Ձեռք բերել հոգևոր գիտելիքներ, Մաս 4

Գտնել պատասխաններ հոգևոր հարցերին

Երբեմն դուք կարող եք հոգևոր հարցեր կամ մտահոգություններ ունենալ վարդապետության, անձնական, սոցիալական կամ պատմական թեմաներով։ Այդպիսի հարցեր կամ մտահոգություններ ունենալու դեպքում կարող եք գործել հավատքով, հավերժության հեռանկարով քննել հասկացություններն ու հարցերը ու ձգտել մեծացնել ձեր հասկացողությունը աստվածայնորեն սահմանված աղբյուրների միջոցով։ Այս դասը նախատեսված է օգնելու ձեզ կրկնել հոգևոր գիտելիքներ ձեռք բերելու սկզբունքները։

Մարտահրավերներ հավատքին

Ընթերցեք հետևյալ սցենարները: Կամ կարող եք դիտել «Աստվածայնորեն սահմանված աղբյուրներ» տեսանյութի 2:43-4:19 հատվածը, որը հասանելի է ChurchofJesusChrist.org կայքում։

Էշլինը երիտասարդ կին է և ընկերոջից ինչ-որ բան է լսել Եկեղեցու մասին, որը մտահոգել է իրեն։ Նա զգում է, որ իրենից թաքցրել են տեղեկությունը, և որ իրեն ստել են՝ այդ բաներն ավելի վաղ իրեն չասելով։ Նա սկսում է խոսել ուրիշների հետ, որոնք նմանապես վրդովված են, նաև բացասական մեկնաբանություն է կարդում այդ թեմայի շուրջ։

Հյուգոն սեմինարիայում մի դժվար վարդապետական թեմայի մասին էր լսել և փորձել էր համացանցում մանրամասներ փնտրել։ Նա գտել էր աղբյուրներ, որոնք այդ թեմայի շուրջ քննադատում էին Եկեղեցուն։ Հետաքրքրությունից ելնելով՝ նա մի տեսանյութ էր դիտել, որը բացասական տեսանկյունից էր ներկայացնում Եկեղեցու ուսմունքներն այդ թեմայի վերաբերյալ։ Այդ փորձառությունը նրա մոտ՝ կյանքում առաջին անգամ կասկած էր առաջացրել Եկեղեցու ճշմարտացիության վերաբերյալ։

• Ինչպե՞ս կզգայիք ձեզ այս իրավիճակներում։

• Ի՞նչ եք կարծում, ինչպե՞ս կարձագանքեիք։

Վարդապետության, անձնական, սոցիալական կամ պատմական թեմաների վերաբերյալ անպատասխան մնացած հոգևոր հարցեր ունենալը կարող է դժվարություններ առաջացնել։ Մտածեք, թե արդյոք ունեք նման հարցեր և գրի առեք դրանք այս դասի համար։

Կան բաներ, որոնք իմանալը և անելը կարող է օգնել ձեզ շիտակությամբ և հավատքով պատասխանել հարցերին ու մտահոգություններին։ Այս դասն ուսումնասիրելիս մտածեք, թե տեղեկությունը, որը կիմանաք, ինչպես կարող է օգնել ձեզ Երկնային Հոր և Հիսուս Քրիստոսի հանդեպ վստահությամբ պատասխանել ձեր իսկ հարցերին։

Հոգևոր գիտելիքներ ձեռք բերելու սկզբունքները

Հետևյալ սկզբունքները կարող են առաջնորդել ձեզ, երբ ջանքեր գործադրեք հոգևոր հարցերի վերաբերյալ ուղղորդում և հասկացողություն ստանալու համար․

• Գործեք հավատքով

• Քննեք հասկացությունները և հարցերը հավերժության հեռանկարով

• Ձգտեք մեծացնել հասկացողությունը աստվածային աղբյուրների միջոցով։

Գործեք հավատքով

Ընթերցեք հետևյալ սցենարները: Կամ կարող եք դիտել «Աստվածայնորեն սահմանված աղբյուրներ» տեսանյութի 4:19-5:35 հատվածը, որը հասանելի է ChurchofJesusChrist.org կայքում։ Նախքան սցենարները կարդալը կամ տեսանյութը դիտելը կարող եք կարդալ նաև պարբերություններ 5–7-ը՝ Վարդապետության սերտման հիմնարար փաստաթղթի (2022) «Ձեռք բերել հոգևոր գիտելիք» բաժնում:

