Pasiunang mga Materyal

Pagkat-on pinaagi sa Espiritu

“Pinaagi sa Gahom sa Espiritu Santo”

Sa tibuok Basahon ni Mormon, ang mga propeta mihatag og gibug-aton sa importante nga tahas sa Espiritu Santo. Ang Langitnong Amahan ug si Jesukristo nagtinguha kanimo nga makaila Kanila ug makakat-on sa kamatuoran “pinaagi sa gahom sa Espiritu Santo” (Moroni 10:5). Kini nga leksiyon makatabang kanimo sa pag-ila sa mahinungdanong mga tahas sa Espiritu Santo, nga kinahanglanon alang sa imong espirituhanong pagtubo ug pag-uswag.

Pagtudlo pinaagi sa Espiritu.Ang Espiritu Santo nagsaksi sa kamatuoran, nagpamatuod ni Kristo, ug nag-usab sa mga kasingkasing. Pinaagi lamang sa Espiritu Santo nga makab-ot nato ang tumong sa pagtudlo sa ebanghelyo— pagtukod og hugot nga pagtuo kang Jesukristo ug pagtabang sa uban nga mas mahisama Kaniya. Pangita og mga paagi sa pagdapit sa Espiritu Santo sa pagbuhat sa Iyang mga tahas.

Pagpangandam sa estudyante: Dapita ang mga estudyante sa pagpakig-istorya sa usa ka sakop sa pamilya o lider sa Simbahan mahitungod sa pipila ka mga pamaagi nga ang Espiritu Santo makig-istorya.

Posible nga mga Kalihokan sa Pagkat-on

Espirituwal nga komunikasyon

Ikonsiderar ang pagpakita sa mga estudyante og hulagway sa mga sinyas gamit ang aso [smoke signal], usa ka makina sa telegraph, o usa ka tawo nga naggamit og morse code, ug pangutan-a sila kon nahibalo ba sila kon para sa asa kini gigamit. Bahina ang mga estudyante ngadto sa mga grupo ug dapita sila sa paghimo og lista sa mga kabag-ohan nga nakaapekto, nakapausab, o nakapauswag sa komunikasyon sa miaging 50 ngadto sa 100 ka tuig. Ilha ang smartphone gikan sa ilang mga lista ug ikonsiderar ang pagpangutana sama nianang naa sa ubos.

Hunahunaa ang daghang lain-laing mga himan sa komunikasyon nga anaa sa kalibotan ug sa unsang paagi ang imong kinabuhi mahimong maapektohan niini. Usa ka importante nga himan nga nakapauswag pag-ayo sa komunikasyon sa tibuok kalibotan mao ang smartphone.

• Unsa nga tahas ang mahimo sa usa ka smartphone sa pagtabang sa mga tawo nga magpabilin nga konektado?

• Sa unsang paagi kini makatabang sa usa ka tawo nga makaangkon og kahibalo ug mas makasabot mahitungod sa kalibotan?

Mas importante pa kay sa bisan unsang pisikal nga himan sa komunikasyon, ang Langitnong Amahan hingpit nga nasayod unsa ka mahinungdanon ang espirituhanong komunikasyon alang kanato atol sa atong mortal nga biyahe. Siya mihatag sa Espiritu Santo aron sa pagtabang kanimo nga magpabiling konektado ngadto Kaniya ug makasabot sa tanan nga gikinahanglan alang sa kalipay karon ug sa imong kaluwasan human niini.

Paghunahuna og mga higayon sa imong kinabuhi diin imong nasinati ang impluwensiya sa Espiritu Santo ug sa unsang paagi ang Iyang impluwensiya nakapanalangin sa imong kinabuhi. Tingali maghunahuna ka kon natudloan ka na ba sa Espiritu Santo o gibati ba gayod ang Iyang impluwensiya. Samtang magtuon ka ug moila sa mahinungdanong tahas sa Espiritu Santo, ikonsiderar kon sa unsang paagi ang Iyang impluwensiya makapanalangin sa imong kinabuhi, ug pamalandongi ang mosunod nga mga pangutana:

• Unsa ka maayo ang akong pagsabot sa mga tahas sa Espiritu Santo?

• Unsaon nako nga mas madapit ang impluwensya sa Espiritu Santo sa akong kinabuhi?

• Sa unsang paagi nako nabati ug naila ang Espiritu Santo sa akong kinabuhi sa pagkakaron?

