2 Nefia 31:14–21

“Tsy maintsy mibosesika handroso ianareo”

Indraindray dia mety ho sarotra ny fahitana ny dia mankany amin’ny fiainana mandrakizay. Ny Raintsika any An-danitra sy i Jesoa Kristy Zanany dia tsy namela antsika ho irery amin’izany dia izany. Te hanampy antsika eny an-dalana Izy ireo. Ity lesona ity dia afaka manampy anao hampitombo ny fanirianao hibosesika handroso sy haharitra hatramin’ny farany mba hahatongavanao amin’ilay tanjonao farany: fiainana mandrakizay miaraka amin’ny Rainao any An-danitra.

Ilay dia lavitra ezaka ataontsika

• Amina hazakazaka lavitra ezaka iray, inona no zavatra mety hahatonga ny mpihazakazaka iray hiala an-daharana?

• Inona no mety hamporisika ny mpihazakazaka iray hamarana ny hazakazaka rehefa mihamafy izany?

ChurchofJesusChrist.org

Saintsaino ireto manaraka ireto:

• Inona no mandrisika anao, na afaka mandrisika anao, hibosesika handroso eo amin’ilay dianao hiverina any amin’ny Ray any An-danitra?

• Inona avy olana atrehinao?

Rehefa mandalina ity lesona ity ianao, dia mitadiava fahamarinana na hevi-baovao izay mety hanampy anao handresy ireo olana atrehinao sy hiezaka hiverina any amin’ny Rainao any An-danitra.

Fanasana avy amin’ Andriamanitra

Rehefa avy nampianatra momba ny batisa sy ny fandraisana ny Fanahy Masina i Nefia, dia nampianatra lafiny manan-danja iray hafa eo amin’ny fotopampianaran’i Kristy ka nampiasa teny nolazain’ny Ray any An-danitra mivantana izy. Vakio ny 2 Nefia 31:15 mba hitadiavana ny zavatra nampianarin’ny Ray any An-danitra.

• Inona araka ny eritreritrao no hevitry ny hoe maharitra hatramin’ny farany?

• Inona araka ny eritreritrao no tsy mampitovy ny maharitra fotsiny sy ny maharitra amin’ny alalan’ny fanarahana ny ohatry ny Mpamonjy?

Nampiasa fanoharana i Nefia mba hanampiana antsika haka sary an-tsaina ny diantsika miverina any amin’ny Ray any An-danitra. Vakio ny 2 Nefia 31:17–20 ary manaova sary tsotsotran’ilay lalana nofaritan’i Nefia. Asio soratra ny zavatra asehon’ireo lafin-javatra samihafa hita eny amin’ilay lalana.

• Ahoana no hamintinanao ny zavatra nianaranao?

Zavatra iray ianarantsika avy amin’ireo andininy ireo ny hoe rehefa manaraka ny ohatry ny Mpamonjy isika ary maharitra hatramin’ny farany, dia hahazo ny fiainana mandrakizay miaraka amin’ny Raintsika any An-danitra isika.

• Nahoana ianao no te hahazo fiainana mandrakizay miaraka amin’ny Rainao any An-danitra?

Mibosesika handroso

Ao amin’ny andininy 19–20, i Nefia dia nitanisa toe-tsaina sy fihetsika takina mba hibosesehana handroso eo amin’ny lalana mankany amin’ny fiainana mandrakizay. Avereno jerena ireo andininy ireo ary tanisao manaraka ilay lalana nataonao sary ireo toe-tsaina sy fihetsika hitanao. ChurchofJesusChrist.org

Makà fotoana hanomezana naoty ny tenanao amina maridrefy 1–5 (ka ny 1 dia ambany; ny 5 dia ambony) eo amin’ny fahatakaranao tsara sy fiezahanao miaina ireo toe-tsaina sy fihetsika ireo.

Misafidiana iray amin’ireo andian-teny tianao ho takatra na hiainana tsara kokoa. Mitadiava soratra masina na teny nindramina izay manampy amin’ny fampitomboana ny fahatakaranao. Hevero ny hampiasa ny Torolalana ho an’ny Soratra Masina, ny application Médiathèque de l’Évangile, ireo lahateny nandritra ny fihaonamben’ny Fiangonana maneran-tany, na loharanom-pitaovana azo antoka hafa.

• Inona no nianaranao momba ny toe-tsaina sy ny fihetsika nosafidinao?

• Mety hanao ahoana raha maneho ny toe-tsaina sy fihetsika nosafidinao ny olona iray?

• Oviana no nahatsapanao ny Ray any An-danitra nitahy anao na ny olona iray fantatrao noho ny iray amin’ireo toe-tsaina na fihetsika ireo?

Ny dianao manokana

Eritrereto ny fiainanao sy ny dianao miverina mankany amin’ny Ray any An-danitra amin’izao fotoana izao. Saintsaino hoe aiza ho aiza ianao eo amin’ny faharetana hatramin’ny farany.

1. Valio ny iray amin’ireto fanontaniana manaraka ireto:

   • Inona no nianaranao androany ka manampy anao ho te hibosesika handroso mankany amin’ny Ray any An-danitra?

   • Ahoana no tianao hampiharana ny zavatra nianaranao androany? (Mety ho ohatra amin’izany ny hoe miaina tsara kokoa ny iray amin’ireo andian-teny nohalalininao.)

