Môrmôna 8:1–26

Rakitsoratra misy vidiny lehibe

Inona no hataonao raha ametraham-pitokisana amin-javatra iray manan-danja toy ireo takela-bolamena ianao? Rehefa naharay ireo takela-bolamena i Môrônia, dia nanao izay rehetra azony natao mba hiarovana izany. Tamin’ny farany dia nandevina azy ireo tao anaty tany izy, natoky fa izy ireo dia “nafenina ho an’ny Tompo” (pejin-dohatenin’ny Bokin’i Môrmôna), mba havoaka “amin’ny alalan’ny tanan’ny Tompo” indray andro any (Môrmôna 8:26). Ity lesona ity dia afaka manampy anao hahatsapa ny maha-zava-dehibe ny Bokin’i Môrmôna eo amin’ny fiainanao.

Fanomezana sarobidy

Alaovy sary an-tsaina hoe misy olona iray manome anao kitapo feno diamondra sy vatosoa ho fanomezana.

• Ahoana no ho fihetsikao? Ahoana no mety hitahian’io fanomezana io ny fiainanao?

Ny Filoha Russell M. Nelson dia nanome tahadikan’ny Bokin’i Môrmôna ho an’ny mpanjakana foko afrikana iray ary nanazava ny maha-testamenta hafan’i Jesoa Kristy izany. Hoy ilay mpanjaka namaly:

“Azonao natao ny nanolotra diamondra sy vatosoa ahy, saingy tsy misy zavatra sarobidy hafa amiko mihoatra noho ity fahalalana fanampiny momba ny Tompo Jesoa Kristy ity.” (Russell M. Nelson, “Ny Bokin’i Môrmôna: hanao ahoana re ny fiainanao raha tsy nisy azy?,” Liahona, nôv. 2017, 60–61)

• Inona avy no antony sasantsasany mety ho nahatsapan’ilay mpanjaka toy izany?

Eritrereto ny fomba hamalianao ireto fanontaniana napetraky ny Filoha Nelson manaraka ireto:

Ry rahalahy sy ranabaviko, inona no lanjan’ny Bokin’i Môrmôna ho anao? Raha tolorana diamondra sy vatosoa na ny Bokin’i Môrmôna ianao dia inona no ho safidianao? Lazao ny marina, inona no manan-danja kokoa aminao? (Russell M. Nelson, “Ny Bokin’i Môrmôna: hanao ahoana re ny fiainanao raha tsy nisy azy?,” Liahona, nôv. 2017, 61)

Rehefa mandalina ny Môrmôna 8 ianao, dia saintsaino ny fijoroanao ho vavolombelona manokana momba ny Bokin’i Môrmôna. Mitadiava antony mahatonga ilay vavolombelon’i Jesoa Kristy ao amin’ny Bokin’i Môrmôna ho sarobidy indrindra sy ny fomba ahafahan’izany mitahy ny fiainanao.

Mahita ny lanjan’ny Bokin’i Môrmôna

1.  Vitao ireto manaraka ireto:

   Manaova soritsori-tsaritanin-karena miafina ao amin’ny diary fandalinanao. Ny teboka tsirairay eo amin’ilay sarintany dia toerana iray hiraketana an-tsoratra ny zavatra ianaranao mandritra ny fandalinanao ny Môrmôna 8. Ampidiro ny zavatra hita momba ny lanjan’ny Bokin’i Môrmôna avy amin’ny tsirairay amin’ireto fizaràna manaraka ireto. Ny zavatra tsirairay ianaranao dia hampanakaiky kokoa anao an’ilay X eo amin’ny saritanin-karena miafina. Ilay X no hahafahanao mirakitra an-tsoratra ny dikan’ny Bokin’i Môrmôna aminao.

Tapany 1. Harena miafina

Taorian’ny nahafatesan’i Môrmôna tamin’ny ady (jereo ny Môrmôna 8:3), dia nitahiry sy nanoratra misimisy kokoa tao amin’ilay rakitsoratra nataon’ny rainy tamin’ny takela-bolamena i Môrônia.

