Alema 9

Manatua Faamanuiaga a le Alii

Alema ma Amoleka

Ua faapefea ona faamanuiaina oe e le Alii? O le a se mea ua Ia faamoemoe e te faia i le mavae ai ona e maua nei faamanuiaga? Ina ua valaau atu Alema ma Amoleka i le nuu o Amonaea ia salamo, sa teena e tagata a laua aoaoga. Na aoao mai Alema e faapea na faamoemoeina i latou e le Alii ia sili atu lo latou amiotonu nai lo sa Lamana, o e e lei aoaoina i le upumoni. Sa ia uunaia tagata ia manatua faamanuiaga a le Alii. O lenei lesona ua faamoemoe e fesoasoani ia te oe ia iloa ma manatua faamanuiaga ua tuuina mai e le Alii ia te oe.

O faamanuiaga a le Alii ia te oe

I lau api talaaga mo suesuega, faaalu ni nai minute e lisi ai faamanuiaga na e maua mai le Tama Faalelagi ma Iesu Keriso. (Mafaufau e faaaofia ai faamanuiaga ua oo mai ona o oe o se tagata o le Ekalesia a Keriso.)

• E faapefea e le manatuaina o nei faamanuiaga ma meaalofa ona aafia ai oe?

• E faafia ona e mafaufau e uiga i nei faamanuiaga? E i ai se mea e mafai ona e faia e taulai atili atu ai ia i latou?

A o e suesue i le asō, o le a e maua avanoa e faaopoopo atu ai i lau lisi. Saili le taitaiga a le Tama Faalelagi e iloa ai Ana faamanuiaga ia te oe ma ia iloa ai pe faapefea ona e manatuaina i latou i lou olaga atoa.

Ua talai atu Alema ma Amoleka i le nuu o Amonaea

Ina ua talai atu e Alema ma Amoleka le afioga a le Atua i le nuu o Amonaea, sa loto-maaa tagata.

Faitau upu na tautala atu ai Alema ia i latou i le Alema 9:8–11, 20–22, ma vaavaai mo upu ma fasifuaitau o loo ta’u mai ai faamanuiaga na tuuina atu e le Alii i nei tagata a ua galo ia i latou.

• O le a se mea sa e mauaina?

• O a uiga o le Alii na faamamafa mai e Alema i le fuaiupu 11? (Mafaufau e faailoga nei uiga i au tusitusiga paia.)

Atonu e fesoasoani le iloa o le upu tali-tiga e faasino i le onosai ma le faapalepale o le Alii pe a i ai se mafuaaga mo le toasā.

Faaalu sina taimi e mafaufau loloto ai i auala na faaali atu ai e le Alii ia te oe le onosai. Atonu e te manao e faaopoopo nei faataitaiga i lau lisi o faamanuiaga.

Mulimuli ane, sa molimau atu Alema i uiga faaopoopo o le Alii lea e mafai ona fesoasoani ia i tatou e malamalama ai i le savali a Alema. Faitau le Alema 9:26 ma mafaufau e faailoga nei uiga. Atonu e aoga le iloa o le uiga o le upu tutusa i tusitusiga paia o le “tonu” po o le “faamaoni.”

A o faaauau pea ona talai atu Alema, sa ia faamamafa atu faapea ua tumu Iesu Keriso i le alofa tunoa, fai mea tutusa, upumoni, onosai, alofa mutimutivale, ma le tali-tiga. Mafaufau loloto pe aisea na manao ai Alema i le nuu o Amonaea ia malamalama i nei uiga o le Faaola.

Faatusatusaina ma le faaeseeseina o ni tagata se toalua

E masani ona faatusatusa pe iloilo e tusitusiga paia ia manatu, mea na tutupu, ma tagata i se auala e aoao atu ai mataupu faavae o le talalelei. O le vaavaai mo nei faatusatusaga po o faaeseesega e mafai ona avea ma se tomai aoga mo le suesueina o tusitusiga paia. Sa faatusatusa e Alema ni vaega se lua o tagata o e sa i ai i tulaga eseese—o sa Lamana ma le nuu o Amonaea. Faatumu le siata lenei i lau api talaaga. Vaavaai pe na faapefea ona faamamafa atu e Alema uiga o le Faaola.

aikona, faamaumau

1. Faatumu le siata lenei i lau api talaaga mo suesuega ma mafaufau po o a isi mea e mafai ona e aoaoina e uiga i le Atua e ala i le faia o nei faatusatusaga.

   	O mea ua e aoaoina e uiga i tagata	O le ala e faaalia ai e le Alii le alofa tunoa, fai mea tutusa, upumoni, onosai, alofa mutimutivale, po o le tali-tiga i nei tagata
   Sa Lamana (Alema 9:14–17)
   Nuu o Amonaea (Alema 9:20–25)

• Na faapefea e le auina atu o Alema ma Amoleka e lapatai ma molimau atu i le nuu o Amonaea ona faaalia ai le alofa mutimutivale o le Alii?

