Mosaea 21–24, Vaega 2

Liliu Atu i le Alii mo le Laveaiga mai Tofotofoga

E faapefea ona e tali atu pe a e feagai ma tofotofoga ma faigata? Aisea e te manatu ai e faalatalata atili atu nisi tagata i le Alii ae o isi e o ’ese mai ia te Ia? I le Mosaea 21–24, ua tatou aoao ai na liliu atu le nuu o Limae ma le nuu o Alema i le Alii mo le malosi ma le laveaiga mai le faatagataotauaina. O lenei lesona ua faamoemoe e fesoasoani ia te oe e faalagolago ai i le Tama Faalelagi ma Iesu Keriso e fesoasoani ia te oe i ou tofotofoga.

Tali atu i tofotofoga

I le lesona talu ai, sa valaaulia ai oe e mafaufau e uiga i se tofotofoga o loo e oo i ai pe sa e oo i ai. Atonu na e aoaoina nisi o upumoni i lau suesuega o le Mosaea 21–24 lea na fesoasoani ia te oe e malamalama ai pe aisea e faataga ai oe e le Alii e oo i tofotofoga. I le asō, toe mafaufau i ou tofotofoga, ae o le taimi lenei mafaufau pe na faapefea ona e tali atu i ai. Atonu e te manao e faamaumau mea faalavefau po o faamanuiaga na e oo i ai ma auala na e lagonaina ai le aafiaga po o faamanuiaga a le Alii.

O le mana laveai o le Alii

Atonu e te manatua le suesueina o le nuu o Limae (i le laueleele o Nifae) ma le nuu o Alema (i le laueleele o Helama). Sa latou oo uma i ni tofotofoga faigata a o faatagataotauaina e sa Lamana. O lenei ata o loo faapupula mai ai a latou malaga i le Mosaea 21–24.

O le asō o le a e aoao ai i le ala na laveai ai e le Alii vaega uma e lua o tagata mai le nofopologa ma agai atu ai i le laueleele o Saraemila. A o e suesue, ia manatua ou tofotofoga ma vaavaai mo upumoni e fesoasoani ia te oe e iloa ai auala e faaaoga ai e le Alii Lona mana o le laveaiga i lou olaga.

Fatu le siata lenei i lau api talaaga mo suesuega. Ia mautinoa ia lava se avanoa e faamaumau ai ni tali se tele i pusa taitasi.

Faitau mau ia lē itiiti ifo ma le tasi se vaega o tagata, ma tusi ni faamatalaga i le siata e uiga i le auala na laveaiina ai i latou mai o latou tofotofoga. Atonu e te manao e faailoga i au tusitusiga paia soo se upu po o fasifuaitau e tulaga ese ia te oe.

Mosaea 21–24: Malosi ma le Laveaiga

Tusi Lesona a le Faiaoga o le Tusi a Mamona (2024)—“Mosaea 21–24, Vaega 2: Liliu Atu i le Alii mo le Laveaiina mai Tofotofoga”

	Nuu o Limae Mosaea 21:13–16, 36; 22:1–13; 29:18–20	Nuu o Alema Mosaea 23:25–29; 24:8–25
O a faatinoga na faia e tagata e maua ai le fesoasoani a le Alii?
Na faapefea ona aafia le Alii i lo latou laveaiga?
O a nisi o fasifuaitau e sili ona fiafia i ai e manatua mai nei fuaiupu?

© 2023 Puletaofia e le Intellectual Reserve, Inc. Ua taofia aia tatau uma.

1. Tali fesili nei:

   • O a nisi o faatinoga na faia e tagata e maua ai le fesoasoani a le Alii?

   • O le a se mea na e aoaoina e uiga i le Alii ma Lona mana a o e suesueina nei tala?

   • O le a se fasifuaitau e sili ona e fiafia i ai na e faailoaina mai se tasi o fuaiupu sa e suesueina?

Iloaina ma le olioli ai i le mana o le Alii

Faatasi ai ma le tele o upumoni e mafai ona tatou aoao mai nei fuaiupu, atonu na e maitauina mai au suesuega e faapea a o tatou liliu atu ia te Ia, o le a lagolagoina i tatou e le Tama Faalelagi i taimi o o tatou tofotofoga ma laveai i tatou i Lana taimi (tagai Mosaea 21:14–16). Ua tatou aoao foi afai tatou te onosaia ma le fiafia ma le onosai o tatou tofotofoga, e mafai e le Alii ona faamalosia i tatou e tauave ma le faigofie a tatou avega (tagai Mosaea 24:15).

• E mafai faapefea e le iloaina o nei mea e uiga i le Alii ona aafia ai le ala e te tali atu ai i ou tofotofoga?

• Na faapefea ona lagolagoina ma faamalosia e le Alii oe po o se tasi e te iloa e onosaia se tofotofoga pe tauaveina se avega? Na faapefea e nei mea ona aafia ai ou lagona mo Ia?

