Seminera
Etera 6: Nandeha nankany amin’ny tany nampanantenaina ireo Jaredita

“Etera 6: Nandeha nankny amin’ny tany nampanantenaina ireo Jaredita,” Bokin’i Môrmôna: Boky torolalana ho an’ny mpampianatra (2024)

“Etera 6,” Bokin’i Môrmôna: Boky torolalana ho an’ny mpampianatra

Etera 6

Nandeha nankany amin’ny tany nampanantenaina ireo Jaredita

Sambo Jaredita atopatopan’ny onja

Alaovy sary an-tsaina hoe mety ho toy ny fahatsapan’ny Jaredita raha niditra ny sambony izy ireo ka niampita ny rano be nandritra ny dian’izy ireo nankany amin’ny tany nampanantenaina. Na dia lavitra sy sarotra aza ny dian’ny Jaredita, dia fantatr’izy ireo fa nanampy azy ireo teny an-dalana ny Tompo. Afaka manampy antsika mandritra ny diantsika mamakivaky ny fiainana an-tany sy miverina eo anatrehan’ny Ray any An-danitra ihany koa ny Tompo. Ity lesona ity dia afaka manampy anao hampihatra ny soratra masina mba hianarana fahamarinana izay afaka manampy anao mandritra ny dian’ny fiainanao.

Ny dian’ny fiainana

Ny fiainantsika etỳ an-tany dia azo ampitahaina amina dia lavitra, ka ny toerana irìna hitodiana dia ny fiainana mandrakizay. Soraty eo amin’ny diary fandalinanao eo amin’ny ilan’ny pejy ny hoe “Izaho” ary ery amin’ny ankilany kosa ny hoe “Fiainana mandrakizay”. Soraty eo amin’ny toerana eo anelanelan’ireo lohateny roa ireo ny sasany amin’ireo sakana izay mety hitranga mandritra ny diantsika ka manasarotra ny fiverenantsika amim-pahamendrehana amin’ny Ray any An-danitra. Avy eo dia eritrereto ny fizotran’ny dianao mankany amin’ny fiainana mandrakizay sy ny hoe inona amin’ireo sakana hita ireo no atrehinao amin’izao fotoana izao.

Anio ianao dia handalina momba ny dia nataon’ny Jaredita nankany amin’ny tany nampanantenaina rehefa vitan’izy ireo ny fanamboarana ny sambon’izy ireo. Rehefa mandalina ianao, dia mitadiava fahamarinana izay afaka manampy anao handresy ireo sakana atrehinao eo amin’ny dianao miverina ho eo anatrehan’ Andriamanitra.

Mampihatra ny soratra masina amin’ny fiainanao

Ireto dingana manaraka ireto dia afaka manampy anao hampitaha, na hampihatra ny zavatra hovakinao ao amin’ny soratra masina amin’ny toe-javatra iainanao manokana. Soraty ao amin’ny diary fandalinanao ny lohateny hoe “Fomba hampiharana ny soratra masina amin’ny fiainako”. Raketo an-tsoratra eo ambanin’ilay lohateny ireto dingana ireto.

  1. Tadiavo ireo antsipiriany manan-danja.

  2. Manaova fampitahana.

  3. Fantaro ireo lesona sarobidy.

  4. Fantaro ny fomba fampiharana azonao manokana atao.

Dingana 1: Tadiavo ireo antsipiriany manan-danja

Vakio ny Etera 6:1–3, hitadiavana antsipiriany manan-danja. Mety ho isan’ireny antsipiriany ireny ny olona, na toerana, na zavatra, na fihetsika izay nasongadina.

Antsipiriany manan-danja iray mety tsikaritrareo ny hoe nataon’ny Tompo namirapiratra ireo vato nentin’ny rahalahin’i Jareda teo Aminy teo aloha (jereo ny Etera 3:1–6) mba hananan’ny Jaredita hazavana ao amin’ny sambon’izy ireo.