Vakio ny Môrmôna 8:1–5 sy ny pejin-dohatenin’ny Bokin’i Môrmôna, hitadiavana ny antony nanoratana sy nitehirizana ny Bokin’i Môrmôna.

• Inona no azontsika ianarana momba ny tanjon’ny Bokin’i Môrmôna?

Soraty eo akaikin’ny iray amin’ireo teboka eo amin’ilay sarintany ny valinteninao.

Fahamarinana iray azontsika ianarana ny hoe ny Bokin’i Môrmôna dia notehirizina ho an’ny androntsika mba handresena lahatra antsika fa i Jesoa no Kristy.

• Ahoana no nitaoman’ny Bokin’i Môrmôna ny fanirianao hanaraka an’i Jesoa Kristy?

Tapany 2. Ny lanjan’ilay rakitsoratra

Eritrereto ny zavatra fantatrao momba ireo takela-bolamena sy ny zavatra izay heverinao fa mety ho sandan’izy ireo. Vakio ny zavatra niainan’i Joseph Smith tamin’ny fotoana nandraisany voalohany ireo takela-bolamena avy amin’i Môrônia.

Rehefa avy nentin’i Joseph tany an-trano ireo takela-bolamena, dia niezaka nandritra ny herinandro maromaro hangalatra azy ireo ny mpikatsaka harena. Mba hiarovana ilay rakitsoratra dia tsy maintsy nafindrafindrany toerana izany, ka nafeniny tao ambanin’ny fatana ireo takelaka, sy tao ambanin’ny gorodon’ny trano fiasan-drainy, ary tao amina antontam-boan-javatra. Tsy maintsy nitandrina foana izy. (Saints: The Story of the Church of Jesus Christ in the Latter Days, bok. 1, The Standard of Truth, 1815–1846 [2018], 43)

• Inona no nanan-danja taminao tamin’io tantara io?

Vakio ny Môrmôna 8:14, hitadiavana ny zavatra nolazain’i Môrônia momba ireo takelaka.

• Inona, araka ny eritreritrao, no tian’i Môrônia nolazaina rehefa nilaza izy fa ireo takelaka dia “tsy misy vidiny” fa “ny rakitsoratra aminy kosa dia misy vidiny lehibe”? Inona no azontsika ianarana avy amin’izany?

Soraty eo akaikin’ny iray amin’ireo teboka eo amin’ilay sarintany ny valinteninao.

Fahamarinana iray azontsika ianarana ny hoe misy vidiny lehibe ny Bokin’i Môrmôna.

Mitanisà andininy, fampianarana, na tantara vitsivitsy avy amin’ny Bokin’i Môrmôna izay tsapanao fa misy vidiny lehibe. Hazavao ny antony mampanan-danja izany aminao na ny hafa.

Tapany 3. Fanomezana avy amin’ Andriamanitra

Saintsaino ny zavatra fantatrao momba an’i Joseph Smith fony izy tanora. Afaka mieritreritra antony mety ho nisafidianan’ Andriamanitra an’i Joseph Smith handika ny Bokin’i Môrmôna ve ianao?

Vakio ny Môrmôna 8:15–16, 26, hitadiavana ny zavatra nampianarin’i Môrônia momba an’i Joseph Smith sy ny Bokin’i Môrmôna.

• Inona avy no fahamarinana azontsika ianarana momba ny fomba nisehon’ny Bokin’i Môrmôna?

Soraty eo akaikin’ny iray amin’ireo teboka eo amin’ilay sarintany ny valinteninao.

Fahamarinana iray azontsika ianarana ny hoe nomen’ Andriamanitra hery namoahana ny Bokin’i Môrmôna i Joseph Smith.

