« អេធើរ ៧–១១ ៖ ‹ ប្រាកដជាការណ៍នេះនឹងនាំទៅរកការជាប់ឃុំឃាំងជាមិនខានឡើយ › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« អេធើរ ៧–១១ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
អេធើរ ៧–១១
« ប្រាកដជាការណ៍នេះនឹងនាំទៅរកការជាប់ឃុំឃាំងជាមិនខានឡើយ »
ដោយសារព្រះស្រឡាញ់យើង ទ្រង់ហៅព្យាការីឲ្យមកព្រមានពួកយើងពីអំពើអាក្រក់ ហើយលើកទឹកចិត្តយើងឲ្យកាន់តាមព្រះបញ្ញត្តិទាំងឡាយ ។ ពួកសាសន៍យ៉ារេឌមិនបានស្ដាប់តាមការព្រមានពីបងប្រុសរបស់យ៉ារេឌទេ ហើយការមិនស្តាប់តាមនេះបានបណ្ដាលឲ្យមានផលវិបាកដល់មនុស្សជាច្រើនជំនាន់ ។ មេរៀននេះអាចជួយអ្នកឲ្យដឹងពីសារៈសំខាន់នៃការធ្វើតាមព្យាការីរបស់ព្រះ ។
ការជាប់ឃុំឃាំង
សូមមើលរូបភាពខាងក្រោមនេះ ។ តើបុគ្គលម្នាក់នេះអាចកំពុងគិត ឬមានអារម្មណ៍យ៉ាងដូចម្តេច ?
សូមពិចារណាទៅលើជម្រើសពីមុនអ្វីខ្លះដែលអាចនាំឲ្យធ្លាក់ចូលទៅក្នុងស្ថានភាពទាំងនេះ និងមូលហេតុអ្វីខ្លះដែលបុគ្គលនេះអាចសម្រេចចិត្តជ្រើសរើសយកជម្រើសទាំងនោះ ។
ការចូលរួមនៅក្នុងការប្រព្រឹត្តអំពើបាបអាចនាំមនុស្សទៅរកការជាប់ឃុំឃាំងខាងវិញ្ញាណ និងរូបកាយ ។
នៅថ្ងៃនេះ អ្នកនឹងសិក្សាអំពីដំណើររឿងមួយដែលនឹងជួយអ្នកឲ្យយល់អំពីមធ្យោបាយដ៏សំខាន់មួយក្នុងការចៀសផុតពីការជាប់ឃុំឃាំងខាងវិញ្ញាណ ។ នៅពេលដែលអ្នកសិក្សា សូមយកចិត្តទុកដាក់លើការបំផុសគំនិតពីព្រះវិញ្ញាណ ដែលអាចជួយឲ្យអ្នកយល់ដឹងពីរបៀបអនុវត្តអ្វីដែលអ្នកបានរៀនសូត្រនៅក្នុងជីវិតរបស់អ្នកផ្ទាល់ ។
« ប្រាកដជាការណ៍នេះនឹងនាំទៅរកការជាប់ឃុំឃាំងជាមិនខានឡើយ »
បន្ទាប់ពីពួកសាសន៍យ៉ារេឌបានទៅដល់ដែនដីសន្យា ពួកគេបានបម្រើព្រះអម្ចាស់ដោយស្មោះត្រង់ ហើយបានចម្រើនឡើង និងបានរីកចម្រើនខ្លាំងនៅក្នុងដែនដី ( សូមមើល អេធើរ ៦:១៧–១៨ ) ។ កាលដែលយ៉ារេឌ និងបងប្រុសរបស់លោកកៀកកាន់តែជិតដល់ទីបញ្ចប់នៃជីវិតរបស់ពួកលោក នោះពួកលោកបានប្រមូលផ្តុំប្រជាជនរបស់ពួកលោកមកជុំគ្នាដើម្បីនិយាយទៅកាន់ពួកគេ ។
សូមអាន អេធើរ ៦:១៩–២៣ ដោយស្វែងរកអ្វីដែលប្រជាជនប្រាថ្នាចង់បាន ។
-
តើបងប្រុសរបស់យ៉ារេឌបានព្រមានអ្វីខ្លះដល់ប្រជាជននៅក្នុង ខទី ២៣ ?
