Ալմա 36

«Ես այլևս չկարողացա հիշել իմ ցավերը»

Մեր մտերիմ մարդկանց հետ կարևոր հոգևոր փորձառություններով կիսվելը կարող է զորացման աղբյուր լինել նրանց և մեզ համար։ Խոսելով իր որդի Հելամանի հետ՝ Ալման պատմում էր, թե ինչպես է հրեշտակ տեսել, զգացել տանջանքներ իր մեղքերի պատճառով և ազատում գտել Հիսուս Քրիստոսի միջոցով։ Այս դասը նախատեսված է օգնելու ձեզ հավատքով դառնալ դեպի Հիսուս Քրիստոսը և զգալ Նրա միջոցով ազատման ուրախությունը։

Հակիմաստ բառեր

Սուրբ գրությունների ուսումնասիրության ձեր օրագրում արտագրեք հետևյալը։ Սլաքից հետո գրեք, թե ըստ ձեզ, որն է յուրաքանչյուրի հակիմաստ բառը։

• Ցավ →

• Զղջում →

• Տխրություն →

Խորհեք, թե երբ եք մեղք գործել և ձախ կողմի զգացողությունն ունեցել։ Այդ զգացողությունը երբևէ փոխվե՞լ է աջ կողմի գրվածով։ Ի՞նչ է տեղի ունեցել, որը հնարավոր է դարձրել այդ փոփոխությունը։

Երբ մեղքը բացասական զգացողություններ է պատճառում, միայն Տերը կարող է օգնել մեզ այդ զգացողությունները վերափոխել դրանց հակադիր՝ դրական զգացողությունների։

Խորհեք, թե հետևյալ պնդումները որքանով են ճիշտ ձեզ համար․

• Երբ մեղք գործեցի, ես գիտեի ինչպես դիմել Տիրոջը ներում, խաղաղություն և հույս ստանալու համար։

• Ես վստահ եմ, որ Տիրոջ օգնությամբ կարող եմ փոխվել։

• Ես պարբերաբար դիմում եմ Տիրոջը այդ օգնության համար։

Այսօր կուսումնասիրեք, թե Ալմա Կրտսերի մեղքերից առաջացած տագնապային խորը զգացումներն ինչպես ուրախության և խաղաղության զգացումների փոխվեցին, երբ նա աղերսեց Փրկչին օգնել իրեն։ Ուսումնասիրելիս փնտրեք, թե ինչպես կարող եք մեղքը և դրա ազդեցությունները հաղթահարելու համար Տիրոջ օգնությանը դիմել և Հիսուս Քրիստոսի միջոցով ուրախություն զգալ։

Ալմայի զորեղ փոփոխությունը

Երբ զորամացիները մերժեցին իրենց ուսուցանված ավետարանը, միացան լամանացիներին, որպեսզի նրանց հրահրեն նեփիացիների դեմ։ Հետո զորամացիները և լամանացիները հարձակվեցին նեփիացիների վրա, ինչը մեծ պատերազմի վերածվեց։ Նեփիացիներից շատերի սրտերը նույնպես «սկսում էին կարծրանալ» Աստծո խոսքի դեմ (Ալմա 35.15)։ Ի պատասխան նեփիացիների հոգևոր մերժման՝ Ալման հավաքեց իր որդիներին, որպեսզի «նրանցից ամեն մեկին առանձին տա իր հանձնարարությունը, արդարությանը պատկանող բաների վերաբերյալ» (Ալմա 35.16)։ Նա նախ խոսեց իր որդի Հելամանի հետ և պատմեց իր դարձի փորձառության մասին։

• Ի՞նչ եք հիշում Ալմա Կրտսերի մասին, և ի՞նչ է պատկերված այս նկարում։

Կարդացեք Ալմա 36.6–11 հատվածները և փնտրեք մանրամասներ, որոնք գուցե բաց եք թողել։

1. Պատասխանեք հետևյալ հարցերին.

   • Ըստ ձեզ՝ հրեշտակի խոսքերն ինչո՞ւ էին այդքան ազդեցիկ Ալմայի համար։

   • Բացի հրեշտակ տեսնելուց, ի՞նչը կարող է ստիպել մարդուն հասկանալ, որ նա փոփոխության կարիք ունի։

Սուրբ գրությունների հատվածները նշելը կարող է օգնել ձեզ ավելի լավ հասկանալ և հիշել, թե ինչ են ուսուցանում սուրբ գրությունները։ Այն կարող է օգնել ձեզ ավելի հեշտ մտովի պատկերացնել սուրբ գրությունների օրինաչափությունները կամ համեմատությունները։ Այն կարող է օգնել նաև հետագայում ավելի հեշտ գտնել կարևոր հատվածները։ Նշելու համար կարող եք բառերն ու արտահայտություններն ընդգծել, շրջանի մեջ վերցնել և գունանշել։

