“2 Nephi 9:1–26: ‘Walay Kinutuban Nga Pag-ula,’” Manwal sa Magtutudlo sa Basahon ni Mormon (2024)
“2 Nephi 9:1–26,” Manwal sa Magtutudlo sa Basahon ni Mormon
2 Nephi 9:1–26
“Walay Kinutuban Nga Pag-ula”
![He Lives [Siya Buhi], ni Simon Dewey](https://assets.churchofjesuschrist.org/0a/a5/0aa56093c0d511ec9810eeeeac1e870bef39128e/he_lives_jesus_christ_resurrected.jpeg)
Gitudloan ni Jacob ang mga Nephite mahitungod sa mga kahimtang nga giatubang sa tanang katawhan tungod sa Pagkapukan ni Adan ug Eva. Siya mipamatuod nga pinaagi lamang ni Jesukristo ug sa Iyang matubsanong gahom nga ang katawhan makabuntog sa espirituhanon ug pisikal nga kamatayon. Kini nga leksiyon makatabang nimo nga mobati og mas dakong pasalamat sa tahas ni Jesukristo sa pagtabang kanato sa pagbuntog sa sala ug kamatayon.
Mga Posibleng Kalihokan sa Pagkat-on
Usa ka lisod nga sitwasyon
Pamalandongi kon unsaon nimo pagsanong ang mosunod nga mga kahimtang:
Niadtong Agosto 5, 2010, 33 ka mga minero sa Chile wala makalingkawas sa grabeng pagkahugno dihang ang bato sulod sa minahan natumpag. Sila napundo sa gamayng luwas nga dapit ug diha sa lungag sa minahan nga anaa sa ubos sa nahugno nga dapit, 2,300 ka pye (700 m) kalawom diha sa yuta.
Ang sitwasyon murag wala nay paglaom. Sila nabulag sa ilang panimalay ug pamilya sa hapit tunga sa milya nga dili matarog nga bato ibabaw kanila, ug sila adunay gamay lang nga suplay sa pagkaon ug tubig. Bisan tuod aduna silay mga himan ug kahibalo, tungod kay dili na lig-on ang minahan dili nila maluwas ang ilang kaugalingon.Ang bugtong purohan mao ang makit-an ug maluwas. (Connie Goulding, “Pagpaningkamot nga Maluwas,” Liahona, Hunyo 2015, 21)
-
Kon ikaw anaa niini nga sitwasyon, unsa kaha nga mga hunahuna o mga pagbati ang anaa kanimo?
-
Unsa ang pipila ka mga butang nga kita gikinahanglan nga luwason, gikan niadtong dili nato mabuntog sa atong kaugalingon?
Tungod sa Pagkapukan ni Adan ug ni Eva, matag usa kanato makasinati og pisikal ug espirituhanong kamatayon. Ang espirituhanong kamatayon nagpasabot sa pagkahimulag gikan sa Dios nga atong nasinati isip resulta sa sala.
Basaha ang 2 Nephi 9:10, nga mangita sa unsay gitandi ni Jacob sa pisikal ug espirituhanon nga kamatayon.
-
Ngano sa imong hunahuna nga si Jacob mihulagway sa kamatayon (kamatayon sa lawas) ug sa impyerno (kamatayon sa espiritu nga resulta sa wala mahinulsoli nga sala), isip usa ka “makalilisang nga mangtas”?
Hunahunaa kon unsa kaha ang kinabuhi kon kita wala giluwas gikan sa pisikal ug espirituhanon nga kamatayon. Ikonsiderar kon unsaon nimo sa pagpakig-istorya sa usa ka tawo sa atong desperado nga panginahanglan alang sa usa ka Manunubos aron sa pagluwas kanato gikan sa pisikal ug espirituhanon nga kamatayon. Samtang magpadayon ka sa pagtuon, pagpamalandong kon unsay imong gibati ngadto kang Jesukristo, kinsa nagtabang kanato sa pagbuntog niini nga mga kahimtang pinaagi sa Iyang Pag-ula.