សូមស្រមៃថា អ្នកមានវត្តមាននៅទីនោះនៅពេលដែលលោកបានផ្ដល់ការព្រមាននេះ ។ សូមជញ្ជឹងគិតពីរបៀបដែលអ្នកនឹងឆ្លើយតបទៅនឹងស្ថានភាពទាំងនេះ ។ សូមគិតអំពីអ្វីដែលអ្នកដឹងអំពីព្រះ និងព្យាការីរបស់ទ្រង់ និងរបៀបដែលហេតុការណ៍នេះអាចមានឥទ្ធិពលលើការសម្រេចចិត្តរបស់អ្នក ។
ការព្រមានត្រូវបានបំពេញ
ទោះបីជាបងប្រុសរបស់យ៉ារេឌបានព្រមានក៏ដោយ ក៏ប្រជាជននៅតែជ្រើសរើសយកស្ដេចមួយអង្គដដែល ។ បន្ទាប់ពីកូនប្រុសបីបួននាក់របស់ពួកគេបានបដិសេធ ទីបំផុត អូរៃហា ដែលជាកូនប្រុសរបស់យ៉ារេឌបានយល់ព្រមធ្វើជាស្តេច ហើយសោយរាជ្យដោយសុចរិតពេញមួយជីវិតរបស់គាត់ ( សូមមើល អេធើរ ៦:២៤–២៩; ៧:១ ) ។ ទោះបីជាយ៉ាងណាក៏ដោយ ការព្យាកររបស់បងប្រុសយ៉ារេឌថា ការមានស្តេចនឹងនាំទៅរកការធ្លាក់ចូលទៅក្នុងការជាប់ឃុំឃាំង បានកើតឡើងជាច្រើនដងនៅក្នុងប្រវត្តិសាស្ត្ររបស់ពួកសាសន៍យ៉ារេឌ ។
សូមអានវគ្គបទគម្ពីរខាងក្រោម ដោយរកមើលឧទាហរណ៍អំពីរបៀបដែលការព្យាកររបស់បងប្រុសយ៉ារេឌត្រូវបានបំពេញ ។ អ្នកប្រហែលជាចង់សរសេរសេចក្តីយោងទាំងនេះនៅក្នុងបទគម្ពីររបស់អ្នកនៅជាប់នឹង អេធើរ ៦:២៣ ។
-
តើអ្នកចាប់អារម្មណ៍អ្វីខ្លះពីក្នុងខគម្ពីរទាំងនេះ ?
-
តើមានសេចក្ដីពិតអ្វីខ្លះដែលយើងអាចរៀនសូត្របានពីដំណើររឿងនេះអំពីលទ្ធផលនៃការបដិសេធព្យាការីរបស់ព្រះអម្ចាស់ ?
សេចក្តីពិតមួយដែលយើងអាចរៀនសូត្របានចេញពីដំណើររឿងនេះគឺថា ការបដិសេធព្យាការីរបស់ព្រះអម្ចាស់អាចនាំទៅរកការជាប់ឃុំឃាំង ។
-
តើគំរូមួយចំនួនអំពីរបៀបដែលនរណាម្នាក់អាចជួបបទពិសោធន៍ជាប់ឃុំឃាំងតាមរយៈការមិនអើពើ ឬការបដិសេធព្យាការីរបស់ព្រះអម្ចាស់មានអ្វីខ្លះ ?
-
ហេតុអ្វីបានជាអ្នកគិតថា មនុស្សជ្រើសរើសមិនអើពើនឹងដំបូន្មាន និងការព្រមានដែលព្រះអម្ចាស់ប្រទានមកតាមរយៈព្យាការីរបស់ទ្រង់ដូច្នេះ ?
ដំបូន្មាននៅសម័យទំនើបមកពីព្យាការីរបស់ព្រះអម្ចាស់
សូមស្វែងរកដំបូន្មាន ឬការព្រមានមកពីព្យាការី និងសាវកនៅសម័យទំនើបនេះ ។ ការណ៍ទាំងនេះអាចចេញមកពី ដើម្បីកម្លាំងយុវជន ( កូនសៀវភៅឆ្នាំ ២០២២ ) ឬពីសុន្ទរកថាសន្និសីទទូទៅថ្មីៗនេះ ។ សូមឆែកមើលថា តើអ្នកអាចស្វែងរកពាក្យ ឬឃ្លាជាក់លាក់ដែលពិពណ៌នាអំពីរបៀបដែលយើងនឹងទទួលបានពរជ័យ នៅពេលដែលយើងធ្វើតាមដំបូន្មាននេះ ក៏ដូចជាផលវិបាកដែលយើងអាចជួបប្រទះដោយសារតែការមិនធ្វើតាមបានដែរឬទេ ។
-
សូមឆ្លើយសំណួរខាងក្រោមនេះ ៖
-
តើការព្រមាន ឬដំបូន្មានអ្វីខ្លះដែលអ្នកអាចរកឃើញ ?