Dingana 2: Manaova fampitahana

Eritrereto ny fomba ahafahan’ireo antsipiriany hitanareo tao amin’ny dingana teo aloha mitaha amin-javatra ara-panahy na toe-javatra eo amin’ny fiainanareo.

  • Inona avy no fampitahana azonareo atao amin’ireo antsipiriany hitanareo tao amin’ny dingana teo aloha?

Ohatra, mety ho nampitaha ny vato mamirapiratra tamin’ireo loharanon’ny hazavana ara-panahy nitahian’ny Ray any An-danitra antsika ianareo, toy ireo fampianarana sy ohatr’i Jesoa Kristy, ny Fanahy Masina, ny soratra masina ary ireo mpaminany velona. (Jereo ny Salamo 119:105; Jaona 8:12; ary ny 1 Nefia 17:13. Azonareo atao ny mampifandray ireo andininy ireo amin’ny Etera 6:3.)

Dingana 3: Fantaro ireo lesona sarobidy

Eritrereto ny lesona na fahamarinana ianaranareo rehefa mampitaha ireo andininy ireo amin’ny fiainanareo na zavatra ara-panahy ianareo. Hevero ihany koa ny zavatra ianaranareo momba ny Ray any An-danitra sy i Jesoa Kristy.

  • Inona avy no lesona na fahamarinana sasantsasany ianaranareo avy amin’ireo andininy ireo? Inona no hitanareo ka afaka manampy anareo amin’ny fiainanareo andavanandro?

Fahamarinana iray ianaranatsika ny hoe Ny Ray any An-danitra sy i Jesoa Kristy dia manome antsika tari-dàlana sy fahazavana mba hanampiana antsika amin’ny diantsika mandritra ny fiainana an-tany.

Dingana 4: Farito ny fampiharana ataon’ny tena manokana

Saintsaino ny fomba ahafahanareo mampihatra eo amin’ny fiainanareo ireo lesona hitanareo tao amin’ny dingana teo aloha.

  • Inona no azonareo atao mba hanarahana na handraisana misimisy kokoa amin’ny fahazavan’ Andriamanitra eo amin’ny fiainanareo?

Mety ho nieritreritra asa tahaka ny fanatsarana ny fandalinanareo soratra masina ianareo, na ny fikatsahana am-bavaka ny tari-dalana avy amin’ny Ray any An-danitra amin’ny fanapahan-kevitrareo isan’andro, na ny fiezahana amim-pahazotoana kokoa hihazona ny Fanahy Masina hiaraka aminareo lalandava.

Manaova fanazaran-tena mampihatra andininy hafa avy ao amin’io tantara io

Sambon’ny Jaredita

Halalino amin’ny alalan’ny famakiana ny Etera 6:4–12 ny ambin’ny tantaran’ny dian’ny Jaredita nankany amin’ny tany nampanantenaina. Mitadiava fomba misimisy kokoa ahafahan’ny dian’ny Jaredita mifandray amin’ny dianao mamakivaky ny fiainana. Rehefa mandalina ianao, dia ampiharo ny fampiasana ny dingana arahina misy dingana efatra amin’ny fampiharana ny soratra masina.

Jereo tsara ny zavatra ampianarin’ireo andininy ireo anao momba ny Ray any An-danitra sy i Jesoa Kristy.

  1. Valio ireto fanontaniana manaraka ireto:

    • Inona avy no antsipiriany manan-danja hitanao tamin’ny zavatra nohalalininao?

    • Inona avy no fampitahana sasantsasany nataonao tamin’ireo antsipiriany ireo sy ireo lafin-javatra eo amin’ny fiainanao?

    • Inona no lesona iray na mihoatra nianaranao momba ny Ray any An-danitra sy i Jesoa Kristy avy amin’ireo andininy ireo?

    • Inona no zavatra iray avy amin’ireo andininy ireo ka hoezahinao hampiharina eo amin’ny fiainanao?