Atamai i Aoaoga Faavae: Mosaea 4:9

“Ia talitonu i le Atua”

talavou o lo o tilotilo i luga, ma mafaufau loloto

I lau suesuega o le Mosaea 4:9–10, ua e aoaoina ai le taua o le talitonu i le Atua. O lenei lesona e mafai ona fesoasoani ia te oe e tauloto mau faasino o le atamai i aoaoga faavae ma le fasifuaitau autu o le mau mo le Mosaea 4:9, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga moni o le olaga.

Tauloto ma faamatala

Toe mafaufau i lou aafiaga i le suesueina o le valaaulia a le Tupu o Peniamina i le Mosaea 4:9–10 mo lona nuu ia talitonu i le Atua. Afai e manaomia, mafaufau e toe faitau nei fuaiupu ma toe iloilo le siata na e fatuina i lau api talaaga mo suesuega mai le lesona talu ai.

• O a ni uiga po o ni uiga paia taua o le Atua lea na valaaulia ai e le Tupu o Peniamina lona nuu ia talitonu i ai?

• E mafai faapefea e le talitonu i nei uiga paia o le Atua ona aafia ai lou olaga?

Filifili se tasi o uiga po o uiga paia o le Atua o loo ta’ua i le Mosaea 4:9–10 lea na aoao atu e le Tupu o Peniamina lona nuu ia talitonu i ai. Faasoa atu pe mafai faapefea ona e faamalamalama atu lenei mea i se tasi e le malamalama i lona uiga.

O le fasifuaitau autu mo le Mosaea 4:9 o le “Ia talitonu i le Atua; … ia talitonu ua ia te ia le poto uma.” O le gaoioiga lenei e mafai ona fesoasoani ia te oe e tauloto ai lenei mau faasino ma le fasifuaitau autu o le mau.

I lau api talaaga mo suesuega, tusi le upu talitonu i mataitusi tetele. I lalo ifo o lenei, tusi ai le fasifuaitau i le Atua, ma i lalo ifo o lenei tusi ai le fasifuaitau ia talitonu ua ia te ia le poto uma. Ona tusi lea o le mau faasino Mosaea 4:9 i mataitusi tetele i le pito i lalo. Amata mai le pito i luga, fai leotele laina taitasi a o e faasino atu i le upu, fasifuaitau, po o le mau faasino. Toe fai faatele le gaoioiga lenei seia oo ina e tuuto atu lenei mea i le manatuaga.

Faataitai le faaaogaina

Toe iloilo mataupu faavae o le mauaina o le malamalama faaleagaga i parakalafa 5–12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022). E mafai ona e taumafai e lisi mataupu faavae uma e tolu mai lou manatuaga. Ona tusi lea i lau api talaaga mo suesuega pe na faapefea ona e faaaogaina, ae pe mafai foi ona faaaoga, nei mataupu faavae i lou olaga.

Faitau le vaaiga faataitai lenei, mafaufau i tulaga i lou olaga na luitauina ai lou talitonuga i le Atua pe e lei malosi foi e pei ona e manao ai.

O Myra o loo i totonu o se vasega lea e ulagia ai e le faiaoga ia tapuaiga ma e lē talitonu i le Atua. O nei faamatalaga na faalavelave ia Myra i le taimi muamua, ae i le silia ma ni nai masina i le vasega, ua amata ona ia mafaufau pe faamata e sa’o lona faiaoga. Sa talitonu lava o ia i taimi uma i le Atua, ae o lenei ua ia lagona atonu ua amata ona ia masalosalo i le i ai o le Atua.

Atonu e te manao e sauni e faaaoga mataupu faavae o le mauaina o le malamalama faaleagaga i le tulaga o Myra e ala i le matamata i le vitio “O Lona Alofa Tunoa: O le Filifili e Talitonu i le Atua” (4:07), o loo maua i le ChurchofJesusChrist.org. A o e matamata, matau le auala na faaaoga ai e le alii talavou i lenei vitio ia mataupu faavae o le mauaina o le malamalama faaleagaga ma pe faapefea ona faatatau ia Myra.

Faaaoga mataupu faavae o le mauaina o le malamalama faaleagaga ma le aoaoga faavae i le Mosaea 4:9 e fesoasoani ai i le tulaga o Myra po o se isi tulaga faataitai e fesootai i le talitonu i le Atua e sili atu ona talafeagai i lou olaga.

Mafaufau i au tali i fesili nei a o e mafaufau pe faapefea ona e fesoasoani ia Myra.

Faatino i le faatuatua

• O a ni faatinoga faamaoni e mafai ona faia e se tasi pe afai o loo latou tauivi e talitonu i le Atua?

• E mafai faapefea e le faia o nei faatinoga ona fesoasoani ia i latou?

Iloilo manatu faavae ma fesili ma se vaaiga e faavavau.

• O a aoaoga mai le Mosaea 4:9 e mafai ona fesoasoani i se tasi i lenei tulaga ia maua ai se vaaiga e faavavau?

• E mafai faapefea e le filifiliga a se tasi e talitonu pe lē talitonu i le Atua ona aafia ai lo latou lumanai?

Saili le malamalama atili e ala i punavai mamana ua filifilia

• O a ni fuaitau o mau po o ni aafiaga faaopoopo (na maua e oe po o isi) e mafai ona fesoasoani i se tasi o i ai lenei luitau?

• O fea se isi mea e mafai e tagata ona maua ai faamatalaga e fesoasoani ai ia i latou i lenei tulaga? Saili ia lē itiiti ifo ma le tasi se isi punavai ma faamatala pe mafai faapefea ona fesoasoani.

1. Faasoa atu pe faapefea ona e faaaogaina mataupu faavae o le mauaina o le malamalama faaleagaga ma le aoaoga faavae o loo aoaoina i le Mosaea 4:9 e fesoasoani ai ia Myra i lona tulaga.