Vakio ity manaraka avy amin’ny Loholona Jeffrey R. Holland ao amin’ny Kôlejin’ny Apôstôly Roambinifolo ity, ka saintsaino ny zavatra nosoratanao. ChurchofJesusChrist.org

Raha atolotsika an’ Andriamanitra ny fontsika, raha tiantsika i Jesoa Kristy Tompo, raha manao izay tsara indrindra vitantsika isika mba hiainana ny filazantsara, dia ho tena hahafinaritra ny rahampitso, sy ireo andro rehetra hafa, amin’ny farany, na dia tsy tsapantsika ho tena mahafinaritra foana aza izany. Nahoana? Satria izay no itiavan’ny Ray any An-danitra azy! Te hitahy antsika Izy. Fiainana mitondra soa, fiainana feno, ary fiainana mandrakizay no tena tanjon’ilay drafiny feno famindrampo ho an’ny zanany! Izany dia drafitra mifototra amin’ilay fahamarinana hoe “ny zavatra rehetra dia miara-miasa hahasoa izay tia an’ Andriamanitra.” Noho izany dia mitiava hatrany. Miezaha hatrany. Matokia hatrany. Minoa hatrany. Mivoara hatrany. Manohana anao ny lanitra androany sy rahampitso ary mandrakizay. (Jeffrey R. Holland, “Rahampitso dia hanao fahagagana eo aminareo ny Tompo,” Liahona, mey 2016, 127)

Tsy voatery atao: Te hianatra bebe kokoa ve ianao?

Inona no dikan’ny hoe maharitra hatramin’ny farany?

Nampianatra ny Loholona Joseph B. Wirthlin (1917–2009) tao amin’ny Kôlejin’ny Apôstôly Roambinifolo hoe:

Ny faharetana hatramin’ny farany dia midika hoe nanorina mafy ny fiainantsika teo ambonin’ny filazantsara isika, mitoetra ao anatin’ireo fotopampianarana ironan’ny Fiangonana, manompo amim-panetrentena ny namantsika, miaina fiainana tahaka ny an’i Kristy ary mitandrina ireo fanekempihavanantsika. Ireo izay maharitra dia mahay mandanjalanja, tsy miovaova, manetry tena, mivoatra tsy tapaka ary tsy mamitaka. Ny fijoroana ho vavolombelona ananan’izy ireo dia tsy mifototra amina antony an’izao tontolo izao fa mifototra amina fahamarinana, fahalalana, zavatra niainana ary amin’ny Fanahy. (Joseph B. Wirthlin, “Press On,” , Nov. 2004, 101)

Nampianatra ny Loholona Dieter F. Uchtdorf ao amin’ny Kôlejin’ny Apôstôly Roambinifolo hoe:

Ny faharetana hatramin’ny farany dia dingana mameno ny isa-minitra, ny isan’ora, ny isan’andro eo amin’ny fiainantsika, manomboka amin’ny fiposahan’ny masoandro ka hatramin’ny fiposahan’ny masoandro. Izany dia tanterahina amin’ny alalan’ny fitsipi-pifehezantena manokana manaraka ny didin’ Andriamanitra.

Ny filazantsaran’i Jesoa Kristy naverina tamin’ny laoniny dia fomba fiainana. Tsy ho an’ny Alahady ihany izany. Tsy zavatra iray azontsika atao fahazarana sy fomba fotsiny izany raha miandrandra fijinjana ireo fitahiana rehetra nampanantenaina amin’izany isika. “Aza mety hofitahina ianareo; Andriamanitra tsy azo vazivazina, fa izay afafin’ny olona no hojinjany” (Galatiana 6:7). (Dieter F. Uchtdorf, “N’avons-nous pas raison de nous réjouir?,” Liahona, Nov. 2007, 20)

Ahoana raha tsapako fa tsy eo amin’ny lalana izay mitondra mankany amin’ny fiainana mandrakizay aho?

Nampianatra ny Filoha Russell M. Nelson hoe:

Raha toa ianao ka nivily lalana, na raha toa misy zavatra ilainao hajanona mba hanampiana ny sainao sy ny fonao ho madio kokoa, dia androany no fotoana tena tsara hiovana.

Ary raha tsy hainao tsara ny zavatra atao mba hibebahana dia miresaha amin’ny evekanao na amin’ny ray aman-dreninao na izy roa. Hanampy anao hahatakatra ny Sorompanavotan’i Jesoa Kristy izy ireo. Hanampy anao hiaina ilay fifaliana entin’ny fibebahana tena izy hatrany izy ireo.

Miangavy aho, aza mijanona ivelan’ilay lalan’ny fanekempihavanana na dia iray minitra monja intsony. Miverena amin’ny alalan’ny fibebahana marina, izao. (Russell M. Nelson, “Fanantenana ho an’i Isiraely,” Fampaherezam-panahy maneran-tany ho an’ny zatovo, jon. 2018)

Nampianatra ny Loholona Jeffrey R. Holland ao amin’ny Kôlejin’ny Apôstôly Roambinifolo hoe:

Tsy miraharaha loatra ny toerana izay nisy, na misy anao Andriamanitra, fa ny toerana izay tianao haleha amin’ny alalan’ny fanampiany. (Jeffrey R. Holland, “The Best is Yet to Be,” Ensign, Jan. 2010, 27)