Seminary
Mosiah 21–24, Bahin 1: Pagpangita sa mga Katuyoan sa Ginoo alang sa Atong mga Pagsulay ug mga Kasakit

“Mosiah 21–24, Bahin 1: Pagpangita sa mga Katuyoan sa Ginoo alang sa Atong mga Pagsulay ug mga Kasakit,” Manwal sa Magtutudlo sa Basahon ni Mormon (2024)

“Mosiah 21–24, Bahin 1,” Manwal sa Magtutudlo sa Basahon ni Mormon

Mosiah 21–24, Bahin 1

Pagpangita sa mga Katuyoan sa Ginoo alang sa Atong mga Pagsulay ug mga Kasakit

batan-on nga namalandong, kinsa makita nga masulub-on

Unsaon nimo sa pagpasabot ngadto sa usa ka tawo ngano nga ang Ginoo mitugot kanato nga makasinati og mga pagsulay ug mga kasakit? Ang Mosiah 21–24 naghulagway sa mga kasinatian sa katawhan ni Limhi ug sa katawhan ni Alma, kinsa parehong nakasugat og lisod nga mga hagit. Kini nga leksiyon gituyo aron sa pagtabang kanimo nga mobati og dugang nga pagsalig sa Langitnong Amahan ug ni Jesukristo kon ikaw makasinati og mga pagsulay ug mga kasakit sa imong kinabuhi.

Pagpas-an sa mga palas-anon

tawo nga nagpas-an og bug-at nga backpack

Handurawa nga ang imong mga pagsulay, palas-anon, ug mga kasakit girepresentar sa mga bato nga kinahanglan nimong pisikal nga pagadad-on sa usa ka bag o backpack.

  • Unsa ang pipila sa mga pagsulay o palas-anon nga masinati sa mga tin-edyer nga morag bug-at nga mga bato sa usa ka backpack?

  • Unsa nga mga pangutana ang tingale aduna ang mga tawo mahitungod sa mga palas-anon nga ilang gipas-an?

Paggahin og kadiyot sa paghunahuna mahitungod sa pipila ka mga pagsulay ug mga palas-anon nga imong giatubang karon o naatubang sa imong kinabuhi. Ikonsiderar ang paglista niini sa imong journal sa pagtuon. Mahimo nimong iapil ang mga pangutana, mga kabalaka, o mga tinguha nga aduna ka nga may kalambigitan sa imong mga pagsulay ug mga palas-anon.

Samtang magtuon ka karon, pangitaa ang mga kamatuoran nga makatabang nimo nga mas makasabot kon ngano kaha nga ang Ginoo motugot kanimo nga makasinati niini nga mga pagsulay.

Ang mga katawhan ni Limhi ug ang mga katawhan ni Alma

Sa Mosiah 21–24, atong mahibaloan ang mahitungod sa duha ka grupo sa mga tawo kinsa nakasinati og dagkong mga pagsulay ug mga kasakit. Ang unang grupo mipuyo sa yuta sa Nephi ug gipangulohan sa anak ni Hari Noah nga si Limhi. Ang ikaduhang grupo mipuyo sa yuta sa Helam ug gipangulohan ni Alma.

paghulagway sa mga dapit sa Mosiah 21–24

Ang mosunod mao ang mubo nga pagpamubo sa mga panghitabo nga naglibot sa pagkabihag sa matag grupo:

Ang mga katawhan ni Limhi

Human sa pagsalikway sa mga pagtulun-an ug mga pasidaan ni Abinadi, ang mga Nephite, kinsa karon gipangulohan ni Hari Limhi, gibihag sa mga Lamanite sa yuta sa Nephi ug gikinahanglan nga mobayad og bug-at nga mga buhis (tan-awa sa Mosiah 19:15). Sama sa gipanagna ni propeta Abinadi (tan-awa sa Mosiah 12:5), gipugos sa mga Lamanite ang katawhan ni Limhi sa pag-alagad kanila ug sa pagpas-an sa bug-at nga mga palas-anon (tan-awa sa Mosiah 21:3).

