Ngaahi Naunau Fakafeʻiloakí

Ko e Ako ʻi he Tuí

Ko e Fatongia ʻo e Tokotaha Akó

ʻOku ʻofa ʻa e Tamai Hēvaní mo Sīsū Kalaisi ʻiate koe pea ʻokú Na fie akoʻi kiate koe ʻa e ongoongoleleí ʻi he mālohi ʻo e Laumālie Māʻoniʻoní. Ko e hā te ke lava ʻo fai ke maʻu lahi ange ai ʻa e meʻa ʻokú Na finangalo ke akoʻi atu kiate koé? ʻE lava ke tokoniʻi koe ʻe he lēsoni ko ʻení ke ke ako lahi ange mei hoʻo aʻusia ʻi he seminelí ʻaki haʻo maʻu ha mahino ki he ʻuhinga ʻo e ako ʻi he tui kia Sīsū Kalaisí.

Kau mālohi ʻi he ako fakalaumālié. ʻOku fiemaʻu ke ngāue maʻu pē ʻa e tokotaha akó ʻi hono ako ʻo e ongoongoleleí ʻa ia ʻokú ne ohi hake ʻa e uluí. Tokoniʻi hoʻo kau akó ke nau vakai ki he mahuʻinga ʻo e ngāue mālohi ʻi he founga faiakoʻí mo e akó.

Teuteu ʻa e tokotaha akó: Fakaafeʻi e kau akó ke nau lau e palakalafi 1–2 ʻi he konga “Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Taukei Fakatokāteliné (2022) pea teuteu ke vahevahe e meʻa te tau lava ʻo fai ke ako ai e ngaahi moʻoni fakalaumālié.

Ngaahi ʻEkitivitī Ako ʻOku Ala Fakahokó

ʻOku hoifua ʻa e ʻEikí ki he ngāué

Fakakaukau ke hiki ʻa e lea ko ʻení ʻi he palakipoé ke maʻu e fakamoʻoni fakafolofola maʻá e kau akó. Mahalo te ke fiemaʻu ke mamataʻi ʻe he kau akó ʻa e foʻi vitiō “Ko ha Uiuiʻi Fakaʻeiʻeiki Makehe,” ʻoku maʻu ʻi he ChurchofJesusChrist.org, mei he taimi 2:16–3:49 pe ʻai ke nau lau ʻa e fakamatala ʻi laló.

Naʻe akoʻi ʻe Palesiteni Lāsolo M. Nalesoni:

ʻOku hōifua e ʻEikí ki he ngāué koeʻuhi ʻoku ʻomi ʻe he ngāué ʻa e ngaahi pale ʻe ʻikai lava ʻo maʻu ka ne taʻeʻoua ia. (Russell M. Nelson, ʻi he Joy D. Jones, “Ko ha Uiuiʻi Fakaʻeiʻeiki Makehe,” Liahona,, Mē 2020, 16)

• Te tau fakaʻaongaʻi fēfē ʻa e lea ʻa Palesiteni Nalesoní ʻi heʻetau moʻuí? Hangē ko ʻení, ʻe ʻaonga fēfē nai ia ki he ngāue fakafaifekaú, ngāue fakaetauhí, pe akó?

• ʻOkú ke pehē ʻe lava fēfē ke fakaʻaongaʻi ia ʻi hono ako e ongoongolelei ʻo Sīsū Kalaisí ʻi he seminelí he taʻu ní?

Fakakaukau ke fakaʻaliʻali ‘a e ngaahi palakalafi mo e ngaahi fehuʻi ko ʻení ki he kau akó ke nau siviʻi fakafoʻituitui kinautolu.

Fakakaukau ki he ngaahi fehuʻi ko ʻení ke tokoni atu ʻi hoʻo fakafuofuaʻi hoʻo ako e ongoongoleleí:

• Ko e hā ha ngaahi ngāue ʻokú ke lolotonga fai ke ako e ongoongolelei ʻo Sīsū Kalaisí? Kuó ke fakaafeʻi fēfē ʻa e ʻOtuá ke ne akoʻi koé?

