3 Nīfai 19

“Naʻe Fakafonu ʻa Kinautolu ʻaki ʻa e Laumālie Māʻoniʻoní”

Naʻe ʻikai ha meʻa ʻe fiemaʻu lahi ange ʻe he kau ākonga Nīfai ʻe toko hongofulu mā uá ka ke maʻu ʻa e takaua ʻo e Laumālie Māʻoniʻoní. Ko e kaveinga ʻeni ʻo ʻenau lotu ki he Tamai Hēvaní hili hono fakaʻosi ʻe he Fakamoʻuí ʻa e ʻaho ʻuluaki ʻo ʻEne ngāue fakafaifekau ʻi honau lotolotongá. Ko e hā ʻoku fiemaʻu ke tau fai ke ʻiate kitautolu ai ʻa e Laumālie Māʻoniʻoní? ʻE founga fēfē haʻatau fiefia ʻi Heʻene takauá ʻi heʻetau moʻuí? Ko e taumuʻa ʻo e lēsoni ko ʻení ke tokoni ke mahino lelei ange kiate koe ʻa e founga ke maʻu ai ʻa e ngaahi tāpuaki ʻo e Laumālie Māʻoniʻoní.

Ngaahi holi māʻoniʻoni ʻa e toʻu tupú

• Kapau naʻe fiemaʻu ke ke saveaʻi ha toʻu tupu ʻe toko 100 mei homou feituʻú, ʻokú ke pehē ko e hā ʻa e meʻa angamaheni taha ʻe kau ʻi heʻenau ngaahi holi māʻoniʻoní?

Fakalaulauloto pe ko e fē ʻi he ngaahi holi ko ʻení te ke lava ʻo fakafelāveʻi ki aí. ʻI hoʻo ako ʻa e 3 Nīfai 19, kumi ʻa e ngaahi moʻoni ʻe lava ʻo tokoni ke ke aʻusia hoʻo ngaahi holi māʻoniʻoní.

Hili ʻa e ngāue fakaetauhi, akonaki, fakamoʻui, mo hono tāpuakiʻi ʻe he Fakamoʻuí ʻa e kakaí, naʻá Ne “ʻalu meiate kinautolu, ʻo Ne hāʻele hake ki he langí” (3 Nīfai 18:39) mo e talaʻofa te Ne liuaki mai he ʻaho hono hokó. Naʻe foki ʻa e kakaí ki ʻapi, pea “naʻe talanoaʻi holo ʻi he poó kotoa ʻa e meʻa naʻe kau kia Sīsū,” pea “naʻe ʻi ai ʻa e tokolahi … naʻa nau fuʻu ngāue lahi ʻaupito ʻi he pō kotoa ko iá, koeʻuhí ke nau ʻi he ʻapongipongí ʻi he potu ko ia ʻa ia ʻe fakahā mai ai ʻe Sīsū ia ki he kakaí” (3 Nīfai 19:3). ʻI he ʻaho hono hokó, naʻe tānaki fakataha ʻe he kau ākonga ʻe toko hongofulu mā ua naʻe fili ʻe Sīsuú ʻa e kakaí pea akoʻi kiate kinautolu ʻa e “ngaahi folofola pē ko ia kuo folofola ʻaki ʻe Sīsuú.” Naʻe tūʻulutui leva ʻa e kau ākongá ʻo “lotu ki he Tamaí ʻi he huafa ʻo Sīsuú” (3 Nīfai 19:8).

Lau ʻa e 3 Nīfai 19:9 ke ʻiloʻi ʻa e meʻa naʻa nau holi lahi taha ki ai ʻi heʻenau lotú.

1. Tali ʻa e ongo fehuʻi ko ‘ení:

   • ʻOkú ke pehē ko e hā naʻa nau holi lahi ai ki he Laumālie Māʻoniʻoní?

   • Ko e hā ha ngaahi tūkunga te ke ala fehangahangai mo ia ʻi he kahaʻú te ke fie ʻiloʻi mo maʻu ai ha mahino ki he ngaahi ueʻi ʻa e Laumālie Māʻoniʻoní?

Fakalaulauloto pe ʻokú ke fiemaʻu moʻoni ʻa e Laumālie Māʻoniʻoní ʻi hoʻo moʻuí pea mo e founga naʻe mei kehe ai hoʻo moʻuí kapau naʻá ke holi maʻu pē ki Hono ivi tākiekiná.

