Moronae 10:26–34

“O Mai ia Keriso”

Na auina mai i tatou i le lalolagi e aoao ma tuputupu ae ina ia mafai ona tatou maua le ola e faavavau. Ina ia fesoasoani ia i tatou, na auina mai ai e le Tama Faalelagi Lona Alo, o Iesu Keriso. Ua Ia valaauina foi perofeta e aoao atu ma molimau atu ia Iesu Keriso. I fuaiupu mulimuli o le Tusi a Mamona, na valaaulia ai e Moronae tagata uma ia mulimuli i le Faaola. O lenei lesona e mafai ona fesoasoani ia te oe e “o mai ia Keriso, ma faaatoatoaina ia te ia” (Moronae 10:32).

Faamoemoega o le Tusi a Mamona

Pe ua e mafaufau ea i le mafuaaga na tuuina mai ai e le Atua ia i tatou le Tusi a Mamona?

O le asō o le a e suesue ai i fuaiupu mulimuli o le Tusi a Mamona. A o e suesue, mafaufau e uiga i faamoemoega ma faamanuiaga o le Tusi a Mamona.

I le itulau autu o le Tusi a Mamona, na tautino mai ai e Moronae o le Tusi a Mamona na tusia e faatalitonu ai i tatou o “Iesu o le Keriso.” O le upu “Keriso” e “tutusa ma le upu Eleni o le Mesia. O lona uiga o le Perofeta faauuina, Ositaulaga, Tupu, ma le Laveai” (Taiala i Tusitusiga Paia, “Mesia,” scriptures.ChurchofJesusChrist.org).

• Na faapefea e le suesueina o le Tusi a Mamona ona faamalosia ai lou talitonuga ia Iesu Keriso?

• Na faapefea e le suesueina o le Tusi a Mamona ona fesoasoani ia te oe e mulimuli ai ia Iesu Keriso?

• O le a sou lagona, o a mai au taumafaiga i le taimi nei e mulimuli ia te Ia?

O le valaaulia mulimuli a Moronae

Ina ua uma ona aoao mai e uiga i meaalofa o le agaga ma lapatai mai e uiga i taunuuga o le le talitonu, sa saunoa Moronae e uiga i le Tusi a Mamona.

Faitau le Moronae 10:27–29, ma vaavaai mo le mea na valoia e Moronae o le a tupu.

• O le a sou manatu e uiga i le feiloai ai ma Moronae i le pa faamasino?

Ona tuuina mai lea e Moronae ana apoapoaiga po o valaaulia faaiu.

Faitau le Moronae 10:30–34, ma vaavaai mo mea na valaaulia i tatou e Moronae e fai ma mo faamanuiaga folafolaina na ia faasoa mai.

Suesue ia le itiiti ifo ma le lua ni valaaulia ma ni folafolaga mai le Moronae 10:30–34. E mafai ona fesoasoani atu le siata lenei. Atonu e fesoasoani le lisi o mau faaopoopo ma fesoasoaniga mo suesuega i au tusitusiga paia i autafa o fuaitau patino mai le Moronae 10:30–34. E mafai foi ona e suesue i isi valaaulia po o folafolaga e te maua i le Moronae 10:30–34 e le o lisiina i le siata.

O mea e tatau ona tatou faia (valaaulia a Moronae)

O mea ua folafola mai e le Tama Faalelagi

O mea e tatau ona tatou faia (valaaulia a Moronae) Taofi mau i meaalofa lelei uma. (Tagai i le Moronae 7:19; Mataupu Faavae ma Feagaiga 6:7.) Aloese mai meaalofa leaga ma mea le mama. (Tagai i le 2 Nifae 4:27–28; Mamona 9:28.) Faafiti outou lava mai mea uma e le faaleatua. (Tagai i le Faaliliuga a Iosefa Samita, Mataio 16:25–29 [i le Mataio 16:24, vaefaamatalaga a]; Mosaea 3:19.) Alofa i le Atua ma o tatou loto, agaga, ma le manatu atoa. (Tagai i le Mataio 22:36–39; Ominae 1:26.)

