Alma 40

Ang Kalibotan sa Espiritu ug ang Pagkabanhaw

Kristo sa kalibotan sa espiritu

Human siya gidapit sa iyang amahan sa paghinulsol, adunay pipila ka mga pangutana si Corianton mahitungod sa laraw sa Dios, lakip ang unsay mahitabo kanato human kita mamatay. Ang iyang amahan, si Alma, mitubag sa iyang mga pangutana ug mipamatuod sa mahinungdanon nga tahas ni Jesukristo sa laraw sa Langitnong Amahan. Kini nga leksiyon makatabang kanimo sa pagpalawom sa imong pasalamat sa unsay nahimo sa Manluluwas alang kanimo ug makahatag kanimo og kahigayonan sa pagpasabot kon unsay mahitabo human kita mamatay.

Mga Pangutana

Si Sister Reyna I. Aburto, usa ka magtatambag sa Kinatibuk-ang Kapangulohan sa Relief Society, mipakigbahin og personal nga kasinatian nga naghulagway sa mga pangutana nga tingali aduna kita mahitungod sa unsay mahitabo human kita mamatay. Tan-awa ang bidyo nga “Ang Lubnganan Walay Kadaogan,” anaa sa ChurchofJesusChrist.org, gikan sa time code 4:21 hangtod sa 5:13, o basaha ang mosunod nga pamahayag:

Sister Reyna I. Aburto

Sa dihang nuwebe anyos pa ko, ang akong magulang nga lalaki namatay atol sa usa ka grabe nga linog. Tungod kay nahitabo kini nga wala damha, dugay-dugay pa nako nga nasabtan ang reyalidad sa unsay nahitabo. Grabe ang akong gibati nga kasub-anan, ug mangutana ko sa akong kaugalingon, “Unsay nahitabo sa akong igsoon? Asa siya? Diin siya miadto? Makita ba nako siya pag-usab?”

Nianang higayona wala pa ko makahibalo kabahin sa plano sa Dios sa kaluwasan, ug ako adunay tinguha nga makahibalo diin kita gikan, unsa ang katuyoan sa atong kinabuhi, ug unsa ang mahitabo nato human kita mamatay. Dili ba aduna kita niana nga mga pangandoy kon kita mawad-an og minahal sa kinabuhi o kon kita makasinati og mga kalisod sa atong mga kinabuhi? (Reyna I. Aburto, “Ang Lubnganan Walay Kadaogan,” Liahona, Mayo 2021, 86)

Ang anak ni Alma nga si Corianton aduna usab mga kabalaka mahitungod sa kinabuhi human sa kamatayon.

Basaha ang Alma 40:1, mangita sa unsay gikabalak-an ni Corianton.

• Ngano sa imong hunahuna nga tingali nabalaka siya bahin niini?

Hinumdomi nga si Corianton nakalapas sa mga sugo sa Dios, lakip ang balaod sa kaputli. Tungod sa iyang mga pagpili, tingali nabalaka siya sa iyang kahimtang human niining kinabuhia. Aron matubag ang mga kabalaka ni Corianton ug matabangan siya sa paghinulsol, gitudloan siya ni Alma og doktrina. Ang tubag ni Alma sa mga kabalaka ni Corianton makatabang usab sa usa ka tawo nga adunay mga pangutana sama ni Sister Aburto.

Si Sister Aburto sa wala madugay gitudloan sa mga misyonaryo kinsa mitabang kaniya sa pagpangita og mga tubag sa iyang mga pangutana. Handurawa nga usa ka niadtong mga misiyonaryo ug nangandam sa pagtudlo kaniya. Gamita ang mosunod nga mga kapanguhaan aron mangandam og mubo nga pagpasabot nga makatabang sa pagtubag sa mga pangutana ni Sister Aburto.

Ang Kalibotan sa Espiritu

Manwal sa Magtutudlo sa Basahon ni Mormon (2024)—”Alma 40: Ang Kalibotan sa Espiritu ug ang Pagkabanhaw”

Basaha ang Alma 40:6–7, 11–14 aron makita kon unsay gitudlo ni Alma kang Corianton. Dayon gamita ang mosunod nga mga kapanguhaan aron sa pagtabang kanimo sa pag-andam pa gayod sa unsay imong itudlo.