Manorata zavatra iray na roa fantatrao momba an’i Joseph Smith nandika ny Bokin’i Môrmôna. (Jereo ny Ireo lohahevitry ny tantaran’ny Fiangonana, “Dikantenin’ny Bokin’i Môrmôna,” history.ChurchofJesusChrist.org na Lohahevitry ny filazantsara, “Dikantenin’ny Bokin’i Môrmôna,” history.ChurchofJesusChrist.org.)

Tapany 4. Ny zavatra omeko lanja momba ny Bokin’i Môrmôna

Miainga amin’ny fandalinanao ny Bokin’i Môrmôna any an-trano, any am-piangonana, ary any amin’ny seminera, soraty ny zavatra omenao lanja momba ny Bokin’i Môrmôna. Mety ho afaka manampy ireto fanontaniana manaraka ireto.

Soraty eo akaikin’ny X eo amin’ny sarintaninao ny valin’ny farafahakeliny iray amin’ireto fanontaniana manaraka ireto:

• Nahoana ianao no ankasitrahinao ny nitehirizana ny Bokin’i Môrmôna?

• Inona no nianaranao momba ireo mpaminanin’ny Tompo nantsoina mba hitondra ny Bokin’i Môrmôna eo amintsika?

• Inona no hataonao mba hanehoana amin’ny Tompo ny fanomezanao lanja ny Bokin’i Môrmôna?

Tsy voatery hatao: Te hianatra bebe kokoa ve ianao?

Inona no sarobidy momba ny Bokin’i Môrmôna?

Nanome ohatra maro ny Filoha Russell M. Nelson. Mba hahazoana valiny misy antsipiriany kokoa, dia jereo ny lahateny feno nataony.

Ny Bokin’i Môrmôna dia mitondra ny fahatakarana feno sy manan-danja indrindra momba ny Sorompanavotan’i Jesoa Kristy, izay tsy hita n’aiza n’aiza. Mampianatra ny tena dikan’ny hoe teraka indray izany. Avy amin’ny Bokin’i Môrmôna no ahafantarantsika momba ny fanangonana an’i Isiraely niparitaka isika. Fantatsika hoe inona no antony maha-eto an-tany antsika. Ireo sy ny fahamarinana hafa dia ampianarina amin’ny fomba mahery vaika sy mandresy lahatra kokoa ao amin’ny Bokin’i Môrmôna mihoatra noho ny ao amin’ny boky hafa. Ny hery rehetran’ny filazantsaran’i Jesoa Kristy dia hita ao amin’ny Bokin’i Môrmôna. Izay no izy.

Ny Bokin’i Môrmôna dia sady manazava ireo fampianaran’ny Tompo no mampibaribary ireo teti-dratsin’ny fahavalo. Ny Bokin’i Môrmôna dia mampianatra fotopampianarana marina mba handresena ireo fomba amam-panao ara-pivavahana diso, toy ny fanatanterahana ny batisa ho an’ny zazakely. Ny Bokin’i Môrmôna dia manome tanjona ny fiainana amin’ny fanentanana antsika hisaintsaina ny fahafahana mahazo fiainana mandrakizay sy “fahasambarana tsy mifarana.” [Môzià 2:41; jereo koa ny Almà 28:12]. Ny Bokin’i Môrmôna dia mandrava ny finoanoam-poana fa azo tratrarina ao anatin’ny faharatsiam-panahy ny fahasambarana ary ny fahatsaran’ny tena manokana no hany ilaina mba hiverenana eo anatrehan’ Andriamanitra [takina ihany koa ny ôrdônansy sy fanekempihavanana masina manokana]. Manafoana tanteraka ny foto-kevitra diso ilay izy fa ny fanambarana dia nifarana tamin’ny Baiboly ary ny lanitra dia mikatona amin’izao fotoana izao. (Russell M. Nelson, “Ny Bokin’i Môrmôna: hanao ahoana re ny fiainanao raha tsy nisy azy?,” Liahona, nôv. 2017, 62)