“Mosiah 3:19: Pagsalikway sa Kinaiyanhon nga Pagkatawo,” Manwal sa Magtutudlo sa Basahon ni Mormon (2024)
“Mosiah 3:19,” Manwal sa Magtutudlo sa Basahon ni Mormon
Mosiah 3:19
Pagsalikway sa Kinaiyanhon nga Pagkatawo
Mibati ka ba sukad nga nasagmuyo sa imong mga sayop o kawalay katakos sa pagsunod sa tanang mga sugo sa Dios? Gihulagway ni Hari Benjamin ang atong dili hingpit nga kinaiya nga “ang kinainyahon nga tawo.” Siya mitudlo nga kita makabuntog niini pinaagi sa Pag-ula ni Jesukristo. Ang katuyoan niini nga leksiyon mao ang pagtabang kanimo sa pagtinguha sa tabang sa Manluluwas sa pagbuntog sa imong napukan nga kinaiya.
Atong napukan nga mga kinaiya
Si Presidente Dallin H. Oaks sa Unang Kapangulohan miasoy sa mosunod nga istorya:
Usa ka maalamon nga Cherokee, usa sa lumad nga mga tribo sa Estados Unidos, misugilon sa iyang apo nga lalaki og sambingay mahitungod sa kinabuhi. “Sulod kanako anaay makalilisang nga panagbugno tali sa duha ka lobo,” miingon ang lolo. “Ang usa dautan: puno sa kasuko ug kasina, pagkalooy sa kaugalingon ug kasubo, kahakog ug pagpamakak. “Ang usa maayo: puno sa kamabination ug kamanggiloy-on, kamapainubsanon ug kamatuoran, gugma ug kamaya. Kana nga panagbugno anaa sa sulod sa matag usa kanato.” “Asa nga lobo ang magmadaugon?” nangutana ang apo nga lalaki. (Dallin H. Oaks, “Mga Pagpili,” Alang sa Kalig-on sa mga Kabatan-onan, Sept. 2021, 13; istorya nga gipahiangay gikan ni Shayne M. Bowen, “Kabubut-on ug Pagkamaytulubagon,” Liahona, Sept. 2012, 52)
-
Kon ikaw ang apohan, unsaon kaha nimo pagtubag ang pangutana sa imong apo?
-
Giunsa nimo pagkamatikod niini nga pakigbisog tali sa “duha ka mga lobo” sa imong kaugalingon?
Sa istorya nga gipaambit ni Presidente Oaks, ang tubag sa lolo sa pangutana sa iyang apo kon hain sa lobo ang nagmadaugon mao, “Kadtong imong gipakaon.”
Isip kabahin sa iyang kataposang pakigpulong ngadto sa mga Nephite, si Hari Benjamin mitudlo sa mga kamatuoran nga gipadayag sa anghel ngadto kaniya mahitungod sa atong pagkapukan nga kinaiya ug sa unsang paagi kini makaapekto sa atong relasyon ngadto sa Dios.
Basaha ang Mosiah 3:19, mangita kon giunsa paghulagway ni Hari Benjamin ang usa ka tawo nga adunay mga kinaiya sama niadtong gihulagway sa unang lobo diha sa istorya.
Ang Mosiah 3:19 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron dali nimo kining mapangita. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.
-
Unsay imong nadiskobrehan?
Si Elder David A. Bednar sa Korum sa Napulog Duha ka Apostoles mitudlo:
May kamatuoran, ang kinaiyanhon nga tawo nga gihulagway ni Hari Benjamin anaa sa matag usa kanato. Ang kinaiyanhon nga tawo dili mahinulsulon, kalibotanon ug mahilayon, mapatuyangon ug mapasulabihon, ug puno sa garbo ug hakog. (David A. Bednar, “Kita Nagtuo sa Pagkaputli,” Liahona, Mayo 2013, 42)
-
Ngano sa imong hunahuna nga ang kinaiyanhon nga tawo usa ka kaaway sa Dios?
