Iakopo 5:1–53

“O Le Alii o le Togaolive”

E popole le Atua i Ana fanau uma, o i latou o e amiotonu ma i latou o e filifili ia amiolētonu. Na faasoa mai e Iakopo le talafaatusa a Senosa o laau olive, lea e faafaatusa iai le faataapeapeina o nisi e amiotonu ae o nisi sa lei amiotonu. O lenei talafaatusa o loo faaalia ai foi taumafaiga a le Alii e faapotopoto Isaraelu i aso e gata ai. O lenei lesona e mafai ona fesoasoani ia te oe e lagona ai le alofa o Iesu Keriso mo oe ma tagata uma.

O le alofa o le Atua mo i latou ua se ese

Mafaufau loloto i vaaiga faataitai nei:

Ua lagona e Lisa le tausalaina e uiga i nisi o mea sese sa ia faia talu ai nei. Ua amata ona ia mafaufau pe o popole pea le Atua mo ia ona o nei mea sese.

• O le a sau tala e fai atu pe afai sa e taumafai e fesoasoani i se tasi o i ai ni lagona e pei o Lisa?

• Aisea e ono faigata ai ona iloa pe lagona le alofa o le Atua pe a uma ona tatou filifili e fai le agasala?

O le asō o le a e suesue ai i se tala faatusipaia e faaalia ai le alofa o le Alii mo i latou ua se ese. A o e suesue, saili mo lesona taua e uiga i le naunautaiga o Iesu Keriso e fesoasoani ia i latou ua liliuese mai ia te Ia. Mafaufau loloto pe mafai faapefea e upumoni ua e aoaoina ona fesoasoani ia te oe i ou tulaga.

O tala faatusa o laau olive

Sa valoia e Iakopo o le a teena e Iutaia ia Iesu Keriso (tagai Iakopo 4:15). Ina ia fesoasoani i lona nuu ia malamalama i le ala o le a fesoasoani ai le Faaola i tagata Iutaia e toe foi atu ia te Ia, sa aoao atu ai e Iakopo ia i latou se talafaatusa na tuuina mai e se perofeta e igoa ia Senosa. O se talafaatusa e faaaogaina ai tagata faatusatusa, o mea faitino, ma gaoioiga e aoao atu ai upumoni.

O nisi nei o faatusa autu o le talafaatusa, faatasi ai ma o latou uiga e talafeagai. Mafaufau e lisi nei faatusa i totonu o lau api talaaga mo suesuega po o tusitusiga paia.

Faatusa	Uiga Talafeagai
Faatusa Alii po o le matai o le togaolive	Uiga Talafeagai Iesu Keriso
Faatusa O le tovine	Uiga Talafeagai O le lalolagi
Faatusa Laau o le olive fanua	Uiga Talafeagai O Le aiga o Isaraelu, o le nuu o le feagaiga a le Alii
Faatusa Laau o le olive vao	Uiga Talafeagai Nuuese (o i latou o e e lei osifeagaiga ma le Alii) ma Isaraelu liliuese

1. Faamae’a mea nei:

   Ina ia fesoasoani ia te oe e saunia e aoao e uiga ia Iesu Keriso a o e suesue i le Iakopo 5, tusi le “O mea ua ou aoaoina e uiga ia Iesu Keriso mai le Iakopo 5” i le ogatotonu o se itulau avanoa i lau api talaaga mo suesuega ma tusi se li’o e faataamilo ai. I le lesona atoa, vaavaai mo upumoni ma malamalamaaga e uiga ia Iesu Keriso, le Alii o le tovine. Faamaumau nei mea na maua i totonu pe faataamilo i le lio i lau api talaaga mo suesuega.

O lau itulau ua maea o malamalamaaga e uiga ia Iesu Keriso o le mea lea o le a e auina atu o lau meaaoga mo lenei lesona.

Malamalama i le talafaatusa

O le amataga o le talafaatusa e mafai ona faatusa i le taimi a o lumanai le galuega a Iesu Keriso i le olaga nei. Faitau le Iakopo 5:3–6, ma vaavaai mo le mea na tupu i le laau olive fanua, lea e faatusa i le nuu o le feagaiga a le Atua.

• O le a sou manatu o le a le mea e faatusa i ai le pala o le laau?

• O le a sou manatu i le mea e ono faatusa i ai le teuina, eliina, ma le faafaileleina o le tovine e le matai?

