2 Nīfai 2:1–16

“Naʻe Tuku ʻe he ʻOtuá ki he Tangatá ʻa e Tauʻatāina Ke Ne Fili Maʻana”

Fakakaukauloto ki hoʻo moʻuí kapau naʻe ʻikai ke ʻi ai haʻo fili. Ko e tauʻatāiná pe ko e malohi ke filí, ko e taha ia ʻo e ngaahi meaʻofa maongoʻonga taha ʻa e ʻOtuá kiate kitautolú. Naʻe ʻosi aʻusia ʻe Sēkope ko e foha ʻo Līhaí ha ngaahi faingataʻa lahi ʻi heʻene kei siʻí, ko ia naʻe akoʻi kiate ia ʻe Līhai ha ngaahi moʻoni mahuʻinga fekauʻaki mo e Fakamoʻuí pea mo e tauʻatāina ke filí. ʻE lava ke tokoni atu ʻa e lēsoni ko ʻení ke mahino lelei ange kiate koe ʻa e fatongia ʻo e tauʻatāina ke filí ʻi he palani ʻa e Tamai Hēvaní.

Ngaahi ʻEkitivitī Ako ʻOku Ala Fakahokó

Ngaahi fili mahuʻingá

ʻI he miniti ʻe ua ka hokó, hiki ha niʻihi ʻo e ngaahi fili mahuʻinga kuó ke fai ʻi he ngaahi ʻaho siʻi kuo hilí.

• ʻOkú ke pehē ko e hā ʻoku mahuʻinga ai ʻa e filí ki heʻetau moʻui fakamatelié pea ki he palani ʻo e fakamoʻui ʻa e Tamai Hēvaní?

Fakalaulauloto ki he meʻa kuó ke ako mei he ngaahi fili ʻokú ke laukau ʻakí pea pehē ki he ngaahi fili ʻokú ke fakaʻiseʻisa mei aí. ʻI he hoko atu hoʻo ako ʻi he lēsoni ko ʻení, fekumi ki he fakahinohino ʻa e Laumālie Māʻoniʻoní ke ʻilo ʻa e meʻa ʻe ala tokoni atu ke mahino lelei ange kiate koe mo ke fakaʻaongaʻi hoʻo malava ko ia ke filí. Kapau ʻoku ʻi ai haʻo ngaahi fehuʻi fekauʻaki mo e tauʻatāina ke filí, lotua foki mo fekumi ki ha ngaahi tali ʻi he hokohoko atu ʻa hoʻo akó.

Ngaahi tafaʻaki mahuʻinga ʻo e tauʻatāina ke filí

Naʻe fāʻeleʻi e foha ʻo Līhai ko Sēkopé ʻi he feituʻu maomaonganoá hili ia e mavahe honau fāmilí mei Selusalemá. Kimuʻa siʻi pea pekia ʻa Līhaí, naʻá ne akoʻi kia Sēkope ha ngaahi moʻoni mahuʻinga fekauʻaki mo e tauʻatāina ke filí.

Lau ʻa e 2 Nīfai 2:1–4 ke ʻiloʻi pe naʻe kamata fēfē e pōpoaki ʻa Līhai kia Sēkopé. Mahalo ʻe tokoni ke ʻiloʻi ʻoku ʻuhinga ʻa e foʻi lea “fakatapuí” ke tukupā pe ʻai ke māʻoniʻoni (vakai, “Fakatapuí” ʻi he Fakahinohino ki he Ngaahi Folofolá [scriptures.ChurchofJesusChrist.org]).

• Ko e hā ʻe mahuʻingamālie ai ki ha taha kuó ne ʻosi fehangahangai mo ha ngaahi faingataʻa lahi ke mahino hono mahuʻinga ʻo e mālohi ke filí?

• Ko e hā ha ngaahi moʻoni mei he ngaahi veesi ko ʻení ʻoku ngali ʻuhingamālie taha kiate koé? Ko e hā hono ʻuhingá?

