“1 Nīfai 17–18: ʻNaʻá ku Sio Pē ki Hoku ʻOtuá,’” Tohi ʻa Molomoná - Tohi Lēsoni ʻa e Tokotaha Akó (2024)
“1 Nīfai 17–18: ʻNaʻá ku Sio Pē ki Hoku ʻOtuá,’” Tohi ʻa Molomoná - Tohi Lēsoni ʻa e Tokotaha Akó
1 Nīfai 17–18
“Naʻá ku Sio Pē ki Hoku ʻOtuá”
Te tau maʻu kotoa ha ngaahi ʻahiʻahi mo ha ngaahi faingataʻa ʻi heʻetau moʻuí. ʻE hoko mai ha niʻihi ko ha nunuʻa ʻo ʻetau ngaahi faihalá pe ʻi heʻetau moʻui pē ʻi ha māmani hinga mo ʻikai haohaoá. Hangē ko e aʻusia ʻa Nīfai ʻi he kotoa ʻo ʻene fononga ki he fonua ʻo e talaʻofá, ʻoku hoko ha ngaahi ʻahiʻahi mo ha ngaahi faingataʻa ʻe niʻihi ʻi he taimi ʻoku ngāue hala ʻaki ai ʻe kinautolu ʻoku tau feohí ʻa ʻenau tauʻatāina ke filí. Neongo pe ko e hā e tupuʻanga ʻo ʻetau mamahí, ka ʻoku ʻomi ʻe Sīsū Kalaisi ha mālohi mo ha fakamoʻui kiate kinautolu ʻoku fekumi kiate Iá. ʻE lava ke tokoniʻi koe ʻe he lēsoni ko ʻení ke ke ongoʻi ʻa e ʻofa mo e houngaʻia ʻi he ʻEikí, neongo pe ko e hā e ngaahi tūkunga ʻokú ke fehangahangai mo iá.
ʻE fēfē nai hoʻo talí?
Kuó ke fakatokangaʻi nai ha ngaahi founga kehekehe ʻoku tali ʻaki ʻe he kakaí ha ngaahi tūkunga tatau? Lau e ngaahi tūkunga ko ʻení pea fakakaukau ki ha niʻihi ʻo e ngaahi founga kehekehe ʻe lava ke tali ʻaki ʻe he kakai ʻi he ngaahi tūkungá.
Naʻe ʻalu ʻa Kuilamo ki he toketā matá koeʻuhí he naʻe nenefu ʻene sió. Naʻe talaange ʻe he toketaá ʻoku hāhāmolofia ʻene faingataʻaʻiá ʻa ia te ne kui kakato ai ʻi loto ʻi ha taʻu ʻe taha.
Naʻe ʻita e tuongaʻane ʻo Leilá ʻo tekeʻi ia, ʻo tupu ai ha lavea hono tungaʻi vaʻé. Naʻe totonu ke ne vaʻinga ʻi he tau hau ʻa ʻene timí, ka ko ʻeni kuo ʻikai ke ne lava ʻo lele.
-
Ko e hā ha niʻihi ʻo e ngaahi founga kehekehe ʻe ala tali ʻaki ʻe he kakai ʻi he ngaahi tūkunga ko ʻení honau tūkunga faingataʻá?
-
ʻOkú ke pehē ko e hā ha niʻihi ʻo e ngaahi ʻuhinga ʻoku tali ai ʻe he kakaí ʻi ha founga lelei pe kovi e ngaahi faingataʻa ʻoku nau aʻusiá?
Fakakaukau ʻa Nīfaí
ʻI hoʻo ako e Tohi ʻa Molomoná, mahalo kuó ke fakatokangaʻi ha faikehekehe ʻi he ngaahi tōʻonga mo e ʻulungaanga ʻo Nīfaí ʻi hono fakafehoanaki kia Leimana mo Lēmiuelá, neongo naʻa nau fepaki mo ha ngaahi faingataʻaʻia tatau. Tokanga ki he faikehekehe ko ʻení ʻi hoʻo ako e ngaahi veesi ko ʻení.
-
Ko e fononga ʻi he feituʻu maomaonganoá:Fakafehoanaki e fakamatala ʻa Nīfai ʻi he 1 Nīfai 17:1–3 mo e meʻa naʻe lea ʻaki ʻe Leimana mo Lēmiuela ʻi he 1 Nīfai 17:20–22.
-
Ko hono foʻu ʻo ha vaká:Fakafehoanaki e tali ʻa Nīfai ʻi he 1 Nīfai 17:8–9, 15 ki he fakafeangai ʻa Leimana mo Lēmiuela ʻi he 1 Nīfai 17:17–18.
-
Ko e hā ha ngaahi fakakaukau pe ongo naʻá ke maʻu ʻi hoʻo fakafehoanaki e ngaahi lea mo e ngaahi ngāue ʻa Nīfaí kia Leimana mo Lēmiuelá?
-
Ko e hā naʻá ke fakatokangaʻi fekauʻaki mo e vā fetuʻutaki ʻo e niʻihi fakafoʻituitui ko ʻení mo e ʻOtuá?
ʻOku tau maʻu kotoa ha ngaahi taimi ʻoku tau tali lelei ai e ngaahi tūkunga faingataʻá, pea ʻikai fuʻu lelei ʻi he taimi ʻe niʻihi. Fakakaukau pe ʻokú ke tatau nai mo Nīfai pe ko Leimana mo Lēmiuelá ʻi he taimi ʻokú ke fehangahangai ai mo e ngaahi tūkunga faingataʻá. ʻI he hokohoko atu hoʻo akó, kumi ki he ngaahi akonaki ʻe lava ʻo tokoni atu ke ke fakahoko ha tali ʻi ha ngaahi founga lelei ange ʻi he taimi ʻokú ke fehangahangai ai mo e ngaahi faingataʻá pe ʻahiʻahí.