• ʻOkú ke ongoʻi nai ʻokú ke maʻu e ngaahi ola ʻokú ke fiemaʻú? Ko e hā hono ʻuhinga?

ʻI hoʻo ako e lēsoni ko ʻení, fakakaukau ki he ngaahi founga ʻokú ke fie ako mo tupulaki ai he taʻú ni ʻi he seminelí. Fekumi ki he fakahinohino ʻa e Tamai Hēvaní ʻo fakafou ʻi he Laumālie Māʻoniʻoní ke tokoni atu ke ke ʻiloʻi e founga ke fakaʻaongaʻi ai e lēsoni ko ʻení ʻi hoʻo moʻuí.

Ngaahi Ako ki he Tohi ʻa Molomoná

Lau ha potufolofola taukei fakatokāteline ʻe ua pe lahi ange, ʻo kumi ki he founga ʻoku fakahoko ai ʻe heʻetau ngaahi ngāué mo e holí ha fatongia pea mo e founga ʻoku fakahoko ai ʻe he ʻOtuá ha fatongia ʻi heʻetau ako e ongoongoleleí.

ʻE lava ke ngāue ʻa e kau akó ʻi ha fanga kiʻi kulupu iiki, pea lau ʻe he tokotaha ako takitaha ha potufolofola kehe pea vahevahe ʻa e meʻa ne nau akó mo ʻenau kulupú.

Fakakaukau ke hiki e ngaahi ʻuluʻi tohi “Ko ʻEtau Ngāué” mo e “Fatongia ʻo e ʻOtuá” ʻi he palakipoé pea fakaafeʻi e kau akó ke hiki e meʻa ʻoku nau ʻiló ʻi lalo he ʻuluʻi tohi totonú. Poupouʻi ke nau vahevahe mo e kalasí ʻa e fakaikiiki ‘o e meʻa ʻoku nau hikí.

• 2 Nīfai 28:30

• 2 Nīfai 32:3

• 2 Nīfai 32:8–9

• ʻEta 12:6

• Molonai 10:4–5

• Ko e hā naʻá ke maʻu ʻe lava ʻo tokoni atu ke ke ako lahi ange mei he ʻOtuá lolotonga e seminelí?

• ʻOkú ke pehē ko e hā ha ola kapau naʻe ʻamanaki ha taha ʻe foaki ange ʻe he ʻOtuá ha ʻilo kiate ia ka naʻe ʻikai ke ne feinga? Pe kapau naʻá ne feinga ka naʻe ʻikai ke ne fekumi ki he tokoni ʻa e ʻOtuá? Ko e hā hono ʻuhingá?

Fakatefito ʻi he meʻa kuó ke ako he ʻaho ní, fakamatalaʻi fakanounou ʻi ha sētesi pē ʻe taha ʻa e meʻa ʻoku mahino kiate koe fekauʻaki mo hono ako ʻo e ongoongoleleí.

Fakakaukau ke fakaafeʻi ‘a e kau akó ke vahevahe ʻenau sētesi fakamatala fakanounoú mo e kalasí. ʻE lava ke ʻilo ʻe he kau akó ha ngaahi moʻoni kehekehe ʻo hangē ko ʻení:

• ʻE akoʻi kitautolu ʻe he ʻOtuá mei he laine ki he laine kapau ʻoku tau holi ke ako meiate Ia.

• Kuo pau ke tau loto vēkeveke ke ako mo lotu ʻi he tui kia Sīsū Kalaisi ʻo kapau ʻoku tau holi ke ʻilo ʻa e moʻoní.

Fakamālō ki he kau akó ʻi heʻenau ngaahi fakamatalá, pea fakapapauʻi ange ko e meʻa ne nau vahevahé ʻoku tokoni ia ki he ako ʻa e tokotaha kotoa pē. ʻE lava ke tokoni ʻeni ke fakaʻaiʻai e kau ako kehé ke nau vahevahe mo fakatupu ha ʻātakai ʻo e kau fakataha.

