“Toe Vakaiʻi Hono 20 ʻo e Fakataukei Fakatokāteliné: Ako Maʻuloto,” Tohi ʻa Molomoná - Tohi Lēsoni ʻa e Tokotaha Akó (2024)

“Toe Vakaiʻi Hono 20 ʻo e Fakataukei Fakatokāteliné,” Tohi ʻa Molomoná - Tohi Lēsoni ʻa e Tokotaha Akó

Toe Vakaiʻi Hono 20 ʻo e Fakataukei Fakatokāteliné

Ako Ma‘uloto

ʻE ʻoatu ʻe he lēsoni ko ʻení ha faingamālie ke ke ako maʻuloto ai ʻa e ngaahi potufolofola fakataukei fakatokāteliné mo honau ngaahi kupuʻi lea folofola mahuʻingá kae pehē foki ki he ako maʻuloto ʻo e ngaahi potufolofolá kakato.

ʻE lava ke tau muimui he sīpinga ʻa e Fakamoʻuí ʻaki hono ako maʻuloto ʻo e ngaahi folofolá

Ko e hā ha ngaahi founga te tau lava ai ʻo muimui ki he sīpinga ʻa Sīsū Kalaisí?

Ko e founga ʻe taha ʻe lava ke tau muimui ai ki he sīpinga ʻa Sīsū Kalaisí ko hono ako maʻuloto ʻa e folofolá. Naʻe fakaʻaongaʻi ʻe he Fakamoʻuí ha ngaahi potufolofola maʻuloto ke ikunaʻi ʻaki ʻa e ʻahiʻahí (vakai, Mātiu 4:1–11) pea mo akoʻi ʻa e niʻihi kehé (vakai, Luke 24:27; 3 Nīfai 22).

Ko e hā ha ngaahi tūkunga ʻe ala ʻaonga ai hono maʻuloto ʻo e folofolá?

ʻI hoʻo ako maʻuloto ʻa e ngaahi potufolofola fakataukei fakatokāteliné pe ngaahi kupuʻi lea folofola mahuʻingá, manatuʻi ʻokú ke muimui ki he sīpinga ʻa Sīsū Kalaisí.

Fakataukei Fakatokāteline ʻo e Tohi ʻa Molomoná: ʻAlamā–Molonai

Tohi ʻa Molomoná – Tohi Lēsoni ʻa e Faiakó (2024)

Potufolofolá	Kupuʻi Lea Folofola Mahuʻinga
Potufolofolá ʻAlamā 7:11–13	Kupuʻi Lea Folofola Mahuʻinga “Pea te ne hāʻele atu, ʻo kātakiʻi ʻa e ngaahi mamahi mo e ngaahi faingataʻá pea mo e ngaahi ʻahiʻahi kehekehe kotoa pē.”
Potufolofolá ʻAlamā 34:9–10	Kupuʻi Lea Folofola Mahuʻinga “Kuo pau ke fai ha fakalelei, … ko ha feilaulau taʻe-fakangatangata mo taʻengata.”
Potufolofolá ʻAlamā 39:9	Kupuʻi Lea Folofola Mahuʻinga “ʻIkai toe muimui ʻi he ngaahi holi ʻa ho matá.”
Potufolofolá ʻAlamā 41:10	Kupuʻi Lea Folofola Mahuʻinga “Kuo teʻeki ai hoko ʻa e faiangahalá ko e fiefia.”
Potufolofolá Hilamani 5:12	Kupuʻi Lea Folofola Mahuʻinga “ʻOku makatuʻunga ʻi he maka ʻo hotau Huhuʻí … kuo pau ke mo langa ai homo makatuʻungá.”
Potufolofolá 3 Nīfai 11:10–11	Kupuʻi Lea Folofola Mahuʻinga “Kuó u fai ai ʻa e meʻa kotoa pē kuo finangalo ʻa e Tamaí ke u fai talu mei he kamataʻangá.”
Potufolofolá 3 Nīfai 12:48	Kupuʻi Lea Folofola Mahuʻinga “Ke mou haohaoa ʻo hangē pē ko aú, pe hangē ko e haohaoa hoʻomou Tamai ʻa ia ʻoku ʻi he langí.”
Potufolofolá 3 Nīfai 27:20	Kupuʻi Lea Folofola Mahuʻinga “Haʻu kiate au ʻo papitaiso … koeʻuhi ke fakamāʻoniʻoniʻi ʻa kimoutolu ʻi he maʻu ʻo e Laumālie Māʻoniʻoní.”
Potufolofolá ʻEta 12:6	Kupuʻi Lea Folofola Mahuʻinga “ʻOku ʻikai te mou maʻu ha fakamoʻoni kae ʻoua kuo hili hono ʻahiʻahiʻi ʻo hoʻomou tuí.”
Potufolofolá ʻEta 12:27	Kupuʻi Lea Folofola Mahuʻinga “Kapau ʻe haʻu kiate au ʻa e tangatá … te u liliu ʻa e ngaahi meʻa vaivaí ko e mālohi kiate kinautolu.”
Potufolofolá Molonai 7:45–48	Kupuʻi Lea Folofola Mahuʻinga “Ko e manavaʻofá ʻa e ʻofa haohaoa ʻa Kalaisí.”
Potufolofolá Molonai 10:4–5	Kupuʻi Lea Folofola Mahuʻinga “Mou kole ʻi he loto-fakamātoato, mo e loto-moʻoni, ʻo maʻu ʻa e tui kia Kalaisi … [pea] ʻi he mālohi ʻo e Laumālie Māʻoniʻoní te mou lava ai ke ʻiloʻi hono moʻoni ʻo e ngaahi meʻa kotoa pē.”

