2 Nīfai 2:17–26

“Huhuʻi … mei he Hingá”

Kuó ke fifili nai ki he founga ʻe kei lava ke liliu ai koe ʻe he ngaahi fili naʻe fai ʻe ʻĀtama mo ʻIvi ʻi he ngaahi taʻu ʻe lauiafe kuo hilí? Naʻe akoʻi ʻe Līhai ʻene fānaú fekauʻaki mo e ngaahi nunuʻa ʻo e Hinga ʻa ʻĀtama mo ʻIví pea te tau lava ʻo ikunaʻi fakataha mo e Fakamoʻuí ʻa e ngaahi fakafeʻatungia kotoa pē ʻo e moʻui fakamatelié. ʻE lava ke tokoni ʻa e lēsoni ko ʻení ke fakahoungaʻi ange ʻe he kau akó ʻa e Fakamoʻuí mo ʻEne Fakaleleí ʻi he mahino kiate kinautolu ʻa e Hinga ʻa ʻĀtama mo ʻIví.

Ngaahi ʻEkitivitī Ako ʻOku Ala Fakahokó

ʻOku tākiekina ʻe he mahinó ki he houngaʻiá

Fakalaulauloto ki he ngaahi fehuʻi ko ʻení:

• ʻI ha meʻafua 1 ki he 10 (1 “ʻikai ʻaupito” mo e 10 ʻoku “kakato”), ko e hā e lahi hoʻo ongoʻi ʻoku mahino kiate koe mo ke houngaʻia ʻi he Fakamoʻui ko Sīsū Kalaisí mo ʻEne feilaulau maʻaú? Ko e hā hono ʻuhingá?

• Kapau ʻe fehuʻi atu ʻe ha taha pe ko e hā ʻoku totonu ke nau fai ke mahino mo nau houngaʻia ai ʻi he Fakalelei ʻa Sīsū Kalaisí, ko e hā te ke talaangé?

Naʻe fakamahinoʻi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ha sitepu ʻe taha ʻoku fie maʻu ki hono maʻu ha mahino lahi ange ki he Fakalelei ʻa e Fakamoʻuí. Mahalo te ke fie mamata ʻi he foʻi vitiō “Feluteni ai e Fakamaau Totonú, ʻOfá mo e ʻAloʻofá” mei he taimi 6:51 ki he 7:26 pe lau ʻa e fakamatala ko ʻení:

Feluteni Ai e Fakamaau Totonú, ‘Ofá, mo e ‘Aloʻofá

Ko e fakamoʻoni ʻa Jeffrey R. Holland ki he Fakalelei ʻa e Fakamoʻuí mo ne fakamatalaʻi ʻene fehokotaki mo e Hinga ʻa ʻĀtama mo ʻIví.

Ka ko hono moʻoní ʻeni, he ʻikai lava ke mahino kakato kiate kitautolu ʻa e Fakalelei mo e Toetuʻu ‘a Kalaisí, pea he ‘ikai ke tau teitei fakahoungaʻi feʻunga ʻe kitautolu e taumuʻa makehe ʻo Hono ʻaloʻí mo ʻEne pekiá … taʻe-maʻu ha mahino naʻe ‘i ai moʻoni ha ‘Ātama mo ha ‘Ivi ne hinga ʻi ha ‘Īteni moʻoni, fakataha mo e ngaahi nunuʻa ‘oku kau ki he hinga ko iá. (Jeffrey R. Holland, “Feluteni ai e Fakamaau Totonú, ʻOfá mo e ʻAloʻofá,” Liahona, Mē 2015, 105)

Ke tokoniʻi koe ke ke fakafuofuaʻi ʻa e lahi ʻo e meʻa kuó ke ʻosi ʻilo fekauʻaki mo e Hinga ʻa ʻĀtama mo ʻIví, fakakaukau ki he ngaahi fehuʻi ko ʻení:

• Ko e hā e Hinga ʻa ʻĀtama mo ʻIví?

• Ko e hā e ngaahi nunuʻa ʻo e Hingá ki he māmaní? kiate koé?

• ʻOku fekauʻaki fēfē nai ʻa e Hingá mo e palani ʻo e fakamoʻui ʻa e Tamai Hēvaní?

• ʻOku tokoniʻi fēfē nai koe ʻe he Hingá ke mahino mo ke houngaʻia ʻia Sīsū Kalaisi mo ʻEne feilaulau maʻaú?