Si Jacob nagtudlo mahitungod sa tahas sa Manluluwas sa pagluwas kanato gikan sa sala ug kamatayon
-
Kompletoha ang mosunod nga kalihokan sa pagtuon
Paghimo og tsart nga adunay mosunod nga mga ulohan diha sa imong journal sa pagtuon. Tun-i ang mga bersikulo nga nalista sa matag kolum ug irekord ang imong mga panabot diha sa imong tsart. Ipadayon ang pagdugang og mga panabot diha sa imong tsart sa tibuok dagan sa leksiyon.
|
Kon walay Manluluwas … (2 Nephi 9:7–9) |
Tungod kay adunay usa ka Manluluwas … (2 Nephi 9:10–13) |
|---|---|
Ikonsiderar nga ipuno ang imong dugang nga mga panabot diha sa imong tsart.
Why We Need a Savior
-
Unsa nga mga hunahuna o mga pagbati ang anaa kanimo mahitungod ni Jesukristo samtang imong gitun-an kini nga mga bersikulo?
Usa ka kamatuoran nga nag-summarize sa mga pagtulun-an ni Jacob sa mga bersikulo nga imong gitun-an mao nga pinaagi sa Iyang Pag-ula, si Jesukristo nagtabang kanato sa pagbuntog sa sala ug kamatayon.
-
Sa unsang paagi nga ang pagsabot niini nga kamatuoran makaapekto sa imong kinabuhi?
-
Kanus-a ang kahibalo sa kadaugan ni Jesukristo batok sa sala ug kamatayon nahimong labing makahuluganon kanimo?
Pagpili sa pagdawat sa pagluwas
Hinumdomi ang asoy sa mga minero sa Chile gikan sa sayo pa sa leksiyon. Samtang nagkat-on ka mahitungod sa nahibilin sa ilang istorya, paghunahuna og mga pagkaparehas tali sa ilang kasinatian ug sa pagluwas kanato gikan sa pisikal ug espirituwal nga kamatayon.
Kapin sa duha ka semana human natanggong ang mga minero, ang mga tigluwas nakakitag paagi nga mahatagan silag pagkaon, tubig, ug mga suplay. Dul-an sa duha ka bulan ang milabay, ang mga tigluwas sa kataposan nakahimo og lungag nga igo ang gidak-on aron mapaubos ang usa ka gamay nga kapsula nga tagsa-tagsa nga makaluwas sa mga minero. Ang kada minero misulod sa kapsula ug mipili sa pagtugyan sa iyang kabubut-on ngadto sa plano sa pagluwas ug sa mga tigluwas aron maluwas. Human matanggong sa sumada [total] nga 69 ka adlaw, ang matag usa sa mga minero naluwas (tan-awa sa Connie Goulding, “Pagpaningkamot nga Maluwas,” Liahona, Hunyo 2015, 21–23).
-
Unsa nga mga pagkaparehas ang imong nakita tali niini nga istorya ug sa Manluluwas nga nagluwas kanato gikan sa sala ug kamatayon?
-
Unsa kaha sa imong hunahuna kon ang usa sa mga minero nga natanggong magdumili sa pagsulod sa kapsula sa pag-ikyas? Ngano man?
Samtang ang kaluwasan gikan sa pisikal nga kamatayon usa ka gasa nga gitanyag sa Manluluwas ngadto sa tanang katawhan, ang atong kaluwasan gikan sa espirituhanong kamatayon nagdepende sa usa ka bahin ngadto sa atong mga tinguha ug mga binuhatan.
Basaha ang 2 Nephi 9:21–24 ug pangitaa ang mga pagpili nga kinahanglan natong buhaton aron ang Manluluwas makaluwas kanato gikan sa espirituhanong kamatayon. Ikonsiderar ang pagrekord og dugang nga mga panabot nga imong naangkon mahitungod sa Manluluwas diha sa ikaduhang kolum sa imong tsart.
-
Unsa ang imong nakat-onan mahitungod sa unsay kinahanglan natong buhaton alang sa Manluluwas aron maluwas kita gikan sa espirituhanong kamatayon?
-
Ngano sa imong hunahuna nga kita “dili maluwas sa gingharian sa Dios” kon kita dili mobuhat niini nga mga butang?
Pamalandongi sa makadiyot ang imong nakat-onan karon mahitungod ni Jesukristo ug unsay Iyang nabuhat alang kanimo. Mahimo nimong irekord ang bisan unsang mga hunahuna o mga impresyon nga imong naangkon o ilakip ang imong pagpasalamat sa atong mahigugmaong Manluluwas.