Atamai i Aoaoga Faavae: Mosaea 18:8–10

“Ua Outou Ulu Atu i se Feagaiga Faatasi ma Ia”

Alema o loo papatisoina [tagata] i vai o Mamona

I se lesona talu ai, na e aoao ai e uiga i le auala e mafai ai e la tatou feagaiga o le papatisoga ma le Faaola ona aafia ai le ala tatou te ola ai. O lenei lesona e mafai ona fesoasoani ia te oe e tauloto le mau faasino ma le fasifuaitau autu o le mau mo le Mosaea 18:8–10, faamatala le aoaoga faavae o loo aoao mai i nei fuaiupu, ma faaaoga mataupu faavae o le mauaina o le malamalama faaleagaga i tulaga moni o le soifuaga e faaaoga ai lenei fuaitau o mau.

Tauloto ma faamatala

Toe faatulaga tonu le mau faasino ma le fasifuaitau autu o i lalo mo le Mosaea 18:8–10 e ala i le tusia i lau api talaaga mo suesuega i le faasologa sa’o. Afai e manaomia, siaki le sa’o o lau faatulagaga e ala i le faasino atu i le lisi o mau faasino o le atamai i aoaoga faavae ma fasifuaitau autu o mau i le faaiuga o le Pepa Autu o le Atamai i Aoaoga Faavae (2022).

le papatisoina i 8 Alii le Ia Mosaea outou 18 i se feagaiga ia ulu atu molimau 10 o se suafa o faatasi ma ua

A uma ona e tusia faasa’o le fasifuaitau, faaaoga sina taimi e taumafai ai e tauloto le mau faasino ma le fasifuaitau autu o le mau e ala i le toe taulotoina pea mo ni nai taimi.

aikona, faamaumau

1. Faamaea le gaoioiga lenei:

I se lesona talu ai, sa e aoaoina ai e faapea pe a tatou papatiso, tatou te ulu atu i se feagaiga ma le Atua o le a tatou auauna ia te Ia ma tausi Ana poloaiga. Mafaufau faapea na talosagaina oe e lauga i se sauniga papatisoga a se tamaitiiti e valu tausaga e uiga i le feagaiga sa latou osia. Faamaumau pe mafai faapefea e le Mosaea 18:8–10 ona fesoasoani ia te oe e faamatala le feagaiga ma pe faapefea e le tausia o le feagaiga ona fesoasoani i le tamaitiiti ia avea atili e faapei o Iesu Keriso.

Faataitai le faaaogaina

Mai le mafaufau, taumafai e lisi mataupu faavae e tolu o le mauaina o le malamalama faaleagaga, e aofia ai se faamatalaga puupuu o le uiga o mataupu faavae taitasi. A talafeagai, toe iloilo parakalafa 5–12 o le “Mauaina o le Malamalama Faaleagaga” i le vaega o le Pepa Autu o le Atamai i Aoaoga Faavae (2022).

Faitau le tulaga faataitai lenei, ma faaaoga mataupu faavae taitasi o le mauaina o le malamalama faaleagaga e saunia ai se fautuaga mo Ana e mafai ona ia faaaogaina e fesoasoani ai ia Paula.

Ua maitauina e Ana o Paula, o se teineitiiti i lana vasega i le lotu, o loo tauivi ia fiafia pe faia ni uo. Na faalogo Ana o nisi taimi e filifili ai Paula e le auai i gaoioiga a le autalavou po o sauniga lotu ona na te lagona e le tutusa o ia ma isi teineiti. E manao Ana e fesoasoani ia Paula ia lagona atili le taliaina, ae na te lei talanoa moni lava ia Paula ma popole atonu e faigata pe le talafeagai le aapa atu ia te ia.

aikona, faamaumau

2.  Tali le fesili lenei:

• E faapefea ona e faaaogaina mataupu faavae taitasi e tolu o le mauaina o le malamalama faaleagaga ma aoaoga o i le Mosaea 18:8–10 e fesoasoani ai ia Ana i lona tulaga?

Afai na e taumafai ma manaomia pea le fesoasoani i le taliina o le fesili talu ai, o fesili nei e mafai ona fesoasoani e taiala ai oe:

Saili nisi malamalamafaaopoopo e ala i punaoa mamana ua filifilia

• O a nisi o fuaitau o mau po o saunoaga a taitai o le Ekalesia e te iloa e mafai ona fesoasoani ai ia Ana? E mafai faapefea ona fesoasoani aoaoga o loo i le Mosaea 18:8–10?

• E mafai faapefea e le talanoa atu i le au peresitene o le vasega a Tamaitai Talavou ona maua ai e Ana le malamalama sili atu e uiga i le tulaga o Paula?

Iloilo manatu faavae ma fesili faatasi ma se vaaiga e faavavau

• O le a se mea e manaomia ona malamalama i ai Ana e uiga i le ala e silasila ai le Alii i feagaiga o le papatisoga lea e mafai ona fesoasoani ia te ia e faatoilalo ai ona lagona o le musuā?

• E ono mafai faapefea e le manatuaina o lagona o le Alii e uiga ia Paula ona fesoasoani ia Ana?

• E ono mafai faapefea e le faamalosiauina o Paula ona fesoasoani ia Ana ia avea atili e faapei o le Tama Faalelagi ma Iesu Keriso?

Faatino i le faatuatua

• O le a se mea e mafai ona fai e Ana e tausia ai ni folafolaga patino o le papatisoga na aoao mai e Alema i le Mosaea 18:8–10?

• O a ni faataitaiga o le fesoasoani ai o Iesu Keriso i isi o le a e faasoa atu ia Ana e fesoasoani ai ia te ia e faatino i le faatuatua?