ʻI hoʻo akó, kumi e tali ki he ngaahi fehuʻi ko ʻení pea fakalaulauloto ki he founga ʻe ala tokoniʻi ai koe ʻe he mahino ʻokú ke maʻu kiate kinautolú.

Ko e ngaahi nunuʻa ʻo e Hinga ʻa ʻĀtama mo ʻIví

ʻI he teuteu ʻa Līhai ke maté, naʻá ne talanoa lahi ki hono foha ko Sēkopé kau ki he Hinga ʻa ʻĀtama mo ʻIví. Naʻe ʻi ha tuʻunga taʻe-faʻa-mate ʻa ʻĀtama, ʻIvi, mo e faʻahinga meʻa moʻui kotoa pē ʻo e moʻui ʻi he māmaní, ne ʻikai ke nau moʻulaloa ki he maté, pea naʻa nau ʻi he ʻao ʻo e ʻOtuá. ʻI he tuʻunga ko iá, naʻe ʻikai ke nau lava ʻo puke pe mate, pea naʻe ʻomi ʻe he ngoué ha meʻakai maʻanautolu naʻe ʻikai ke nau ngāueʻi ke maʻu ia. Naʻe ʻikai foki lava ke nau maʻu ha fāmili. Naʻe fakatokanga ange ʻa e ʻEikí kapau te na kai ʻa e fua ʻo e ʻakau ʻo e ʻilo ʻo e leleí mo e koví, te na iku ʻo mate (vakai, Mōsese 3:16–17; ʻĒpalahame 5:12–13). ʻOku ʻiloa ʻa e fili ʻa ʻĀtama mo ʻIvi ke kai ʻa e fua ko iá mo e ngaahi nunuʻa kiate kinaua mo e toenga ʻo e māmaní ko e Hingá.

Lau ʻa e 2 Nīfai 2:19–23 mo e ʻAlamā 42:6–9, ʻo kumi e ngaahi nunuʻa ʻo e Hingá. Fakakaukau ke fakaʻilongaʻi ʻa e meʻa ʻokú ke maʻú.

1. Fakakakato ʻeni ʻi hoʻo tohinoa ako:

   Faʻu ha lisi ʻo e ngaahi nunuʻa ʻo e Hingá.

   ʻE ala tokoni ke fengāueʻaki e kau akó ʻi ha fanga kiʻi kulupu iiki pe hiki ha lisi ʻi he palakipoé ko ha kalasi.

• Te ke ongoʻi fēfē nai kapau ko ʻĀtama mo ʻIvi koe ʻokú ke aʻusia e ngaahi nunuʻa ko ʻení?

• ʻOkú ke pehē ʻoku lelei, kovi pe fakatou lelei mo kovi e ngaahi nunuʻa ko ʻení? Ko e hā hono ʻuhingá?

Lau ʻa e 2 Nīfai 2:24–25, pea fakakaukau ki he founga te ke fakamatalaʻi fakanounou ʻaki ʻa e ngaahi veesi ko ʻení ʻi he lea pē ʻaʻau.

Ko e 2 Nīfai 2:25 ko ha potufolofola fakataukei fakatokateline ia. Fakakaukau ke fakaʻilongaʻi e ngaahi potufolofola fakataukei fakatokāteliné ʻi ha founga makehe koeʻuhí ke faingofua ange hoʻo maʻu kinautolú. Te ke maʻu ha faingamālie ʻi he lēsoni hokó ke akoako fakaʻaongaʻi e tokāteline ʻoku akoʻi ʻi he potufolofola ko ʻení ki ha fehuʻi pe tūkunga.

Ko e moʻoni ʻe taha naʻe akoʻi ʻe Līhaí ko e Hingá ko ha konga mahuʻinga ia ʻo e palani ʻo e fiefia ʻa e Tamai Hēvaní.

