Mosaea 4

“Faatumauina Pea le Faamagaloina o a Outou Agasala”

E faapefea ona ese lou olaga pe a e lagonaina le faateleina o le olioli ma le filemu o le mafaufau? O sa Nifae, na uunaia e aoaoga a le Tupu o Peniamina, sa “faatumulia i le olioli” ma sa lagonaina le “filemu o le mafaufau” a o latou salamo ma maua se faamagaloga o a latou agasala (Mosaea 4:3). Ona aoao atu lea e le Tupu o Peniamina ia i latou le ala e faatumau ai lenei faamagaloga o a latou agasala. O lenei lesona e mafai ona fesoasoani ia oe e malamalama ai i mea e mafai ona e faia e maua ma faatumau ai se faamagaloga o au agasala.

Tumau malosi faaleagaga

Vaai i le ata lenei ma mafaufau po o le a le mea e manaomia ona fai e se tasi e tausia ai le maloloina ma le tuputupu ae o lenei laau.

• O le a le mea e tupu i lenei laau pe afai e teuina i totonu o se potu pogisa pe le fuiina lava?

• E faapefea ona fesootai lenei mea i lo tatou soifua maloloina faaleagaga ma manaoga?

E pei o le tausia o se laau, o le tausia o i tatou lava ia maloloina faaleagaga e manaomia ai taumafaiga faifai pea. I le Mosaea 4, na aoao ai e le Tupu o Peniamina lona nuu i mea na manaomia ona latou faia e tumau ai le malosi faaleagaga. A o e suesue, mafaufau loloto i aoaoga o le a fesoasoani ia te oe i au taumafaiga e tumau malosi faaleagaga ai i lou olaga atoa ma tuputupu ae ia avea atili e faapei o le Faaola.

Faatumauina o se faamagaloga o a tatou agasala

Manatua o se vaega o le lauga a le Tupu o Peniamina, sa ia faasoa mai ai se savali sa ia mauaina mai se agelu e uiga i le afio mai o Iesu Keriso ma le taua o le faatoilaloina o lo tatou natura pa’ū e ala i le Togiola a le Faaola (tagai Mosaea 3).

Faitau le Mosaea 4:1–3, ma vaavaai mo faamanuiaga ma lagona na oo i ai le nuu o le Tupu o Peniamina.

• O le a se mea e tumatila ia te oe mai nei fuaiupu?

• O le a sou manatu o le a se mea e manaomia ona fai e tagata e tumau ai i lenei tulaga faamamaina ma le olioli?

Vaai faalemafaufau pe faape’i le avea ai ma se tasi o le nuu o le Tupu o Peniamina i lena aso. Mafaufau pe o le a sou manatu i se aafiaga o lenei mea i ou lagona e uiga ia Iesu Keriso ma pe o le a foi se mea mai lenei aafiaga, e te manao e tumau ia oe e faavavau.

• O le a se eseesega e ono faia i lou olaga pe afai e te lagonaina le faamagaloina o au agasala i le tele o taimi?

O le vaega o totoe o aoaoga a le Tupu o Peniamina i le Mosaea 4 ua fesoasoani tatou te malamalama ai ina ua uma ona tatou maua le faamagaloga mai ia Iesu Keriso, e tatau ona tatou faia ni taumafaiga e tumau pea i le faamagaloina o a tatou agasala.

• O le a sou manatu o le a le eseesega i le va o le mauaina ma le faatumauina o se faamagaloga o a tatou agasala?

• Aisea e te manatu ai e taua mo i tatou le taumafai e faatumau ai pea se faamagaloga o a tatou agasala i o tatou olaga atoa?

Mafaufau pe faapefea ona faatatau lenei upumoni i lou lava olaga. O le a le lelei o lou lagona o lo o e faatumauina pea se faamagaloga o au agasala? A o faaauau pea ona e suesue, vaavaai mo upumoni e mafai ona fesoasoani ia oe e malamalama ai i mea e mafai ona e faia e faatumau ai se faamagaloga o au agasala.

I lau api talaaga mo suesuega, mafaufau e tusi se ulutala ua faaulutalaina, “O mea e mafai ona tatou faia e faatumau ai pea se faamagaloga o a tatou agasala.”

Faitau le Mosaea 4:9–16 ma vaavaai mo aoaoga a le Tupu o Peniamina e fesoasoani tatou te malamalama ai i le ala e mafai ai ona tatou faatumau ai pea se faamagaloga o a tatou agasala.

1. Tali fesili nei:

   • O a ni mea e le itiiti ifo ma le tolu na aoao mai e le Tupu o Peniamina e tatau ona tatou faia ina ia faatumau ai pea se faamagaloga o a tatou agasala e sili ona tumatila ia te oe?

   • O le a sou manatu o le a faapefea mo oe le faaaogaina o nei valaaulia mai le Tupu o Peniamina i lou olaga?

   • E mafai faapefea e le faia o nei mea ona fesoasoani ia oe e faatumau ai pea se faamagaloga o au agasala?

