Doctrinal Mastery: Alma 7:11–13

“At Siya ay Hahayo, Magdaranas ng mga Pasakit at Hirap at Lahat ng Uri ng Tukso”

Sa iyong pag-aaral ng Alma 7:1–13, nalaman mo ang tungkol sa ilan sa dinanas ng Tagapagligtas bilang bahagi ng Kanyang Pagbabayad-sala upang “malaman niya nang ayon sa laman kung paano tutulungan ang kanyang mga tao” (Alma 7:12). Ang lesson na ito ay makatutulong sa iyo na maisaulo ang doctrinal mastery reference at ang mahalagang parirala ng banal na kasulatan para sa Alma 7:11–13, maipaliwanag ang doktrinang itinuro sa scripture passage na ito, at magamit ang mga alituntunin ng pagtatamo ng espirituwal na kaalaman sa mga sitwasyon sa tunay na buhay.

Isaulo at ipaliwanag

Ang mahalagang parirala ng banal na kasulatan para sa Alma 7:11–13 ay “At siya ay hahayo, magdaranas ng mga pasakit at hirap at lahat ng uri ng tukso.” Maaari mong markahan ang pariralang ito sa iyong mga banal na kasulatan kung hindi mo pa ito nagagawa.

Ang sumusunod na aktibidad ay maaaring makatulong sa iyo na maisaulo ang reference at mahalagang parirala ng banal na kasulatan. Isulat ang reference at mahahalagang parirala ng banal na kasulatan batay sa pagkakasaulo mo. Kung hindi mo ito magagawa sa unang subok, muling basahin ang reference at parirala, at pagkatapos ay subukan itong isulat. Ulitin ang pagbabasa at pagsusulat hanggang sa maisulat mo ito nang buo ayon sa naisaulo mo.

Sa nakaraang lesson, natutuhan mo mula sa Alma 7:11–13 na nagdusa si Jesucristo upang iligtas ka mula sa kasalanan at kamatayan at tulungan ka sa mga hamon ng mortalidad.

Kunwari ay may kaibigan kang nag-text sa iyo tungkol sa isang bagay na mahirap na pinagdaraanan niya. Naisip mo na makatutulong ang mensahe sa Alma 7:11–13 para sa iyong kaibigan pero nag-aalala ka na hindi niya ito babasahin kung ipadadala mo lang sa kanya ang scripture reference.

1. Sagutin ang sumusunod na tanong:

   • Paano mo ibubuod ang Alma 7:11–13 sa paraang makatutulong sa iyong kaibigan sa kanyang paghihirap?

Pagsasanay ng pagsasabuhay

Hanapin ang mga alituntunin ng pagtatamo ng espirituwal na kaalaman sa bahaging “Pagtatamo ng Espirituwal na Kaalaman” ng Doctrinal Mastery Core Document (2022). Isulat ang mga alituntuning ito bilang mga heading sa iyong study journal, at mag-iwan ng espasyo sa pagitan ng bawat isa para masagot mo ang mga tanong tungkol sa mga ito kalaunan sa lesson.

Isipin kung paano makatutulong ang mga alituntunin ng pagtatamo ng espirituwal na kaalaman at ang doktrinang itinuro sa Alma 7:11–13 sa sumusunod na sitwasyon.

Simula nang magdiborsyo ang mga magulang ni Peter ilang taon na ang nakakaraan, pakiramdam niya ay pahirap nang pahirap ang buhay niya. Nahihirapan siyang pumasok sa eskuwela, at ang ilan sa kanyang mga kaibigan ay tila hindi na siya isinasama tulad noon. Halos tumigil na rin si Peter sa pagsisimba, sa pagbabasa ng mga banal na kasulatan, at pagdarasal sa Diyos. Isang araw, sinabi ni Peter sa isa sa kanyang mga kaibigan ang tungkol sa kanyang mga paghihirap. Sabi niya, “Gusto kong mas maging maayos ang mga bagay-bagay, pero hindi ko alam kung saan ako hihingi ng tulong. Pakiramdam ko ay nag-iisa ako at wala nang pag-asang mabago ang sitwasyon ko.”

Isipin kunwari na ikaw ang kaibigang kausap ni Peter at humingi rin siya sa iyo ng payo kung paano makakayanan ang kanyang mahirap na sitwasyon. Gamitin ang mga turo sa Alma 7:11–13 at ang mga alituntunin ng pagtatamo ng espirituwal na kaalaman para matulungan si Peter sa kanyang hamon.

Kumilos nang may pananampalataya

Basahin ang talata 5–7 sa bahaging “Pagtatamo ng Espirituwal na Kaalaman” sa Doctrinal Mastery Core Document. Maaari mong markahan ang mahahanap mo na makatutulong.

2. Sagutin ang kahit isa sa mga sumusunod na tanong:

   • Ano ang maituturo mo kay Peter tungkol kay Jesucristo at sa Kanyang Pagbabayad-sala na maaaring makatulong kay Peter na kumilos nang may pananampalataya?

   • Ano ang magagawa ni Peter para matanggap ang tulong na ibibigay ni Jesucristo?

Suriin ang mga konsepto o tanong nang may walang-hanggang pananaw

Basahin ang talata 8 sa bahaging “Pagtatamo ng Espirituwal na Kaalaman” ng Doctrinal Mastery Core Document. Maaari mong markahan ang mahahanap mo na makatutulong

3. Sagutin ang kahit isa sa mga sumusunod na tanong:

   • Sa iyong palagay, paano ninanais ng Ama sa Langit na pag-isipan ni Peter ang kanyang sitwasyon?

   • Sa iyong palagay, bakit makatutulong kay Peter na makita ang kanyang sitwasyon nang may walang-hanggang pananaw?

Hangaring mas makaunawa sa pamamagitan ng sources na itinalaga ng Diyos

Basahin ang talata 11–12 sa bahaging “Pagtatamo ng Espirituwal na Kaalaman” ng Doctrinal Mastery Core Document, at maghanap ng mga turo na makatutulong kay Peter.

4. Sagutin ang kahit dalawa sa mga tanong sa bahaging ito:

   • Anong uri ng mga source na itinalaga ng Diyos ang maaari mong ituro kay Peter na makapagbibigay sa kanya ng tulong na kailangan niya?

   Ang isang mahalagang source na itinalaga ng Diyos na makatutulong sa sitwasyong ito ay ang Alma 7:11–13. Muling basahin ang mga talatang ito, at maghanap ng mga turong makatutulong kay Peter.

   • Ano ang gusto mong maunawaan at madama ni Peter sa mga talatang ito?

   • May naiisip ka bang iba pang mga talata sa banal na kasulatan na nagtuturo kung ano ang maaaring nais ng Ama sa Langit na malaman ni Peter?