Duha ka tahas sa Espiritu Santo

Ikonsiderar ang pagpares sa mga estudyante o ang pagtunga sa klase. Ang matag usa mahimong magtuon og duha sa mga pakisayran sa kasulatan ug ipakigbahin sa usag usa kon unsay ilang nadiskobrehan.

Ang Espiritu Santo nagserbisyo og daghang mga katuyoan ug adunay lain-laing mga tahas. Basaha ang mosunod nga mga hugpong [set] sa mga kasulatan, nga mangita sa duha ka importante nga tahas sa Espiritu Santo.

• Tahas 1: 2 Nephi 26:12–13; 3 Nephi 28:11

• Tahas 2: 1 Nephi 10:19; Moroni 10:4–5

• Unsa ang imong nadiskobrehan?

Basaha ang mosunod nga pamahayag ni Elder Quentin L. Cook sa Korum sa Napulog Duha ka Apostoles:

Ang Espiritu Santo mao ang tigpadayag ug tigpamatuod sa tanang kamatuoran, hilabi na sa Manluluwas. Kon wala ang Espiritu Santo, kita dili gayod masayod nga si Jesus mao ang Kristo. Ang Iyang importanteng tahas mao ang pagsaksi sa Amahan ug sa Anak ug sa Ilang mga titulo ug sa Ilang himaya. (Quentin L. Cook, “Ang Panalangin sa Nagpadayon nga Pagpadayag ngadto sa mga Propeta ug Personal nga Pagpadayag sa Paggiya sa Atong Kinabuhi,” Liahona, Mayo 2020, 98)

• Unsa nga mga kamatuoran ang mahimong maila gikan sa mga pakisayran sa kasulatan nga imong gitun-an ug sa pamahayag ni Elder Cook?

Usa ka importante nga kamatuoran nga tingali imong naila mao nga ang Espiritu Santo nagtudlo sa kamatuoran ug nagpamatuod sa Langitnong Amahan ug ni Jesukristo.

Ikonsiderar ang pag-rekord niini o ang susama nga mga kamatuoran diha sa imong mga kasulatan o diha sa journal sa pagtuon. Ang kanunay nga pag-rekord sa mga kamatuoran makapalig-on sa imong espirituhanong panumdoman ug makatugot sa Espiritu Santo sa pagpahinumdom niini kanimo kon gikinahanglan (tan-awa sa John 14:26).

• Sa unsang paagi nga ang pagsabot niining duha ka tahas sa Espiritu Santo makabenepisyo sa imong kinabuhi?

Pamalandongi sa hilom ang bisan unsang mga kasinatian nga tingale imong nasinati uban sa Espiritu Santo ug giunsa nimo pagkamatikod sa Espiritu Santo nga naglihok sa imong kinabuhi.

Ang ubang mga estudyante mamahimong dili makahunahuna og tubag sa mosunod nga mga pangutana. Kon gikinahanglan, pahinumdomi sila nga kon ang mga kamatuoran sa ebanghelyo adunay kahulugan sa ilang mga hunahuna ug mobati og maayo sa ilang mga kasingkasing, diha ang Espiritu Santo nagpamatuod sa kamatuoran. Kasagaran, kon ang usa ka tawo mobati nga naaghat sa pagmarka sa usa ka bersikulo sa kasulatan, kini dinasig sa Espiritu.

Ikonsiderar ang pagdapit sa mga estudyante sa pagpangutana mahitungod sa Espiritu Santo.

• Sa unsang paagi nga ang Espiritu Santo mitabang kanimo nga mas maduol ngadto sa Langitnong Amahan ug ni Jesukristo?

• Kanus-a nimo gibati ang Espiritu Santo nga nagpamatuod sa kamatuoran?

• Unsa ang gikinahanglan nimong buhaton kon wala ka mobati nga ikaw adunay mga kasinatian uban sa Espiritu Santo?

Pagbati ug pagdapit sa Espiritu Santo

Ang Espiritu Santo makig-istorya kanato sa daghang mga pamaagi. Ang Espiritu makalamdag sa imong hunahuna, magtabang kanimo nga makasinati og kalinaw ug kalipay, ug mogiya kanimo sa pagbuhat sa unsay matarong (tan-awa sa Doktrina ug mga Pakigsaad 11:12–13; Mga Taga-Galacia 5:22–23). Ang mga kasulatan kasagaran naghulagway sa Iyang impluwensiya isip usa ka “hinay nga hinagawhaw nga tingog” nga atong “mabati” (tan-awa sa 1 Nephi 17:45).