-
Unsa kaha ang gipasabot sa “pagpakaon” sa kinaiyanhon nga lalaki o babaye nga anaa sa sulod kanatong tanan?
Hunahunaa ang pipila sa mga paagi nga imong namatikdan ang mga kinaiya o batasan sa kinaiyanhon nga lalaki o babaye sa imong kinabuhi. Samtang nagpadayon ka sa pagtuon, pangitaa ang mga pagtulun-an nga makatabang kanimo sa imong mga paningkamot sa pagbuntog niini nga mga kinaiya ug mga batasan.
Pagbuntog sa kinaiyanhon nga tawo
Basaha ang Mosiah 3:19 pag-usab, niining higayona mangita sa unsay gitudlo ni Hari Benjamin kon unsaon nato pagbuntog ang kinaiyanhon nga tawo.
-
Unsa ang imong nakat-onan gikan niini nga bersikulo nga makatabang kanimo sa pagbuntog sa kinaiyanhon nga tawo?
Gikan sa Mosiah 3:19, kita nakat-on nga pinaagi sa pagtugyan ngadto sa mga pagdani sa Balaang Espiritu, kita makabuntog sa kinaiyanhon nga tawo ug mahimong mga santos pinaagi sa Pag-ula ni Jesukristo.
-
Tubaga ang mosunod nga mga pangutana:
-
Sa imong hunahuna sa unsang paagi si Jesukristo makatabang kanato sa pagsalikway sa kinaiyanhon nga tawo ug mahimong usa ka santos pinaagi sa Iyang Pag-ula?
-
Unsa sa imong hunahuna ang gipasabot sa pagtugyan ngadto sa mga pagdani sa Balaang Espiritu? Sa unsang paagiha sa imong hunahuna ang pagbuhat niini makatabang kanimo sa pagbuntog sa kinaiyanhon nga pagkatawo?
-
Paggamit og mga cross-reference aron sa pagpalawom sa imong pagsabot
Ang paggamit og mga cross-reference usa ka kahanas sa pagtuon sa kasulatan nga makatabang sa pagpalawom sa imong pagsabot sa usa ka tudling sa kasulatan. Pagpraktis niini nga kahanas pinaagi sa pagpangita og mga cross-reference nga makapalawom sa imong pagsabot sa mga pagtulun-an sa Mosiah 3:19.
Ikonsiderar ang pagpangita og mga cross-reference pinaagi sa pagpangita sa termino nga “kinaiyanhon nga tawo” o ubang importante nga mga pulong gikan sa Mosiah 3:19 diha sa Gospel Library app. Mahimo usab nimong pangitaon ang pipila ka mga pakisayran sa kasulatan ug mga hilisgotan nga gilista sa footnotes alang sa Mosiah 3:19.
Laing kapilian mao ang pagtuon sa pipila o sa tanan sa mosunod nga mga tudling sa kasulatan:
-
Tubaga ang mosunod nga mga pangutana:
-
Unsa ang labing menos duha ka cross-reference nga imong gigamit alang niini nga kalihokan?
-
Sa unsang paagi kini nga mga cross-reference nakapalambo sa imong pagsabot o pagdayeg sa mga pagtulun-an sa Mosiah 3:19?
-
Unsa ang imong nakat-onan kon sa unsang paagi ang Manluluwas makatabang kanato sa pagbuntog sa kinaiyanhon nga tawo ug mahimong usa ka santos?
-
Paggamit niini sa imong kinabuhi
-
Kompletoha ang mosunod:
Karon nga mas nakakat-on na ka mahitungod sa unsay ipasabot sa pagsalikway sa kinaiyanhon nga tawo ug mahimong usa ka santos pinaagi sa Pag-ula sa Manluluwas, hunahunaa kon unsaon nimo sa paggamit niini nga mga pagtulun-an sa imong kinabuhi. Unsa ang usa ka butang nga imong gibati nga nadasig nga buhaton o hunongon sa pagbuhat? Irekord ang imong mga hunahuna ug mga impresyon diha sa imong journal sa pagtuon.