Toe Vakaiʻi Hono 2 ʻo e Fakataukei Fakatokāteline ki he Tohi ʻa Molomoná

Ako Maʻuloto e Ngaahi Fakamoʻoni mo e Ngaahi Kupuʻi Lea Fakafolofola Mahuʻingá

ʻE lava ke tokoniʻi koe ʻi ha ngaahi founga lahi ʻi hono ako ma’uloto ʻo e ngaahi potufolofolá mo e meʻa ʻoku nau akoʻí. ʻOku fakataumuʻa ʻa e lēsoni ko ʻení ke tokoniʻi koe ke ke ako maʻuloto e ngaahi potufolofola mo e ngaahi kupuʻi lea fakafolofola mahuʻinga ki ha niʻihi ʻo e ngaahi potufolofola fakataukei fakatokāteline ʻo e Tohi ʻa Molomona.

Ko hono fakaʻaongaʻi ʻo e ngaahi folofolá ke vahevahe e ongoongoleleí

Fakakaukauloto ʻoku ʻi ai ha taha ʻo ho ngaahi kaungāmeʻá ʻoku ʻi ai haʻane ngaahi fehuʻi fekauʻaki mo ha niʻihi ʻo e ngaahi meʻa ʻokú ke tui ki ai ʻi hoʻo hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, kau ai hoʻo ngaahi tui fekauʻaki mo Sīsū Kalaisí, ko ʻetau taumuʻa ʻi he māmaní, mo e ngaahi fekau ʻa e ʻOtuá. ʻI hoʻo fakakaukau ki he founga te ke ala tali ʻakí, ʻokú ke fakakaukau ai te ke fie fakaʻaliʻali ange ha ngaahi potufolofola mei he Tohi ʻa Molomoná ke tokoni ki hono tali ʻene ngaahi fehuʻí.

• Te ke lava nai ʻo fakakaukau ki ha ngaahi potufolofola tokoni mei he Tohi ʻa Molomoná te ke lava ʻo fakaʻaliʻali ki ho kaungāmeʻá?

• ʻE tokoni fēfē nai kiate koe hono ʻiloʻi e ngaahi potufolofola fakataukei fakatokāteliné mo honau ngaahi kupuʻi lea fakafolofola mahuʻingá ʻi he ngaahi tūkunga ko ʻení?

ʻE lava ke tokoni e lēsoni ko ʻení ke ke ako maʻuloto e ngaahi potufolofolá mo e ngaahi kupuʻi lea fakafolofola mahuʻinga ki he ngaahi potufolofola fakataukei fakatokāteline te ke ako he taʻu ní. ʻE lava ke tokoni kiate koe ʻa hono ako maʻuloto e ngaahi veesi folofolá mo e ngaahi kupuʻi lea ko ʻení ʻi hoʻo moʻuí pea ʻi hoʻo feinga ke vahevahe hoʻo tuí mo e niʻihi kehé. ʻOku ʻoatu ʻi lalo ha lisi ʻo e ngaahi fuofua potufolofola fakataukei fakatokāteline ʻe 12 ʻo e Tohi ʻa Molomoná mo honau ngaahi kupuʻi lea fakafolofola mahuʻingá.

Ko e ʻUluaki Potufolofola Fakataukei Fakatokāteliné ʻe 12 mo e Ngaahi Kupuʻi Lea Mahuʻingá

Potufolofolá	Kupuʻi Lea Fakafolofola Mahuʻingá
Potufolofolá 1 Nīfai 3:7	Kupuʻi Lea Fakafolofola Mahuʻingá “Te u ʻalu ʻo fai ʻa e ngaahi meʻa kuo fekau ʻe he ʻEikí.”
Potufolofolá 2 Nīfai 2:25	Kupuʻi Lea Fakafolofola Mahuʻingá “Naʻe hinga ʻa ʻĀtamá koeʻuhi ke ʻi ai ʻa e faʻahinga ʻo e tangatá; pea ʻoku ʻi ai ʻa e faʻahinga ʻo e tangatá, koeʻuhi ke nau maʻu ʻa e fiefiá.”
Potufolofolá 2 Nīfai 2:27	Kupuʻi Lea Fakafolofola Mahuʻingá “ʻOku nau tauʻatāina ke fili ʻa e tauʻatāiná mo e moʻui taʻengatá … pe … pōpulá mo e maté.”
Potufolofolá 2 Nīfai 26:33	Kupuʻi Lea Fakafolofola Mahuʻingá “ʻOku tatau ʻa e kakai fulipē ʻi he ʻao ʻo e ʻOtuá.”
Potufolofolá 2 Nīfai 28:30	Kupuʻi Lea Fakafolofola Mahuʻingá ʻE foaki ʻe he ʻOtuá “ki he fānau ʻa e tangatá ʻa e ʻotu lea ki he ʻotu lea, ʻa e akonaki ki he akonaki.”
Potufolofolá 2 Nīfai 32:3	Kupuʻi Lea Fakafolofola Mahuʻingá “Keinanga ʻi he ngaahi folofola ʻa Kalaisí; he vakai, ʻe fakahā kiate kimoutolu ʻe he ngaahi folofola ʻa Kalaisí ʻa e ngaahi meʻa kotoa pē ʻoku totonu ke mou faí.”
Potufolofolá 2 Nīfai 32:8–9	Kupuʻi Lea Fakafolofola Mahuʻingá “Kuo pau ke mou lotu maʻu ai pē.”
Potufolofolá Mōsaia 2:17	Kupuʻi Lea Fakafolofola Mahuʻingá “ʻO ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá.”
Potufolofolá Mōsaia 2:41	Kupuʻi Lea Fakafolofola Mahuʻingá “[Ko] kinautolu ʻoku tauhi ʻa e ngaahi fekau ʻa e ʻOtuá … ʻoku nau monūʻia ʻi he meʻa kotoa pē.”
Potufolofolá Mōsaia 3:19	Kupuʻi Lea Fakafolofola Mahuʻingá “[Liʻaki] ʻa e tangata fakakakanó kae [hoko] ko ha tangata māʻoniʻoni ʻi he fakalelei ʻa Kalaisi ko e ʻEikí.”
Potufolofolá Mōsaia 4:9	Kupuʻi Lea Fakafolofola Mahuʻingá Tui pē ki he ʻOtuá; … tui ʻokú ne maʻu ʻa e poto kotoa.”
Potufolofolá Mōsaia 18:8–10	Kupuʻi Lea Fakafolofola Mahuʻingá Ke “papitaiso ʻa kimoutolu ʻi he huafa ʻo e ʻEikí, ko e fakamoʻoni … kuo mou fai ha fuakava mo ia.”