Si Elder Ronald A. Rasband sa Korum sa Napulog Duha ka Apostoles mipaambit sa pipila ka mga pamaagi nga ang Espiritu Santo makig-istorya kanato:

Ang akong kasinatian mao nga ang Espiritu kasagaran makig-istorya pinaagi sa pagbati. Mabati ninyo kini diha sa mga pulong nga pamilyar ninyo, nga masabtan ninyo, nga moaghat ninyo. …

… Ang Espiritu nagsulti sa mga pulong nga atong gibati. Kini nga mga pagbati malumo, hinay nga pag-awhag nga molihok, nga mobuhat og butang, mosulti og butang, motubag sa piho nga paagi. Kon kita kaswal ra o kontento na sa atong pagsimba, nadani palayo ug nawad-an og pagbati tungod sa kalibotanong mga kalihokan, mabantayan nato ang atong kaugalingon nga maminosan ang atong abilidad nga mobati. (Ronald A. Rasband, “Tugoti ang Balaang Espiritu nga mao ang Mogiya,” Liahona, Mayo 2017, 94-95)

Bisan pinaagi sa ilang kaugalingong mga kasinatian, mga kasinatian sa uban, o niadtong ilang nabasahan diha sa mga kasulatan, daghang mga estudyante ang makat-on og lain-laing mga pamaagi nga ang Espiritu Santo makaimpluwensiya sa usa ka tawo. Ikonsiderar ang pagdapit sa mga estudyante sa pagpaambit sa pipila niini ug ilista kini sa pisara.

Kon ang mga estudyante nagkinahanglan og tabang sa pagsabot kon unsaon sa Espiritu Santo pagpakig-istorya, mahimo nimong i-reference ang kalihokan sa pahina 114 sa Isangyaw ang Akong Ebanghelyo: Usa ka Giya sa Misyonaryo nga Pangalagad (2019).

Dasiga ang mga estudyante sa paghatag og pagtagad sa ilang mga hunahuna ug mga pagbati atol sa seminary ug samtang nagtuon sa ebanghelyo diha sa panimalay.

• Unsa ang pipila ka mga paagi nga imong gibati ang impluwensiya sa Espiritu Santo?

• Sa unsang paagi nga ang pag-ila kon imong gibati ang Espiritu Santo mahimong usa ka panalangin sa imong kinabuhi?

Ang mga kasulatan naglangkob og daghang mga ehemplo sa mga indibidwal kinsa makugihong nangita sa impluwensiya sa Espiritu Santo. Si Nephi ug ang mga anak nga lalaki ni Mosiah diha sa Basahon ni Mormon mao ang pipila kanila.

Basaha ang 1 Nephi 2:16–17 ug Alma 17:2–3, nga mangita og matarong nga mga lihok nga nidapit sa Espiritu Santo.

Sa pagtubag sa mga estudyante sa mosunod nga pangutana, ikonsiderar kon ang bisan hain niini nga mga ideya makatabang ba nga hisgotan: (1) naningkamot nga magmasulondon sa mga kasugoan, (2) naghinulsol sa mga kasaypanan, (3) nag-ampo alang sa paggiya, (4) aktibong nag-apil, ug (5) nag-rekord sa mga impresyon. Makaila kita sa Espiritu Santo pinaagi sa mga pagbati nga mahimong maglakip sa gugma, kalipay, kalinaw, pagpaubos, pagpasalamat, balaang pagtahod, kasegurohan, kadasig, ug kainit (tan-awa sa Mga Taga-Galacia 5:22–23; Doktrina ug mga Pakigsaad 9:8–9).

• Base niini nga mga bersikulo ug sa imong kaugalingong mga ideya, unsa ang pipila ka mga paagi nga kita makadapit sa Espiritu Santo sa atong kinabuhi?

Paghimo og plano nga mas makadapit ug makakat-on gikan sa Espiritu Santo samtang magtuon ka sa ebanghelyo diha sa seminary, sa panimalay, ug sa Simbahan. Ilakip ang piho nga mga pamaagi nga makadapit ka sa Espiritu Santo sa imong kinabuhi ug unsay imong mahimo aron makaila sa impluwensiya sa Espiritu sa imong kinabuhi.