-
តើព្រះអម្ចាស់នឹងប្រទានពរជ័យដល់ពួកយើងតាមរបៀបណាខ្លះ នៅពេលដែលយើងធ្វើតាមដំបូន្មាននេះ ?
-
តើការមិនអើពើនឹងដំបូន្មាននេះ ឬការព្រមានទាំងនេះអាចនាំនរណាម្នាក់ឲ្យជាប់ការឃុំឃាំងយ៉ាងដូចម្តេច ?
-
ការអនុវត្តវាទៅក្នុងជីវិតរបស់អ្នក
សូមគិតអំពីរបៀបដែលអ្នកឆ្លើយតបទៅនឹងដំបូន្មាន និងការព្រមានរបស់ព្យាការីនៃព្រះអម្ចាស់ ពរជ័យដែលអ្នកបានទទួលដោយសារការធ្វើតាមដំបូន្មាន និងការព្រមានទាំងនោះ និងដំបូន្មានដែលអ្នកប្រហែលជាត្រូវធ្វើតាមដោយស្មោះត្រង់បន្ថែមទៀត ។
អ្នកខ្លះអាចនឹងមានអារម្មណ៍បាក់ទឹកចិត្ត នៅពេលដែលពួកគេជួបនឹងផលវិបាកដោយសារការមិនគោរពតាមដំបូន្មាន និងការព្រមានរបស់ព្រះអម្ចាស់តាមរយៈព្យាការីរបស់ទ្រង់ ។ ប៉ុន្តែ ទោះបីជាយើងបានធ្វើខុសយ៉ាងណាក៏ដោយ ក៏ព្រះអង្គសង្គ្រោះអាចរំដោះពួកយើងចេញពីការជាប់ឃុំឃាំងរបស់យើងបានដែរ នៅពេលដែលយើងបែរត្រឡប់មករកទ្រង់វិញ ។ ឧទាហរណ៍ សូមអាន អេធើរ ៧:២៥–២៧ ហើយកត់សម្គាល់ពីអ្វីដែលបានកើតឡើង នៅពេលដែលប្រជាជនបានប្រែចិត្ត ហើយបែរត្រឡប់មករកព្រះវិញ ។
-
តើវគ្គបទគម្ពីរនេះបង្រៀនអ្នកអ្វីខ្លះអំពីព្រះអម្ចាស់ ? ( សូមមើល ម៉ូសាយ ៧:៣៣ ) ។
ដើម្បីមើលឧទាហរណ៍មួយអំពីរបៀបដែលនរណាម្នាក់បានជួបបទពិសោធន៍ពីការរំដោះរបស់ព្រះអម្ចាស់ បន្ទាប់ពីការបានជួបបទពិសោធន៍ការជាប់ឃុំឃាំងខាងវិញ្ញាណ សូមពិចារណាមើលវីដេអូនេះ « The Immediate Goodness of God » ដែលមាននៅលើគេហទំព័រ ChurchofJesusChrist.org ចាប់ពីនាទីទី ៣:៣៧ ដល់នាទីទី ៦:៣៣ ។
នៅក្នុងសៀវភៅកំណត់ហេតុការសិក្សារបស់អ្នក សូមសរសេរពីអ្វីដែលអ្នកបានរៀនសូត្រ និងទទួលអារម្មណ៍អំពីការធ្វើតាមព្យាការីរបស់ព្រះអម្ចាស់នៅថ្ងៃនេះ ។ សូមកត់ត្រាពីចំណាប់អារម្មណ៍ខាងវិញ្ញាណណាមួយដែលអ្នកបានទទួល ហើយដាក់ផែនការដើម្បីធ្វើតាមចំណាប់អារម្មណ៍ទាំងនោះ ។