Atamai i Aoaoga Faavae: Mosaea 3:19

“[Tuu] Ese le Tagata Natura ma [Avea] ma Tagata Paia e ala i le Togiola a Iesu Keriso.”

I lau suesuega o le Mosaea 3:19, ua e aoao ai i le ala e faatoilalo ai le tagata natura e ala i le Togiola a Iesu Keriso. O lenei lesona e mafai ona fesoasoani ia te oe e tauloto ai le mau faasino o le atamai i aoaoga faavae ma le fasifuaitau autu o le mau mo le Mosaea 3:19. E mafai foi ona fesoasoani ia te oe e faamatala ai le aoaoga faavae o loo aoaoina i lenei fuaitau ma faaaoga mataupu faavae o le mauaina o le malamalama faaleagaga i tulaga moni o le olaga.

Tauloto ma faamatala

I le taimi o le lesona talu ai, sa e aoaoina ai le upumoni lenei mai le Mosaea 3:19: O le gauai atu i uunaiga a le Agaga Paia, e mafai ai ona tatou faatoilaloina le tagata natura ma avea ma tagata paia e ala i le Togiola a Iesu Keriso. O le fasifuaitau autu o le mau mo le Mosaea 3:19 o le “[Tuu] Ese le Tagata Natura ma [avea] o se tagata paia e ala i le Togiola a Iesu Keriso.”

Tusi se faatafatolu e pei o lenei i lau api talaaga mo suesuega. Vaevae le mau faasino ma le fasifuaitau autu o le mau mo le Mosaea 3:19 i ni vaega se fa. Tusi vaega e fa i lau tafatolu. Mo se faataitaiga, e mafai ona e tusia le “Mosaea 3:19” i le vaega pito i luga o lau ata, “[Tuu] ese le tagata natura” i le vaega lona lua, ma isi mea faapena. Faataitai le taulotoina o le fasifuaitau atoa e agai mai luga i le pito i lalo o lau ata seia oo ina e lagona le toafimalie i le taulotoina e aunoa ma le tilotilo i ai.

1. Faamaea mea nei:

   Manatu faapea o loo e aoaoina atu se lesona e uiga i le Mosaea 3:19 i se vasega o le peraimeri i lau uarota po o le paranesi. E mafai faapefea ona e faamatalaina le sāvali o lenei fuaitau o le atamai i aoaoga faavae i se vaega o tamaiti laiti? Tusi se parakalafa puupuu i au lava upu e faamatala ai le aoaoga faavae o le Mosaea 3:19.

Faataitai le faaaogaina

Toe iloilo faapuupuu mataupu faavae o le mauaina o le malamalama faaleagaga i parakalafa 5–12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022). Filifili ia lē itiiti ifo ma le tasi o mataupu faavae e tolu ma tusi se faatusa po o se ata faigofie e te lagona e faatusa i ai.

Sa tauivi Tovia ma le puleaina o lona ita mo le tele o tausaga. E masani ona ita o ia i ona tei ma ona mātua ma siisii lona leo. O loo tauivi foi o ia ina ia fegalegaleai ma isi i le aoga. I se tasi aso, a o talanoa atu i ona mātua e uiga i le vave o lona ita, sa ia ee atu: “Maimau pe ana mafai ona avea au ma se tagata e sili atu le onosai, ae ou te lagona e lē mafai. Ona pau lava o au ia.”

2. Tali le fesili lenei i se parakalafa e lē itiiti ifo ma le lima ni fuaiupu.

   • E faapefea ona e faaaogaina aoaoga o le Mosaea 3:19 ma mataupu faavae o le mauaina o le malamalama faaleagaga e fesoasoani ai i lenei vaaiga faataitai?

Mafaufau i mea nei pe afai e te manaomia se taitaiga e malamalama ai pe faapefea ona tali le fesili na i ai muamua.

Saili le malamalama atili e ala i punaoa mamana ua filifilia

• O le a sou manatu e faapefea ona fesoasoani aoaoga o le Mosaea 3:19 i lenei tulaga?

• O a ni isi o mau po o saunoaga mai taitai o le Ekalesia e te manatu e mafai ona fesoasoani?

Iloilo manatu faavae ma fesili ma se vaaiga e faavavau.

• O a nisi o auala e mafai ona e vaai atu ai i lenei popolega faatasi ma se vaaiga e faavavau?

• E mafai faapefea ona fesoasoani le manatuaina o faamoemoega o le Alii mo le faatagaina o i tatou e ola i se lalolagi pa’ū?

• O le a se mea ua e iloa e uiga ia Iesu Keriso ma Lana Togiola e mafai ona faia ai se eseesega i lenei tulaga?

Faatino i le faatuatua

• O a nisi o auala e mafai ai e se tasi i lenei tulaga ona faatino i le faatuatua?