Matamata le vitio “Lagonaina o le Alofa ma le Agalelei o le Alii i Tofotofoga” (4:18) i le ChurchofJesusChrist.org. Vaavaai pe mafai faapefea e upumoni po o fasifuaitau na e faailoa mai i tusitusiga paia ona fesootai i le aafiaga o le aiga o Gutierrez.

O au laasaga e sosoo ai

Mafaufau i mea ua e aoaoina i le aso e mafai ona fesoasoani ia te oe i tofotofoga o feagai ma oe.

2. Faamae‘a faatonuga nei:

   Faaopoopo se koluma fou i le siata na e fatuina i le amataga o le lesona ma faaigoa le atulaina pito i luga o lenei koluma “O A’u.” Ona faamaea lea o lau koluma fou e ala i le taliina o fesili nei. (Afai e leai se avanoa e te fatuina ai se koluma fou, tali fesili i se isi avanoa i lau api talaaga mo suesuega.)

   • O a ni faatinoga e mafai ona e faia e maua atili ai le fesoasoani a le Alii i ou tofotofoga?

   • O le a se mea ua e aoaoina e uiga i le Alii i le aso e mafai ona fesoasoani e te malamalama ai i le ituaiga fesoasoani po o le malosi e mafai ona Ia tuuina atu ia te oe?

   • O a upu po o fasifuaitau mai fuaiupu na e suesueina e te manatu e mafai ona fesootai i ou tulaga? Aisea?

Tuu i le faitalia: O e Manao e Aoao Atili?

Aisea e le saunia ai e le Atua i taimi uma le laveaiga vave mai o tatou tofotofoga?

Sa mataituina e Elder Evan A. Schmutz o le Fitugafulu:

Ua valaaulia i tatou e le Atua ina ia tali atu ma le faatuatua i o tatou lava puapuaga uiga ese ia mafai ai ona tatou seleseleina faamanuiaga ma maua le atamai lea e le mafai ona aoaoina i se isi lava auala. …

O le toatele o i tatou ua aioi atu i le Atua ina ia aveese le pogai o o tatou puapuaga, ma pe a le oo mai le toomaga na tatou sailia, ua faaosoosoina i tatou i le mafaufau faapea e le o faafofoga mai o Ia. Ou te molimau atu, e oo lava i na taimi, e faafofoga o Ia ia tatou tatalo, e i ai se mafuaaga mo le faatagaina o o tatou puapuaga ia faaauau [tagai Mataupu Faavae ma Feagaiga 121:7–8; 122], ma o le a fesoasoani mai ia i tatou ia tauaveina [tagai Mosaea 24:12–15]. (Evan A. Schmutz, “O Le a Soloiesea e le Atua o Loimata Uma,” Liahona, Nov. 2016, 116)

Atonu e te manao e matamata le vitio pe faitau le lauga “Ia Manatua Lau Au Paia Mafatia, Lo Matou Atua e” (10:18) saunia e Elder Anthony D. Perkins o le Fitugafulu i le ChurchofJesusChrist.org. Ina ua maua Elder Perkins i le kanesa ma iloa ai o le a faapuupuuina lona olaga faaletino, sa ia aoaoina ni lesona taua e uiga i tofotofoga ma mafatiaga.

O a ni auala e ono oo mai ai le fesoasoani po o le laveaiga a le Alii?

Sa aoao mai Peresitene Dallin H. Oaks o le Au Peresitene Sili:

O faamanuiaga o le faamalologa e oo mai i auala e tele, e fetaui lelei ma o tatou manaoga taitoatasi, e pei ona silafia e Ia o lē e sili lona alofa ia i tatou. O nisi taimi o se “faamalologa” e fofoina ai o tatou ma’i pe aveese ai a tatou avega. Ae o nisi taimi e “faamaloloina” i tatou e ala lea i le tuuina mai o le malosi ma le malamalama po o le onosai e tauaveina ai avega ua tuuina mai i o tatou luga. (Dallin H. Oaks, “Na te Faamaloloina i Latou e Mafatia i Avega,” Liahona, Nov. 2006, 7–8)

Na faasoa mai e Elder L. Tom Perry (1922–2015) o le Korama a Aposetolo e Toasefululua ni lesona e mafai ona tatou aoaoina mai le laveaiina o le nuu o Limae ma Alema. Matamata le vitio “O Le Mana e Laveaiina Ai” e vaai ai i nei lesona.

E mafai faapefea e le manatuaina o aafiaga ua mavae ona fesoasoani ia te a’u e onosaia lelei ai o’u tofotofoga?

Matamata le vitio “O Mea Lelei e Oo Mai” (4:55) i le ChurchofJesusChrist.org. Vaavaai mo le fautuaga na tuuina mai e Elder Jeffrey R. Holland o le Korama a Aposetolo e Toasefululua a o ia faamalamalama mai le ala na aoaoina ai o ia e se tofotofoga e faapea, o le faalagolago i le Alii e mafai ona ofoina mai ia i tatou le faamoemoe i taimi faigata.