• O a ni mea o aoao atu e nei faatinoga ia te oe e uiga ia Iesu Keriso? (Faaopoopo ou malamalamaaga i le tusiga i lau api talaaga.)

Ina ua mavae lenei asiasiga muamua, sa faia e le matai o le tovine isi faatinoga taua e lua e laveai ai lana laau olive fanua:

1. Sa ia poloaiina ia aveesea lala autu o le laau olive ua mamae ma ia sulu ni lala mai se laau olive vao i le laau autu (tagai Iakopo 5:7–10). O le suluina e mafai ona faatusa i taumafaiga a le Alii ina e fesoasoani i Nuuese ia avea ma vaega o Lona nuu o le feagaiga e ala i le papatisoga ma le liuaina.

2. Sa ia ave lala laiti ma mu’amu’a mai le laau autu o le olive ma sulu i latou i vaega eseese o le togaolive (tagai Iakopo 5:8, 13–14). E mafai ona faatusa lenei mea i le faataapeapeina o Isaraelu i vaega eseese o le lalolagi. O nisi o i latou sa faataapeapeina sa amiotonu, e pei o le aiga o Liae (tagai i le 1 Nifae 10:12–13). O isi na faataapeapeina ona o le amioleaga.

O le vaega o totoe o le talafaatusa o loo faaalia ai asiasiga a le alii o le tovine na faia i lona tovine i nisi taimi mulimuli ane. O nei asiasiga e mafai ona faatusa i vaitau eseese i le talafaasolopito o le lalolagi.

Suesue fuaiupu nei, ma vaavaai po o le a le mea na tupu i le laau autu ma laau na faataapeapeina i taimi o asiasiga taitasi.

• Asiasiga lona lua (faatusaina i le taimi o Iesu Keriso): Iakopo 5:15–17, 19–20, 23–28

• Asiasiga lona tolu (faatusaina i le Liliuese Tele): Iakopo 5:29–32, 38–41, 46–47

• O le a se mea na e matauina e uiga i le tulaga o laau ma fua i le taimi o nei asiasiga?

• O le a se mea na e matauina e uiga i upu ma faatinoga a le alii o le togaolive i le taimi o nei asiasiga?

• O a mea o aoao atu e nei upu ma faatinoga ia te oe e uiga i le Faaola? (Faaopoopo ou malamalamaaga i le itulau o lau api talaaga.)

Na faasoa mai e Elder Jeffrey R. Holland o le Korama o Aposetolo e Toasefululua se lesona se tasi e mafai ona tatou aoaoina e uiga i le Atua mai nei fuaiupu:

Ina ua uma ona eli ma teteleina, faasusu ma velevele, teuteu ma uluulu, toe fetuunai, ma faafeusuai, sa lafoai i lalo e le Alii o le tovine lana suo ma ana mea faigaluega ma tagi, ma taualaga atu i soo se tasi e lagona mai, “Se a foi se isi mea e mafai ona ou faia i lou tovine?” [Iakopo 5:41, 49].

O se faatusa e le mafaagaloina lea o le aafiaga o le Atua i o tatou olaga! E maeu le tiga i se matua pe afai e le filifilia o Ia e Lana fanau po o le “talalelei a le Atua” [Roma 1:1] na Ia auina mai! E maeu le faigofie ona alofa i se tasi o le e tupito le alofa ia i tatou! (Jeffrey R. Holland, “O Le Silisiliese o le Atua,” Liahona, Nov. 2003, 72)

• O le a se mea na tulagaese ia te oe mai lenei saunoaga? Aisea?

O taumafaiga faifai pea a le alii o le togaolive

Faitau le Iakopo 5:51–53, ma vaavaai mo mea na filifili le alii o le tovine e fai ina ua uma ona vaai i ana laau i se tulaga ua mamae.

• O le a se mea o aoao mai e nei fuaiupu e uiga i le Alii? (Faaopoopo ou malamalamaaga i le itulau o lau api talaaga.)

• E faapefea ona e aoteleina lesona ua e aoaoina mai le Iakopo 5 i se tasi o fuaitau o le upumoni?

O se upumoni e tasi e mafai ona tatou aoao mai le Iakopo 5 e faapea e alofa le Alii i fanau uma a le Tama Faalelagi ma faaauau pea ona tausia i latou e tusa lava pe latou te liliuese mai ia te Ia.