 

     

Lau ʻa e lea ko ʻeni ʻa Palesiteni Lāsolo M. Nalesoní, ʻo kumi ki he meʻa ʻe tokoni ke fakapapauʻi pe ʻe liliu hoʻo moʻuí ʻe he seminelí.

Ko e lahi ange hoʻo muimui ki he sīpinga ʻa Sīsū Kalaisí, ko e lahi ange ia hoʻo lavameʻá.

Ko e hā leva te ne tokoniʻi koe ke ke hoko ko ha ākonga faivelenga pehē ʻa Sīsū Kalaisí? Ko e taha ʻo e ngaahi talí ko e seminelí mo e ʻinisititiutí—ʻo ʻikai ko e maʻu kalasí pē ka ko e kau faivelenga ki he kalasí mo muimui faivelenga ʻi ha faʻahinga ngāue pē ne vahe atu. …

ʻE hoko ʻa e ʻosi mei he seminelí mo e ʻinisititiutí ke fakalahi ai hoʻo malava ke lavameʻa ʻi he ngaahi meʻa mahuʻinga taha te ke fakahoko ʻi hoʻo moʻuí. ʻE ʻoʻou ʻa e fiefia moʻoní! (Russell M. Nelson, “A Personal Invitation to Participate in Seminary and Institute,” Feb. 2019, ChurchofJesusChrist.org)

• Ko e hā ha meʻa naʻe makehe kiate koe mei he fakamatala ʻa Palesiteni Nalesoní? Ko e hā hono ʻuhingá?

• Te ke tokanga fēfē ki he muimui kia Sīsū Kalaisí lolotonga hoʻo aʻusia ʻi he seminelí?

• ʻOkú ke pehē ʻoku ʻuhinga ki he hā ʻa e “kau mālohi” ʻi he seminelí?

Fakaafeʻi e kau akó ke nau aleaʻi ha ngaahi founga pau ke kau mālohi pe longomoʻui atu ai ki he seminelí. Tokoni ke mahino kiate kinautolu ʻe lava ʻe he kau ako ʻoku kehekehe honau ʻulungāngá mo e ngaahi tūkunga moʻuí ke nau kau mālohi ʻi ha ngaahi founga kehekehe. Hangē ko ʻení, ʻe anga fēfē nai ha kau mai ha tokotaha ako ‘oku mā mo ha tokotaha ako ʻoku anga fakakaumeʻa ʻi heʻena founga pē ʻanaua?

Founga ke ako lahi taha ai mei he seminelí

ʻI he ʻekitivitī ko ʻení, fakakaukau ke fakaʻaliʻali ʻa e fakatātā ko ʻení pe ko ha fakatātā ʻe taha ʻo ha talavou ʻi he seminelí. Fakaafeʻi e kau akó ke nau ʻai ke ongo moʻoni ange ʻa e tūkungá ʻaki hono ʻoange ki he talavoú ha hingoa mo fakamatalaʻi hono ʻulungāngá, puipuituʻa ʻi he ongoongoleleí, ongo ʻokú ne maʻu ki he seminelí, mo e ngaahi meʻa peheé. Fakaafeʻi leva e kau akó ke hiki ʻi heʻenau tohinoa akó ʻa e faleʻi te nau fai ki he talavou ko ʻení kimuʻa pea vahevahe ʻenau faleʻí mo e kalasí.

Fakakaukauloto ko e fuofua taimi ʻeni ke ʻalu ai ʻa e talavou ʻi he fakatātā ko ʻení ki he seminelí. ʻOkú ne fie ako mo tupulaki fakalaumālie ka ʻoku ʻikai ke ne fakapapauʻi ʻa e founga ke fakahoko ai iá. Lekooti ʻa e faleʻi te ke ʻoange kiate iá ʻo makatuʻunga ʻi he meʻa kuó ke ako he ʻaho ní mo e meʻa kuó ke aʻusia he kuohilí ʻi he seminelí mo e lotú.