Fakakaukau ki hoʻo ngaahi tūkungá. Toe vakaiʻi ʻa e saati ʻo e ngaahi potufolofola fakataukei fakatokāteliné pea fili ha potufolofola ʻe taha (pe ko ha ngaahi kupuʻi lea folofola mahuʻinga) ʻokú ke ongoʻi ʻe tokoni lahi taha kiate koe ke ke ako maʻuloto he taimí ni. Fakakaukau ke fakaʻaongaʻi ha taha ʻo e ngaahi founga ko ʻení (pe ko e ngaahi meʻa ʻi he polokalama ako maʻuloto ʻi he app Fakataukei Fakatokāteliné) ke tokoni atu ke ke ako maʻuloto ʻa e potufolofola (pe ngaahi kupuʻi lea) naʻá ke filí.

Tohiʻi ia: Seti ha uasi ki ha taimi feʻunga (hangē ko ʻení, sēkoni ʻe 30). Hiki ki he lahi taha ʻo e potufolofolá te ke lavá ʻo ʻikai sio ki he ngaahi folofolá pe sātí. Toe seti ʻa e uasí pea tohi ha meʻa lahi ange. Toutou fai pehē pē kae ʻoua kuó ke hiki kotoa ʻa e potufolofolá. Te ke lava leva ʻo toe ʻahiʻahi fakahoko ʻa e ʻekitivitií ke vakai pe te ke lava ʻo hiki ia ʻi ha taimi vave ange.
Ngaahi mataʻitohi ʻuluakí: Hiki ʻi hoʻo tohinoa akó ʻa e potufolofola mo e veesi naʻá ke filí. Tohiʻi ʻa e mataʻitohi ʻuluaki mei he foʻi lea takitaha, ʻi he tafaʻakí. Toutou lau ʻa e potufolofolá kakato. Fakapuliki leva ʻa e potufolofolá pea feinga ke fakaʻaongaʻi pē ʻa e ʻuluaki mataʻitohí ke toe lau ʻa e potufolofolá mo e vēsí (ʻo toutou toʻo hono fakapulikí ʻo ka fiemaʻu). Toutou fai ʻeni kae ʻoua kuó ke lava ʻo toutou lau maʻuloto ʻa e potufolofolá.
Kupuʻi lea ki he kupuʻi lea: ʻUluakí, vahevahe ʻa e potufolofolá mo e vēsí ki ha ngaahi kupuʻi lea nounou ange. Hili iá pea ako maʻuloto ʻa e ʻuluaki kupuʻi lea ʻi he potufolofolá ʻaki hono toutou lau pe toutou tohi ia. Pea fai ʻa e meʻa tatau ki he kupuʻi lea hono uá. Toutou fai ʻeni kae ʻoua kuó ke maʻuloto kotoa ʻa e potufolofolá mo e vēsí.

Fakamanatú

Kumi ha ngaahi faingamālie ke toutou lau maʻuloto ʻa e potufolofolá mo e vēsí (pe ngaahi kupuʻi lea mahuʻingá).