Ko e fekumi ki he Laumālie Māʻoniʻoní

Lau ʻa e 3 Nīfai 19:10–23, pea kumi ʻa e ngaahi founga te ke lava ʻo fakakakato ai ʻa e fakamatala ko ʻení:

• ʻE lava ke fakafonu ʻaki kitautolu ʻa e Laumālie Māʻoniʻoní ʻi heʻetau …

Ko ha ngaahi founga ʻe lava ke fakakakato ai ʻa e fakamatala ko ʻení ko e:

• … holi moʻoni mo lotua ʻEne takauá.

• … kau ki he ngaahi ouau ʻo e ongoongoleleí.

Fakakaukau ʻi he faʻa lotu ki ha taha ʻokú ke ʻilo ʻokú ke ongoʻi ʻe ʻaonga ha mahino lelei ange kiate ia ʻa e founga ke maʻu lahi ange ai ʻa e tataki mo e fakafiemālie ʻa e Laumālie Māʻoniʻoní. Fakakakato ʻa e ʻekitivitī A mo E pea fakakaukau ki he founga te ke lava ai ʻo tokoni ki he tokotaha ko ʻení.

ʻEkitivitī A: ʻE lava ke fakafonu ʻaki kitautolu ʻa e Laumālie Māʻoniʻoní ʻi heʻetau holi fakamātoato mo lotua ʻEne takauá.

• ʻE tokoni fēfē ʻetau ngaahi holí mo e lotú ke fakafonu ʻaki kitautolu ʻa e Laumālie Māʻoniʻoní?

Naʻe fakamatalaʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e founga ʻe lava ke tokoniʻi ai kitautolu ʻe he holí mo e lotú ke tau maʻu ʻa e Laumālié.

ʻOku tau … manatu ke lotua fakamātoato maʻu pē [ʻa e] ngaahi meʻa ʻoku tau holi lahi taha ki aí, ʻa ia ko e Laumālie Māʻoniʻoní? Pe ʻoku tohoakiʻi ʻetau tokangá ʻe he ngaahi meʻa ʻo e māmaní mo e ngaahi meʻa fakaʻaho ʻo e moʻuí ʻo tukunoaʻi pea aʻu pē ʻo ngalo ai e meʻafoaki mahuʻinga tahá ni? ʻOku kamata ʻetau maʻu e Laumālie Māʻoniʻoní mei heʻetau holi fakamātoato ke maʻu ʻEne takauá ʻi heʻetau moʻuí. (David A. Bednar, “Maʻu ʻa e Laumālie Māʻoniʻoní,” Liahona, Nōvema 2010, 96)

Mahalo te ke fie mamata ʻi he “Maʻu ʻa e Laumālie Māʻoniʻoní” (2:56), ʻoku maʻu ʻi he ChurchofJesusChrist.org.

Having the Holy Ghost

You can invite the Holy Spirit into your life through prayer, scripture study and being obedient to God’s commandments.

• Ko e fē ha taimi kuo tokoniʻi ai koe ʻe hoʻo ngaahi holi māʻoniʻoní mo e lotú ke ke ongoʻi e ivi tākiekina ʻo e Laumālié?

ʻEkitivitī E: ʻE lava ke fakafonu ʻaki kitautolu ʻa e Laumālie Māʻoniʻoní ʻi heʻetau kau ki he ngaahi ouau ʻo e ongoongoleleí.

Lau ʻa e 3 Nīfai 18:7, 11; 27:20, ʻo kumi ʻa e founga ʻe lava ke tokoni ai ʻa e ngaahi ouaú ke fakafonu ʻaki kitautolu ʻa e Laumālie Māʻoniʻoní.

Naʻe akoʻi ʻe he Palōfita ko Siosefa Sāmitá (1805–44) ʻo pehē:

Ko e papitaisó ko ha ouau māʻoniʻoni ia ʻo e teuteu ke maʻu ʻa e Laumālie Māʻoniʻoní; ko e fetuʻutakiʻanga pea mo e kī ia ʻe ngāue mai ai ʻa e Laumālie Māʻoniʻoní. He ʻikai lava ke maʻu ʻa e Meʻafoaki ʻo e Laumālie Māʻoniʻoní ʻi he hilifaki ʻo e nimá, ʻi ha toe founga kehe ʻo ha tefitoʻi moʻoni, ka ko e tefitoʻi moʻoni pē ʻo e māʻoniʻoní. (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 110.)

• Ko e hā ha meʻa naʻá ke ako fekauʻaki mo e fatongia ʻo e ngaahi ouaú (hangē ko e papitaisó mo e sākalamēnití) ʻi hono tokoniʻi ke fakafonu ʻaki kitautolu ʻa e Laumālie Māʻoniʻoní?