• Aisea e te manatu ai o aoaoga a Alema e uiga i le Atua i le Alema 9 e taua mo i tatou e manatua i o tatou aso?

O le a se mea ua tuuina atu e le Alii ia te oe?

Sa maofa Alema i le vave ona galo i le nuu o Amonaea ia faamanuiaga na tuuina atu e le Alii ia i latou o se nuu (tagai Alema 9:8–11). Ina ia fesoasoani ia i latou ia salamo ma toe liliu atu i le Alii, sa faamanatu atu e Alema ia i latou le tele o faamanuiaga na latou maua (tagai fuaiupu 20–24).

• O a nisi o mafuaaga e ono galo ai ia i tatou mea na faia e le Alii mo i tatou?

A o e faitau i fesili nei, mafaufau loloto pe na faapefea ona e mauaina nisi o faamanuiaga lava e tasi ia na maua e le nuu o Amonaea. Mafaufau e faaopoopo faamanuiaga nei i lau lisi.

• O le a le mea ua “faaali mai [e le Alii] ia te i latou, e tusa ai ma o latou manao, ma [lo outou] faatuatua, ma tatalo”? (Alema 9:20).

• Na faapefea ona faamanuiaina oe i meaalofa a le Agaga o loo taua i le Alema 9:21?

• Na faapefea ona laveaiina oe e le Atua mai tofotofoga? (Tagai i le Alema 9:22.)

aikona, faamaumau

2. Faamaea le gaoioiga lenei ma aotele mea na e faia i lau api talaaga mo suesuega.

   Faaalu sina taimi e fai ai se mea e fesoasoani ai ia te oe e manatua faamanuiaga ua tuuina atu e le Alii ia te oe. O nisi nei o manatu:

   • Pue se ata o le lisi na e faia i le vasega ma tuu i se mea e mafai ona e vaai soo i ai, e pei o le lau autu i lau telefoni.

   • Tusi ou lagona i lau api talaaga mo suesuega ma fai se fuafuaga e faamaumau ai e le aunoa ou faamanuiaga.

   • Seti se faamanatu i lau kalena e manatunatu ai e le aunoa i mea ua faia e le Alii mo oe.

Tuu i le faitalia: O e Manao e Aoao Atili?

O a nisi o faamanuiaga ua tuuina atu e le Alii i tagata o Lana Ekalesia?

Na faasoa mai e Elder Neil L. Andersen o le Korama a Aposetolo e Toasefululua nisi o faamanuiaga ua tuuina mai e le Alii ia i tatou:

Elder Neil L. Andersen

E tuufesili nisi, “Pe le o tele ea nisi faatuatuaga e alolofa ia Keriso?” Ioe o loo i ai! Ae, o le avea ai ma tagata o Le Ekalesia a Iesu Keriso o le Au Paia o Aso e Gata Ai, o le i ai o se molimau i Lona moni a’ia’i, e le gata mai le Tusi Paia, ae mai le Tusi a Mamona foi; o le iloa ua toefuatai mai Lana perisitua i le fogaeleele; o le uma ai ona osia o feagaiga paia e mulimuli ia te Ia ma maua ai le meaalofa o le Agaga Paia; i le uma ai ona faaeeina i mana i Lona malumalu paia, ma avea ma se vaega o le sauniuniga mo Lona toe afio mai ma le mamalu i le fogaeleele; e le mafai ai ona faatusalia o tatou tagata ma i latou e le’i mauaina nei upumoni. ‘O lē ua foaiina atu i ai mea e tele e su’eina mai ia te ia mea e tele’ [Mataupu Faavae ma Feagaiga 82:3].” (Neil L. Andersen, “Aua Lava Nei Tuua o Ia,” Liahona, Nov. 2010, 41)

Sa molimau mai Sister Sheri L. Dew, o le sa auauna atu o se fesoasoani i le Au Peresitene Aoao o le Aualofa, i faamanuiaga faapena:

Sister Sheri L. Dew

E tulaga ese i tatou. E tulaga ese i tatou ona o a tatou feagaiga, o o tatou faamanuiaga faaleagaga, ma tiutetauave e o mai faatasi ma nei mea e lua. Ua faaeeina i o tatou luga le mana ma ua faameaalofaina i le Agaga Paia. O loo i ai so tatou perofeta soifua e taialaina i tatou, o sauniga e fusia ai i tatou i le Alii ma isi, ma le mana o le perisitua ia i tatou. Ua tatou malamalama i le mea tatou te tutu ai i le fuafuaga sili o le fiafia. Ma ua tatou iloa o le Atua o lo tatou Tama ma o Lona Alo o lo tatou Fautua lea e le mavae.

Faatasi ai ma nei avanoa e oo mai ai se tiutetauave tele, aua “o ia o lē ua tuu atu i ai mea e tele, e tele mea ua manaomia mai ai” (Mataupu Faavae ma Feagaiga 82:3). (Sheri L. Dew, “We Are Women of God,” Liahona, Ian. 1999, 98)