Երբ Էշլինը հասկացավ, թե ինչ էր արել, այնքան վշտացավ, որ դադարեց եկեղեցի հաճախել։ Մեկ տարուց ավելի նա հեռու մնաց Եկեղեցուց։ Ի վերջո, նրա մտերիմ ընկերներից մեկը հարցրեց, թե ինչու է դադարել Եկեղեցի հաճախել։ Էշլինի ընկերը կիսվեց նրա հետ գերագույն համաժողովի մի ելույթով՝ ասելով, որ այն օգտակար կլինի և առաջարկեց նրան կարդացածի վերաբերյալ աղոթել։

Հյուգոն թաքցրեց իր կասկածներն ու մտահոգությունները, բայց շարունակում էր եկեղեցի հաճախել։ Սակայն նա դեռևս ուներ տարակուսանք առաջացնող զգացողություններ։ Ինչ-որ պահի նա իր մտահոգությունների մասին ծնողների հետ խոսելու շատ մեծ ցանկություն ունեցավ։ Դա առաջին գիտակցված հոգևոր զգացումն էր, որ նա ունեցավ՝ համացանցում իր փորձառությունից ի վեր:

1. Պատասխանեք հետևյալ հարցերին.

   • Ըստ ձեզ՝ Էշլինը և Հյուգոն հավատքո՞վ են գործում, թե՞ ոչ։

   • Ի՞նչ կարող եք ասել, որը կխրախուսի նրանց դիմել Աստծուն՝ ի պատասխան իրենց դժվարությունների։

   • Ո՞ր սուրբ գրությունները կարող են օգնել մարդուն հավատքով գործել, երբ նրա մոտ ծագել է մի հարց, որին պատասխանելը հեշտ չէ։

   Ձեր օրագրում նշեք առնվազն մեկ սուրբ գրություն և բացատրեք, թե ինչու եք կարծում, որ այն օգտակար կլինի։ Եթե դժվարանում եք գտնել մեկ սուրբ գրություն, վերանայեք վարդապետության սերտման սուրբ գրությունների հատվածները և հիմնական արտահայտությունները Վարդապետության սերտման հիմնարար փաստաթղթում։

Քննեք հասկացություններն ու հարցերը հավերժության հեռանկարով

Վերանայեք 8–10-րդ պարբերությունները Վարդապետության սերտման հիմնարար փաստաթղթի «Ձեռք բերել հոգևոր գիտելիքներ» բաժնում:

2. Պատասխանեք հետևյալ հարցերին.

   • Հասկացությունները և հարցերը հավերժության հեռանկարով քննելը ինչպե՞ս կարող էր օգնել Էշլինին կամ Հյուգոյին, երբ նրանց մոտ կասկածներ ծագեցին առաջին անգամ։

   • Ինչպե՞ս կարող է դա օգնել նրանց իրենց այժմյան իրավիճակում։

   • Ի՞նչ կցանկանայիք, որ Հյուգոն կամ Էշլինը հասկանան Աստծո և Նրա ծրագրի մասին իրենց կյանքի տվյալ պահին։

Ձգտեք մեծացնել հասկացողությունը աստվածային աղբյուրների միջոցով

Վերանայեք 11–12-րդ պարբերությունները Վարդապետության սերտման հիմնարար փաստաթղթի «Ձեռք բերել հոգևոր գիտելիքներ» բաժնում:

Ընթերցեք հետևյալ սցենարները: Կամ կարող եք դիտել «Աստվածայնորեն սահմանված աղբյուրներ» տեսանյութի 5:35-7:01 հատվածը, որը հասանելի է ChurchofJesusChrist.org կայքում։

