Fakataukei Fakatokāteliné: 2 Nīfai 2:25

“Naʻe Hinga ʻa ʻĀtamá Koeʻuhí ke ʻI Ai ʻa e Faʻahinga ʻo e Tangatá; pea ʻOku ʻI Ai ʻa e Faʻahinga ʻo e Tangatá, Koeʻuhí ke Nau Maʻu ʻa e Fiefiá”

Naʻá ke ako ʻi he lēsoni “2 Nīfai 2:17–26,” kau ki he Hinga ʻa ʻĀtama mo ʻIví. ʻE lava ke tokoni hoʻo ʻilo fekauʻaki mo e Hingá ke ke falala ki he Fakamoʻuí ʻi hoʻo fehangahangai mo e ngaahi faingataʻa ʻo e moʻui fakamatelié. ʻE tokoni ʻa e lēsoni ko ʻení ke ke ako maʻuloto ʻa e potufolofola fakataukei fakatokāteliné mo e kupuʻi lea fakafolofola mahuʻinga ʻi he 2 Nifai 2:25, fakamatalaʻi ʻa e tokāteliné, pea akoako fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

Ngaahi ʻEkitivitī Ako ʻOku Ala Fakahokó

Fakamatalaʻi mo ako maʻuloto

ʻOkú ke pehē nai te ke lava ʻo fakamatalaʻi pe ko e hā ʻa e ʻelifānite pe kōlila kae ʻikai fakaʻaongaʻi hono hingoá? Ke akoako fakamatalaʻi e ngaahi meʻá ki he niʻihi kehé, fakakaukau ki he founga te ke fakamatalaʻi ʻaki e fanga monumanu ko ʻení.

ʻE ala faingataʻa ke fakamatalaʻi ha niʻihi ʻo e ngaahi konga ʻo e palani ʻa e Tamai Hēvaní, kau ai ʻa e Hinga ʻa ʻĀtama mo ʻIví. Naʻá ke ako ʻi ha lēsoni kimuʻa fekauʻaki mo e Hingá. Lau ʻa e 2 Nīfai 2:25, ʻo fakakaukau ki he meʻa naʻá ke akó. Fakamanatu ko e Hingá ko ha konga mahuʻinga ia ʻo e palani ʻo e fiefia ʻa e Tamai Hēvaní.

Hiki e founga te ke fakamatalaʻi ʻaki e Hinga ʻa ʻĀtama mo ʻIví ki ha kiʻi tamasiʻi taʻu valu pea mo e ʻuhinga ʻoku mahuʻinga ai ke mahino ʻa e Hingá.

Ako maʻuloto e potufolofola fakataukei fakatokāteliné. Ko e founga ʻe taha ke ako maʻuloto aí ko hono vahevahe e potufolofola fakataukeí mo e kupuʻi lea fakafolofola mahuʻingá ki he ngaahi konga ʻe nima ko ʻení:

• 2 Nīfai 2:25

• “Naʻe hinga ʻa ʻĀtama

• koeʻuhí ke ʻi ai ʻa e faʻahinga ʻo e tangatá;

• pea ʻoku ʻi ai ʻa e tangatá,

• koeʻuhí ke nau maʻu ʻa e fiefiá.”

Hiki ʻa e ngaahi konga ko ʻení ʻi ha laʻipepa, pea toe lau ʻa e konga takitaha lolotonga hoʻo tuhu ki aí. Hili iá pea tamateʻi pe fufuuʻi ʻa e ngaahi foʻi leá pe kupuʻi leá lolotonga hono toutou lau ʻa e potufolofolá. Hokohoko atu kae ʻoua kuo tamateʻi ʻa e meʻa kotoa pē pea lava ke ke toutou lau maʻuloto ʻa e fakamoʻoni fakafolofolá mo e kupuʻi lea fakafolofola mahuʻingá.

Akoako hono fakaʻaongaʻí

1. Feinga ke hiki ʻi ha laʻipepa ʻoku ʻatā ʻa e ngaahi tefitoʻi moʻoni kotoa ʻe tolu ʻo hono maʻu ʻo e ʻilo fakalaumālié kae ʻikai sio ki ha faʻahinga fakamatala ʻoku hiki.

   • Naʻe tuʻunga lelei fēfē nai hoʻo lava ke manatuʻi e ngaahi tefitoʻi moʻoni ʻo hono maʻu ʻo e ʻilo fakalaumālié?

   Kapau ʻokú ke fie maʻu tokoni ʻi hono manatuʻi e ngaahi tefitoʻi moʻoni ko ʻení, vakai ki he Fakamatala ki he ʻElito ʻo e Fakataukei Fakatokāteliné (2022).

   • Te ke fakaʻaongaʻi fēfē nai ʻa e ngaahi tefitoʻi moʻoni ki hono maʻu ʻo e ʻilo fakalaumālié mo e tokāteline ʻo e Hingá ke tokoni ki hono tokangaekina e hohaʻa ʻa Kitioné?

Kapau ʻokú ke fie maʻu tokoni ʻi hono manatuʻi e ngaahi tefitoʻi moʻoni ko ʻení, vakai ki he Fakamatala ki he ʻElito ʻo e Fakataukei Fakatokāteliné (2022).