• Ko e fē ha taimi kuo fakafonu ʻaki ai koe ʻa e Laumālie Māʻoniʻoní ʻi hoʻo kau ʻi he ngaahi ouau ʻo e ongoongoleleí?

2. Fakamanatuʻi ʻa e tokotaha naʻá ke fakakaukau ki ai ʻa ia ʻe ʻaonga ki ai ha mahino lelei ange ʻo e founga ke maʻu ai ʻa e Laumālie Māʻoniʻoní. Teuteu ha pōpoaki te ke lava ʻo vahevahe mo ia. Vahevahe ha faʻahinga aʻusia naʻe tokoniʻi ai koe pe ko ha niʻihi kehe ʻe he maʻu ha loto-holí mo e lotú pe kau ʻi he ngaahi ouaú, ke maʻu ʻa e Laumālie Māʻoniʻoní.

Fakaʻaongaʻi fakatāutahá

Fakakaukau ki hoʻo fiemaʻu fakataautaha ʻa e Laumālie Māʻoniʻoní pea mo e ʻuhinga ʻokú ke fiemaʻu ai Hono ivi tākiekiná ʻi hoʻo moʻuí. Feinga ke ʻiloʻi ha meʻa ʻokú ke ongoʻi ʻoku ueʻi koe ke ke fai ke ke pukepuke ai ʻa e Laumālie Māʻoniʻoní. Feinga ke muimuiʻi ʻa e ueʻi ko iá.

Fili Pē: Fie Ako Lahi Ange?

ʻE lava fēfē ke hoko ʻa e Laumālie Māʻoniʻoní ko hotau takaua maʻu pē?

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Kapau ʻoku tau feinga ke tau hoko ʻo lelei—ʻo ʻikai haohaoa he taimí ni, ka ʻoku fakaʻau pē ke tau lelei ange—kapau ʻoku tau tauhi ʻetau ngaahi fuakavá, fekumi ki he takaua ʻo e Laumālie Māʻoniʻoní, maʻu ʻi he moʻui taau ʻa e sākalamēnití mo tauhi maʻu ha fakamolemole ʻo ʻetau ngaahi angahalá, pea vilitaki atu ki muʻa, te tau lava leva ʻo maʻu maʻu pē ʻa e takaua ʻo e Laumālie Māʻoniʻoní. ʻOku ʻikai ke tau “teuteu ke maʻu ha fakahā”; ka ʻoku tau lolotonga “moʻui ʻi he fakahā.” (David A. Bednar, The Spirit of Revelation [2021], 7)

ʻOku akoʻi foki ʻi he Tokāteline mo e Ngaahi Fuakava 121:45–46 ʻa e founga te tau lava ai ʻo maʻu ʻa e Laumālie Māʻoniʻoní ko hotau takaua maʻu peé.

3 Nīfai 19:23. ʻE tokoniʻi fēfē kitautolu ʻe he Laumālie Māʻoniʻoní ke tau taha mo e Tamaí pea mo e ʻAló?

Naʻe fakamatalaʻi ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

That They May Be One in Us

We will not be one with God and Christ until we make Their will and interest our greatest desire.

Ko e moʻoni he ʻikai ke tau taha mo e ʻOtuá mo Kalaisi kae ʻoua kuo tau ʻai Hona finangaló mo e meʻa ʻokú Na hōifua ki aí ko e meʻa ʻoku tau holi lahi taha ki aí. ʻOku ʻikai aʻusia ʻa e faʻahinga fakavaivai ko iá ʻi ha ʻaho pē ʻe taha, ka ʻe akoʻi kitautolu ʻe he ʻEikí ʻo fakafou ʻi he Laumālie Māʻoniʻoní, ʻo kapau te tau loto-fiemālie ki ai, kae ʻoua kuo malava ke pehē, ʻi he fakalau ʻa e taimí, ʻokú Ne ʻiate kitautolu ʻo hangē ko e ʻiate Ia ʻa e Tamaí. ʻOku ou tetetete he taimi ʻe niʻihi ʻi heʻeku fakakaukau atu ki he meʻa ʻe fiemaʻú, ka ʻoku ou ʻiloʻi ko e faaitaha haohaoa pē ko ʻení ʻoku lava ʻo maʻu ai hono kakato ʻo e fiefiá. (D. Todd Christofferson, “That They May Be One in Us,” Liahona, Nov. 2002, 73)