Pasiunang mga Materyal

Pagtuon sa mga Kasulatan

Hugot nga Mogunit sa Pulong sa Dios

Ang mga kasulatan talagsaon sa ilang abilidad sa pagpalawom sa hugot nga pagtuo ug gugma sa Langitnong Amahan ug ni Jesukristo. Ang makanunayon ug makahuluganon nga pagtuon nagdapit sa hugot nga pagtuo ug naglig-on sa atong inadlaw nga kinabuhi. Ang katuyoan niini nga leksiyon mao ang pagpalambo sa imong tinguha ug abilidad sa pagtuon sa mga kasulatan kada adlaw ug sa pagdawat sa gisaad nga mga panalangin nga nag-uban sa pagtuon sa kasulatan.

Pagdasig og kinaiya sa inadlaw nga pagtuon sa kasulatan.Pipila ka mga butang ang maghatag og mas gamhanan ug malungtarong impluwensiya sa kaayohan diha sa mga kinabuhi sa mga estudyante kay sa pagtabang kanila sa pagkat-on sa paghigugma sa mga kasulatan ug sa pagtuon niini kada adlaw. Usa ka paagi sa pagbuhat niini mao ang paghisgot uban sa mga estudyante sa mga benepisyo ug mga panalangin sa inadlaw, personal nga pagtuon sa kasulatan.

Pagpangandam sa estudyante: Ihatag sa mga estudyante ang handout nga “Ebalwasyon sa Pagtuon sa Kasulatan” gikan niini nga leksiyon aron dad-on sa balay ug tubagan. Ikonsiderar ang pagdapit sa mga estudyante sa paghangyo sa mga sakop sa pamilya sa pagtubag usab sa mga pangutana ug sa paghisgot sa ilang mga tubag.

Posible nga mga Kalihokan sa Pagkat-on

Inadlaw nga pagtuon sa kasulatan

Aron matabangan ang mga estudyante nga makita ang importansiya sa makanunayon nga paningkamot sa pagtuon sa mga kasulatan sa paglabay sa panahon, ikonsiderar ang pagdapit og usa ka estudyante nga komportable nga mohimo og push-up nga moduol sa atubangan sa klase ug mopakita niini. Inig kahuman niya, ikonsiderar ang pagpangutana, “Mas kusgan ba ang estudyante karon nga nakahimo na siya og pipila ka mga push-up? Ngano o nganong dili man?”

Kon gusto sa usa ka tawo nga mahimong mas lig-on pinaagi sa pagbuhat sa mga push-up, unsa ang kinahanglan niyang buhaton? Unsa ka dugay nga mamatikdan ang pag-uswag sa kusog? Unsa nga mga hagit ang tingale kinahanglang buntogon sa usa ka tawo?

• Sa unsang paagi kaha kini may kalabotan sa pagtuon sa mga kasulatan?

Basaha ang mosunod nga mga pamahayag ni Presidente Thomas S. Monson (1927–2018) ug Julie B. Beck, kanhi Unang Magtatambag sa Kinatibuk-ang Kapangulohan sa Young Women, ug ribyoha unsay ilang gitudlo mahitungod sa pagtuon sa kasulatan:

Ang paggahin og panahon matag adlaw sa pagtuon sa kasulatan, walay duda, makapalig-on sa atong mga pundasyon sa hugot nga pagtuo ug sa atong mga pagpamatuod sa kamatuoran. (Thomas S. Monson, “Unsa ka Lig-on ang Tukuranan,” Liahona, Nob. 2006, 68)

Bisan og wala nako isipa ang akong kaugalingon nga eksperto, … mapasalamaton ko nga akong gisugdan ang tibuok kinabuhi nga pamatasan sa pagbasa [sa mga kasulatan]. Imposible nga makat-on sa mga leksiyon nga gilangkoban sa mga kasulatan pinaagi sa pagbasa niini kausa lang o pagtuon sa pinili nga mga bersikulo sa klase. (Julie B. Beck, “Ang Akong Kalag Nalipay sa mga Kasulatan,” Liahona, Mayo 2004, 107)

• Unsa ang inyong nakit-an?

Ikonsiderar ang pagpakita sa mosunod nga ebalwasyon sa kaugalingon sa pagtuon sa kasulatan aron ang mga estudyante makakompleto niini nga sila ra.

