2 Nephi 9:50–52

“Duol Ngadto Sa Usa Nga Balaan Sa Israel”

Nakadahom ka na ba og dakong kalipay gikan sa usa ka butang apan nahigawad lang pagkahuman? Gitapos ni Jacob ang iyang wali pinaagi sa pagtambag sa mga Nephite sa paglikay sa paggahin og panahon o kwarta sa mga butang nga dili makahatag og malungtarong katagbawan. Iyang gidapit sila sa pagduol ngadto kang Jesukristo ug pagbusog sa mga panalangin sa ebanghelyo. Kini nga leksiyon gituyo aron sa pagtabang kanimo nga mobati og mas dakong tinguha sa pagtinguha sa mga panalangin ug katagbawan nga si Jesukristo lamang ang makahatag.

Mga Posibleng Kalihokan sa Pagkat-on

Pagtagbaw sa atong kagutom ug kauhaw

Paghunahuna og panahon sa imong kinabuhi diin ikaw gigutom o giuhaw pag-ayo.

• Unsa nga mga pagkaon o ilimnon ang labing makapatagbaw ug makatabang sa mga sitwasyon nga sama niini? Unsa nga mga pagkaon o ilimnon ang dili sama niana nga makatabang? Ngano man?

Tingali nakabantay ka nga ang atong mga espiritu, sama sa atong mga lawas, nagkinahanglan og pag-amuma ug katagbawan.

• Unsa ang pipila ka mga paagi nga kita makahatag og malungtarong pag-amuma o katagbawan sa atong mga espiritu?

• Unsa ang mga butang nga gibuhat sa mga tawo alang sa katagbawan nga makapahimo kanila nga mobati og espirituhanong kahaw-ang?

• Ngano kaha sa imong hunahuna nga ang mga tawo usahay mobuhat sa mga butang nga dili makahatag og malungtarong katagbawan?

Hunahunaa kon sa unsang paagi ang mosunod nga mga pangutana may kalabotan sa imong kaugalingong kinabuhi.

• Aduna bay mga butang nga imong gibuhat alang sa kalipay ug katagbawan nga dili makatagbaw niadtong mga tinguha? Unsa ang nakatabang kanimo nga mobati og malungtarong kalinaw ug kalipay sa imong kinabuhi?

• Samtang magtuon ka karon, pangitaa ang mga kamatuoran nga makatabang nimo nga masinati ang mga panalangin ug katagbawan nga si Jesukristo lamang ang makatanyag.

“Pagbusog kamo niana nga dili mahanaw”

Hinumdomi gikan sa imong pagtuon sa 2 Nephi 9:27–49 nga si Jacob nipasidaan sa iyang katawhan batok sa makasasala nga mga buhat nga ilang gihimo. Dayon gitapos ni Jacob ang iyang mga pakigpulong pinaagi sa usa ka importante nga pagdapit.

Basaha ang 2 Nephi 9:50–52, nga mangita sa pagdapit ni Jacob sa iyang mga katawhan.

• Unsa ang pipila ka mga pulong o hugpong sa mga pulong gikan niini nga mga bersikulo nga imong nakita nga importante? Ngano man?

• Unsa ang natabang niini nga mga bersikulo sa imong pagsabot mahitungod sa mga tinguha ni Jesukristo alang kanato? Unsay gitudlo niini kanimo mahitungod sa unsay Iyang gitanyag kanato?

Usa ka kamatuoran nga atong makat-onan gikan niini nga mga bersikulo mao nga kon kita moduol ngadto kang Jesukristo, ang atong mga kalag mahimong matagbaw.

Paggamit og mga cross-reference aron sa pagpalawom sa imong pagsabot

Ang pagpangita og mga tudling sa kasulatan nga may kalabotan sa imong gitun-an mahimong makatabang nga paagi sa pagpalawom sa imong pagsabot ug pagpasalamat sa unsay anaa sa mga kasulatan.

Pagpraktis niini nga kahanas pinaagi sa pagpangita og mga cross-reference nga may kalabotan sa mga pagtulun-an sa 2 Nephi 9:50–52.

Ikonsiderar ang paghimo og diagram nga susama sa mosunod diha sa imong journal sa pagtuon ug sa pagsulat sa “2 Nephi 9:50–52” sa tunga nga lingin. Samtang mangita ka og may kalabotan nga mga kasulatan nga gusto nimong hinumduman, mahimo nimong isulat ang mga pakisayran sa ubang mga lingin.

Ang imong unang lakang sa pagpangita og mga cross-reference mao ang pagpangita sa mga pakisayran sa kasulatan ug sa mga hilisgotan nga gilista diha sa mga footnote. Sunod, ikonsiderar ang pag-ila sa mahinungdanon nga mga pulong gikan sa 2 Nephi 9:50–52 ug sa pagpangita niadtong mga pulong o may kalabotan nga mga termino diha sa Giya ngadto sa mga Kasulatan, , o sa Gospel Library nga function sa pagpangita.

Ania ang pipila ka mga pulong o hugpong sa mga pulong nga mahimo nimong ikonsiderar sa pagpangita: duol; buhi nga tubig; makatagbaw; patalinghog; pagbusog; pag-ampo; pasalamat; magmalipayon.

