Мормон 8:27–41; 9:1–6, 27–37

Бидний үед зориулан бичсэн

Моронай ялтаснууд дээр бичиж байгаа нь

Хэдэн зуун жилийн өмнө амьдарч байсан ч бидний цаг үед амьдрах ямар байхыг мэддэг байсан гээд төсөөлөөд үз дээ. Моронай үүнийг мэдэж байсан ба Их Эзэн түүнд бидний үеийг харуулжээ. Моронай эцсийн өдрүүдэд давамгайлах гэм нүгэл, зан байдлыг дүрсэлсэн. Тэрээр биднийг “Их Эзэнд ханд” (Мормон 9:6) хэмээн уриад, Есүс Христийг дагахад туслах өөр нэг зөвлөгөөг өгсөн. Энэ хичээл Мормоны Ном биднийг хожмын үед Их Эзэнд хандахад туслахын тулд бичигдсэн гэдгийг ойлгоход тусална.

Моронай бидэнд хандаж бичсэн

Та нар өөрсдийгөө эрт дээр үед амьдарч байгаагаар мөн бидний үед нээгдэх цаг хугацааны капсулд зурвас бичиж хийхийг та нараас хүссэн гэж төсөөл.

• Та нар өнөө цаг үед тулгардаг сорилт бэрхшээлийг удирдахад туслах ямар анхааруулга, зөвлөгөө, урмын үгийг бичих вэ?

Мормон нас барахаасаа өмнө хүү Моронайдаа алтан ялтаснуудыг даатгаж өгсөн (Мормон 8:1-ийг үзнэ үү). Моронай Их Эзэний өөрт нь бидний үеийн хүмүүст хандан юу бичихээ мэдэхэд тусалсан нэг арга замыг дүрсэлжээ. Мормон 8:34–35; 9:30-ийг уншаад, Их Эзэн Моронайг ариун нандин үүрэг даалгаварт нь хэрхэн адисалсныг олж мэд.

• Их Эзэн Моронайд юу үзүүлсэн бэ?

• Үүнээс бид ямар үнэнийг мэдэж авч болох вэ?

Бидний олж мэдсэн нэг үнэн бол Есүс Христ Мормоны Номын бошиглогчдыг бидний үеийг оюундаа тунгааж бичихэд сүнслэгээр нөлөөлсөн гэх үнэн юм.

• Мормоны Номын бошиглогчид бидний үеийг харсан гэдгийг мэдэх нь үүнийг унших арга замд маань хэрхэн нөлөөлж болох вэ?

Мормоны Номын бошиглогчдын талаар ерөнхийлөгч Эзра Тафт Бэнсоны (1899–1994) хэлсэн дараах үгсийг унш.

Ерөнхийлөгч Эзра Тафт Бэнсон

Хэрэв тэд өнөө үеийг харж, бидэнд агуу үнэ цэнтэй зүйлсийг сонгож бичсэн юм бол бид Мормоны Номыг судлах ёсгүй гэж үү? “Их Эзэн юуны учир үүнийг цэдэгтээ оруулахад Мормонд (эсвэл Моронайд болон Алмад) сүнслэгээр нөлөөлсөн юм бол? Энэ эрин үед амьдрахад туслах зүйлээс би ямар сургамж авч болох вэ?’ гэж бид өөрсдөөсөө байнга асууж байх ёстой.” (Ezra Taft Benson, “The Book of Mormon—Keystone of Our Religion,” Ensign, Nov. 1986, 6)

Ерөнхийлөгч Бэнсоны санал болгосонтой адил асуултуудыг өөртөө тавих нь та нарт Мормоны Номыг илүү утга учиртай, илүү өөрт хамаатуулж судлахад туслах учир энэ бол судраас судлах үр дүнтэй ур чадвар юм. Та нар судалж байхдаа эдгээр асуултыг анхаарч үзэж болно.

• Эдгээр асуултыг тавьснаар судар судлах тань хэрхэн сайжирна гэж та нар бодож байна вэ?

Мормон 8:27–33-ыг эсвэл Мормон 8:36–41-ийг уншаад, Моронай бидний үеийн хүмүүсийн сүнслэг байдлыг хэрхэн дүрсэлснийг олж мэд.

• Та нар Моронайн тодорхойлсон нөхцөл байдлын алиныг нь одоогийн нийгмээс харж байна вэ?

• Эдгээр хандлага, зан үйл бидний Есүс Христэд итгэх итгэлд хэрхэн нөлөөлж чадах вэ?

Бидний үеийн сүнслэг шийдлүүд

Мормон 9:6, 27–31-ийг уншаад, бидэнд сүнслэг сөрөг нөхцөл байдлыг даван туулахад туслахын тулд Их Эзэн Моронайг юу бичихэд өдөөснийг олж мэд.

шигтгээ зураг, тэмдэглэх

1. Дараах асуултуудын хоёрт нь хариул.

   • Моронай бидэнд энэ цаг үеийн нийтлэг гэм нүгэл, зан байдлыг даван туулахад туслах юуг заасан бэ?

   • Эдгээр сургаалын аль нь энэ үеийн өсвөр үеийнхэнд Есүс Христэд илүү найдахад хамгийн сайн тусалж чадах вэ?

   • Эдгээр сургаалын аль нь та нарт яг одоо хамгийн их тусалж чадна гэж бодож байна вэ? Яагаад?

Мормоны Номын сургаал

Мормоны Ном нь бидэнд Есүс Христэд итгэж, түүнд хандахад туслах зорилгоор бичигдсэн (1 Нифай 6:4; Мормон 7:5; Моронай 10:30, 32-ыг үзнэ үү).

2. Дараахыг хийж гүйцэтгэ.