Ikonsiderar kon unsay imong gibati mahitungod sa imong pagtuon sa mga kasulatan.

Handout: “Ebalwasyon sa Pagtuon sa Kasulatan”

Manwal sa Magtutudlo sa Basahon ni Mormon (2024)—“Pagtuon sa mga Kasulatan”

Gradohi ang imong kaugalingon sa mosunod nga mga pahayag sa sukdanan gikan sa 1 hangtod sa 5 (1 maoy ubos ug 5 maoy taas):

• Ang pagtuon sa mga kasulatan kada adlaw maoy prayoridad nako.

• Nakahibalo ko ug naggamit sa mga kahanas sa pagtuon sa kasulatan (pag-ampo, pagpamalandong, mga footnote, mubo nga mga sulat, ug uban pa) nga nakatabang nako nga mas makasabot sa mga kasulatan.

• Nakasabot ko sa unsay akong nabasa diha sa mga kasulatan.

• Ang pagtuon sa mga kasulatan nakatabang nako nga mobati nga mas duol kang Jesukristo.

Ang mga estudyante mahimong dapiton sa pagpaambit og mga hagit nga ilang giatubang kalabot sa makahuluganon nga inadlaw nga pagtuon sa kasulatan. Ikonsiderar ang pagdapit sa mga estudyante sa pagpaambit sa posible nga mga solusyon sa mga hagit. Tabangi ang mga estudyante nga makasabot nga bisag hain pa sila sa ebalwasyon, mahimo silang molambo sa ilang abilidad sa pagdawat og mga panalangin sa pagtuon sa kasulatan.

© 2023 by Intellectual Reserve, Inc.All rights reserved.

Mga panalangin sa pagtuon sa mga kasulatan

Basaha ang mosunod nga mga bersikulo, nga mangita sa mga panalangin nga moabot gikan sa pagtuon sa mga kasulatan.

Ang mga estudyante mahimong dapiton sa pagsulat sa lain-laing mga panalangin sa pagtuon sa kasulatan diha sa pisara. Samtang nagsulat sila, dapita sila sa pagbutang usab og tsek nga marka tupad sa bisan unsang mga panalangin nga ilang nadawat.

• 1 Nephi 15:24

• 2 Nephi 32:3

• Mosiah 1:3–5

• Alma 17:2–3

• Alma 37:8–9

• Unsa nga mga kamatuoran nga may kalabotan sa pagtuon sa kasulatan ang imong mailhan gikan niini nga mga bersikulo?

Ang mga estudyante mahimong makaila sa mga kamatuoran sama sa kon kita mopatalinghog ug hugot nga mogunit sa pulong sa Dios, Siya mopanalangin kanato nga makasugakod sa tentasyon ug kadautan (tan-awa 1 Nephi 15:24); Si Jesukristo motabang kanato nga mahibalo unsay buhaton sa atong mga kinabuhi samtang kita magbusog sa Iyang mga pulong (tan-awa 2 Nephi 32:3); ug ang pagtuon sa mga kasulatan makatabang nako nga makahibalo ug magmaya diha ni Jesukristo (tan-awa Alma 37:9).

• Hain niini nga mga kamatuoran o mga panalangin ang imong nasinati?

Para sa dugang nga mga panalangin nga moabot gikan sa pagtuon sa kasulatan, tan-awa ang “Komentaryo ug Background nga Impormasyon.”

Unsaon nako nga mas makat-on pa gikan sa pagtuon sa kasulatan?

Ang mosunod nga pangutana mahimong hisgotan sa mga estudyante diha sa gagmay nga mga grupo o mga pares. Ikonsiderar ang pagdapit sa mga estudyante sa pagpaambit sa ilang mga panlantaw. Mahimo nimong hangyoon ang mga estudyante sa pagpaambit og dugang nga mga detalye mahitungod sa ilang mga tubag, sama sa giunsa, kanus-a, o nganong gigamit nila kana nga pamatasan.

• Unsa ang makatabang sa usa ka tawo nga makakuha pa og dugang gikan sa iyang pagtuon sa kasulatan?

Basaha ang mosunod nga pamahayag ni Elder D. Todd Christofferson sa Korum sa Napulog Duha ka Apostoles ug pangitaa ang dugang nga mga kahanas nga makatabang sa pagtuon sa kasulatan nga mahimong mas epektibo.