1. Kompletoha ang mosunod:

   • Unsa ang labing menos duha ka cross-reference nga imong nakit-an?

   • Sa unsang paagi kini nga mga cross-reference nakapauswag sa imong pagsabot o pagpasalamat sa mga pagtulun-an diha sa 2 Nephi 9:50–52?

Paggamit sa imong nakat-onan

Hunahunaa kon unsay imong nakat-onan mahitungod ni Jesukristo karon ug sa unsang paagi kini nga mga pagtulun-an makapanalangin kanimo sa imong mga kahimtang karon.

2. Aron matabangan ka nga maproseso ang imong nakat-onan, tubaga ang labing menos duha sa mosunod nga mga pangutana:

   • Unsa ang imong nakat-onan o gibati mahitungod ni Jesukristo karon nga gusto nimong mahinumdoman?

   • Sa unsang paagi nga ang pagpili sa pagsunod ni Jesukristo makahatag sa imong kalag og malungtarong katagbawan?

   • Unsa ang pipila ka piho nga mga pagpili nga imong mahimo nga makahatag og malungtarong katagbawan nga anaa pinaagi ni Jesukristo sa imong kinabuhi?

Opsiyonal: Gustong Makakat-on pa og Dugang?

2 Nephi 9:50–51. Unsa ang gipasabot ni Jacob sa dihang siya miingon nga duol og pagpalit nga “wala magkinahanglan og salapi ug walay presyo”?

Ang tanang tawo makadawat sa mga panalangin nga gitanyag ni Jesukristo, di igsapayan sa pinansiyal nga kahimtang o bisan unsa nga kalibotanon nga mga kwalipikasyon. Samtang kini nga mga panalangin wala magkinahanglan og pisikal nga kwarta, adunay usa ka butang nga kinahanglan natong buhaton aron maangkon kini. Asa pa ko makakat-on pa og dugang mahitungod sa pagpundok sa Israel?

Si Elder Jeffrey R. Holland sa Korum sa Napulog Duha ka Apostoles mitudlo:

Kon malisod ang mga butang nga gipabuhat kanato, bisan niadtong sukwahi sa atong gipanganti sa atong kasingkasing, hinumdomi nga ang pagkamaunungon nga atong gipasalig sa kawsa ni Kristo mao ang labing gamhanan nga debosyon sa atong kinabuhi. Bisan og si Isaias nagpasalig pag-usab kanato nga anaa kini “bisag walay kwarta ug walay bayad” [Isaias 55:1]—ug kini mao—kinahanglan kita nga andam, gamit sa linya ni T. S. Eliot, magkinahanglan kini “sa tanan nga anaa kanato” [“Little Gidding,” sa T. S. Eliot: Collected Poems, 1909–1962 (1963), 209]. (Jeffrey R. Holland, “Ang Labing Dako nga Katigayonan,” Liahona, Nob. 2021, 8)

Si Presidente Marion G. Romney (1897–1988) sa Unang Kapangulohan mitudlo:

Kon ang kinabuhi sa yuta mahuman na ug ang mga butang makita sa ilang tinuod nga panglantaw, kita mas klarong makakita ug makaamgo kon unsa ang balik-balik nga gisulti kanato sa Ginoo ug sa iyang mga propeta, nga ang mga bunga sa ebanghelyo mao lamang ang mga tumong nga takos sa hingpit nga mga paningkamot sa kinabuhi. Ang ilang tag-iya makaangkon og tinuod nga bahandi—bahandi sa panglantaw sa Ginoo sa mga mithi. (Marion G. Romney, sa Conference Report, Okt. 1949, 39)

Sa unsang paagi nga ang unsay gitanyag ni Jesukristo kanato lahi gikan sa mga kalipay sa kalibotan?

Si Elder Ulisses Soares sa Korum sa Napulog Duha ka Apostoles mitudlo:

Ang mga tawo bisan asa adunay gipangita. Sa ilang kaugalingong paagi, ang tinud-anay nilang gipangita mao ang kalipay. Apan, sama sa kamatuoran mismo, daghan ang natago gikan sa kalipay “tungod kay sila wala masayod asa kini pangitaa” (Doktrina ug mga Pakigsaad 123:12).

Tungod kay wala sila masayod kon asa pangitaon ang tinuod ug mahangtorong kalipay, ila kining gipangita diha sa mga butang nga sa tinuoray naghatag og lumalabay lamang nga kalingawan— pagpalit og mga butang, pagtinguha sa pasidungog ug pagdayeg sa kalibotan pinaagi sa dili angay nga kinaiya, o pagtutok sa pisikal nga katahom ug kamadanihon.

Ang kalingawan sa kasagaran masaypan isip kalipay. Daw makita nga kon mas magtinguha ang mga tawo og lumalabay nga kalingawan, mas mahimo silang dili malipayon. Kasagaran, ang kalingawan molungtad lamang og mubong panahon. (Ulisses Soares, “Paths to True Happiness,” Ensign, Abr. 2018, 14)