Fakaʻaongaʻi ha kiʻi taimi ke fakakaukau ai ki he ʻuhinga naʻe hoko ai ʻa e Hingá ko ha konga mahuʻinga ʻo e palani ʻa e Tamai Hēvaní ʻi hoʻo lau ʻa e lea ko ʻeni ʻa ʻEletā Sefilī R. Hōlaní ʻo e Kōlomu ʻo e Kau ʻAposetolo ʻe Toko Hongofulu Mā Uá:

Ko e hingá ko e konga mahuʻinga ia ʻo e palani fakalangi ʻa e Tamai Hēvaní. Ka ne taʻeʻoua ia, naʻe ʻikai fanauʻi ʻe ʻĀtama mo ʻIvi ha fānau ʻi he māmaní, pea ʻikai ha fāmili ʻo e faʻahinga ʻo e tangatá ke nau aʻusia ʻa e fehangahangaí mo e fakalakalaká, tauʻatāina ke filí, pea mo e fiefia ʻo e toetuʻú, huhuʻí, mo e moʻui taʻengatá [vakai, 2 Nīfai 2:22–27; Mōsese 5:11]. (Jeffrey R. Holland, “Ko e Fakalelei ʻa Sīsū Kalaisí,” Ensign, Māʻasi 2008, 35)

• Ko e hā naʻe hoko ai e Hingá ko ha konga mahuʻinga ʻo e palani ʻa e Tamai Hēvaní?

ʻOku tau kei fie maʻu pē ha tokoni.

Neongo ko e ngaahi nunuʻa ʻo e Hingá ko ha konga ia ʻo e palani ʻa ʻetau Tamai Hēvaní pea ʻoku fakataumuʻa ke tokoniʻi kitautolu ke tau fakalakalaka, ka he ʻikai ke tau lava ʻo ongoʻi ʻa e fiefia moʻoní taʻe-kau ai ha tokoni fakalangi.

Lau fakalelei ʻa e 2 Nīfai 2:26, ʻo kumi pe ʻe lava fēfē nai ke ikunaʻi ʻa e ngaahi nunuʻa ʻo e Hingá pea ongoʻi fiefia. Hili iá pea lau ʻa e Mōsese 5:10–11, ʻo fakatokangaʻi e ngaahi moʻoni naʻá ne tataki ʻa ʻĀtama mo ʻIvi ke na fiefiá.

• Ko e hā naʻá ke akó?

• ʻOkú ke pehē ko e hā naʻe fiefia ai ʻa ʻĀtama mo ʻIvi hili ʻena ʻilo ki he Hingá mo e Fakalelei ʻa Sīsū Kalaisí?

2. Fakakakato e ngaahi meʻa ko ʻení:

   Fakakaukauloto ʻokú ke fakatokangaʻi ʻi ha fealeaʻaki mo hao kaungāmeʻa ʻoku ʻikai ke ne houngaʻia ʻi he Fakamoʻuí pe ko ʻEne Fakaleleí.

   • Ko e hā ha ʻilo fekauʻaki mo e Hinga ʻa ʻĀtama mo ʻIví ʻe lava ʻo tokoni ke ne houngaʻia ʻi he Fakamoʻuí mo ʻEne Fakaleleí?

Fili Pē: Fie Ako Lahi Ange?

Ko e hā e ongo ʻoku totonu ke tau maʻu fekauʻaki mo hono kai ʻe ʻIvi ʻa e fuá?

Naʻe pehē ʻe Palesiteni Tāleni H. ʻOakesi ʻo e Kau Palesitenisī ʻUluakí:

The Great Plan of Happiness

Elder Dallin H. Oaks delivers a message titled "The Great Plan of Happiness."

“ʻOku ʻi ai ha kau Kalisitiane ʻoku nau fakahalaiaʻi ʻa ʻIvi koeʻuhí ko e meʻa naʻá ne faí, ʻo pehē naʻe tōnounou mo ʻene fānau fefiné ʻi he meʻá ni. Ka ʻoku ʻikai pehē ʻa e Kāingalotu ia ‘i he Ngaahi ‘Aho Kimui Ní! Tupu mei he fakahaá, ʻoku tau fakamanatua ʻa e ngāue ʻa ʻIví mo fakaʻapaʻapa ki heʻene potó mo e loto-toʻá ʻi he konga maʻongoʻonga ʻoku ui ko e Hingá. (Dallin H. Oaks, “The Great Plan of Happiness,” Ensign, Nov. 1993, 73)

ʻE founga fēfē nai haʻatau maʻu ʻa e fiefiá ʻi ha māmani faingataʻa?

