Iloilo Lou Aoaoina 10

O Le Tusi a Mamona; 1 Nifae–Moronae

o le tagata o loo faitau i le Tusi a Mamona

O le manatunatu i le ma le iloiloina o lou aoaoina faaleagaga e mafai ona fesoasoani e te latalata atili atu ai i le Faaola ma faamalosia ai lou liuaina. O lenei lesona ua faamoemoe e fesoasoani ia te oe e iloilo ai le alualu i luma ma le tuputupu ae ua e oo i ai i le taimi o au suesuega o le Tusi a Mamona i lenei tausaga.

O lau suesuega o le Tusi a Mamona

I le aluga o le tausaga ua tuanai i le seminare, afai ua suesueina le Tusi a Mamona: O Se Tasi Molimau ia Iesu Keriso.

I lenei lesona, o le a e maua ai le avanoa e faamatala ai nisi o mea sa e aoaoina ma lagonaina ma iloilo ai pe ua faapefea ona fesoasoani le Tusi a Mamona ia te oe ia liua atili ia Iesu Keriso.

O a ni o ou lagona e uiga i le Tusi a Mamona?

Sa valaaulia i tatou e Peresitene Russell M. Nelson e mafaufau e uiga i fesili e tolu e faatatau i le Tusi a Mamona:

Peresitene Russell M. Nelson

Muamua, faamata e faapeī lou olaga e aunoa ma le Tusi a Mamona? Lua, o le a se mea o le a e le iloaina? Ma le tolu, o le a se mea o le a e le mauaina? (Russell M. Nelson, “O Le Tusi a Mamona: Faamata e Faape’i Lou Olaga e aunoa ma Lea?,” ” Liahona, Nov. 2017, 61)

aikona, faamaumau

1. Tali fesili nei:

   • O le a faapefea ona e tali atu i fesili taitasi a Peresitene Nelson?

   • Na faapefea ona aafia ou lagona e uiga i le Tusi a Mamona a o e suesueina i lenei tausaga?

O a ni mea ua e malamalama ai e uiga i le Tama Faalelagi ma Iesu Keriso?

Sa faamatalaina e Peresitene Russell M. Nelson se tasi o matafaioi autu o le Tusi a Mamona:

Peresitene Russell M. Nelson

E tupu se mea mamana pe a saili atu se atalii/afafine o le Atua ia iloa atili e uiga ia te Ia ma Lona Alo Pele. E leai se isi vaipanoa o loo manino ma mamana atili ai le aoaoina o na upumoni nai lo le Tusi a Mamona. (Russell M. Nelson, “O Le Tusi a Mamona: Faamata e Faape’i Lou Olaga e aunoa ma Lea?,” Liahona, Nov. 2017, 61)

Faaalu sina taimi e mafaufau ai i mea ua e aoaoina e uiga i le Tama Faalelagi ma Iesu Keriso a o e suesueina le Tusi a Mamona i lenei tausaga. E mafai ona e iloiloina au tusitusiga paia ma api faamaumau mo suesuega mo upumoni e uiga i le Tama Faalelagi ma Iesu Keriso atonu na e makaina pe tusia ni faamatalaga i le aluga o le tausaga. Lisi ni upumoni se tolu pe fa sa faapitoa ona anoa ia te oe i lau api faamaumau mo suesuega.

Saili ia le itiiti ifo ma le tasi se fasifuaitau o mau e lagolagoina upumoni taitasi na e lisiina i lau api faamaumau mo suesuega. Tusi le mau faasino i autafa o upumoni taitasi, ma faamatala pe mafai faapefea ona e faaaogaina le fuaitau o le mau e aoao atu ai lena upumoni.

Afai e manaomia, e mafai ona e iloiloina nisi o fuaitau nei o mau:

• 2 Nifae 9:19–23

• Alema 5:33–34

• Alema 12:32–34

• Alema 34:8–10

• 3 Nifae 11:9–15

• Mamona 9:9–13

aikona, faamaumau

2. Tali fesili nei:

   • O a ni upumoni se lua ua e aoaoina e uiga i le Tama Faalelagi po o Iesu Keriso mai lau suesuega o le Tusi a Mamona?

   • Aisea e te manatu e taua ai le malamalama i nei upumoni?

Na faapefea ona tosinaina e le Tusi a Mamona le ala e te ola ai i lou olaga?

Faitau le saunoaga lenei a le Perofeta o Iosefa Samita (1805–44), ma vaavaai mo mea na ia aoaoina mai e uiga i le mana o le Tusi a Mamona:

o le Perofeta o Iosefa Samita

© 1998 David Lindsley

Na ou tauina atu i le usoga e faapea, o le Tusi a Mamona o se tusi silisili ona sa’o i tusi uma lava o i le lalolagi, ma o le maa autu o la tatou ekalesia, ma e sili atu ona latalata le tagata i le Atua e ala i le usitaia o ona mataupu, nai lo se isi lava tusi. (Faatomuaga o le Tusi a Mamona; tagai foi i le History of the Church, 4:461)

Ina ia “ola i ona mataupu” o lona uiga ia ola i mataupu faavae ma aoaoga o loo i ai i le Tusi a Mamona. Mafaufau mo ni nai minute pe na faapefea ona tosina ou mafaufauga, uiga faaalia, po o faatinoga ona o mea ua e aoaoina mai le Tusi a Mamona.

aikona, faamaumau

3. Tali ia lē itiiti ifo ma le tasi o fesili nei:

   • Na faapefea ona fesoasoani au suesuega o le Tusi a Mamona ia e latalata atili ai i le Tama Faalelagi ma Iesu Keriso?

   • O a nisi o aoaoga patino ua mafai ona e faaaogaina mai lau suesuega o le Tusi a Mamona?

   • O a ni faamanuiaga ua e oo i ai a o e suesueina e le aunoa le Tusi a Mamona?