   Есүс Христийн тухай заадаг Мормоны Номын нэг юм уу хэд хэдэн судрын хэсгийг ол. Энэ хэсэг нь Есүс Христэд итгэж, Түүнд хандахад хэрхэн тусалж болохыг тайлбарла (Мормон 9:6-г үзнэ үү).

   Та нар Мормоны Номыг үргэлжлүүлэн судлахдаа ерөнхийлөгч Бэнсоны урамшуулсан шиг асуултуудыг тавихаа бүү март. Судар судлах явцдаа Их Эзэний дуу хоолойг сонсох чадварт чинь эдгээр асуулт хэрхэн нөлөөлж байгааг анхаар.

Нэмэлт: Илүү дэлгэрэнгүй судлахыг хүсэж байна уу?

Мормоны Номыг хэнд зориулан бичсэн бэ?

Арван хоёр төлөөлөгчийн чуулгын ахлагч Гари Э.Стивэнсон ийн хуваалцсан.

Ахлагч Гари Э.Стивэнсон

Мормоны Ном нь та нарт зориулагдан, та бидний өдрүүдэд бичигдсэнийг ухаарч байна уу? Энэ ном бол бидний хэлдгээр цаг хугацааны бүрэн байдлын эрин үед амьдарч байгаагийн маань нэгэн адислал мөн. Хэдийгээр Мормоны Номыг сүнслэгээр нөлөөлөгдсөн эртний хүмүүс бичиж, тэдний олон нь бошиглогчид байсан боловч тэдэнд болон тэдний үед амьдарч байсан хүмүүст энэ номыг бүхлээр нь эзэмших боломж тохиогоогүй юм. Бошиглогч, санваартан, хаадын дээдлэн, хүндэтгэж, хадгалж ирсэн ариун нандин цэдгийг одоо та нар хялбархан уншиж болохоор болсон. Бүрэн бүтэн Мормоны Номыг гартаа барьж үзэх аз завшаан та нарт байгаа. Мормоны Номын бошиглогчдын нэг Моронай бидний үеийг буюу та нарын амьдрах өдрүүдийг харсан нь сонирхолтой. Олон зуун жилийн өмнө тэрээр та нарыг харсан. (Гари Э.Стивэнсон, “Номонд ханд мөн Их Эзэнд ханд,” 2016 оны 10-р сарын Ерөнхий чуулган, 33)

Моронай эцсийн өдрүүдийг хэрхэн дүрсэлсэн бэ?

Залуу эмэгтэйчүүдийн ерөнхий ерөнхийлөгч асан Бонни Л.Оскарсон ийн заасан.

Ерөнхийлөгч Бонни Л.Оскарсон

Моронай дайн тулаан, дайны цуурхал, асар их жигшил зэвүүцэл, аллага, дээрэм, Бурханы мэлмийд зөв эсвэл буруу зүйл гэж байдаггүй гэж бидэнд хэлэх хүмүүс зэрэг бидний үеийг олж харснаа хэлдэг. Тэрээр бардамналаар дүүрч, үнэтэй хувцсанд шунан дурлаж, шашныг шоолон басамжилдаг хүмүүсийн тухай өгүүлсэн байдаг. Тэр “гачигдалтай, мөн нүцгэн, мөн шаналсан нь хажуугаар” [Мормон 8:39] өнгөрөхөд анзаардаггүй, дэлхийн зүйлүүдэд хэт автсан хүмүүсийг мөн харуулсан.

Moронай энэ цаг үед амьдарч байгаа бидэнд өөртөө дүгнэлт хийж болох нэгэн асуултыг тавьдаг. Тэрээр: “Яагаад та нар Христийн нэрийг өөрсөд дээрээ авахаас ичнэ вэ?” хэмээн асуусан. [Мормон 8:38]. Энэ шүүмжилсэн асуулт дэлхийд улам бүр ихсэж буй шашнаас ангид байх байдлыг маш зөв тодорхойлдог. (Бонни Л.Оскарсон, “Сионы эгч нар аа, хүч чадалтай байж, өндийн босоцгооё,” 2016 оны 10-р сарын Ерөнхий чуулган, 133–136)

Мормоны Номыг ямар хэл дээр бичсэн бэ?

Моронай еврей, шинэчлэгдсэн египет гэсэн хоёр хэл дээр бичих чадвартайгаа дурдсан. Тэр хэрэв “ялтаснууд хангалттай том байсан аваас” еврей хэл дээр бичих байсан; гэвч зай бага байсан тул цэдгийг хадгалсан хүмүүс “шинэчлэгдсэн египет” (Moрмон 9:32–33-ыг үзнэ үү) хэлийг ашигласан гэдгийг хэлжээ. Мормоны Номон дээр өмнө нь Нифай, Бенжамин хаан хоёр хоёул египет хэл мэддэг байснаа мэдэгдсэн байдаг. Нифай жижиг ялтаснуудыг сийлбэрлэх үедээ “египетчүүдийн хэл” дээр бичсэнээ тунхагладаг (1 Нифай 1:2).

Гэвч Моронай Лихайн үеэс хэдэн мянган жилийн туршид хэлэнд зарим тохируулга ашиглан, “бидний ярианы маягийн дагуу, биднээр доош дамжигдан өөрчлөгдсөн” (Moрмон 9:32) “шинэчлэгдсэн египет хэл” дээр бичсэнээ хэлдэг. Энэ нь яагаад Моронай “өөр ямар ч хүн бидний хэлийг эс мэднэ” харин Бурхан цаашид цэдгийн хөрвүүлэг, орчуулгад зориулан “нэгэн хэрэгслийг бэлтгэсэн” (Moрмон 9:34) хэмээн төгсгөснийг тайлбарлаж байна.