Fakaʻaongaʻi e ngaahi tefitoʻi moʻoni ko ʻení ʻi he tūkunga ko ʻení:

Lolotonga e ako ʻa Kitione ki he Hinga ʻa ʻĀtama mo ʻIví ʻi heʻene kalasi Lautohi Faka-Sāpaté, naʻá ne ʻohovale he fanongo ki he pehē ʻe heʻene faiakó ko e Hingá ko ha konga mahuʻinga ia ʻo e palani ʻo e fakamoʻui ʻa e Tamai Hēvaní. ʻOkú ne kamata fakakaukau ki he ngaahi meʻa kovi kotoa ʻe lava ke hoko koeʻuhí ko e Hingá—ʻa e angahalá, maté, puké, faingataʻaʻia fakaesinó, fokoutua fakaʻatamaí, ngaahi ʻahiʻahí, mo ha ngaahi meʻa lahi ange. ʻOkú ne ʻiloʻi ko e ngaahi meʻa ʻoku lāunga lahi taha aí ko e ngaahi nunuʻa ia ʻo e Hingá. ʻOkú ne fifili pe ʻe lava fēfē ke hoko ʻa e Hingá ko ha meʻa naʻe mei fie maʻu ʻe he Tamai Hēvaní ke hoko.

Fekumi ke maʻu ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí.

Lau ʻa e palakalafi 11–12 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné.

• Te ke fakaʻaongaʻi fēfē nai ʻa e tefitoʻi moʻoni ko ʻení ke fakamatalaʻi ʻa e hohaʻa ʻa Kitioné?

Ngaahi founga kehe ke fakaʻaongaʻi ai ʻa e tefitoʻi moʻoni ko ení

• Ko e hā ha ngaahi maʻuʻanga tokoni kuo fokotuʻu fakalangi te ke fokotuʻu atu ke fekumi ki ai ʻa Kitione ki ha tokoni lahi ange?

• Ko e hā te ke fili ai ʻa e ngaahi maʻuʻanga tokoni ko iá?

Lēkooti hoʻo ngaahi fakamatalá ʻi hoʻo tohinoa akó.

Sivisiviʻi e ngaahi fakakaukaú mo e ngaahi fehuʻí, ʻaki ha fakakaukau ʻoku taʻengatá

Toe vakaiʻi ʻa e palakalafi 8–10 ʻi he “Ko Hono Maʻu ʻo e ʻIlo Fakalaumālié” ‘i he konga Fakamatala ki he ʻElito ʻo e Fakataukei Fakatokāteliné.

• Te ke fakaʻaongaʻi fēfē nai ʻa e tefitoʻi moʻoni ko ʻení ke fakamatalaʻi ʻa e meʻa ʻoku hohaʻa ki ai ʻa Kitioné?

Ngaahi founga kehe ke fakaʻaongaʻi ai ʻa e tefitoʻi moʻoni ko ʻení

Lēkooti hoʻo ngaahi fakamatalá ʻi hoʻo tohinoa akó.

Ngaahi founga kehe ke fakaʻaongaʻi ai ʻa e tefitoʻi moʻoni ko ʻení

• ʻE tokoni fēfē nai ʻa e mahino ʻokú ke maʻu ki he Hingá mo hono tuʻunga ʻi he palani ʻo e fakamoʻuí ʻi he tūkunga ko ʻení?

• Ko e hā ʻokú ke ʻilo fekauʻaki mo e Fakamoʻuí mo ʻEne Fakaleleí ʻe ala tokoní?

• Ko e hā mo ha toe founga ʻe lava ke tau vakai ai ki he tūkunga ko ʻení ʻaki ha fakakaukau ʻoku taʻengatá?

Ngāue ʻi he tui

Toe vakaiʻi ʻa e palakalafi 5–7 ʻi he konga “Ko Hono Maʻu ʻo e ʻIlo Fakalaumālié” ‘i he Fakamatala ki he ʻElito ʻo e Fakataukei Fakatokāteliné.

• Te ke fakaʻaongaʻi fēfē nai ʻa e tefitoʻi moʻoni ko ʻení ke fakamatalaʻi ʻa e hohaʻa ʻa Kitioné?

Ngaahi founga kehe ke fakaʻaongaʻi ai ʻa e tefitoʻi moʻoni ko ʻení

Fakakaukau ki he ngaahi meʻa naʻá ke aʻusia ʻi hoʻo fehangahangai mo e ngaahi faingataʻa ʻoku fekauʻaki mo e Hingá. Fakalaulauloto ki he meʻa kuó ke fai ke ngāue ai ʻi he tui mo falala ki he Fakamoʻuí ʻi he taimi ʻokú ke fehangahangai ai mo e ngaahi faingataʻa ʻo e moʻui fakamatelié.

• ʻE tokoni fēfē nai hoʻo ngaahi aʻusiá ʻi he tūkunga ʻo Kitioné?

• Ko e hā mo ha toe founga ʻe lava ke fakahaaʻi ai ʻe Kitione ʻa e tui kia Sīsū Kalaisí?

Lēkooti hoʻo fakamatalá ʻi hoʻo tohinoa akó.