O a’u laasaga e sosoo ai

Mafaufau po o le a le lelei o lo o e faia i le faaaogaina o aoaoga a le Tupu o Peniamina mai nei fuaiupu. E mafai ona e faia lenei mea e ala i le taulai atu i amioga e tolu pe fa na e faatoa e faailoaina ma fesili ifo ia te oe lava i fesili e pei o le:

• O le a le tele o taumafaiga ou te faia i lenei mea?

• E faafia ona ou faia lenei mea?

• O a lagona ma uunaiga ua ou lagonaina i le asō e ono fautua mai ai ni vaega e mafai ona ou faaleleia?

Ia faia ma le agaga tatalo se fuafuaga patino e faaleleia atili ai i se vaega se tasi. Mafaufau i soo se faafitauli e te ono feagai a o e taumafai e faaleleia i lenei vaega ma mea e mafai ona e faia e maua ai le fesoasoani a le Alii e faatoilalo ai nei luitau. Atonu e fesoasoani le faasoa atu o lau sini i se tagata o le aiga po o se tasi e pele ia te oe o le e mafai ona lagolagoina oe i lenei mea. Atonu foi e te manao e faaaofia lenei sini i au sini mo Tamaiti ma le Autalavou.

Tuu i le faitalia: O e Manao e Aoao Atili?

Mosaea 4:2. O le a le uiga o le nuu o le Tupu o Peniamina na “vaai i latou lava … ua maualalo lava nai lo le efuefu o le eleele”?

Atonu na manatu le nuu o le Tupu o Peniamina o i latou lava ua “maualalo lava nai lo le efuefu o le eleele” (Mosaea 4:2) ona o le efuefu o le eleele e usitaia e le aunoa poloaiga a le Alii, ae e tele lava ina le usitaia e fanau a le Atua (tagai Helamana 12:4–8). Manatua e faatauaina e le Tama Faalelagi Ana fanau ma o a tatou agasala e le aafia ai lo tatou taua faalelagi (tagai Mataupu Faavae ma Feagaiga 18:10).

Na aoao mai Sister Joy D. Jones, sa avea muamua ma Peresitene Aoao o le Peraimeri:

Afai tatou te agasala, e faaitiitia lo tatou agavaa, ae le faaitiitia ai lava lo tatou taua! E faaauau pea ona tatou salamo ma taumafai malosi pea ina ia faapei o Iesu faatasi ai ma lo tatou taua. (Joy D. Jones, “O Le Taua le Mafuatiaina,” Liahona, Nov. 2017, 14)

O le a le matafaioi e faia e sauniga o le talalelei i lo tatou faatumauina o se faamagaloga o a tatou agasala?

Na aoao mai Elder David A. Bednar o le Korama o Aposetolo e Toasefululua:

I le avea ai ma tagata o le Ekalesia toefuataiina a le Alii, ua faamanuiaina ai i tatou uma e ala i lo tatou uluai faamamaina mai le agasala e fesootai ma le papatisoga ma e ala i le gafatia mo se faamamaina faifai pea mai le agasala lea ua mafai e ala i le mafutaga ma le mana o le Agaga Paia. …

O nisi taimi e faailoa ai e le Au Paia o Aso e Gata Ai le moomooga ina ia mafai ona toe papatisoina—ma o lea e oo ai ina mama ma agavaa e pei o le aso na latou mauaina ai lo latou sauniga faaola muamua o le talalelei. E mafai ona ou fautua atu ma le faaaloalo e le o faamoemoe lo tatou Tama Faalelagi ma Lona Alo Pele mo i tatou ia maua na lagona o le faafouga faaleagaga, faafouina, ma le toefuataiina faatasi i o tatou olaga. O faamanuiaga o le mauaina ma le faatumauina pea o se faamagaloga o a tatou agasala e ala i sauniga o le talalelei e fesoasoani tatou te malamalama ai o le papatisoga o se vaega o le aluese i la tatou malaga faaleagaga i la le tino; e le o se taunuuga e tatau ona tatou moomoo e toe asiasi pea lava i ai. (David A. Bednar, “[Faatumauina] Pea le Faamagaloina o a Outou Agasala,” Liahona, Me 2016, 61–62)

O le a se mea e mafai ona ou faia e tausia ai e matitiva ma e le tagolima?

Na aoao mai Elder Dieter F. Uchtdorf o le Korama a Aposetolo e Toasefululua:

O le ala a le Alii e tausia ai e le tagolima e ese lava mai le ala a le lalolagi. Ua fetalai le Alii “E tatau ona faia i la’u lava ala” [Mataupu Faavae ma Feagaiga 104:16]. E le gata ina gauai mai o Ia i o tatou manaoga vave; ae o lo o Ia popole foi mo lo tatou alualu i luma e faavavau. Mo lenei mafuaaga, ua i ai pea i le ala a le Alii le ola faalagolago o le tagata ia te ia lava ma o le auauna atu i o tatou tuaoi o se faaopoopoga lea i le tausia o e matitiva. (Dieter F. Uchtdorf, “O Le Faia i le Ala a le Alii,” Liahona, Nov. 2011, 54)

Mafaufau e saili le uepisaite JustServe.org mo avanoa e tausia ai e matitiva ma e le tagolima i la outou eria.