Maayo man na nga usahay mobasa og basahon sa kasulatan sulod sa gitakda nga oras aron makuha ang kinatibuk-ang kahulugan sa mensahe niini, pero sa pagkakabig, kinahanglan mas hatagan nimo og gibug-aton ang kadugayon sa panahon nga imong gigahin sa mga kasulatan kay sa kadugayon nga nagbasa ka nianang panahona. Makita ko kamo usahay nga nagbasa og pipila ka mga bersikulo, mihunong sa pagpamalandong niini, mainampingon nga nagbasa sa mga bersikulo pag-usab, ug samtang kamo naghunahuna mahitungod sa unsay gipasabot niini, nag-ampo alang sa pagsabot, nagpangutana sa inyong hunahuna, naghulat sa espirituhanong mga impresyon, ug nagsulat sa mga impresyon ug mga panabot nga moabot aron ikaw makahinumdom ug makakat-on pa. Sa pagtuon niining paagiha, mahimong dili daghan ang imong mabasa nga mga kapitulo o mga bersikulo sulod sa tunga sa oras, pero makahatag ka og luna sa imong kasingkasing para sa pulong sa Dios, ug Siya makigsulti nganha kanimo. (D. Todd Christofferson, “Kon Makabig na Kamo,” Liahona, Mayo 2004, 11)

• Unsa ang imong nakita niini nga mga ideya nga makapanalangin sa imong kasinatian sa pagtuon sa kasulatan?

Ang mga estudyante mahimong makadugang pa og mga panabot sa pisara nga wala pa masulat.

Dugang sa kahanas sa pagtuon sa kasulatan nga mosunod, daghang mga ideya sa kahanas ang gihatag diha sa “Dugang nga mga Kalihokan sa Pagkat-on” sa ubos nga seksiyon nga mahimong gamiton.

Mahimo nimong dapiton ang mga estudyante sa pagbuhat sa mosunod nga kalihokan sa hilom nga paagi nga sila ra. Dayon bahina sila ngadto sa gagmay nga mga grupo o pares aron ipaambit kon unsa ang ilang nakat-onan.

Gamita ang sunod nga 5 o 10 ka minuto sa pagsulay sa paggamit sa mga sugyot nga gihatag ni Elder Christofferson. Paggahin og panahon sa pagpamalandong, pagbasa pag-usab, pag-ampo, pagpangutana, ug pagsulat og mga impresyon. Ania ang pipila ka posible nga mga tudling sa kasulatan nga mahimo nimong gamiton (batia nga gawasnon sa pagpili og lain-laing mga tudling sa Basahon ni Mormon).

Mosiah 3; Alma 32; 3 Nephi 11

Human ang mga estudyante nakagahin na og panahon sa pagtuon, dapita sila sa pagpaambit kabahin sa ilang kasinatian. Ang mosunod nga mga pangutana mahimong makatabang.

• Unsa ang imong kasinatian sa pagtuon sa mga kasulatan niining paagiha?

• Sa unsang paagi nga ang pagtuon niini nga pamaagi makaimpluwensiya sa imong personal nga pagtuon sa kasulatan?

Paghimo og tumong sa pagtuon sa kasulatan

Usa sa mga katuyoan sa seminary mao ang pagtabang kanimo nga maduol kang Jesukristo pinaagi sa inadlaw nga pagtuon sa mga kasulatan. Aron matabangan ka, adunay gikinahanglan nga kredito sa seminary sa pagbasa sa kasamtangang basahon sa kasulatan karong tuiga labing menos 75 porsiyento sa mga adlaw sa kalendaryo sa semester.

Tinguhaa ang inspirasyon pinaagi sa Espiritu Santo sa paghimo og personal nga tumong sa pagtuon. Sa pagtabang, sugdi pinaagi sa paghalad og pag-ampo sa pagpangita og inspirasyon gikan sa Langitnong Amahan. Hunahunaa ang mosunod nga mga pangutana samtang maghimo ka og tumong:

• Kanus-a ug asa ko makatuon sa akong mga kasulatan kada adlaw?

• Pila ka oras kada adlaw ako magtuon?

• Unsa ang akong mahimo aron mas hingpit nga madapit ang Espiritu Santo sa akong kasinatian sa pagtuon sa kasulatan?

Komentaryo ug Background nga Impormasyon

Unsa ang dugang nga mga panalangin ang moabot gikan sa pagtuon sa kasulatan?