Էշլինը որոշեց կարդալ ընկերոջ առաջարկած գերագույն համաժողովի ելույթը։ Կարդալիս նա խաղաղության և գոհունակության զգացում ունեցավ, որը բավական տարբեր էր Եկեղեցու մասին բացասական մեկնաբանությունները կարդալիս նրա ունեցած զգացումից։ Նա ներքուստ հավաստիացավ, որ իր կարդացածի մեջ բարություն և ճշմարտություն կար։ Ժամանակի ընթացքում աղոթքով և հավատքով ուսումնասիրելու միջոցով նա զգաց, որ իր վկայությունն ամրապնդվում է, թեև նա դեռ ուներ անպատասխան մնացած հարցեր։

Հյուգոն խոսեց ծնողների հետ ու հասկացավ, որ նրանք բարությամբ ու ըմբռնումով էին մոտենում իր մտահոգություններին։ Նրանք Հյուգոյին ներկայացրին Gospel Library-ի Ավետարանական թեմաներ աղբյուրը և միասին կարդացին Հյուգոյին մտահոգող թեմաների մասին։ Նա հանգստացավ՝ իմանալով, որ կան մարգարեական պատասխաններ, որոնցում կարող է փնտրել իր հարցերի պատասխանները։

3. Պատասխանեք հետևյալ հարցերին.

   • Սցենարների գործող անձանցից յուրաքանչյուրը ո՞ր աղբյուրներից ստացավ տեղեկությունը։ Ո՞ր աղբյուրներն էին հավաստի։ Ինչո՞ւ էին հավաստի կամ ինչո՞ւ հավաստի չէին:

   • Ի՞նչ տարբերություն եղավ, երբ Էշլինը և Հյուգոն օգտվեցին աստվածայնորեն սահմանված աղբյուրներից։

   • Աստվածայնորեն սահմանված ո՞ր աղբյուրներին եք երախտապարտ։ Ինչո՞ւ։

   Մտածեք, թե ինչ սովորեցիք այսօր, և այն ինչպես կարող է օգնել ձեր կամ ուրիշների ունեցած հոգևոր հարցերի կամ դժվարությունների դեպքում։ Կարող եք ձեր օրագրում գրել, թե ինչ սովորեցիք, որը կարող է օգնել ձեզ խաղաղություն և հասկացողություն գտնել։ Հրավիրեք Երկնային Հոր ազդեցությունը, որպեսզի մտածելու և գրելու ընթացքում ոգեշնչի ձեզ։

Ընտրովի. ցանկանո՞ւմ եք ավելին իմանալ

Աստված ինչպե՞ս կարող է օգնել նրանց, ովքեր զգում են, որ Նրա կամ Նրա ավետարանի հանդեպ իրենց հավատքը տատանվում է։

Նախագահ Դիտեր Ֆ. Ուխդորֆն ուսուցանել է.

Իմ կյանքում ես հասկացել եմ, որ կարիք չկա, որ մենք լինենք «ավելին», որպեսզի սկսենք դառնալ այն մարդը, որին ցանկանում է տեսնել Աստված։

Աստված կվերցնի ձեզ այնպես՝ ինչպես կաք այս պահին և կսկի աշխատել ձեզ հետ։ Ձեզ միայն անհրաժեշտ կլինի հոժարակամ սիրտ, հավատալու ցանկություն և Տիրոջ հանդեպ վստահություն։ …

Եթե մի փոքր հավատք գործադրեք և սկսեք քայլել որպես մեր Տեր Հիսուս Քրիստոսի խաղաղ հետևորդ՝ ձեր սիրտը կփոխվի [տես Ա Թագավորաց 10.9]։ Ձեր ողջ էությունը կլցվի լույսով [տես Մատթեոս 6.22]։

Աստված կօգնի ձեզ, որ դառնաք ավելին, քան դուք երբևէ կարող էիք պատկերացնել։ Եվ դուք կհասկանաք, որ Հիսուս Քրիստոսի ավետարանն իսկապես օգնում է ձեզ՝ ձեր կյանքում։ Այն գործում է։ (Դիտեր Ֆ. Ուխդորֆ, «Ավետարանը հրաշալիորեն գործում է», Լիահոնա, նոյեմբեր 2015 թ․, 22–23)։