Ang mga katawhan ni Alma

Human sa kamatayon ni Abinadi, si Alma ug ang iyang mga sumusunod milayas ngadto sa Katubigan sa Mormon, diin sila gibunyagan (tan-awa Mosiah 17:1–4; 18:1–14). Sa wala madugay sila milayas alang sa ilang kahilwasan [safety] ug mitukod og usa ka matarong nga pinuy-anan sa yuta sa Helam (tan-awa sa Mosiah 18:32–34; 23:1–4, 19–20). Ang katawhan ni Alma sa kataposan napalgan ug nabihag sa mga Lamanite (tan-awa sa Mosiah 23:25–29, 36–37). Si Amulon, kinsa usa sa daotan nga mga pari ni Noah, gihatagan og pagtugot ibabaw kanila ug misugod sa paglutos kang Alma ug sa iyang mga katawhan (tan-awa sa Mosiah 24:8–9).

Nganong gitugotan sa Ginoo ang mga pagsulay

Basaha ang mosunod nga mga tudling sa kasulatan, mangita sa mga pagtulun-an nga makatabang nimo nga masabtan nganong gitugotan kita sa Ginoo nga makasinati og mga pagsulay ug mga kasakit. Mahimo nimong markahan ang mga pulong ug mga hugpong sa mga pulong nga mahinungdanon diha kanimo.

icon, rekord

  1. Tubaga ang mosunod nga mga pangutana:

    • Unsa nga mga pagkaparehas ug kalainan ang imong nakita tali sa duha ka grupo sa mga tawo ug unsa ang ilang nasinati?

    • Unsa nga ebidensiya ang imong nakita niini nga mga asoy sa gugma ug pagpakabana sa Ginoo alang sa mga tawo?

    • Unsa ang imong nakat-onan bahin sa nganong gitugotan sa Ginoo ang mga tawo nga mag-antos sa mga pagsulay ug mga kasakit?

Kini nga mga asoy nagpadayag og daghang kamatuoran mahitungod kon nganong gitugotan sa Ginoo ang mga tawo nga makasinati og mga pagsulay. Taliwala sa uban, mahimo nimong namatikdan ang mosunod:

  • Ang Ginoo nagtugot kanato nga makasinati og mga pagsulay aron sa pagtabang kanato nga mahimong mapainubsanon ug mas mosalig Kaniya (tan-awa sa Mosiah 21:5–14).

  • Ang ubang mga pagsulay ug mga kasakit moabot isip resulta sa pagkamasinupakon (tan-awa sa Mosiah 21:15).

  • Ang atong mga pagsulay makahatag nato og mga kahigayonan sa pagtinguha ug pagbati sa gahom sa Ginoo sa atong mga kinabuhi (tan-awa sa Mosiah 21:15–16; 24:14).

  • Ang Ginoo mopanton sa Iyang mga katawhan ug mosulay sa ilang pailub ug hugot nga pagtuo (tan-awa sa Mosiah 23:21).

Daghang mga tawo ang naghunahuna nga ang gipanton (tan-awa sa Mosiah 23:21) adunay sama nga kahulogan sa gisilotan. Si Elder Lynn G. Robbins sa Seventy mipasabot, “Ang pulong nga pagpanton naggikan sa Latin nga castus, nagpasabot nga ‘putli o lunsay,’ ug ang pagpanton nagpasabot nga ‘aron malunsay’ [tan-awa sa Merriam-Webster’s Collegiate Dictionary, 11th ed. (2003), “pagpanton”]” (“Ang Matarong nga Maghuhukom,” Liahona, Nob. 2016, 97). Pamalandongi sa makadiyot kon sa unsang paagi ang Ginoo naglunsay kanimo pinaagi sa imong mga pagsulay ug mga kasakit.

  1. Tubaga ang labing minos duha sa mosunod nga mga pangutana:

    • Sa unsang paagi nga ang pagsabot niini nga mga kamatuoran makaimpluwensiya sa paagi sa imong reaksiyon sa imong mga pagsulay?

    • Unsa nga mga kasinatian ang nakatabang nimo nga makita ang mga katuyoan sa Ginoo sa pagtugot kanimo nga makasinati og mga pagsulay?

    • Unsa ang imong nakat-onan karon nga makatabang nimo nga mas masabtan ang mga pagsulay nga imong gisinati?