• Doktrina ug mga Pakigsaad 138:11–13, 18–22, 57

• Giya ngadto sa mga Kasulatan, “Paraiso,” scriptures.ChurchofJesusChrist.org

Si Presidente Dallin H. Oaks sa Unang Kapangulohan mitudlo:

Presidente Dallin H. Oaks

Kita nasayod gikan sa mga kasulatan nga human mamatay ang atong mga lawas magpadayon kitang magpuyo isip mga espiritu didto sa kalibotan sa espiritu. Ang mga kasulatan nagtudlo usab nga kining kalibotan sa espiritu gibahin tali sa mga “matarong” o “makiangayon” samtang buhi pa ug niadtong mga nagpakadaotan. Naghulagway usab kini giunsa sa ubang matinud-anong mga espiritu pagtudlo sa ebanghelyo ngadto sa mga daotan o masinupakon (tan-awa sa 1 Pedro 3:19; Doktrina ug mga Pakigsaad 138:19–20, 29, 32, 37). (Dallin H. Oaks, “Salig sa Ginoo,” Liahona, Nob. 2019, 26)

Pangandam kon unsaon nimo pagpasabot ang mga tubag sa mosunod nga mga pangutana:

• Unsay mahitabo sa atong mga espiritu kon kita mamatay?

• Sama sa unsa kaha ngadto sa paraiso? Sama sa unsa ang dapit nga gitawag ni Alma nga “kawanangan sa kangitngit,” apan gitawag usab nga bilanggoan sa espiritu (1 Pedro 3:19) o impyerno (2 Nephi 9:12)?

• Sa unsang paagi nga ang pagkat-on mahitungod sa paraiso ug bilanggoan makadugang sa atong pagpasalamat alang sa Manluluwas?

• Sa unsang paagi nga ang atong kahibalo kabahin sa kalibotan sa espiritu makapanalangin kanato atol sa atong mortal nga mga kinabuhi?

Kon magtudlo, siguroha nga ipaklaro nga tali sa kamatayon ug pagkabanhaw, ang mga espiritu sa mga matarong nagpuyo sa paraiso ug ang mga espiritu sa mga daotan nagpuyo sa bilanggoan sa espiritu. Ipakigbahin kon sa unsang paagi ang imong pagsabot niini nga kamatuoran makaimpluwensiya sa mga pagpili nga imong gihimo niini nga kinabuhi.

© 2024 by Intellectual Reserve, Inc. All rights reserved.

Pagkabanhaw

Manwal sa Magtutudlo sa Basahon ni Mormon (2024)—”Alma 40: Ang Kalibotan sa Espiritu ug ang Pagkabanhaw”

Basaha ang Alma 40:2–5, 23–24 aron makita kon unsay gitudlo ni Alma kang Corianton. Dayon gamita ang mosunod nga mga kapanguhaan aron sa pagtabang kanimo sa pag-andam pa gayod sa unsay imong itudlo.

• Alma 11:42–45

• Giya ngadto sa mga Kasulatan, “Pagkabanhaw,” scriptures.ChurchofJesusChrist.org

Si Presidente Dallin H. Oaks sa Unang Kapangulohan mitudlo:

Presidente Dallin H. Oaks

Atong gisaulog ang ka tinuod sa Pagkabanhaw niining panahon sa Pasko sa Pagkabanhaw. Kini naghatag nato sa panglantaw ug kalig-on sa paglahutay sa mortal nga mga hagit nga giatubang sa matag usa kanato ug niadtong atong gihigugma, mga butang sama sa pisikal, mental, o emosyonal nga kakulangan nga atong makuha gikan sa pagkatawo o masinati atol sa atong mortal nga kinabuhi. Tungod sa Pagkabanhaw, kita nasayod nga kining mortal nga mga kakulangan temporaryo lamang! (Dallin H. Oaks, “Ang Dako nga Laraw,” Liahona, Mayo 2020, 95)

Pangandam kon unsaon nimo pagpasabot ang mga tubag sa mosunod nga mga pangutana:

• Unsa ang pagkabanhaw? Kinsa ang mabanhaw?

• Sumala sa Alma 40:2–3, unsay nakapaposible sa Pagkabanhaw?

• Sa unsang paagi nga ang atong kahibalo kabahin sa Pagkabanhaw makapanalangin kanato atol sa atong mortal nga mga kinabuhi?