Naʻe akoʻi ʻe Līhai kia Sēkope ha ngaahi tafaʻaki mahuʻinga lahi ʻo e tauʻatāina ke filí. Lau e ngaahi meʻa ko ʻení. Fili ha meʻa ʻe ua ʻokú ke ongoʻi ʻe ʻuhingamālie kiate koe ke ke ako, pea ako leva ʻa e fakamatala ʻoku hoko atu aí.

Ko Hotau Mālohi ke Filí

Tohi ʻa Molomoná – Tohi Lēsoni ʻa e Faiakó (2024)—“2 Nīfai 2:1–16”

Fili A: Ko e hā e meʻa ʻoku akoʻi mai kiate kitautolu ʻe hotau mālohi ke filí fekauʻaki mo e ʻOtuá?

Lau ʻa e 2 Nīfai 2:14, 16 ʻo kumi ki he meʻa naʻe akoʻi ʻe Līhai kau ki he ʻOtuá mo ʻetau tauʻatāina ke filí.

• Ko e hā ʻa e meʻa naʻá ke akó?

• Ko e hā ʻoku mahuʻinga ai ke mahino ʻoku foaki mai ʻe he ʻOtuá kiate kitautolu ʻa e mālohi ke tau ngāue maʻatautolú?

• Ko e hā ʻa e ongo ʻokú ke maʻu ʻi he falala atu e Tamai Hēvaní ke ke fai hoʻo ngaahi filí?

Fakakaukau ki ha sīpinga ʻo e taimi naʻá ke fakaʻaongaʻi ai ʻa e tauʻatāina ke filí ʻi ha founga ʻokú ke ongoʻi ʻoku fakahoifua ki he Tamai Hēvaní.

• Ko e hā e ʻuhinga ʻokú ke ongoʻi ai naʻe fakahōifua ki he ʻOtuá hoʻo filí?

Mahalo ʻe ʻaonga foki ke fakakaukau ki ha ngaahi fili naʻá ke fai naʻe ʻikai fakahōifua ki he ʻOtuá mo e meʻa kuó ke ako meiate kinautolú.

Fili E: Ko e hā ha meʻa kuo foaki mai ʻe he ʻOtuá ke ne tokoniʻi kitautolu ke tau fili fakapotopotó?

Lau ʻa e 2 Nīfai 2:5, 13 mo e Molonai 7:16 ʻo kumi e ngaahi moʻoni ko ʻení. Fakatokangaʻi ange ʻoku ʻuhinga ʻa e “fonó” ki he ngaahi fekau ʻa e ʻOtuá.

• Kuo pau ke tau ʻiloʻi ʻa e leleí mei he koví ka tau lava ʻo fakaʻaongaʻi kakato ʻetau tauʻatāina ke filí.

• Kuo pau ke tau maʻu ʻa e fonó ka tau maʻu ʻa e tauʻatāina ke filí.

• Ko e hā ʻokú ke ako fekauʻaki mo e Tamai Hēvaní mo Sīsū Kalaisi mei he moʻoni ko ia ʻokú Na foaki ki he tokotaha kotoa pē ha ʻilo feʻunga ki he leleí mo e koví kae lava ke nau fili ke angatonu pe faiangahala?

• Ko e hā naʻe mei hoko kapau naʻe ʻikai ha fono pe ngaahi fekau?

Fili F: Ko e hā ʻoku tau ongoʻi ai e fakafepakí ki heʻetau ngaahi fili leleí?

Lau ʻa e 2 Nīfai 2:11, 16, ʻo kumi ha ngaahi moʻoni kehe naʻe akoʻi ʻe Līhai fekauʻaki mo ʻetau tauʻatāina ke filí.

• Ko e hā naʻá ke maʻú?

• ʻI he palani ʻa e Tamai Hēvaní, ʻokú ke pehē ko e hā e ʻuhinga ʻokú hoko ai e fakafepakí ko ha konga mahuʻinga ʻo e tauʻatāina ke filí?

• Ko e hā ha ngaahi founga ʻoku fakataueleʻi ai kitautolu ke tau fai e ngaahi fili ʻoku totonú mo ia ʻoku halá?