Fakapapauʻi ke fakakau atu ‘a e

• meʻa te ne lava ʻo fai kimuʻa, lolotonga, mo e hili ʻa e kalasí ke fakatupulaki ʻene ako fakalaumālié

• founga te ne lava ai ʻo tokanga taha ki he muimui ki he Fakamoʻuí mo fakaafeʻi e Laumālie Māʻoniʻoní ke akoʻi iá

• ngaahi ngāue pe tōʻonga te ne ʻai ke faingofua pe faingataʻa ange ʻa e ako fakalaumālié, kiate ia mo e niʻihi kehe ʻi he kalasí fakatouʻosi

ʻI hono vahevahe ʻe he kau akó ʻenau faleʻí, fakakaukau ke tokoniʻi kinautolu ke nau vakai ki he mahuʻinga ʻo hono teuteuʻi honau lotó mo e ʻatamaí ke ako kimuʻa he kalasí. Te ke lava ʻo tokoni ke fai ʻeni ʻe he kau akó ʻaki hano ʻoange ha ngaahi fakaafe kiate kinautolu ke nau teuteu ʻo fakaʻaongaʻi ha niʻihi ʻo e ngaahi fokotuʻu ki he “Teuteu ʻa e Tokotaha Akó” ʻa ia ʻoku maʻu ʻi ʻolunga ʻi he lēsoni takitaha. Tokoniʻi foki kinautolu ke nau sio ki he mahuʻinga ʻo hono ngāueʻi e ngaahi moʻoni ʻoku nau akó hili ʻenau mavahe mei he kalasí.

Fokotuʻu ha taumuʻa ke ako ki he lahi tahá mei hoʻo aʻusia ʻi he seminelí he taʻu ní. Ke fai ʻení, te ke lava ʻo tali ʻa e ngaahi fehuʻi ko ʻení:

• Ko e hā ʻa e meʻa ʻokú ke fakaʻamu ke ke maʻu pe ako mei he seminelí he taʻu ní?

• Ko e hā ʻokú ke loto fiemālie ke fai ke fakahaaʻi ki he ʻEikí ʻokú ke fie ako meiate Ia pea hoko ʻo hangē ko Iá?

Fakamatala Fakamahinó mo e Puipuituʻá

Ko e hā te u lava ʻo fai ke maʻu mo manatuʻi ai e meʻa ʻoku finangalo e Tamai Hēvaní ke akoʻi maí?

Naʻe akonaki ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Hiki ʻi ha potu malu ʻa e ngaahi meʻa mahuʻinga kuó ke ʻilo pe ako mei he Laumālié. Te ke fakatokangaʻi ko e taimi ʻokú ke lekooti ai ha ngaahi fakakaukau mahuʻinga, ʻe faʻa hoko mai mo ha ngaahi fakakaukau kehe naʻe ʻikai ke ke mei maʻu ia. Pea ko e ʻilo foki te ke maʻú, te ke maʻu ia ʻi he kotoa hoʻo moʻuí. Feinga maʻu pē, ʻi he ʻahó pe poʻulí, ʻi ha feituʻu pē ʻokú ke ʻi ai, pe ko e hā pē meʻa ʻokú ke faí, ke ke ʻiloʻi pea tali ki he fakahinohino ʻa e Laumālié. Maʻu ha laʻipepa pe kaati kuo maau ke lekooti ai e faʻahinga fakahinohino peheé.

Fakahaaʻi hoʻo houngaʻia ki he ʻEikí ʻi he tataki fakalaumālie ʻokú ke maʻu mo talangofua ki aí. ʻE fakamālohia ʻe he founga ko ʻení ʻa hoʻo malava ke ako ʻi he Laumālié. Te ne fakatupulaki e tataki ʻa e ʻEikí ʻi hoʻo moʻuí. Te ke ako lahi ange ʻi hoʻo ngāueʻi ʻa e ʻilo, aʻusia, mo e ueʻi fakalaumālie ʻoku ʻoatu ʻe he Laumālie Māʻoniʻoní. (Richard G. Scott, “How to Learn by the Spirit,” New Era, Sept. 2014, 48)

Ko e hā ʻoku mahuʻinga ai ʻeku kau ki he kalasí?