Հատվածների ստորև ներկայացվող խմբերում կարդացեք, թե ինչ էր նկարագրում Ալման իր տեսածի ու զգացածի մասին այն երեք օրվա ընթացքում, երբ չէր կարողանում շարժվել։ Կարող եք նշել այն, ինչ առաջարկված է։

• Ալմա 36.12–16․ բառեր կամ արտահայտություններ, որոնք նկարագրում են, թե Ալման ինչ էր զգում իր մեղքերի պատճառով

• Ալմա 36.17–18․ բառեր կամ արտահայտություններ, որոնք ցույց են տալիս, թե ինչ էր հիշում Ալման և ինչ արեց, որը հանգեցրեց փոփոխության

• Ալմա 36.19–21․ բառեր կամ արտահայտություններ, որոնք նկարագրում են, որ Ալման զգում է ինչ-որ հակառակ բան կամ հակասում է նրան, ինչ նա ի սկզբանե զգացել է

• Ի՞նչն է տպավորում ձեզ այն ամենում, որը հանգեցրեց Ալմայի փոփոխությանը։

• Ի՞նչ ճշմարտություններ կարող ենք սովորել նրա փորձառությունից։

Ճշմարտություններից մեկը, որ կարող ենք սովորել, հետևյալն է. Հիսուս Քրիստոսը մեզ մեր մեղքերի ցավից ազատելու և մեզ ուրախությամբ լցնելու զորություն ունի։

• Ալման ինչպե՞ս հրավիրեց Փրկչի ազատման զորությունը։

Կարդացեք հետևյալ խոսքերը և մտածեք, թե դրանք ինչպես են օգնում ձեզ ավելի խորությամբ հասկանալ այն ճշմարտությունները, որոնք սովորում ենք Ալմայի փորձառությունից։ Կարող եք արտագրել ձեր ցանկությամբ որևէ արտահայտություն և այն գրանցել ձեր սուրբ գրությունների նշումների բաժնում կամ լուսանցքներում։

Տասներկու Առաքյալների Քվորումի նախագահ Բոյդ Ք. Փաքերը (1924–2015) բացատրել է.

Կարիք չկա իմանալ ամեն ինչ նախապես, որպեսզի Քավության զորությունը գործի ձեզ համար։ Հավատացեք Քրիստոսին, այն սկսում է գործել խնդրելու օրվանից: (Բոյդ Ք. Փաքեր, «Մաքրված», Ensign, մայիս 1997 թ․, 10)

Տասներկու Առաքյալների Քվորումից երեց Նիլ Լ․ Անդերսենն ուսուցանել է.

Երբ մենք ազնվորեն խոստովանում ենք մեր մեղքերը, ուղղում ենք այն, ինչ կարող ենք, և թողնում ենք մեր մեղքերը՝ պահելով պատվիրանները, ներում ստանալու գործընթացի մեջ ենք մտնում։ Ժամանակի ընթացքում մենք կզգանք, որ մեր վշտի ցավը հեռանում է՝ «վերցնելով հանցանքը մեր սրտերից» և պարգևելով «խղճմտանքի խաղաղություն»: (Նիլ Լ․ Անդերսեն, «Ապաշխարեք, … որպեսզի ես կարողանամ բժշկել ձեզ», Լիահոնա նոյեմբեր 2009 թ․, 42)

• Ի՞նչ նոր գաղափարներ ձեռք բերեցիք այս խոսքերից։

2. Ընտրեք հետևյալ իրավիճակներից մեկը և, հիմնվելով ձեր մտքերի ու այսօր սովորածի վրա, գրեք ձեր պատասխանը։ Ձեր պատասխանում անպայման օգտագործեք Ալմա 36 գլխի մեկ կամ մի քանի հատված։

   Ի՞նչ կասեիք այն պատանուն, որը․

   • Զղջման և ցավի մեծ զգացում ունի իր մեղքերի պատճառով։

   • Զգում է, որ իր մեղքերը սարսափելի չեն և ժամանակի ընթացքում առանց ապաշխարության ինքնուրույն կլուծվեն։

Մի պահ մտածեք ձեր իրավիճակի և այն մասին, թե այսօրվա դասն ինչպես կարող է կիրառվել ձեր կյանքում։ Մտածեք մեկ բան, որը կարող եք անել այսօր, որպեսզի դառնաք դեպի Փրկիչը և ձեր կյանք հրավիրեք Նրա ազատման զորությունը։

Ընտրովի. ցանկանո՞ւմ եք ավելին իմանալ

Ալմա 36.12–16 Ի՞նչ են նշանակում Ալմայի օգտագործած որոշ բառեր։

Տասներկու Առաքյալների Քվորումի նախագահ Բոյդ Ք. Փաքերն (1924–2015) ուսուցանել է.

