Pasiunang mga Materyal

Kinatibuk-ang Pagpasabot

Karong tuiga sa seminary, imong tun-an ang Basahon ni Mormon. Kini nga mga leksiyon makatabang nimo nga mas makasabot sa kaimportante sa plano sa Langitnong Amahan ug mapalambo ang imong abilidad sa pagtuon sa mga kasulatan kada adlaw. Ikaw usab makakat-on unsaon sa pag-ila sa mahinungdanong mga tahas sa Espiritu Santo, unsaon paglihok diha sa hugot nga pagtuo kang Jesukristo samtang ikaw nangita og mga tubag sa imong mga pangutana, ug unsaon pagpahimulos sa labing maayo ang imong kasinatian sa seminary.

Pangandam sa Pagtudlo

Ang mosunod nga impormasyon maghatag sa mga magtutudlo og mga ideya kon unsa ang kinahanglang andamon daan para sa kada leksiyon. Pahinumdom: Pipila o tanan sa mosunod nga mga leksiyon mamahimong itudlo sa sinugdanan sa tuig sa pagtungha o sa laing panahon nga makabenepisyo sa mga estudyante.

Ang Plano sa Kaluwasan

Katuyoan sa Leksiyon: Kini nga leksiyon makatabang sa mga estudyante nga makasabot ug mobati sa kamahinungdanon sa plano sa Langitnong Amahan.

• Pagpangandam sa estudyante: Dapita ang mga estudyante sa paghunahuna og usa ka butang nga ilang gibati nga dili sila mabuhi kon wala ug sa pagpangandam sa pagpasabot kon ngano. Mahimo usab nila kining dad-on o usa ka hulagway niini sa klase, kon angay.

• Hilisgotan nga ipakita: Ang mga pangutana nga gitubag sa Basahon ni Mormon (gilista sa pisara, gisulat sa mga piraso sa papel ug gibutang sa mga bongbong, o gipakita sa laing paagi)

• Sugyot sa pagtudlo pinaagi sa videoconference: Ipakita ang mga pangutana nga gitubag sa Basahon ni Mormon. Dapita ang mga estudyante sa pagpakita kon unsa nga pangutana ang labing interesado nilang makat-onan. Paghimo og breakout nga mga room alang sa matag usa sa mga pangutana aron ang mga estudyante makahisgot kon unsay ilang nakat-onan, ug paghatag og limitado nga oras. Kon nahuman na ang oras, taposa ang mga breakout nga mga room aron mahisgotan sa mga estudyante diha sa klase ang ilang nakat-onan.

Pagtuon sa mga Kasulatan

Katuyoan sa Leksiyon: Ang katuyoan niini nga leksiyon mao ang pagpalambo sa tinguha ug abilidad sa mga estudyante sa pagtuon sa mga kasulatan kada adlaw ug madawat ang gisaad nga mga panalangin nga nag-uban sa pagtuon sa kasulatan.

• Pagpangandam sa estudyante: Ihatag sa mga estudyante ang handout nga “Ebalwasyon sa Pagtuon sa Kasulatan” gikan niini nga leksiyon aron dad-on sa balay ug tubagan. Ikonsiderar ang pagdapit sa mga estudyante sa paghangyo sa mga sakop sa pamilya sa pagtubag usab sa mga pangutana ug sa paghisgot sa ilang mga tubag.

• Handout: “Ebalwasyon sa Pagtuon sa Kasulatan”

Pagkat-on pinaagi sa Espiritu

Katuyoan sa leksiyon: Kini nga leksiyon makatabang sa mga estudyante sa pag-ila sa mahinungdanong mga tahas sa Espiritu Santo, nga importante alang sa ilang espirituhanong pagtubo ug pag-uswag.

• Pagpangandam sa estudyante: Dapita ang mga estudyante sa paghunahuna og mga kasinatian diin ilang gibati ang impluwensiya sa Espiritu Santo. Dasiga sila sa pagtutok sa mga hunahuna, mga pagbati, o mga impresyon nga nahiuban sa mga kasinatian ug sa pagtambong sa klase nga andam nga mopaambit.

• Imahe o butang: Mga hulagway sa lain-laing matang sa mga himan sa komunikasyon, lakip ang usa ka smartphone

Pagkat-on pinaagi sa Hugot nga Pagtuo kang Jesukristo

Katuyoan sa leksiyon: Kini nga leksiyon makatabang sa mga estudyante nga makapahimulos pag-ayo sa ilang kasinatian sa seminary pinaagi sa pagsabot kon unsay buot ipasabot sa pagkat-on og hugot nga pagtuo diha kang Jesukristo.

• Pagpangandam sa estudyante: Dapita ang mga estudyante sa pagbasa sa parapo 1–2 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022) ug pagpangandam nga mopaambit unsa ang atong mabuhat aron makat-on og espirituhanong mga kamaturoan.

• Mga bidyo: “Usa ka Talagsaong Balaanon nga Tawag” (11:25; tan-awa gikan sa time code 2:16 hangtod 3:49)

• Hilisgotan nga ipakita: Ang pamahayag ni Presidente Russell M. Nelson sa sinugdanan sa leksiyon; usa ka hulagway sa estudyante sa seminary

• Sugyot sa pagtudlo pinaagi sa videoconference: Kon mahimo, ikonsiderar ang pagdapit og usa o duha ka mga estudyante nga bag-o lang migradwar sa seminary sa pagtambong sa videoconference ug sa pagpaambit kon unsay nakatabang nila nga makat-on sa ebanghelyo diha sa seminary. Mahimo usab nila nga ipaambit ang unsa unta ang gusto nilang usbon sa paagi nga ilang nahimo o nahibal-an diha sa una nilang pagsugod sa ilang kasinatian sa seminary.

Pag-angkon og Espirituhanong Kahibalo, Bahin 1

Katuyoan sa leksiyon: Kini nga leksiyon makatabang sa mga estudyante nga molihok diha sa hugot nga pagtuo kang Jesukristo samtang mangita sila og mga tubag sa mga pangutana ug mga kabalaka sa ilang kinabuhi.

• Pagpangandam sa estudyante: Dapita ang mga estudyante sa pagpangutana sa usa ka miyembro sa pamilya o lider sa Simbahan kinsa nagpakita og dakong hugot nga pagtuo kang Jesukristo kon unsay iyang gibuhat aron magpabiling lig-on kon mag-atubang og mga pangutana o mga kabalaka mahitungod sa ebanghelyo.

• Hilisgotan nga ipakita: Ang mga pakisayran ug mga kasumahan [summaries] gikan sa 1 Nephi alang sa pakisayran sa estudyante atol sa kalihokan sa pagtuon

• Sugyot sa pagtudlo pinaagi sa videoconference: Ikonsiderar ang pagdapit sa mga estudyante sa pagbotar sa dayag nga paagi sa matag posibleng tubag sa pangutana nga “Unsa kaha ang ipasabot niini kon adunay usa ka tawo nga adunay mga pangutana mahitungod sa ebanghelyo o sa Simbahan ni Jesukristo?” Pananglitan, mahimo nilang palungon ang ilang mga camera kon sa ilang hunahuna ang tubag tingale eksakto ug ipadayon ang ilang mga camera nga naka-on kon dili. Hunong human sa matag opsiyon aron sa pagpangutana sa pipila ka mga estudyante nganong mibotar sila sa paagi nga ilang gibuhat. Tabangi sila nga makasabot nga bisan unsa sa mga tubag mahimong eksakto o dili eksakto depende sa mga tinguha ug mga pagpili sa usa ka tawo.