“1 Nīfai 8:1–18: ʻOku Lelei Taha ʻa e ʻOfa ʻa e ʻOtuá ʻi he Meʻa Kotoa Pē Tohi ʻa Molomoná - Tohi Lēsoni ʻa e Tokotaha Akó (2024)
“1 Nīfai 8:1–18: ʻOku Lelei Taha ʻa e ʻOfa ʻa e ʻOtuá ʻi he Meʻa Kotoa Pē” Tohi ʻa Molomoná - Tohi Lēsoni ʻa e Tokotaha Akó
1 Nīfai 8:1–18
ʻOku Lelei Taha ʻa e ʻOfa ʻa e ʻOtuá ʻi he Meʻa Kotoa Pē
Te ke fakamatalaʻi fēfē ʻa e ʻofa ʻa e ʻOtuá? Naʻe mata meʻa-hā-mai ʻa Līhai ʻa ia naʻá ne mamata ai ki ha fuʻu ʻakau fakaʻofoʻofa. Naʻá ne kai ʻa e fua ʻo e ʻakau ko iá, pea naʻe “melie ʻaupito ia, ʻo laka hake ʻi he ngaahi meʻa kotoa pē” kuó ne kai aí (1 Nīfai 8:11). ʻOku fakafofongaʻi ʻe he fuʻu ʻakaú ni mo hono fuá ʻa e ʻofa ʻa e ʻOtuá, ʻa ia ʻoku hā ʻi he ʻaloʻi, moʻui, ngāue fakafaifekau, mo e feilaulau fakalelei ʻa Sīsū Kalaisí. Naʻe “fakafonu [ʻe he ʻofa ko ʻení] ʻa [e] laumālie [ʻo Līhaí] ʻaki ha fuʻu fiefia lahi” (1 Nīfai 8:12). ʻOku fakataumuʻa e lēsoni ko ʻení ke tokoni atu ke ke fakatupulaki hoʻo holi ke ongoʻi e ʻofa ʻa e ʻOtuá mo e Fakalelei ʻa Sīsū Kalaisí.
Poʻulí mo e māmá
Kuo vahevahe ʻe ha kau lea tokolahi ʻi he konifelenisi lahí ha ngaahi talanoa ʻo haʻanau aʻusia ʻa e fakapoʻuli fakatuʻasinó pea hoko mai ai ha mahino lahi ange mo ha houngaʻia ʻi he māmá. Feinga ke ke fakakaukauloto ki he ngaahi tūkunga ko ʻení. Lau pe mamata ʻi ha taha ʻo e ngaahi talanoa ko ʻení.
Ko e heka pasikala ʻi ha tānolo maile ʻe 15 (vakai, Vern P. Stanfill, “Fili ʻa e Māmá,” Liahona, Nōvema 2015, 55–57).
Choose the Light
A reckless biker finds himself in a battle against time and the elements when he enters a situation he can’t get out of. He discovers his only option is to choose the light.
Ko e ʻikai ulo e ngaahi maama ʻi he Temipale Sōlekí ʻi he poʻulí (vakai, Sharon Eubank, “Ko Kalaisi ʻa e Maama ʻOku Ulo ʻi he Fakapoʻulí,” Liahona, Mē 2019, 73–76).
Ko Kalaisi ʻa e Maama ʻoku Ulo ʻi he Fakapoʻulí
ʻOku akoʻi ʻe Sisitā ʻIupengi kapau te tau ʻai ke hoko ʻa Kalaisi ko e uho ʻo ʻetau moʻuí te ne poupouʻi kitautolu ʻi hotau ngaahi ʻahiʻahí pea hoko ko ʻetau maama ʻi he fakapoʻulí.
Ko Kalaisi ʻa e Maama ʻoku Ulo ʻi he Fakapoʻulí
ʻOku akoʻi ʻe Sisitā ʻIupengi kapau te tau ʻai ke hoko ʻa Kalaisi ko e uho ʻo ʻetau moʻuí te ne poupouʻi kitautolu ʻi hotau ngaahi ʻahiʻahí pea hoko ko ʻetau maama ʻi he fakapoʻulí.
Ko e hifo maea ki ha ʻana loloto (vakai, Timothy J. Dyches, “ʻOku Pikitai ʻa e Māmá ki he Māmá,” Liahona, Mē 2021, 112–15).
ʻOku Pīkitai ʻa e Māmá ki he Māmá
ʻOku akoʻi ʻe ʻEletā Dyches ko Sīsū Kalaisi ʻa e Maama ʻo e Māmaní pea ko e tupuʻanga ʻo e moʻoní, fiefiá mo e melinó.
Ko e lotua ʻe Līhai e ʻaloʻofa ʻa e ʻEikí
Lolotonga e nofo ʻa Līhai ʻi he feituʻu maomaonganoá, naʻá ne vahevahe e fakaikiiki ʻo ha meʻa-hā-mai naʻá ne maʻu mo hono fāmilí. ʻI he meʻa-hā-mai ko ʻení, naʻá ne ʻi ha “feituʻu maomaonganoa fakapoʻuli mo fakataʻelata” (1 Nīfai 8:4).