O mea ua folafola mai e le Tama Faalelagi Ua lava Lona alofa tunoa ma e mafai ona faaatoatoaina ai i tatou. (Tagai i le 2 Nifae 10:24; 25:23; Eteru 12:27; Taiala i Tusitusiga Paia, “Alofa Tunoa,” scriptures.ChurchofJesusChrist.org.) O le a faapaiaina i tatou ma maua se faamagaloga o a tatou agasala. (Tagai i le 3 Nifae 27:20; Mataupu Faavae ma Feagaiga 76:41; Taiala i Tusitusiga Paia, “Faapaiaina,” scriptures.ChurchofJesusChrist.org.) O le a tatou paia e aunoa ma se ila. (Tagai i le Levitiko 19:2; Mataupu Faavae ma Feagaiga 87:8; Taiala i Tusitusiga Paia, “Paia,” scriptures.ChurchofJesusChrist.org.)

1. Tali fesili nei:

   • O le fea valaaulia po o folafolaga e sili ona anoa ia te oe ma aisea?

   • E mafai faapefea e le faatinoina o nei valaaulia ona fesoasoani ia te oe e sau ai ia Iesu Keriso?

   • O a mataupu faavae e mafai ona tatou aoao mai le Moronae 10:30–34?

O se tasi o mataupu faavae tatou te aoaoina o le, a o tatou o mai ia Iesu Keriso, e mafai ona faaatoatoaina i tatou ia te Ia.

“O mai ia Keriso, ma faaatoatoaina ia te ia”

Atonu e te manao e matamata le vitio “O Mai ia Keriso: 2014 Pese Autu” (4:48), o loo maua i le ChurchofJesusChrist.org. Mafaufau loloto pe na faapefea ona fesoasoani le alofa tunoa o le Faaola ia te oe i ou taimi o mafatiaga.

2. Tali ia lē itiiti ifo ma le tasi o fesili nei:

   • O le a le mea na faia e Iesu Keriso ina ia mafai ai ona tatou maua folafolaga i le Moronae 10:30–34 ma ia faaatoatoaina ia te Ia?

   • Na faapefea ona e vaaia le alofa tunoa (fesoasoani faalelagi po o le malosi) o le Tama Faalelagi ma Iesu Keriso o galue i lou olaga?

Mafaufau i se mea e mafai ona e faia e sau ai ia Keriso ma faaatoatoaina ia te Ia. Afai e te le o mautinoa po o le a le mea e fai, e mafai ona fesoasoani le mafaufau loloto i fesili nei. Afai e i ai se mea e te lagona e mafai ona e faia i le taimi nei, fai loa. O se tasi o au sini o le atinaega o le autalavou atonu ua fesoasoani ia te oe e sau ia Keriso. E mafai ona faaauau pea ona e galue i lena sini.

• Pe o i ai se mea e le faale-atua i lo’u olaga e manaomia ona ou faafitia ai a’u lava ia (mo se faataitaiga, o tosinaga o ala o faasalalauga po o mausa leaga)?

• E mafai faapefea ona sili atu lo’u alofa i le Atua ma lo’u manatu atoa, mafaufau, ma le malosi atoa?

• E faapefea e le faia o nei mea ona fesoasoani ia te au ia avea atili e faapei o Iesu Keriso?

Tuu i le faitalia: O e Manao e Aoao Atili?

E mafai faapefea ona faamanuiaina a’u pe a ou talia le valaaulia e o mai ia Keriso?

Na faasoa mai Elder Gerrit W. Gong o le Korama o Aposetolo e Toasefululua:

O valaaulia a le Atua e tumu i le alofa ma avanoa aua o Iesu Keriso o “le ala, ma le upu moni, ma le ola” [Ioane 14: 6]. Mo i latou o e lagona le mamafatu, ua Ia valaaulia e, “O mai ia te a’u,” ma ia i latou o e o mai ia te Ia, ua Ia folafola mai, “O a’u foi e malolo ai outou” [Mataio 11:28]. “O mai ia Keriso, ma faaatoatoaina ia te ia, … alolofa i le Atua ma o outou manatu atoa, mafaufau, ma le malosi atoa, ona lava lea o lona alofa tunoa mo outou, ma o lona alofa tunoa e mafai ai ona outou atoatoa ia Keriso” [Moronae 10:32].