• E mafai faapefea e lenei upumoni ona fesoasoani i se tasi ia lagona se manao sili atu ia salamo?

• O a nisi o faataitaiga mai tusitusiga paia, pe mai lou olaga ua faapupula ai le auala e faaauau ai ona alofa ma popole le Alii mo tagata e tusa lava pe ua latou liliuese mai ia te Ia?

Mafaufau pe mafai faapefea e mea ua e aoao ma lagonaina i le asō ona aafia ai lou olaga. Mafaufau e faamaumau ou lagona i totonu o lau api talaaga mo suesuega.

Tuu i le faitalia: O e Manao e Aoao Atili?

O a ni faatusa faaopoopo ma ni faauigaga e ono i ai i le Iakopo 5?

O mea nei o loo tuuina mai ai se vaaiga aoao o auiliiliga ma faatusa o le talafaatusa i le Iakopo 5.

Faatusa	Uiga Talafeagai
Faatusa O aa o le laau olive fanua	Uiga Talafeagai O tagata taitoatasi na osifeagaiga i ai le Alii anamua, e pei o Aperaamo, Isaako, ma Iakopo (tagai Iakopo 6:4); ma le isi, o feagaiga e osia e le Alii ma i latou o e mulimuli ia te Ia
Faatusa O fua o le laau	Uiga Talafeagai O olaga po o galuega a tagata
Faatusa Eliina, teuteuina, faafetilaisaina (faalelei eleele)	Uiga Talafeagai O taumafaiga a le Alii ma Ana fanau
Faatusa Toe totoina o lala	Uiga Talafeagai Faataapeapeina o vaega i le lalolagi atoa po o le toefuataiina mai o i latou i o latou uluai tulaga
Faatusa Suluina	Uiga Talafeagai O le faataapeapeina ma le faapotopotoina o le nuu o le feagaiga a le Alii; ma le isi, o le liua o i latou o e ua avea ma vaega o le nuu o le feagaiga a le Alii (suluina o lala olive vao i le laau o le olive fanua)
Faatusa Lala ua mamae	Uiga Talafeagai Amioleaga ma le liliuese
Faatusa Lafoina o lala i le afi	Uiga Talafeagai O faamasinoga a le Atua i e amioleaga

O faatali ea le Atua sei ou faatoilaloina o’u vaivaiga ona alofa mai lea ia te au?

Sa aoao mai Peresitene Dieter F. Uchtdorf, o le sa avea ma uso o le Au Peresitene Sili:

E alofa le Atua ia te oe i lenei lava aso ma aso uma lava.

E le o faatalitali o Ia seiloga e te faatoilaloina ou vaivaiga ma mausa leaga ona faatoa alofa atu lea ia te oe. O loo alofa o Ia ia te oe i le aso faatasi ma se malamalamaaga atoa i au tauiviga. … Na te silafia ou mafatiaga. Na te silafia lou salamo mo taimi na e faaletonu pe toilalo ai. Ma o loo alofa mai pea o Ia ia te oe. (Dieter F. Uchtdorf, “Ola Fiafia i le Talalelei,” Liahona, Nov. 2014, 123)

O le a se mea e mafai e le talafaatusa o laau olive ona fesoasoani ou te malamalama ai e uiga i le Togiola a le Faaola?

Sa faamalamalama mai e Elder Jeffrey R. Holland o le Korama a Aposetolo e Toasefululua:

O lenei talafaatusa e pei ona toe faamatalaina e Iakopo sa faamoemoe e faatatau ia Keriso mai lava i le amataga. …

E pei lava ona taumafai le Alii o le togaolive ma ana tagata faigaluega e faamalosia, teuteu, faamama, ma taumafai e faaleleia a latou laau i se tulaga e tulai mai ai i se mataupu e tasi o se auivi faasolopito o le faataapeapeina ma le faapotopotoina o Isaraelu, o le uiga loloto o le Togiola e lagolagoina ma faalautele ai a latou auaunaga. E ui i otiotiga ma le suluina ma le faafaileleina o laau fefiloi i vaega uma o le tovine, ae o le toe aumaia o i latou i lo latou punavai o le aoaoga autu lea o lenei talafaatusa. O le toe foi mai, salamo, toe faatasia—to-gi-ola—o le savali lenei i le taimi atoa. (Jeffrey R. Holland, O Keriso ma le Feagaiga Fou [1997], 165)