Helaman 13–16

Pagsabot sa mga Propeta sa Ginoo

Samuel ang Lamanite diha sa paril

Unsa ang imong gibati dihang nakadungog ka og mga tawo nga nagpahayag og mga kabalaka o pagsaway mahitungod sa mga propeta? Samtang si Samuel ang Lamanite nagtindog ibabaw sa paril ug nagtawag sa mga katawhan sa paghinulsol, sila adunay nagkalain-laing mga reaksiyon sa iyang mga gipamulong. Ang mga tawo nakasinati og susama nga mga reaksiyon sa mga propeta sa atong panahon. Kini nga leksiyon makatabang kanimo nga makasabot sa tahas sa mga propeta ug kon unsaon nila sa pagtabang kanato.

Pagsalig sa mga Propeta sa Ginoo

Idrowing ang mosunod diha sa imong journal sa pagtuon:

graphic nga nagpakita sa usa ka tawo ubos sa ulohan nga kadtong kinsa mituo ug misunod sa mga propeta ug laing tawo ubos sa ulohan nga kadtong kinsa dili motuo ug gani nagsaway pa sa mga propeta

Sa palibot sa porma [figure] nga nagrepresentar sa matag grupo, ilista ang pipila ka mga rason kon nganong ang mga tawo motuo ug mosunod sa mga propeta o dili motuo ug gani mosaway pa kanila.

Paggahin og kadiyot sa pagpamalandong sa unsay imong nakat-onan ug nahibaloan nang daan mahitungod sa mga propeta nga makatabang nimo ug sa uban nga motuo nga sila gitawag sa Dios. Pananglitan, tingali nakahimo ka og lista sa mga kamatuoran mahitungod sa mga propeta samtang nagtuon ka mahitungod kang Nephi sa Helaman 7–10.

Sa Helaman 13, ang Ginoo mipadala og dugang nga propeta, si Samuel ang Lamanite. Kini nga leksiyon usa ka kinatibuk-ang pagpasabot sa iyang mga pagtulun-an (tan-awa sa Helaman 13–16). Samtang magtuon ka, makadugang ka sa imong listahan sa mga kamatuoran mahitungod sa mga propeta. Pangita og mga panabot nga makatabang sa usa ka tawo kinsa naglisod sa pagtuo.

Si Samuel nagsangyaw ngadto sa mga Nephite

Basaha ang Helaman 13:1–7; 14:9, ug pangitaa kon unsay nakapadani kanimo bahin kang Samuel.

• Sa panig-ingnan ni Samuel, unsay imong nakat-onan mahitungod sa mga propeta? (Ikonsiderar ang pagdugang sa bisan unsang kamatuoran nga imong nakit-an diha sa imong lista.)

Usa sa mga kamatuoran nga tingali imong naila mao nga ang mensahe sa propeta dili iyang kaugalingon; kini gikan sa Ginoo. Ikonsiderar ang pagmarka sa mga pulong diha sa Helaman 13:5, 7; 14:9 nga nagsuporta niini nga kamatuoran. Mahimo usab nimong basahon ang Helaman 7:29 ug Doktrina ug mga Pakigsaad 1:38; 21:4–5 isip cross-reference ug ikonektar kini sa mga bersikulo diha sa Helaman 13.

• Sa unsang paagi nga ang pagsabot niini nga kamatuoran makaapekto sa paagi nga kita mamati sa mga propeta?

• Sa unsang paagi kini makatabang kon kita mobati nga natintal sa pagduhaduha o pagsaway kanila?

icon, rekord

1. Kompletoha ang mosunod:

   Paggahin og pipila ka minuto sa pagribyo sa usa ka bahin sa usa ka bag-o nga kinatibuk-ang pakigpulong sa komperensiya gikan sa propeta. Hunahunaa ang Ginoo ug ang Iyang mga pagpakabana alang kanimo. Sulayi nga basahon ang pakigpulong ingon nga kini usa ka mensahe gikan sa Ginoo. Pag-andam og usa sa mosunod:

   • Pangita og usa ka piho nga hugpong sa mga pulong o pagtulun-an nga imong gituohan nga gidasig sa Ginoo. Ipakigbahin kon ngano.