Lau ʻa e 1 Nīfai 8:5–8, ʻo kumi e meʻa naʻe hoko kia Līhaí pea mo e ongo naʻá ne maʻú. ʻE ala tokoni ke ke fakakaukauloto ki he meʻa ʻokú ke laú. Fekumi ki ha ngaahi fakamatala fakaikiiki ʻe lava ʻo tokoni atu ke ke faʻu ha fakatātā fakaʻatamai pe fakakaukauloto ki he ngaahi meʻa naʻe hokó ʻo hangē ha foʻi faivá.
-
ʻOkú ke pehē ko e hā e faʻahinga fakakaukau pe ongo naʻá ne fakatupu ʻa Līhai ke ne lotua ha ʻaloʻofa?
Fakaʻaongaʻi ha kiʻi taimi ke fakalaulauloto ai ki he ngaahi founga kehekehe te tau ala ongoʻi ai ʻa e fakapoʻulí ʻi heʻetau moʻuí mo e ngaahi ʻuhinga ʻe lava ke tau tangi ai ki he ʻEikí ke maʻu ha ʻaloʻofá.
Lau ʻa e 1 Nīfai 8:9–12ʻo kumi e founga naʻe tokoniʻi ai ʻe he ʻEikí ʻa Līhaí.
Tā ha fakatātā faingofua ʻi hoʻo tohinoa akó ke ne fakafofongaʻi ʻa e fuʻu ʻakau naʻe mamata ki ai ʻa Līhaí. Tā ʻa e fuá ki he fuʻu ʻakaú, pea fakahingoa ʻa e fuá ʻo fakatefito ki he ngaahi fakamatala ʻa Līhai ʻi he 1 Nīfai 8:10–12. (Ki ha ngaahi fakamatala lahi ange ke fakahingoa ʻaki e fuaʻiʻakau ʻo e fuʻu ʻakaú, lau ʻa e 1 Nīfai 15:36 mo e ʻAlamā 32:42.) ʻI hoʻo tā fakatātaá, fakakaukau pe ko e hā ʻoku fakafofongaʻi ʻe he fuʻu ʻakau ko ʻení mo hono fuá.
Naʻe fiemaʻu ʻe Nīfai kimui ange ke ne ʻiloʻi mo mahino fakatāutaha kiate ia ʻa e meʻa-hā-maí, kau ai mo e ʻuhinga ʻo e fuʻu ʻakau ne mamata ki ai ʻa Līhaí. Lolotonga e fakalaulauloto ʻa Nīfai ki he meʻa ne akoʻi kiate iá, naʻe fakahā kiate ia ʻe he Laumālié, ʻi ha meʻa-hā-mai ʻo hono fua ʻe he Taupoʻou ko Melé ʻa e pēpē ko Sīsuú (vakai, 1 Nīfai 11:13, 20).
Sio ki he fakatātā ko ʻení pea fakakaukau ki he ʻuhinga naʻe fakahā ai ʻeni kia Nīfaí ʻi Heʻene fiemaʻu ke ʻilo ʻa e ʻuhinga ʻo e fuʻu ʻakaú.
Lau ʻa e 1 Nīfai 11:21–23, ʻo kumi pe ko e toe hā mo ha meʻa naʻe fakahā kia Nīfai pea mo e founga naʻe tokoni ai kiate ia ke ne ʻilo ʻa e ʻuhinga ʻo e fuʻu ʻakaú. Te ke lava ʻo fakahingoa ʻa e fuʻu ʻakaú ʻo makatuʻunga ʻi he meʻa ʻokú ke akó.
-
ʻOkú ke pehē ʻoku tokoniʻi fēfē kitautolu ʻe he Fakamoʻuí ke tau ongoʻi e ʻofa ʻa e ʻOtuá?
Naʻe akoʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
Ko hono fakahaaʻi maʻongoʻonga ʻo e ʻofa ʻa e ʻOtuá ki Heʻene fānaú, ʻa e ngāue feilaulau huhuʻi mo e Toetuʻu ʻa e ʻEiki ko Sīsū Kalaisí. ʻE lava ke pehē ko e fua ʻo e ʻakaú ko e fakaʻilonga ia ʻo e ngaahi tāpuaki ʻo e Fakalelei ʻa e Fakamoʻuí. (David A. Bednar, “Hau ʻo Mamata,” Liahona, Nōvema. 2014, 109)
-
Ko e hā ha ngaahi moʻoni te ke lava ʻo ʻilo fekauʻaki mo e ʻofa ʻa e ʻOtuá mei he mata meʻa-hā-mai ʻa Līhaí mo e fakamatala ʻa ʻEletā Petinaá?