Si Elder D. Todd Christofferson sa Korum sa Napulog Duha ka Apostoles mitudlo:

Sa kataposan, ang sentrong katuyoan sa tanang kasulatan mao ang pagbusog sa atong mga kalag uban sa hugot nga pagtuo diha sa Dios nga Amahan ug sa Iyang Anak, si Jesukristo. (D. Todd Christofferson, “Ang Panalangin sa Kasulatan,” Liahona, Mayo 2010, 34)

Si Presidente Russell M. Nelson mitudlo:

Inadlaw nga pagbasa sa pulong sa Dios importante alang sa espirituhanong kaluwasan, ilabi na niining panahon sa nagkagrabe nga kaguliyang. Samtang kita magbusog sa mga pulong ni Kristo matag adlaw, ang mga pulong ni Kristo mosulti nato unsaon sa pagtubag sa mga kalisod nga wala nato mahunahunai nga atong atubangon. (Russell M. Nelson, “Paminaw Kaniya,” Liahona, Mayo 2020, 90)

Dugang nga mga Kalihokan sa Pagkat-on

Pag-apil sa pag-ampo sa pagtuon sa kasulatan

Tabangi ang mga estudyante nga makasabot sa lain-laing mga pamaagi nga magamit ang pag-ampo aron mapalambo ang pagtuon sa kasulatan. Ikonsiderar ang pagpangutana sa mosunod:

• Unsa ang imong iampo sa sinugdanan ug atol sa pagtuon sa kasulatan?

Ikonsiderar ang pagpaambit sa mosunod nga pamahayag ni Presidente Howard W. Hunter (1907–95): “Wala nay mas makatabang pa kaysa pag-ampo aron maablihan ang atong pagsabot sa mga kasulatan. Pinaagi sa pag-ampo atong mapahiangay ang atong mga hunahuna sa pagpangita sa mga tubag sa atong mga pagpangita” (“Reading the Scriptures,” Ensign, Nob. 1979, 64).

Pagpamalandong

Mahimo nimong tabangan ang mga estudyante nga makasabot nga ang pagpamalandong sa pulong sa Dios mahimong mosangpot sa personal nga pagpadayag. Ang mosunod nga mga tudling makatabang sa pagpakita niini nga kamatuoran: 1 Nephi 11:1; Helaman 10:2–3; Doktrina ug mga Pakigsaad 76:19; Doktrina ug mga Pakigsaad 138:1, 11. Ikonsiderar kini nga mga pangutana sa panaghisgotanay:

• Ngano sa imong hunahuna nga ang pagpamalandong mahimong mosangpot sa personal nga pagpadayag?

• Unsa kaha ang mapamalandongan sa usa ka tawo samtang nagtuon sa mga kasulatan?

• Unsaon nimo pagtugot niini nga kahanas nga mas hingpit nga makapanalangin sa imong pagtuon?

Pagpangita og mga baroganan

Ang pagtabang sa mga estudyante sa pag-ila sa mga baroganan makatabang sa pagpalambo sa ilang pagtuon sa kasulatan. Mahimo nimong ipaambit kini nga pamahayag sa mga estudyante aron matabangan sila nga makahibalo unsa ang mga baroganan.

Si Elder Richard G. Scott (1928–2015) sa Korum sa Napulog Duha ka Apostoles miingon: “Ang mga baroganan mao ang gihiusa nga kamatuoran, gituyo alang sa paggamit sa halapad og nagkadaiyang mga kahimtang. Ang tinuod nga baroganan naghimo sa mga desisyon nga klaro bisan pa ubos sa labing makalibog ug mapugsanong mga kahimtang” (“Acquiring Spiritual Knowledge,” Ensign, Nob.1993, 86).

Paggamit sa mga footnote

Usa ka paagi nga ang mga estudyante makabaton og makapabayaw nga pagtuon sa kasulatan mao ang paggamit sa mga footnote. Naglangkob kini og mga pakisayran sa ubang mga bersikulo o dugang nga mga himan aron matabangan ang mga estudyante nga mas makasabot sa ilang gibasa.

Ikonsiderar ang paghatag sa mga estudyante og kahigayonan sa pagpraktis pinaagi sa pagpakita og ehemplo diin ang mga footnote nakatabang sa pagpalawom sa pagsabot.