Doktrinal nga Kahanas: Alma 41:10

“Ang Pagkadaotan Dili Mahitabo Nga Kalipay”

Sa Alma 41:10, imong nakat-onan nga “ang pagkadaotan dili mahitabo nga kalipay.” Kini nga leksiyon makatabang kanimo sa pagsag-ulo sa tudling sa doktrinal nga kahanas ug sa mahinungdanon nga hugpong sa mga pulong sa kasulatan sa Alma 41:10, mapasabot ang doktrina, ug mabansay ang paggamit sa mga baroganan sa pag-angkon og espirituhanong kahibalo sa tinud-anay nga mga sitwasyon sa kinabuhi.

Isag-ulo ug ipasabot

Aron matabangan ka nga makasag-ulo, sublia ang mahinungdanon nga hugpong sa mga pulong sa doktrinal nga kahanas ug ang pakisayran sa makadaghang higayon, “Alma 41:10 ‘Ang pagkadaotan dili mahitabo nga kalipay.’” Sulayi nga dili kaayo kini tan-awon sa matag higayon nga imo kining balikon. Kon gusto nimo og dugang nga hagit, sulayi ang pagsag-ulo sa tibuok tudling. Tingali makatabang ang paggamit sa Doktrinal nga Kahanas nga app.

1. Kompletoha ang mosunod nga kalihokan:

   Paghunahuna og sitwasyon diin makatabang alang sa usa ka tawo nga mahibalo sa doktrina nga gitudlo diha sa Alma 41:10. Dayon ipasabot kon sa unsang paagi ang doktrina makatabang sa sitwasyon.

Pagbansay sa paggamit

2. Kompletoha ang mosunod nga kalihokan sa pagpares:

   Rebyoha ang matag usa sa mosunod nga tulo ka mga baroganan sa pag-angkon og espirituhanong kahibalo diha sa Mahinungdanon nga Dokumento sa Doktrinal nga Kahanas (2022). Dayon ipares ang mga pamahayag A–F ngadto sa tukma nga baroganan. Ang matag baroganan adunay duha ka mga pamahayag nga may kalabotan niini.

   1. “Lihokon Inubanan sa hugot nga Pagtuo”

   2. “Susihon ang mga Konsepto ug mga Pangutana inubanan sa Mahangtorong Panglantaw”

   3. “Tinguhaa ang Dugang nga Panabot pinaagi sa Balaanong Gitudlo nga mga Tinubdan”

   1. “Ang Unang Kapangulohan ug ang Korum sa Napulog Duha ka Apostoles—mga propeta sa Ginoo dinhi sa kalibotan karon—mao ang importante kaayong tinubdan sa kamatuoran.”

   2. “Samtang magtinguha kita sa pagpalambo sa atong panabot ug sa pagsulbad sa mga problema, importante nga mosalig kita sa pagpamatuod nga ato nang naangkon mahitungod ni Jesukristo.”

   3. “Atong ikonsiderar ang [mga pangutana] diha sa kinatibuk-ang kahulogansa plano sa kaluwasan ug sa mga pagtulun-an sa Manluluwas.”

   4. “Ang pagkat-on sa pag-ila ug paglikay sa dili kasaligang mga tinubdan makapanalipod nato gikan sa sayop nga impormasyon ug niadtong mga nagtinguha sa pagdaot sa atong tinuohan.”

   5. “Tinguhaon nato ang tabang sa Espiritu Santo aron makita ang mga butang sama sa pagkakita niini sa Ginoo.”

   6. “Samtang padayon kita nga mangita og mga tubag, kinahanglan nga magpakabuhi kita sa hugot nga pagtuo—mosalig nga sa kataposan kita makadawat sa mga tubag nga atong gitinguha.”

Ang mga tubag makita sa kataposan niini nga leksiyon.

Basaha ang mosunod nga senaryo:

Si Carlos, usa ka miyembro sa Simbahan, naglisod nga makita ang kamahinungdanon sa pagsunod sa mga sugo sa Dios. Bag-ohay lang siya miingon kanimo, “Nakaila ko og daghang mga tawo kinsa milapas sa mga sugo ug ingon og adunay nindot nga mga kinabuhi. Unsaon nimo pag-ingon nga kinahanglan nimong sundon ang mga sugo aron magmalipayon?” Imong makita ang katim-os sa pangutana ni Carlos apan gibati nimo nga nagkinahanglan ka og igong panahon sa paghunahuna aron sa pagtubag. Nagkasabot mong duha nga maghisgot pa bahin sa iyang pangutana pagkasunod adlaw.

Gamita ang unsay imong nakat-onan ug gibati samtang nagtuon sa Alma 41:10 ug sa mga baroganan sa pag-angkon og espirituhanong kahibalo aron sa pagpangandam sa paghisgot sa pangutana ni Carlos.

Tinguhaa ang dugang nga panabot pinaagi sa balaanong gitudlo nga mga tinubdan

1. Ang mga kasulatan balaanong gitudlo nga mga tinubdan nga makatabang kanato sa pagtubag sa atong mga pangutana. Basaha ang Alma 41:10 ug pangita og bisan og usa ka laing tudling sa doktrinal nga kahanas nga makatabang kanimo sa pagtubag.

2. Paghunahuna og pipila ka mga tinubdan nga imong idapit kang Carlos sa pagrebyo alang sa dugang nga impormasyon. Mahimo pa gani nimo ipasabot kon unsay nakapahimo sa tinubdan nga kasaligan mahitungod sa espirituwal nga mga butang.

Susihon ang mga konsepto o mga pangutana inubanan sa mahangtorong panglantaw

Ang mosunod nga mga pangutana makatabang kanimo sa pag-ila sa mga pangagpas nga gihimo ni Carlos:

• Unsa kaha ang iyang mga pangagpas mahitungod sa mga sugo o kalipay?

• Unsa nga mga pagtulun-an sa ebanghelyo ang may kalabotan o naghatag og mga tubag sa iyang pangutana?

• Unsa sa imong hunahuna ang kinahanglang mahibaloan ni Carlos mahitungod sa Langitnong Amahan, sa Iyang plano, ug giunsa Niya pagdumala ang Iyang mga anak?

Lihokon inubanan sa hugot nga pagtuo

Si Carlos makalihok inubanan sa hugot nga pagtuo pinaagi sa pagtinguha nga mas makasabot sa mga sugo sa Langitnong Amahan. Ang pagpili sa pagtuman sa mga sugo samtang siya nagtinguha og dugang panabot mahitungod sa kamahinungdanon niini usa usab ka paglihok inubanan sa hugot nga pagtuo. Pagpili og labing menos duha ka mga sugo ug ilha kon sa unsang paagi ang pagsunod niini makatabang kang Carlos nga makasinati og kalipay o sa unsang paagi ang paglapas niini mahimong mosangpot sa kasakit. Mahimo usab nimong ipakigbahin kon sa unsang paagi ang pagsunod niini nga mga sugo nakahatag kanimo og kalipay.

2. Pagsulat og tubag kang Carlos. Ipasabot kon sa unsang paagi siya makasunod sa matag usa sa mga baroganan sa pag-angkon og espirituhanong kahibalo ug sa doktrina nga gitudlo diha sa Alma 41:10 aron makakaplag og mga tubag sa iyang pangutana.

Ang mga tubag sa kalihokan sa pagpares mao ang (1) B, F; (2) C, E; ug (3) A, D.