Ko hono ongoʻi e ʻofa mo e fiefia lahi ʻa e ʻOtuá ʻo fakafou ʻia Sīsū Kalaisí
Ko e moʻoni ʻe taha te tau lava ʻo ako ko e lelei ange ʻa e ʻofa ʻa e ʻOtuá, ʻa ia ʻoku fakafou mai ʻia Sīsū Kalaisí, ʻi ha toe meʻa pea ʻokú ne ʻomi ʻa e fiefia lahi tahá.
ʻE lava ke tokoni atu e ngaahi ʻekitivitī ko ʻení ke ke fakatokangaʻi ʻa e founga te ke ala ongoʻi ai e ʻofa ʻa e ʻOtuá kiate koé koeʻuhí ko Sīsū Kalaisi. ʻI hoʻo fai e ngaahi ʻekitivitī ko ʻení, feinga ke ʻiloʻi e ngaahi tāpuaki lahi ʻoku maʻu ʻo fakafou ʻia Sīsū Kalaisi mo ʻEne Fakaleleí pea hiki kinautolu ʻi he fua naʻá ke taá.
ʻEkitivitī 1
Lau ʻa e meʻa naʻe fakamoʻoniʻi ʻe Līhai hili ʻene mamata ki he mata meʻa-hā-mai ko ʻení ʻi he 1 Nīfai 10:5–6. Lau foki ha niʻihi ʻo e ngaahi potufolofola ko ʻení pe kumi ha ngaahi potufolofola kehe ʻoku nau fakahaaʻi e ngaahi tāpuaki te tau lava ʻo maʻu ʻo fakafou ʻi he Fakalelei ʻa Sīsū Kalaisí: ʻĪsaia 53:4–5; Sione 1:17; Mōsaia 4:2–3; ʻAlamā 7:11–12; Hilamani 5:12.
ʻEkitivitī 2
Mamata ʻi he vitiō ko ʻení, ʻoku maʻu ʻi he ChurchofJesusChrist.org, ʻo kumi e ngaahi tāpuaki ʻoku maʻu ʻo fakafou ʻia Sīsū Kalaisí:
“Fakalelei—ʻOku ʻIkai Hoko Tuʻo Taha Pē” (3:00)
Fakalelei - ʻOku ʻIkai Hoko Tuʻo Taha Pē
Ko e vahevahe ʻe ha talavou e founga naʻá ne aʻusia ai e tāpuaki ʻo e Fakalelei ʻa Sīsū Kalaisí ʻi he tokoni ʻa e pīsopé.
Because of Him—Easter Video
Jesus Christ is our Savior. Because of Him, we can change for the better and live again with God. This Easter season we celebrate His life and Resurrection and invite all to share His miraculous story.
Melino ʻia Kalaisí
ʻOku maʻu e melinó ʻia Kalaisi he taimi ʻoku ʻikai maʻu ai ha melino he māmaní.
ʻEkitivitī 3
Fakalaulauloto ki he ngaahi founga kuó ke aʻusia ai e ngaahi tāpuaki ʻoku foaki ʻe Sīsū Kalaisí pe ko e founga kuó ke mamata ai ki he ngaahi tāpuaki ko ʻení ʻi he moʻui ʻa e kakai kehé. ʻE lava ke kau heni ʻa e ngaahi founga naʻe tāpuekina ai koe ʻe he ʻEikí ʻi he ngaahi taimi ʻo e fakapoʻulí.
Ko e hā naʻá ke akó?
Fakaʻaongaʻi ha kiʻi taimi ke toe vakaiʻi ai e ngaahi tāpuaki te tau lava ʻo maʻu ʻo fakafou ʻi he Fakalelei ʻa Sīsū Kalaisí, ʻa ia naʻá ke hiki ʻi hoʻo fakatātā ʻo e fuaʻiʻakaú. Fakalaulauloto ki he ʻuhinga ʻe hanga ai ʻe he ngaahi tāpuaki ko ʻení ʻo “ngaohi ha taha ke fiefiá” (1 Nīfai 8:10), ke “melie ʻaupito ia, ʻo lahi hake ʻi he ngaahi meʻa kotoa peé” (1 Nīfai 8:11), pea fakafonu koe “ʻaki ha fuʻu fiefia lahi” (1 Nīfai 8:12).
-
Tali ha fehuʻi ʻe ua pe lahi ange mei he ngaahi fehuʻi ko ʻení:
-
Ko e hā naʻá ke ako fekauʻaki mo e ʻofa ʻa e ʻOtuá maʻaú?
-
Ko e ngaahi tāpuaki fē ʻoku lava ke maʻu ʻo fakafou ʻia Sīsū Kalaisi ʻokú ke fiemaʻu lahi taha ʻi hoʻo moʻuí? Ko e hā hono ʻuhingá?
-
Kuo tāpuekina fēfē koe koeʻuhí ko e ʻofa kuo fakahaaʻi ʻe he ʻOtuá ʻi hono fekauʻi mai Hono ʻAlo ko Sīsū Kalaisí ke fakalelei maʻaú?