Kon magtudlo, siguroha nga ipaklaro nga tungod kay si Jesukristo nabanhaw, kitang tanan mabanhaw usab. Ipakigbahin ang usa ka rason nga ikaw mapasalamaton sa saad sa pagkabanhaw.

© 2024 by Intellectual Reserve, Inc. All rights reserved.

Mga tubag

icon, rekord

1. Pagsulat og mubo nga pagpasabot kon unsay imong itudlo kang Sister Aburto. Ilakip ang mga kamatuoran nga imong nakaplagan, ug ikonsiderar ang pagpakigbahin sa imong pagpamatuod mahitungod sa tahas ni Jesukristo sa kalibotan sa espiritu ug sa pagkabanhaw. Mahimo usab nimong ipakigbahin unsa ang imong gisulat alang sa uban.

2. Tubaga ang labing menos duha sa mosunod nga mga pangutana:

   • Ngano nga ang unsay imong nakat-onan mahitungod sa kalibotan sa espiritu ug sa pagkabanhaw importante diha kanimo?

   • Sa unsang paagi kini nga kahibalo makaapekto sa imong mga pagbati ngadto sa Langitnong Amahan ug ni Jesukristo?

   • Unsa ang pipila ka mga pangutana nga anaa nimo nga natubag karon?

   • Unsa nga mga pangutana ang gusto nimong ipadayon sa pagpangita og mga tubag?

Opsiyonal: Gustong Makakat-on Pa og Dugang?

Alma 40:16–20. Unsa ang Unang Pagkabanhaw?

Si Elder Bruce R. McConkie (1915–85) sa Korum sa Napulog Duha ka Apostoles mitudlo:

Elder Bruce R. McConkie

Kadtong moabot sa buntag niini nga pagkabanhaw mobuhat sa ingon uban sa langitnon [celestial] nga mga lawas ug makapanunod sa langitnon [celestial] nga himaya; kini sila mao ang unang mga bunga ni Kristo. Kadtong moabot sa hapon niini nga pagkabanhaw mobuhat sa ingon uban sa kalibotanhon nga mga lawas ug sa ingon makapanunod niana nga gingharian; sila gihulagway nga iya ni Kristo niining pag-abot. Ang tanan nga nabanhaw sa pagkakaron nakadawat og langitnon [celestial] nga mga lawas; ang pagtungha sa kalibotanhon [terrestrial] nga mga binuhat dili magsugod hangtod mahuman ang Ikaduhang Pag-anhi. (Doktrina ug mga Pakigsaad 76:50–80; 88:95–99.) (Bruce R. McConkie, Doctrinal New Testament Commentary [1965], 1:196)

Alma 40:21–22. Unsa ang buot ipasabot sa “pagadad-on aron mobarog sa atubangan sa Dios”?

Si Elder D. Todd Christofferson sa Korum sa Napulog Duha ka Apostoles mitudlo:

Elder D. Todd Christofferson

Pinaagi sa Iyang Pag-ula ug Pagkabanhaw, si Jesukristo nakabuntog sa tanang aspeto sa Pagkapukan. Ang pisikal nga kamatayon temporaryo lang, ug gani ang espirituhanong kamatayon adunay kataposan, kay kitang tanan mobalik ngadto sa presensiya sa Dios, maayo kay temporaryo lang, aron pagahukman. Kita makasalig gayod sa Iyang gahom sa pagbuntog sa uban pa ug paghatag kanato og kinabuhing walay kataposan. (D. Todd Christofferson, “Ang Pagkabanhaw ni Jesukristo,” Liahona, Mayo 2014, 112)

Alma 40:23. Sama sa unsa ang usa ka nabanhaw nga lawas?

Si Elder Paul V. Johnson sa Seventy mitudlo:

Elder Paul V. Johnson

Ang pagkabanhaw nakapahimong posible sa espiritu ug sa lawas sa tawo nga mahiusa pag-usab, apan niining higayona ang lawas mahimo nang imortal ug hingpit—dili na ulipon sa kasakit, balatian, o ubang mga problema [tan-awa sa Alma 11:43]. …

Ang matag usa kanato adunay pisikal, mental, ug emosyonal nga mga limitasyon ug mga kahuyang. Kini nga mga hagit, diin ang pipila daw dili malupig karon, sa kataposan mahimong masulbad ra. Walay usa niining mga problema moabot nato human kita mabanhaw. (Paul V. Johnson, “Ug Wala Nay Kamatayon,” Liahona, Mayo 2016, 121–22)