Պրկված նշանակում է «խոշտանգված»։ Հնում պրկանոցը մի շրջանակ էր, որի վրա պառկեցնում էին զոհին և նրա յուրաքանչյուր կոճ ու դաստակ սռնուն ամրացնում։ Այնուհետև սռնին պտտում էին, որպեսզի անտանելի ցավ պատճառեն զոհին։

Ցաքանը շրջանակ է, որի վրա սրածայր գամեր են ամրացված։ Հողի միջով քաշելիս դրանք տակնուվրա են անում հողը։ Սուրբ գրություններում հաճախ խոսվում է մեղքով «ցաքանված» (տակնուվրա եղած) հոգիների ու մտքերի մասին։

Տանջանք նշանակում է «գալարել»՝ տանջելու միջոց, որն այնքան ցավոտ էր, որ նույնիսկ անմեղը կխոստովաներ։ (Բոյդ Ք. Փաքեր, «Տիրոջ ձեռքի հպումը», Ensign, մայիս 2001 թ․, 23)

Ալմա 36.19 Եթե ապաշխարեմ, կմոռանա՞մ մեղքերս։

Խոսելով մեր մեղքերը հիշելու մասին՝ Տասներկու Առաքյալների Քվորումից երեց Դիտեր Ֆ. Ուխդորֆը բացատրել է․

Սատանան կփորձի ստիպել մեզ հավատալ, որ մեր մեղքերը չեն ներվել, քանի դեռ մենք կարող ենք հիշել դրանք։ Սատանան ստախոս է, նա փորձում է աղավաղել մեր տեսադաշտը և հեռացնում է մեզ ապաշխարության և ներման ուղուց: Աստված չի խոստացել, որ մենք չենք հիշի մեր մեղքերը։ Հիշելը կօգնի մեզ չկատարել նորից նույն սխալները: Բայց եթե մենք մնանք ճշմարիտ և հավատարիմ, մեր մեղքերի հիշողությունները ժամանակի ընթացքում կմեղմանան: Դա կլինի ապաքինման և սրբագործման անհրաժեշտ ընթացքի մասը։ Ալման վկայում էր, որ երբ Հիսուսի ողորմածությունն աղերսեց, նա դեռ շարունակում էր հիշել իր մեղքերը, բայց իր մեղքերի մասին հիշելն այլևս չէր վշտացնում ու տանջում նրան, քանի որ գիտեր, որ ներված է (տես Ալմա 36.17–19) (Դիտեր Ֆ. Ուխդորֆ, «Ապահով վերադարձի կետ», Լիահոնա, մայիս 2007 թ., 101)

Ապաշխարության հետ կապված տառապանքն ինչպե՞ս է համեմատելի այն տառապանքի հետ, որը կզգանք, եթե չապաշխարենք։

Տասներկու Առաքյալների Քվորումից երեց Դ. Թոդ Քրիստոֆերսոնն ուսուցանել է.

Ապաշխարության հետ կապված ցանկացած ցավ կլինի շատ ավելի թույլ, քան այն տառապանքը, որն անհրաժեշտ է չլուծված մեղսագործության դիմաց արդարության բավարարման համար: Փրկիչը շատ չի խոսել այն մասին, թե ինչ տառապանք է կրել արդարության պահանջները բավարարելու և մեր մեղքերը քավելու համար, բայց Նա ասել է հայտնություն պարունակող հետևյալ արտահայտությունը.

«Քանզի ահա, ես՝ Աստվածս, տառապել եմ այս բաները բոլորի համար, որպեսզի նրանք չտառապեն, եթե ապաշխարեն,

Բայց եթե չապաշխարեն, նրանք պետք է տառապեն, ճիշտ ինչպես ես․

«Տառապանք, որը ստիպեց ինձ, նույնիսկ Աստծուս, բոլորից մեծագույնիս, ցավից դողալ և արյունահոսել ամեն մի ծակոտիից և տառապել՝ թե մարմնով, թե ոգով,– և ես ցանկացա, որ գուցե չխմեմ դառը բաժակը» (Վ&ևՈւ 19.16–18)։ (Դ. Թոդ Քրիստոֆերսոն, «Ապաշխարության աստվածային պարգևը», Լիահոնա, նոյեմբեր 2011 թ․, 40)