Lau ʻa e fakamatala ko ʻeni naʻe fai ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ke tokoni ke mahino kiate koe ʻa e moʻoni ko ʻení:

He ʻikai lava ke hoko e fānau fakalaumālie ʻa e ʻOtuá ʻo hangē ko Iá … tukukehe kapau ne nau maʻu … ha aʻusia ʻi ha ʻātakai naʻe fakatou ʻi ai ʻa e leleí mo e koví. …

… Naʻa mau fiemaʻu ʻa e faingamālie ke … fehangahangai ai mo e leleí mo e koví pea ke mālohi feʻunga ke fili ʻa e leleí. (Jeffrey R. Holland, Christ and the New Covenant: The Messianic Message of the Book of Mormon [1997], 200, 204)

Fakakaukau ki ha ngaahi founga ʻokú ke ako ai ke fili ʻa e leleí, ʻo aʻu ai pē ki he taimi ʻoku ʻahiʻahiʻi ai koe ʻe he koví. Mahalo te ke loto ke hiki hoʻo ngaahi talí ʻi hoʻo tohinoa akó. Mahalo te ke fie fakalaulauloto foki ki ha ngaahi founga te ke lava ai ʻo kumi tokoni ʻi ha faʻahinga fili pē te ke fie liliu.

Ko ʻEtau Fiemaʻu ki he Fakamoʻuí

Kuo teʻeki ai ha taha ka ko e Fakamoʻuí pē kuó Ne fakaʻaongaʻi haohaoa ʻa e tauʻatāina ke filí ʻi he moʻui fakamatelié. ʻOku tau faiangahala kotoa pē, pea ka ʻikai ha tokoni te tau “ʻauha … pea mamahi ʻo taʻengata” (2 Nīfai 2:5).

ʻI hoʻo fakakaukau ki he meʻá ni, lau ʻa e 2 Nīfai 2:6–8 ke vakai ki he meʻa naʻe fai ʻe Sīsū Kalaisi maʻatautolu kotoá.

Kapau ʻokú ke fiemaʻu ke mahino ange ʻa e meʻa ʻoku akoʻi ʻi he 2 Nīfai 2:6–8, vakai ki he fakamatala ʻi he konga ki he “Fili pē: Fie Ako Lahi Ange?” ki he ngaahi veesi ko ʻení.

• Naʻe fili fēfē e Fakamoʻuí ke Ne tokoniʻi koé?

• ʻOku tākiekina fēfē ʻe he mahino ko ʻeni fekauʻaki mo Sīsū Kalaisí hoʻo ngaahi ongo kiate Iá?

• Ko e hā ʻokú ke ako mei he sīpinga ʻa e Fakamoʻuí fekauʻaki mo hono fakahoko ʻo e ngaahi fili?

Fakakaukau ki ha taimi naʻá ke fakatomala ai mei ha angahala, ʻi he tokoni ʻa Sīsū Kalaisí. Naʻe liliu fēfē koe ʻe he fakatomala?

Fili Pē: Fie Ako Lahi Ange? 

Ko e hā ʻoku hoko mai ai ʻa e faingataʻá mo e fakafepakí ki heʻeku moʻuí?

Mamata ʻi he “Ko e Hū Lototoʻa Atu ki he ʻAfioʻanga ʻo e ʻOtuá” mei he taimi 7:27 ki he 8:30 ke vakai ki hono fakamatalaʻi ʻe ʻEletā Siaosi Kelepingikati ʻo e Kau Fitungofulú ha ngaahi tali ki he fehuʻi ko ʻení.

