Doktrinal nga Kahanas: Mosiah 3:19

“[Isalikway] ang … Kinaiyanhon nga Pagkatawo ug [Mahimo] nga usa ka Santos pinaagi sa Pag-ula ni Jesukristo.”

batan-on nga naggakos sa usag-usa

Sa imong pagtuon sa Mosiah 3:19, imong nakat-onan unsaon pagbuntog ang kinaiyanhon nga tawo pinaagi sa Pag-ula ni Jesukristo. Kini nga leksiyon makatabang nimo sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan alang sa Mosiah 3:19. Makatabang usab kini kanimo nga mapasabot ang doktrina nga gitudlo niini nga tudling ug magamit ang mga baroganan sa pag-angkon og espirituhanong kahibalo sa tinud-anay nga mga sitwasyon sa kinabuhi.

Isag-ulo ug ipasabot

Atol sa miaging leksiyon, imong nakat-onan ang mosunod nga kamatuoran gikan sa Mosiah 3:19: Pinaagi sa pagtugyan ngadto sa mga pagdani sa Balaang Espiritu, kita makabuntog sa kinaiyanhon nga pagkatawo ug mahimong mga santos pinaagi sa Pag-ula ni Jesukristo. Ang mahinungdanong hugpong sa mga pulong sa kasulatan alang sa Mosiah 3:19 mao ang “[Isalikway] ang … kinaiyanhon nga pagkatawo ug [mahimo] nga usa ka Santos pinaagi sa Pag-ula ni Jesukristo.”

Pagdrowing og triyanggulo sama sa mosunod diha sa imong journal sa pagtuon. Bahina ang pakisayran ug ang mahinungdanon nga hugpong sa mga pulong sa kasulatan sa Mosiah 3:19 ngadto sa upat ka bahin. Isulat ang upat ka bahin sa imong triyanggulo. Sama pananglit, mahimo nimong isulat ang “Mosiah 3:19” sa ibabaw nga bahin sa imong drowing, “[Isalikway] ang … kinaiyanhon nga pagkatawo” sa ikaduhang bahin, ug uban pa. Pagpraktis sa pagsag-ulo sa tibuok hugpong sa mga pulong nga magsugod gikan sa ibabaw ngadto sa ubos sa imong drowing hangtod nga komportable ka na sa pag-recite niini nga dili magtan-aw.

yano nga itom-ug-puti [black-and-white] nga hulagway sa usa ka triyanggulo nga adunay upat ka mga seksiyon

icon, rekord

1. Kompletoha ang mosunod:

   Hunahunaa nga nagtudlo ka og leksiyon mahitungod sa Mosiah 3:19 ngadto sa klase sa primary sa imong ward o branch. Unsaon kaha nimo sa pagpasabot ang mensahe niini nga tudling sa doktrinal nga kahanas ngadto sa grupo sa gagmay nga mga bata? Pagsulat og mubo nga parapo sa imong kaugalingon nga mga pulong nga nagpasabot sa doktrina sa Mosiah 3:19.

Pagbansay sa paggamit

Rebyoha sa daklit ang mga baroganan sa pag-angkon og espirituhanong kahibalo sa mga parapo 5–12 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022). Pagpili og bisan usa sa tulo ka mga baroganan ug pagdrowing og simbolo o yano nga hulagway nga imong gibati nga nagrepresentar niini.

Si Nathan nakigbisog sa pagpugong sa iyang kasuko sulod sa daghang katuigan. Kanunay siyang masuko sa iyang mga igsoon ug mga ginikanan ug mopataas sa iyang tingog. Naglisod usab siya sa pakighalobilo sa uban diha sa eskwelahan. Usa ka adlaw, samtang nakig-istorya sa iyang mga ginikanan bahin sa iyang pagkadali masuko, siya misingka: “Unta mahimo kong mas mapailobon nga tawo, apan tan-aw nako dili nako kaya. Ingon ani gyud ko!”

2. Tubaga ang mosunod nga pangutana sa usa ka parapo [paragraph] nga adunay labing menos lima ka kapahayag [sentence].

   • Unsaon nimo paggamit ang mga pagtulun-an sa Mosiah 3:19 ug ang mga baroganan sa pag-angkon og espirituhanong kahibalo sa pagtabang niini nga sitwasyon?

Ikonsiderar ang mosunod kon kinahanglan nimo og giya sa pagsabot kon unsaon sa pagtubag ang nauna nga pangutana.

Tinguhaa ang dugang nga panabot pinaagi sa balaanong gitudlo nga mga tinubdan

• Sa imong hunahuna sa unsang paagi ang mga pagtulun-an sa Mosiah 3:19 makatabang niini nga sitwasyon?

• Unsa ang ubang mga kasulatan o mga pamahayag gikan sa mga lider sa Simbahan nga sa imong hunahuna nga makatabang?

Susihon ang mga konsepto ug mga pangutana inubanan sa mahangtorong panglantaw

• Unsa ang pipila ka mga paagi nga imong makita kini nga kabalaka uban sa mahangtorong panglantaw?

• Sa unsa nga paagi nga ang paghinumdom sa mga katuyoan sa Ginoo sa pagtugot kanato sa pagpuyo sa usa ka napukan nga kalibotan makatabang?

• Unsa ang imong nahibaloan mahitungod ni Jesukristo ug sa Iyang Pag-ula nga makahimo og kalainan niini nga sitwasyon?

Lihokon inubanan sa hugot nga pagtuo

• Unsa ang pipila ka mga paagi nga ang usa ka tawo niini nga sitwasyon makalihok inubanan sa hugot nga pagtuo?