilini (1917–2008) ʻo e Kōlomu ʻo e Kau ʻAposetolo ʻe Toko Hongofulu Mā Uá:

   

   Ko e konga ia hono akoʻi kitautolu he ngāué, ʻa ʻetau ako ko ia ke kātaki lolotonga e ngaahi taimi ʻo e lotofoʻí, faingataʻá mo e mamahí. ʻOku hoko ʻa e ngaahi meʻa ko ʻeni ʻoku tau ʻausiá, neongo ʻene faʻa faingataʻa ke kātekiná, ko e ngaahi meʻa ia ʻokú ne fakatupulaki ʻetau mahinó, langaki hotau ʻulungāngá pea mo fakalahi ʻetau ongoʻi manavaʻofa ki he niʻihi kehé.

   Koeʻuhí ne foua ʻe Sīsū Kalaisi ha mamahi lahi, ʻoku mahino ai kiate Ia hotau faingataʻaʻiá. ʻOku mahino kiate Ia hotau mamahí. ʻOku tau aʻusia ai e ngaahi faingataʻá, kae lava ʻo fakatupulaki ʻetau ongoʻi manavaʻofa mo loto mahino ki he niʻihi kehé. (Joseph B. Wirthlin, “Tali Lelei ʻA ia ʻOku Hoko Maí,” Liahona, Nōvema. 2008, 27)

2. Tali e ngaahi fehuʻi ko ‘ení:

• Ko e hā naʻe akoʻi ʻe he ngaahi maʻuʻanga tokoni ko ʻení te ke fie vahevahe mo ʻAtelií?

• Ko e hā kuó ke ako te ne fai ha liliu ʻi he founga ʻokú ke fekumi ai ki he tali ki he ngaahi fehuʻi faingataʻá?

© 2023 ʻe he Intellectual Reserve, Inc. All rights reserved.

Ngaahi fehuʻi ʻo e lotó

Kuo ui ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ngaahi fehuʻi faingataʻa mo e ngaahi hohaʻa ʻo e moʻuí ko ha “ngaahi fehuʻi ʻo e lotó” (vakai, “Ka Ne Mou ʻIlo Au,” Liahona, Nōvema 2016, 103). Hiki ʻi hoʻo tohinoa akó ha niʻihi ʻo e “ngaahi fehuʻi ʻo e lotó.” ʻE lava ke hoko ʻeni ko ha ngaahi fehuʻi ʻokú ke maʻu pe ko ha ngaahi fehuʻi ʻe ala maʻu ʻe hoʻo ngaahi kaungāmeʻá pe kau mēmipa ho fāmilí.

Fili ha fehuʻi ʻokú ke fiemaʻu ai e tokoni ʻa e Tamai Hēvaní ke mahino kiate koe. Fakaʻaongaʻi ha taimi ke ke fekumi ai ki ha mahino lahi ange mei he ngaahi maʻuʻanga tokoni kuo fokotuʻu fakalangí. Fakaafeʻi ʻa e Laumālie Māʻoniʻoní ke ne tataki koe, pea hiki ʻi hoʻo tohinoa akó ʻa e mahino ʻokú ke maʻú.

Ke kamatá, te ke lava ʻo fekumi ʻi he ChurchofJesusChrist.org, Gospel Library app, pe ngaahi makasini konifelenisi ʻa e Siasí ke maʻu ha ngaahi fakamatala mei he kau taki ʻo e Siasí ʻoku nau tali hoʻo fehuʻí. ʻE lava foki ke maʻu ʻi he Fakahinohino ki he Ngaahi Folofolá ha ngaahi potufolofola ʻaonga.

Manatuʻi, ʻoku fiemaʻu ha taimi lahi ki he fekumi ki ha tali ki he ngaahi fehuʻi fakalaumālié. ʻI hoʻo muimui ki he sīpinga ʻa e ʻEikí ki hono maʻu ʻo e ʻilo fakalaumālié, ʻe lava ke akoʻi koe ʻe he Laumālie Māʻoniʻoní ʻi he “ʻotu lea ki he ʻotu lea, … ko e siʻi ʻi heni pea siʻi ʻi hena” (2 Nīfai 28:30). Kumi ha ngaahi faingamālie ke vahevahe ai e meʻa ʻokú ke akó mo e kau mēmipa ho fāmilí pe kau taki ʻo e Siasí.