   • Ihulagway kon unsay imong mahimo aron makadawat og personal nga pagsaksi nga ang mensahe nga gikan sa propeta gikan sa Ginoo.

Ang reaksiyon sa mga Nephite ngadto sa mga Propeta

Basaha ang Helaman 13:24–29; 14:10, mangita sa kinaiya sa mga Nephite ngadto sa mga propeta.

• Unsa nga mga kamatuoran ang imong matino gikan niining mga bersikulo bahin sa mga propeta?

Tingali nakaila ka og usa ka kamatuoran nga susama sa mosunod: Ang mga propeta sa Ginoo dili inila sa mga daotan. Mahimo nimong irekord kini nga kamatuoran duol niini nga mga bersikulo.

• Sa unsa nga mga paagi nga imong nakita kini nga kamatuoran sa atong panahon?

• Sa unsang paagi kadtong nagsaway ug nakigbatok sa mga propeta mahimong “walay kaalam ug buta nga [nangulo]”? (Helaman 13:29).

• Kon dili kita moduol sa Manluluwas aron maghinulsol ug molambo, sa unsang paagi kini nahisama sa pagpili sa “kangitngit kay sa kahayag”? (Helaman 13:29).

Si Presidente Spencer W. Kimball (1895–1985) mitudlo:

Presidente Spencer W. Kimball

Ang mga propeta … dili mahimong mousab sa mensahe sa Ginoo aron lamang nga ang mga tawo mobati og kahayahay. Buotan ra sila kaayo aron modaogdaog. Mapasalamaton kaayo ako nga ang mga propeta wala magtinguha nga mainila. (Spencer W. Kimball, “Listen to the Prophets,” Ensign, Mayo 1978, 77)

icon, rekord

2. Pagsulat og tubag sa mosunod nga senaryo nga dili mominos sa tulo ka kapahayag:

   Hunahunaa nga ang usa ka tawo nagtuo nga siya kinahanglan nga “[mobuhat sa] bisan unsa nga gipangandoy sa [iyang] kasingkasing” (Helaman 13:27). Isip resulta, nasuko sila sa dihang gidapit sila sa mga propeta nga maghinulsol. Base sa unsay imong nakat-onan, pag-andam og tubag niini nga kabalaka o pagsaway.

Ang Ginoo miluwas ni Samuel

Tan-awa pag-ayo ang hulagway gikan sa sinugdanan sa leksiyon. Kini nagpakita kon unsa ang nahitabo sa kataposang pakigpulong ni Samuel.

Basaha ang Helaman 16:1–8, mangita ug magmarka sa ebidensiya sa kamatuoran nga ang gahom sa Dios anaa sa Iyang mga propeta. (Hunahunaa ang pagdugang niini nga kamatuoran ngadto sa imong lista.)

• Unsa nga ebidensiya ang imong nakita nga ang Dios nagauban ni Samuel?

Bisan og dili tanan nga mga propeta gipanalipdan niini nga paagi, ang Dios nanalipod sa Iyang mga propeta hangtod nga sila makahuman sa ilang buhat (tan-awa sa Mosiah 13:1–4; Doktrina ug mga Pakigsaad 122:9).

3. Buhata ang mosunod nga duha ka mga kalihokan, ug tubaga ang mosunod nga pangutana:

   Pagpili og usa ka propeta gikan sa mga kasulatan o sa kasaysayan sa Simbahan. Paglista og ebidensiya nga ang Dios nagauban niana nga propeta. Ikonsiderar ang pagdirekta ngadto sa mosunod nga mga panig-ingnan ni Noe, Moises, Pedro, ug Joseph Smith.

   Si Noe nga anaa sa arka kauban sa mga kahayopan

   (tan-awa ang Genesis 7:7, 10–13, 17, 23.)

   Si Moises nga nagtunga sa Pulang Dagat

   (tan-awa ang Exodo 14:21–30.)

   Usa ka anghel mipagawas kang Pedro gikan sa bilanggoan

   (tan-awa ang Buhat 12:4–11.)