Naʻe akonaki ʻa Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e Ongoongolelei Moʻoni, Haohaoa, mo Mahinongofua ʻo Sīsū Kalaisí

ʻOku akoʻi ʻe Palesiteni Ballard ʻoku maʻu e fiefiá ʻi hono moʻui ʻaki e ongoongoleleí, ʻaki hono tauhi e ongo fekau lahí. Ko e ongo founga tefito ki hono tauhi e ongo fekau ko iá ko e tauhi e Sāpaté pea mo e ngāue fakaetauhí.

Naʻe akoʻi ʻe he palōfita ko Līhaí, “ʻOku ʻi ai ʻa e … tangatá [mo e fefiné] koeʻuhí ke nau maʻu ʻa e fiefiá.” [2 Nīfai 2:25]. ʻOku lahi ha ngaahi ʻuhinga he ʻikai lava ke tau maʻu ai ʻa e nongá, nēkeneká, mo e fiefiá ʻi he moʻuí ni, kau ai ʻa e masivesivá, taú, ngaahi fakatamaki fakaenatulá, pea mo ha ngaahi palopalema taʻe-ʻamanekina ʻi he ngāué, tuʻunga moʻui leleí, mo e ngaahi vā fetuʻutaki fakafāmilí.

Ka neongo ʻoku ʻikai ke tau lava ʻo puleʻi e ngaahi mālohi ko ia mei tuʻa ʻoku nau uesia ʻetau moʻui ʻi he māmaní, te tau lava ʻo maʻu ha nonga, nēkeneka, mo ha fiefia ʻi heʻetau fāifeinga ke hoko ko ha kau ākonga faivelenga ʻo e ʻEiki ko Sīsū Kalaisí, neongo e ngaahi palopalema fakamāmani ʻokú ne ʻākilotoa kitautolú. …

… Kāinga, fai pē hoʻo lelei taha ʻe lavá ʻi he ʻaho takitaha, pea he ʻikai fuoloa, kuó ke fakatokangaʻi ʻoku ʻafioʻi koe ʻe hoʻo Tamai Hēvaní pea ʻokú Ne ʻofa ʻiate koe. Pea ʻi hoʻo ʻiloʻi iá—ʻo ʻiloʻi moʻoni iá—ʻe ʻi ai ha taumuʻa moʻoni ki hoʻo moʻuí, pea ʻe fakafonu ʻaki koe ʻa e fiefiá mo e nongá. (M. Russell Ballard, “Ko e Ongoongolelei Moʻoni, Haohaoa, mo Mahino Ngofua ʻo Sīsū Kalaisí,” Liahona, Mē 2019, 28)

Naʻe pehē ʻe Palesiteni Lāsolo M. Nalesoni:

Fiefiá mo e Moʻui Fakalaumālié

ʻOku akoʻi ʻe Palesiteni Nelson te tau malava ʻo maʻu e fiefiá ʻi ha faʻahinga tūkunga pē kapau te tau fakatefito ʻetau tokangá ʻia Sīsū Kalaisi pea mo e palani ʻo e fakamoʻuí.

Siʻoku kāinga ʻofeina, ʻoku siʻi ha kaunga e fiefia ʻoku tau maʻú, ki he tūkunga ʻetau moʻuí mo e meʻa ʻoku tukutaha ai ʻetau tokangá.

ʻI hono tukutaha ʻetau tokanga ki heʻetau moʻuí ʻi he palani ʻa e ʻOtuá ki he fakamoʻuí … pea mo Sīsū Kalaisi mo ʻEne ongoongoleleí, te tau lava ʻo ongoʻi fiefia ʻo tatau ai pē ko e hā e meʻa ʻoku hokó—pe ʻikai ke hoko—ʻi heʻetau moʻuí. ʻOku haʻu ʻa e fiefiá meiate ia pea koeʻuhí ko Ia. Ko Ia e tupuʻanga ʻo e fiefia kotoa pē. ʻOku tau ongoʻi ia ʻi he taimi Kilisimasí ʻi heʻetau hiva, “Fiefia ki māmani, ka haʻu ʻa e ʻEikí” [“Fiefia ki Māmani,” Ngaahi Himí, fika 110]. ʻOku tau ongoʻi ia he taʻú kakato. Ki he Kāingalotú, ko Sīsū Kalaisi ʻa e fiefiaʻangá! (Russell M.Nelson, “Fiefiá mo e Moʻui Fakalaumālié,” Liahona, Nōvema 2016, 82)