Fili Pē: Fie Ako Lahi Ange?

ʻE tataki fēfē nai au ʻi heʻeku fekumi ki he moʻoní?

Naʻe akoʻi ʻe Palesiteni Henelī B. ʻAealingi ʻo e Kau Palesitenisī ʻUluakí ʻo pehē:

Hangē pē ko hono fakamālohia kitautolu ʻe he Laumālie Māʻoniʻoní ʻi heʻetau fefaʻuhi mo e filí, ʻokú Ne ʻomi foki ha mālohi ke tau ʻilo ʻaki e moʻoní mei he loí. Ko e moʻoni ko ia ʻoku mahuʻinga tahá ʻoku fakapapauʻi pē ia ʻe he fakahā mei he ʻOtuá. ʻE ʻikai feʻunga ʻa ʻetau ʻuhinga fakaetangatá mo hono ngāue ʻaki ko ia ʻetau ngaahi ongo fakatuʻasinó. ʻOku tau moʻui ʻi ha taimi ʻoku aʻu ki he poto tahá ʻe faingataʻa fau ke ne fakafaikehekeheʻi ʻa e moʻoní mei he olopoto kākaá. …

Ko e ngaahi moʻoni ko ia ʻokú ne fakaʻilongaʻi ʻa e hala ki ʻapi ki he ʻOtuá, ʻoku fakapapauʻi mai ia ʻe he Laumālie Māʻoniʻoní. (Henry B. Eyring, “Hoko ʻa e Laumālie Māʻoniʻoní ko Ho Takaua,” Liahona, Nōvema. 2015, 104–5)

 

In Search of Truth

President Dallin H. Oaks of the First Presidency taught that we should be cautious and choose correct sources in our search for truth. When we seek the truth about religion, we should use spiritual methods appropriate for that search.

Naʻe akoʻi ʻe Palesiteni Tāleni H. ʻOakesi ʻo e Kau Palesitenisī ʻUluakí ʻoku totonu ke tau tokanga mo fili e ngaahi maʻuʻanga tokoni totonú ʻi heʻetau fekumi ki he moʻoní. ʻI heʻetau fekumi ki he moʻoni fakalotú, ʻoku totonu ke tau fakaʻaongaʻi e ngaahi founga fakalaumālie totonú ki he fekumi ko iá.

ʻE tāpuekina fēfē ʻe hono fakaʻaongaʻi e ngaahi maʻuʻanga tokoni kuo fokotuʻu fakalangí ʻa e ngaahi tafaʻaki kehe ʻo ʻeku moʻuí?

Kuo akonaki ʻa Palesiteni Lāsolo M. Nalesoni ʻo pehē:

Makehe mei he veiveiua ʻa ha faʻahinga, ʻoku moʻoni ʻa e ʻi ai ʻa e meʻa ʻoku moʻoni mo e meʻa ʻoku halá. ʻOku ʻi ai moʻoni ha moʻoni ʻaupito—ko ha moʻoni taʻengata. Ko e taha e ngaahi fokoutua ʻo hotau kuongá ko e tokosiʻi fau e kakai ʻoku nau ʻilo ʻa e feituʻu ke maʻu ai ʻa e moʻoní. [vakai ki he Tokāteline mo e Ngaahi Fuakava 123:12]. …

ʻOku mālohi fau e tokāteline haohaoa ʻa Kalaisí. ʻOkú ne liliu e moʻui ʻa e taha kotoa ʻoku mahino ki aí mo feinga ke fakahoko ia ʻi heʻene moʻuí. ʻOku tokoni mai e tokāteline ʻa Kalaisí ke tau ʻilo mo nofo ʻi he hala ʻo e fuakavá. Ko e nofo ʻi he hala fāsiʻi ko ia kuo fakamahinoʻi lelei maí, ʻe iku ʻo fakafeʻungaʻi ai kitautolu ke maʻu e meʻa kotoa ʻoku maʻu ʻe he ʻOtuá [vakai, ʻEta 4:14; Tokāteline mo e Ngaahi Fuakava 78:17–18; 84:38]. ʻOku hala ha meʻa ʻe toe mahuʻinga ange ʻi he meʻa kotoa ʻoku maʻu ʻe heʻetau Tamaí! (Russell M. Nelson, “Moʻoni Haohaoa, Tokāteline Haohaoa, mo e Fakahā Haohaoa,” Liahona Nōvema 2021.)