Zotërimi Doktrinor: Alma 7:11–13

“Dhe Ai do të Shkojë Përpara, duke Vuajtur Dhimbje dhe Hidhërime dhe Tundime të çdo Lloji”

Në studimin tënd të vargjeve Alma 7:1–13, ti mësove për disa nga ato që Shpëtimtari vuajti si pjesë e Shlyerjes së Tij në mënyrë që “ai të mund të dijë, sipas mishit, se si të ndihmojë popullin e tij” (Alma 7:12). Ky mësim mund të të ndihmojë ta mësosh përmendsh referencën dhe frazën kyç të shkrimit të shenjtë të zotërimit doktrinor për vargjet Alma 7:11–13, ta shpjegosh doktrinën e dhënë mësim në këtë fragment dhe t’i zbatosh parimet e marrjes së njohurisë shpirtërore në situata nga jeta reale.

Mëso përmendsh dhe shpjego

Fraza kyç e shkrimit të shenjtë për vargjet Alma 7:11–13 është: “Dhe ai do të shkojë përpara, duke vuajtur dhimbje dhe hidhërime dhe tundime të çdo lloji”. Merre parasysh ta shenjosh këtë frazë në shkrimet e tua të shenjta nëse nuk e ke bërë tashmë.

Veprimtaria vijuese mund të të ndihmojë ta mësosh përmendsh referencën dhe frazën kyç të shkrimit të shenjtë. Shkruaj sa më shumë që arrin të mbash mend nga referenca dhe fraza kyç e shkrimit të shenjtë. Nëse nuk ia arrin dot me përpjekjen e parë, rilexoje referencën dhe frazën dhe më pas përpiqu ta shkruash atë. Përsërite të lexuarit dhe të shkruarit derisa të mund ta shkruash të gjithën përmendsh.

Në një mësim të mëparshëm ti mësove nga Alma 7:11–13 se Jezu Krishti vuajti për të të shpëtuar nga mëkati e vdekja dhe për të të ndihmuar përmes sfidave të vdekshmërisë.

Supozo sikur një shok të dërgoi mesazh me celular për diçka të vështirë që po kalon. Ti mendon se mesazhi tek Alma 7:11–13 do të jetë i dobishëm për shokun tënd, por shqetësohesh se ai nuk do ta lexojë nëse ti i dërgon vetëm referencën e shkrimit të shenjtë.

1. Përgjigju për pyetjen vijuese:

   • Si do t’i përmblidhje vargjet tek Alma 7:11–13 në një mënyrë që mund ta ndihmonte shokun tënd përmes vështirësisë së tij?

Ushtroje vënien në zbatim

Gjeji parimet e marrjes së njohurisë shpirtërore te pjesa “Marrja e Njohurisë Shpirtërore” te Dokumenti Bazë i Zotërimit Doktrinor (2022). Shkruaji këto parime si tituj në ditarin tënd të studimit, duke lënë hapësirë ndërmjet secilit në mënyrë që të mund t’u përgjigjesh pyetjeve rreth tyre më vonë në mësim.

Merre parasysh se si parimet e marrjes së njohurisë shpirtërore dhe doktrina e dhënë mësim tek Alma 7:11–13 mund të ndihmojnë në skenarin vijues.

Që kur prindërit e Ervinit u shkurorëzuan pak vite më parë, ai është ndier sikur jeta e tij është bërë gjithnjë e më e vështirë. Ai ka pasur vështirësi në shkollë dhe disa nga shokët e tij nuk duket se e përfshijnë atë aq sa e përfshinin dikur. Ervini gjithashtu ka ndaluar më së shumti pjesëmarrjen në kishë, leximin e shkrimeve të tij të shenjta dhe lutjen drejtuar Perëndisë. Një ditë, Ervini foli hapur me një nga shokët e tij rreth vështirësive të tij. Ai tha: “Unë dua që gjërat të përmirësohen, por nuk di se kujt t’i drejtohem. Ndihem shumë i vetmuar dhe i bllokuar në situatën time.”

Përfytyro sikur ti je shoku të cilit Ervini po i fliste, dhe gjithashtu sikur ai të kërkoi këshillë se si ta kapërcejë situatën e tij të vështirë. Përdori mësimet tek Alma 7:11–13 dhe parimet e marrjes së njohurisë shpirtërore për ta ndihmuar Ervinin në sfidën e tij.

Vepro me besim

Lexo paragrafët paragrafët 5–7 në pjesën “Marrja e Njohurisë Shpirtërore” te Dokumenti Bazë i Zotërimit Doktrinor. Merre parasysh ta shenjosh atë që të duket e dobishme.

2. Përgjigju për të paktën njërën prej pyetjeve vijuese:

   • Çfarë mund t’i mësosh Ervinit rreth Jezu Krishtit dhe Shlyerjes së Tij që mund ta ndihmojë atë të veprojë me besim?

   • Çfarë mund të bëjë Ervini për të marrë ndihmën që Jezu Krishti mund të japë?

Shqyrtoji konceptet ose pyetjet me një këndvështrim të përjetshëm

Lexo paragrafin 8 në pjesën “Marrja e Njohurisë Shpirtërore” te Dokumenti Bazë i Zotërimit Doktrinor. Merre parasysh ta shenjosh atë që të duket e dobishme

3. Përgjigju për të paktën njërën prej pyetjeve vijuese:

   • Si mendon se Ati Qiellor do të donte që Ervini të mendonte rreth situatës së tij?

   • Pse mendon se do të ishte e dobishme që Ervini ta shihte situatën e tij me një këndvështrim të përjetshëm?

Kërko kuptueshmëri të mëtejshme nëpërmjet burimeve të caktuara në mënyrë hyjnore

Lexoji paragrafët 11–12 në pjesën “Marrja e Njohurisë Shpirtërore” te Dokumenti Bazë i Zotërimit Doktrinor, duke kërkuar mësime që mund ta ndihmojnë Ervinin.

4. Përgjigju për të paktën dy prej pyetjeve në këtë pjesë:

   • Në ç’lloj burimesh të caktuara në mënyrë hyjnore, mund ta drejtoje Ervinin që mund t’i sigurojnë atij ndihmën që i nevojitet?

   Një burim i rëndësishëm, i caktuar në mënyrë hyjnore që mund ta ndihmojë në këtë situatë, është Alma 7:11–13. Rilexoji këto vargje, duke kërkuar mësimet që mund të jenë të dobishme për Ervinin.

   • Çfarë do të doje që Ervini të kuptonte dhe ndiente nga këto vargje?

   • A mund të mendosh për ndonjë fragment tjetër të shkrimeve të shenjta që jep mësim atë që Ati Qiellor mund të dojë që Ervini të dijë?