ʻŪ kaati fakamanatú

Tuku ha taimi ke faʻu ai ha ngaahi kaati fakamanatu te ke lava ʻo fakaʻaongaʻi ʻi he lolotonga ʻo e taʻú. Tuku ʻa e fakamoʻoni fakafolofola ʻo e fakataukei fakatokāteliné ʻi he tafaʻaki ʻe taha ʻo e kaati takitaha pea mo e kupuʻi lea fakafolofola mahuʻingá ʻi he tafaʻaki ʻe tahá. Faʻu ha ngaahi kaati fakamanatu ki he kotoa ʻo e ngaahi potufolofola fakataukei fakatokāteline ʻe 12 ʻoku hiki atu ʻi he sātí.

ʻO ka fiemaʻu, fakaʻaongaʻi e ngaahi fakahinohino ko ʻení ke tokoni atu kiate koe ʻi hono faʻu hoʻo ngaahi kaati fakamanatú:

Sitepu 1: Faʻu ha kaati ʻe 12

Fakaʻaongaʻi ha tafaʻaki kakato ʻo ha laʻipepa, tā ha laine ʻi lotomālie he laʻipepá mei ʻolunga ki lalo ke faʻu ha kōlomu ʻe ua. Tā leva ha laine fakatafaʻaki ʻe ua ʻi he laʻipepá ke faʻu ha puha ʻe tolu ʻoku lahi tatau ʻi he kōlomu takitaha, ʻo ke maʻu ai ha puha fakakātoa ʻe ono. Vakai ki he fakatātā ko ʻení ki ha sīpinga ʻo e fōtunga ʻoku totonu ke ʻi ai hoʻo pēsí:

Fulihi hake ʻa e laʻipepá pea fai ʻa e meʻa tatau ʻi he tafaʻaki ko iá. Toe fai ʻeni ʻi ha laʻipepa makehe ke faʻu ʻaki e puha ʻe 12 ʻokú ke fiemaʻú.

Sitepu 2: Hiki e ngaahi fakamoʻoni fakafolofola ʻo e fakataukei fakatokāteliné ʻi he tafaʻaki ʻe tahá

ʻI he tafaʻaki ʻe taha ʻo e ongo laʻipepá, hiki ai ha fakamoʻoni fakafolofola mei he sātí ʻi he puha takitaha. Tanaki atu ki he fakamoʻoni fakafolofolá, te ke lava foki ʻo tā ha fakatātā faingofua te ne tokoniʻi koe ke ke manatuʻi ʻa e kupuʻi lea fakafolofola mahuʻingá.

Sitepu 3: Hiki e ngaahi kupuʻi lea fakafolofola mahuʻingá ʻi he tafaʻaki ʻe tahá

Fulihi hake hoʻo laʻipepá pea hiki ʻi he puha takitaha ʻa e kupuʻi lea fakafolofola mahuʻinga ʻoku hoa mo e fakamoʻoni fakafolofola ʻi he tafaʻaki ʻe tahá.

Sitepu 4: Kosi hoʻo ngaahi kātí

Kosikosi e puha takitaha naʻá ke faʻú ki ha ngaahi kaati.

ʻI he ʻosi hono faʻu hoʻo ʻū kātí, fakaʻaongaʻi ha ngaahi miniti siʻi ke ako maʻuloto ha niʻihi pe kotoa ʻo e ngaahi fakamoʻoni fakafolofola ko ʻení mo e ngaahi kupuʻi lea folofola mahuʻingá. Fakakaukau ke kumi tokoni mei he kau mēmipa ho fāmilí mo e ngaahi kaungāmeʻá. Te ke lava foki ʻo fakakaukau ke ako maʻuloto kakato ha niʻihi ʻo e ngaahi potufolofola ko ʻení kae ʻikai ko e ngaahi kupuʻi lea folofola mahuʻingá pē.

• Ko e ngaahi potufolofola mo e ngaahi kupuʻi lea fakafolofola mahuʻinga fē ʻokú ke ongoʻi ʻe ʻaonga taha kiate koe ke ke ako maulotó? Ko e hā hono ʻuhingá?

• Ko e hā ha ngaahi moʻoni ʻoku akoʻi mai ʻe he ngaahi potufolofola ko ʻení fekauʻaki mo e Fakamoʻuí mo ʻEne ongoongoleleí?

• Ko e hā ha niʻihi ʻo e ngaahi founga ʻe lava ke tokoniʻi ai koe ʻi hono ako maʻuloto e ngaahi veesi folofolá mo e ngaahi moʻoni meí he folofolá?