I lenei faamautinoaga “o lona alofa tunoa e mafai ai ona outou atoatoa ia Keriso” o le faamafanafanaga foi, filemu, ma le tautinoga lea e mafai ona tatou faaauau pea i luma ma le faatuatua ma le lototele i le Alii e tusa pe le tutupu ni mea e pei ona tatou faamoemoe i ai, mananao i ai, pe atonu e talafeagai, e ala i le leai o ni a tatou lava mea sese, pe a mavae foi ona tatou faia o le mea silisili. (Gerrit W. Gong, “O La Tatou Afi o le Tolauapiga o le Faatuatua,” Liahona, Nov. 2018, 42)

Na aoao mai Elder Jeffrey R. Holland o le Korama a Aposetolo e Toasefululua:

“Ioe, o mai ia Keriso, ma faaatoatoaina ia te ia … ,” o loo aioi mai ai Moronae. “Alolofa i le Atua ma o outou manatu atoa, mafaufau, ma le malosi atoa, ona … o lona alofa tunoa e mafai ai ona outou atoatoa ia Keriso” [Moronae 10:32; ua faaopoopo le faamamafa]. Pau le tatou faamoemoega mo le atoatoa moni o le taliaina lea e avea ma se meaalofa mai le lagi—e le mafai ona tatou “mauaina”. O le mea lea, ua ofo mai ai ia i tatou e le alofa tunoa o Keriso e le gata o le faaolataga mai le faanoanoa ma le agasala ma le oti ae o le faaolataga mai a tatou lava faitioga faifai pea. (Jeffrey R. Holland, “Ia Atoatoa Ona Lelei o La Outou Amio—I Le Iuga,” Liahona, Nov. 2017, 41)

Na aoao mai Elder D. Todd Christoffferson o le Korama a Aposetolo e Toasefululua:

Ia manatua, o le mana togiola po o le alofa tunoa o Keriso e le gata ina aveesea ai le ta’usalaga o le agasala ma sese, ae na te faapaia foi ma faia i tatou o ni tagata paia, e mafai ona ola i le afioaga o le Atua. (D. Todd Christofferson, “Filifiliga ma Tautinoga,” [faigalotu i le lalolagi atoa mo talavou matutua, 12 Ianuari, 2020], broadcasts.ChurchofJesusChrist.org)

Moronae 10:34. Mata o le a faape’i le Faamasinoga Mulimuli?

Sa aoao mai Peresitene Dieter F. Uchtdorf, a o avea ma uso o le Au Peresitene Sili:

O le Aso o le Faamasinoga o le a avea ma se aso o le alofa mutimutivale ma le alofa—o se aso e faamaloloina ai loto nutimomoia, o le a suia ai loimata faanoanoa i loimata o le lotofaafetai, o le taimi o le a faia ai mea uma ia tonu.

Ioe, o le a i ai le faanoanoa matuitui ona o le agasala. Ioe, o le a i ai faanoanoaga e oo foi i le tiga ona o o tatou masei, lo tatou valea, ma lo tatou lotomaaa na mafua ai ona tatou le mauaina o avanoa mo se lumanai matua sili atu ona lelei.

Ae e ia te a’u le mautinoaga o le a le gata ina faamalieina i tatou i le faamasinoga a le Atua; ae o le a tatou ofo ma maofa foi i Lona alofa tunoa le i’u, alofa mutimutivale, agalelei ma le alofa mo i tatou, o Lana fanau. Afai e lelei o tatou manaoga ma galuega, afai tatou te faatuatua i le Atua soifua, ona mafai lea ona tatou tepa taulai atu i le mea na ta’ua e Moronae “le pa faamasino logomalie a le Ieova silisili, le Faamasino Faavavau” [Moronae 10:34]. (Dieter F. Uchtdorf, “E, le Silisiliese Na’ua o le Fuafuaga a lo Tatou Atua!,” Liahona, Nov. 2016, 21)