2 Nīfai 2:4 ʻOku ʻuhinga ki he hā ʻa e “fakahaofi ʻoku taʻetotongí”?

ʻOku ʻuhinga e kupuʻi lea “ʻoku taʻetotongi ʻa e fakamoʻuí” (1)ʻoku ʻatā tauʻatāina ia ki he fānau kotoa ʻa e ʻOtuá pea (2) heʻikai lava ia ke fakatau, fakafetongi koloa, pe maʻu mai ko ha totongi ʻo ʻetau ngaahi ngāue leleí pē; ko e maʻongoʻonga taha ia ʻi he ngaahi meʻaʻofa ʻa e ʻOtuá (2 Nīfai 2:4; Tokāteline mo e Ngaahi Fuakava 6:13; 14:7). Naʻe ʻikai “taʻetotongi” ia kia Kalaisi, ʻa ē naʻe pau ke Ne totongi ʻa e mahuʻinga ke feauʻaki ʻa e ngaahi fiemaʻu ʻo e fakamaau totonú. ʻOku ʻikai “taʻetotongi” ia kiate kitautolu he ʻoku fiemaʻu ke tau maʻu ʻa e tuí mo fakatomala. ʻOku ʻatā tauʻatāina pē ʻa e meʻaʻofá ni ka ʻoku fakatou fiemaʻu ki ai ʻa e Fakamoʻuí mo ʻetau feinga ke tali ʻa e meʻaʻofá.

“Naʻe fakamoʻoni ʻa Paula, ‘He hangē [ko e] mate kotoa pē ʻia ʻĀtamá, ʻe pehē [pē] foki [ʻa e] moʻui kotoa pē ʻia Kalaisi’ (1 Kolinitō 15:22). ʻI he ʻuhinga ko ʻení, ʻoku fakahaofi ai ʻa e tokotaha kotoa pē, ʻo tatau ai pē pe ko e hā e ngaahi fili naʻe fai ʻi he moʻui ko ʻení. Ko ha meʻaʻofa taʻetotongi ʻeni mei he Fakamoʻuí ki he faʻahinga kotoa ʻo e tangatá” (Ngaahi Tefito ʻo e Ongoongoleleí “Fakamoʻuí,” topics.ChurchofJesusChrist.org).

Ko e hā te u lava ʻo ako fekauʻaki mo e Fakamoʻuí mo ʻEne Fakaleleí mei he 2 Nīfai 2:6–8?

ʻOku ʻuhinga ʻa e huhuʻí ke “fakahaofi, ke fakatau, pe totongi huhuʻi, hangē ko e totongi ke fakatauʻatāinaʻi ha taha mei he nofo pōpulá” (Fakahinohino ki he Ngaahi Folofolá, “Huhuʻi,” scriptures.ChurchofJesusChrist.org).

ʻOku ʻuhinga ʻa e ʻaloʻofá ʻi he tuʻunga ko ʻení ki he loto lelei, angaʻofa, mālohi, mo e ʻofa ʻa e Fakamoʻuí. Ko Ia ʻa e sīpinga ʻo e moʻoní (vakai kia Sione 14:6), pea ʻoku nofoʻia ʻia Kalaisi ʻa e ngaahi ʻulungaanga mo e mālohi kotoa pē ʻo e ʻOtuá (vakai, Kolose 2:9).

ʻOku ʻikai ke tau lava ʻo ngaueʻi pe maʻu ʻiate kitautolu pē ha fakamoʻui, koeʻuhí “he kuo faiangahala kotoa pē” (Loma 3:23; toe vakai kia ʻAlamā 22:14). Koeʻuhí ʻoku ʻikai ha angahala ʻa e Fakamoʻuí pea ʻokú Ne maʻu ʻa e mālohi kotoa pē, ʻe toki lava pē ʻo fakamoʻui kitautolu ʻo fakafou ʻi Heʻene ngaahi leleí.

ʻOku faitatau mo fekauʻaki ʻa e ʻaloʻofá mo e mēsí ka ʻoku na kehekehe ʻi ha ngaahi founga mahuʻinga. Ke maʻu ha meesi, ko e ʻikai ia ke tau maʻu ʻa e meʻa ʻoku totonu ke tau maʻú (tauteá). Ke maʻu ʻa e ʻaloʻofá ko hono maʻu ia ha meʻa ʻoku ʻikai totonu ke tau maʻu (ngaahi tāpuaki). Ko ia ʻoku tokoniʻi ai kitautolu ʻe he feilaulau ʻa e Fakamoʻuí ke tau fakaʻehiʻehi mei he tautea totonu ʻo e angahalá pea toe fakaʻatā ai foki kitautolu ke tau maʻu e ngaahi meʻaʻofa ʻoku ʻikai totonu ke tau maʻú.

2 Nīfai 2:7 ʻOku ʻuhinga nai ki he hā ke maʻu ha loto-mafesifesi mo ha laumālie fakatomalá?