Ikonsiderar ang pagpaambit sa imong plano sa usa ka kasaligan nga sakop sa pamilya o higala, ug kanunay nga hisgoti ang imong pag-uswag uban kaniya.

Komentaryo ug Background nga Impormasyon

Unsaon nako pag-andam ang akong kaugalingon sa pagdawat ug pagsunod sa giya gikan sa Espiritu Santo?

Si Elder Quentin L. Cook sa Korum sa Napulog Duha ka Apostoles mitudlo og pipila ka mga pamaagi kon unsaon nato pagpangandam sa atong kaugalingon sa pagdawat og personal nga pagpadayag pinaagi sa Espiritu Santo. Tan-awa ang video “Ang Panalangin sa Nagpadayon nga Pagpadayag ngadto sa mga Propeta ug sa Personal nga Pagpadayag aron sa Paggiya sa Atong Kinabuhi” (14:10) gikan sa time code 10:08 hangtod 11:42.

Si Elder Cook nagtudlo nga ang mga propeta padayon nga nagdawat og pagpadayag nga mogiya sa Simbahan ug nga kita makadawat og pagpadayag nga mogiya sa atong mga kinabuhi.

Unsaon nako pagkahibalo kon gibati ko ba ang Espiritu o adunay sinalagma [random] lamang nga mga hunahuna ug mga pagbati?

Pagkat-on gikan kang Elder David A. Bednar sa Korum sa Napulog Duha ka Apostoles ug kang Sister Susan Bednar samtang sila mipasabot kon unsaon pagbati ug pag-ila sa Espiritu Santo.

Unsa kaha kon kulang ko og pagsalig sa akong abilidad sa pagkat-on gikan sa Espiritu Santo?

Si Elder Richard G. Scott (1928–2015) sa Korum sa Napulog Duha ka Apostoles mitudlo:

Unsay nakita nga makahasol nga buluhaton sa sinugdanan mahimong mas sayon sa pagdumala sa paglabay sa panahon samtang kamo kanunay nga maningkamot sa pag-ila ug pagsunod sa mga pagbati nga giaghat sa Espiritu. Ang inyong pagsalig sa direksiyon nga inyong nadawat gikan sa Espiritu Santo mahimo usab nga mas molig-on. Ako mosaksi nga samtang kamo nakaangkon og kasinatian ug kalamposan sa pagkaginiyahan sa Espiritu, ang inyong pagsalig diha sa mga impresyon nga inyong gibati mahimong mas sigurado kay sa inyong pagdepende diha sa unsay inyong nakita o nadungog. (Richard G. Scott, “Aron Makabaton og Espirituhanong Giya,” Liahona, Nob. 2009, 7)

Sa unsa pa nga paagi nga ang Espiritu Santo makatabang kanako?

Si Presidente Ezra Taft Benson (1899–1994) mitudlo:

Pag-ampo sa Langitnong Amahan nga panalanginan ka sa Iyang Espiritu sa tanang panahon. Kasagaran natong tawgon ang Espiritu nga Espiritu Santo. Ang Espiritu Santo usa usab ka gasa gikan sa Langitnong Amahan. Ang Espiritu Santo motabang kanimo sa pagpili sa matarong. Ang Espiritu Santo manalipod kanimo gikan sa kadautan. Siya mohunghong kanimo sa hinay, hinagawhaw nga tingog sa pagbuhat sa matarong. Kung magbuhat ka og maayo, ikaw makabati og maayo, ug kana mao ang Espiritu Santo nga nakig-istorya kanimo. Ang Espiritu Santo usa ka maayo kaayo nga ikauban. Anaa siya kanunay aron tabangan ka. (Ezra Taft Benson, “To the Children of the Church,” Liahona, Mayo 1989, 82)

Dugang nga Kalihokan sa Pagkat-on

Ang pundok sa mga katawhan sa Bountiful

Ikonsiderar ang pagbasa sa 3 Nephi 11:1–8, nga mangita sa unsay gibuhat sa mga tawo sa yuta sa Bountiful aron sa pagtabang kanila nga makadungog ug makasabot sa tingog sa Dios. Hisgoti kon unsay atong makat-onan gikan sa ilang ehemplo kay kini may kalabotan sa pagdapit ug pag-ila sa Espiritu Santo.