Ko e folau ʻa Līhai mo hono fāmilí ki he fonua ʻo e talaʻofá
Hili hono fakakakato ʻe Nīfai mo hono ngaahi tokouá ʻa hono foʻu ʻo e vaká, naʻe fekau ʻe he ʻEikí ʻa Līhai mo hono fāmilí ke nau kamata folau ki he fonua ʻo e talaʻofá (vakai, 1 Nīfai 18:1–8).
Lau ʻa e 1 Nīfai 18:9–21, ʻo kumi ki he niʻihi ʻo e ngaahi faingataʻa ne nau aʻusia lolotonga e fononga ko ʻení. ʻI hoʻo akó, hokohoko atu hono fakafehoanaki e ngaahi angafai mo e ʻulungaanga ʻo Nīfaí kia Leimana mo Lēmiuelá. Mahalo te ke fie mamata foki he foʻi vitiō “Ko e Tukufolau ʻa e Fāmili ʻo Līhaí ki he Fonua ʻo e Talaʻofá” mei he taimi 3:13 ki he 11:31, ʻoku maʻu ʻi he ChurchofJesusChrist.org.
Ko e Tukufolau ’a e Fāmili ‘o Līhaí ki he Fonua ’o e Tala’ofá | 1 Nīfai 18
Ko e tukufolau atu ʻa e fāmili ʻo Līhai ki he fonua ʻo e talaʻofá ʻi he vaka ne foʻu ʻe Nīfai mo hono ngaahi tokouá.
-
Tali ha fehuʻi ʻe ua pe lahi ange mei he ngaahi fehuʻi ko ʻení ʻi hoʻo tohinoa akó:
-
Ko e hā naʻe makehe kiate koe mei he fakamatala ko ʻení?
-
Fakatokangaʻi e meʻa naʻe lekooti ʻe Nīfai ʻi he veesi 16. Kapau naʻá ke maʻu ha faingamālie ke fai ange ha ngaahi fehuʻi fekauʻaki mo ʻene ngaahi angafai ʻi he veesi ko ʻení, ko e hā te ke fehuʻi angé?
-
ʻOkú ke pehē te ne tali fēfē hoʻo ngaahi fehuʻí?
-
Naʻe vahevahe ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ha ʻuhinga ʻe taha naʻe lava ai ʻa Nīfai ʻo tali ʻi he founga naʻá ne fakahokó ʻi he kotoa hono ngaahi faingataʻaʻiá.
“Ke u Tohoakiʻi ʻa e Kakai Fulipē Kiate Au”
ʻOku fakahaaʻi ʻe ʻEletā Lenilani ʻa e founga ʻe lava ai ʻe he vā ofi ange mo e ʻOtuá, kae tautautefito ʻi hono maʻu e sākalamēnití ʻo fetongi e siokitá, ongoʻi ʻoku ʻi ai ʻetau totonu ki ha meʻá, mo e fakafehuʻiá ʻaki ʻa e ʻofá mo e loto houngaʻia.
Koeʻuhi ko e fakamamaʻo ʻa Leimana mo Lemiuela mei he Fakamoʻuí, naʻá na lāunga, fakafili, mo taʻe-tui ai. Naʻá na fakakaukau ʻoku ʻikai potupotu tatau ʻa e moʻuí pea ne ʻi ai ʻena totonu ki he ʻaloʻofa ʻa e ʻOtuá. ʻI he tafaʻaki ʻe tahá, ʻoku pau naʻe ʻiloʻi ʻe Nīfai ʻe ʻikai ʻaupito potupotu tatau ʻa e moʻuí kia Sīsū Kalaisi koeʻuhí ko ʻene ofi ange ki he ʻOtuá. Neongo naʻe tonuhia kakato e Fakamoʻuí, ka ko Ia ne lahi taha ʻEne mamahí.
Ko e lahi ange ʻetau ofi kia Sīsū Kalaisi ʻi he fakakaukaú mo e taumuʻa ʻo hotau lotó, ko e lahi ange ia ʻetau fakahoungaʻi ʻEne tonuhia ʻa faiekiná, ko e lahi ange ia ʻetau fakahoungaʻi e ʻaloʻofá mo e fakamolemolé, pea ko e lahi ange ia ʻetau fie maʻu ke fakatomala pea hoko ʻo tatau mo Iá. (Dale G. Renlund, “Ke u Tohoakiʻi ʻa e Kakai Fulipē Kiate Au,” Liahona, Mē 2016, 40)
-
Ko e hā ha foʻi moʻoni naʻá ke ako mei he fakamatala ʻa ʻEletā Lenilaní ʻe lava ʻo tokoni atu ʻi hoʻo ngaahi faingataʻaʻiá?
Ko e moʻoni ʻe taha mahalo kuó ke ʻiloʻí ʻi he taimi ʻoku tau ofi ai kia Sīsū Kalaisí, te tau lava ʻo ongoʻi ha ʻofa mo ha houngaʻia kiate Ia neongo e ngaahi taimi faingataʻá.
Tuku ha kiʻi taimi ke ke fakakaukau ai ki he meʻa kuó ke ako he ʻaho ní. Fakafuofuaʻi pe ʻokú ke ongoʻi ofi fēfē ki he Tamai Hēvaní mo Sīsū Kalaisí. Ko e hā te ke lava ʻo fai ke ke toe ofi ange ai kiate Kinauá? ʻOkú ke pehē ko e hā ha meʻa makehe ʻe lava ke hoko heni ʻi hoʻo moʻuí? Hiki hoʻo ngaahi fakakaukaú mo e ongo fakalaumālié ʻi hoʻo tohinoa akó.