   Gipahiuli ni Elias ang mga Yawe sa Pagkapari

   (tan-awa sa Joseph Smith—Kasaysayan 1:15–25)

   Karon paglista og ebidensiya nga ang Dios anaa usab sa Iyang mga modernong propeta. Ang mga ehemplo mahimong maglakip kon sa unsang paagi ang mga pagtulun-an o mga imbitasyon sa modernong mga propeta nakatabang kanato sa paghatag ug giya sa mga kalisdanan sa atong panahon.

   • Ngano kahang makatabang man ang paghinumdom niining mga ebidensiya?

Sama sa mga katawhan ni Nephi, kita adunay gahom sa pagpili kon dawaton ba nato ang mga pagtulun-an sa propeta o mosanong pinaagi sa pagsaway ug sa kasuko. Sa imong journal sa pagtuon, irekord unsa ang imong nakat-onan mahitungod sa mga propeta ug unsa ang imong gibati mahitungod kanila. Samtang magpadayon ka sa pagtuon unsay gitudlo ni Samuel ang Lamanite niining semanaha, mainampoong magtinguha nga makakat-on ug magamit ang iyang dinasig nga mga pagtulun-an.

Opsiyonal: Gustong Makakat-on Pa og Dugang?

Sa unsang paagi ang Ginoo namulong pinaagi sa Iyang mga propeta ug sa uban karon?

Si Elder Neil L. Andersen sa Korum sa Napulog Duha ka Apostoles mihatag sa mosunod nga pagpamatuod:

Elder Neil L. Andersen

Mosaksi ako ninyo nga si Jesus mao ang Kristo, nga naggiya Siya sa kalihokan niining sagrado nga buhat, ug nga ang kinatibuk-ang komperensiya mao ang usa sa pinakaimportante nga panahon nga Siya mohatag og direksyon sa Iyang Simbahan ug ngari nato sa personal nga paagi.

… Makapaabot kita nga madungog “ang kabubut-on sa Ginoo, … ang hunahuna sa Ginoo, … ang tingog sa Ginoo, ug ang gahom sa Dios ngadto sa kaluwasan” (Doktrina ug mga Pakigsaad 68:4). Misalig kita sa saad sa Ginoo: “Bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra”(Doktrina ug mga Pakigsaad 1:38). …

Mosaad ko nga kon andamon ninyo ang inyong espiritu, ug moanhi nga magpaabot nga makadungog sa tingog sa Ginoo, ang mga hunahuna ug pagbati moabot sa inyong hunahuna nga gihimo alang gayod kaninyo. (Neil L. Andersen, “Pagpamati sa Tingog sa Ginoo sa Kinatibuk-ang Komperensiya” [digital-only article], Liahona, Mar. 2019, ChurchofJesusChrist.org)

Si Elder Robert D. Hales (1932-2017) sa Korum sa Napulog Duha ka Apostoles naghisgot sa mga pulong ni Samuel ug mitandi niini sa mga pulong sa buhing mga propeta.

Nganong kuyaw ang pagsalikway sa mga pulong sa mga propeta?

Si Presidente Henry B. Eyring sa Unang Kapangulohan mitudlo:

Presidente Henry B. Eyring

Kon atong isalikway ang tambag nga gikan sa Dios, wala kita mopili nga mahimong gawasnon sa impluwensiya sa gawas. Mipili kita og laing impluwensiya. Atong gisalikway ang panalipod sa usa ka hingpit nga mapinanggaon, makagagahom sa tanan, Amahan sa Langit nga nahibalo sa tanan, kansang katuyoan sa kinatibuk-an, sama sa Iyang Hinigugma nga Anak, mao ang paghatag og kinabuhing dayon, nga ihatag ang tanan nga anaa Kaniya, ug modala kanato og balik nga pamilya ngadto sa mga bukton sa Iyang gugma. Sa pagsalikway sa Iyang tambag, mipili kita sa impluwensiya sa laing gahom, kansang katuyoan mao ang paghimo kanatong miserable ug kansang motibo mao ang pagdumot. (Henry B. Eyring, “Finding Safety in Counsel,” Ensign, Mayo 1997, 25)