Naʻe akonaki ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e fili ʻa e [tokotaha akó] ke kau atú ko hono fakaʻaongaʻi ia ʻo e mafai fakahoko ʻo e tauʻatāina ke filí ʻa ia ʻokú ne fakaʻatā ʻa e Laumālie Māʻoniʻoní ke ne fakahā mai ha pōpoaki fakatāutaha ʻoku fakataumuʻa ki heʻenau ngaahi fiemaʻu fakafoʻituituí. …

ʻE ‘omi ‘e he‘enau kau ko iá ʻa e fakahinohino ʻa e Laumālié ki he moʻui [ʻa e kau akó]. … ʻOku fakaʻatā ʻe he kau atu ki he lēsoní ke aʻusia ʻe he niʻihi fakafoʻituituí ʻa e tataki ʻa e Laumālié. ʻOku nau ako ai ke ʻiloʻi mo ongoʻi ʻa e tataki fakalaumālié. (Richard G. Scott, “To Learn and to Teach More Effectively” [Brigham Young University Education Week devotional, Aug. 21, 2007], 4–5, speeches.byu.edu)

Naʻe pehē ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku fakataumuʻa ʻa e tui moʻoní ki he ʻEiki ko Sīsū Kalaisí pea ʻoku iku maʻu pē ia ki he ngāué. …

… ʻOku fie maʻu ʻi he ako ʻi he tuí ke ngāue lahi fakalaumālie, fakaʻatamai, mo fakaesino kae ʻikai ko e tali fakafiefiemālie pē. ʻOku fakahaaʻi ʻe he fakamātoato mo e tuʻu ʻaliʻaliaki ʻo ʻetau ngāue ʻi he tui ʻoku fai ki heʻetau Tamai Hēvaní mo Hono ʻAlo ko Sīsū Kalaisí, ʻa ʻetau loto fie ako mo fie tali ʻa e fakahinohino mei he Laumālie Māʻoniʻoní. (David A. Bednar, “Seek Learning by Faith,” Liahona, Sept. 2007, 63–64)

   

Ngaahi ʻEkitivitī Fakalahi ki he Akó

ʻEkitivitī ako fetongitongi he kamataʻangá

Ke kamata e lēsoní, fakakaukau ke fakaafeʻi ha tokotaha ako pe ko e kalasí kotoa ke fai ha meʻa ʻe fiemaʻu ai ha kiʻi ngāue siʻisiʻi ke fakakakato—hangē ko ʻení, feinga’i ke maʻu ha meʻa ʻoku ʻikai malava ke te aʻu ki ai pe fakahoko ha mate tupuʻa pe ha pāsolo ʻe fiemaʻu ki ai ha kiʻi fakakaukau. ʻOange ha kiʻi pale kiate kinautolu ʻoku nau feinga ke fakakakato ʻa e ngāué. Fakaʻaliʻali leva ʻa e lea ʻa Palesiteni Nalesoni fekauʻaki mo e ngāué, ʻa ia ʻoku ʻi he kamataʻanga ʻo e lēsoní.

Fakamatala ki he ʻElito ʻo e Taukei Fakatokāteliné

Fakaafeʻi e kau akó ke lau ʻa e palakalafi 1–2 ʻi he konga “Maʻu ʻo e ʻIlo Fakalaumālié” ‘o e Fakamatala ki he ʻElito ʻo e Fakataukei Fakatokāteliné (2022). Kole ange ke nau fakaʻilongaʻi ʻa e foʻi lea pe kupuʻi lea takitaha ʻokú ne fakamatalaʻi ʻa e meʻa ʻoku fiemaʻu ke tau ako fakalaumālié. Kole ange leva ke nau fakaʻilongaʻi ʻi ha founga kehe ʻa e foʻi lea pe kupuʻi lea takitaha ʻokú ne fakamatalaʻi ʻa e fatongia ʻo e ʻOtuá ʻi heʻetau akó.

ʻEkitivitī ako fetongitongi ki he fakaʻosí

Fakaafeʻi e kau akó ke nau fai ha tohi kiate kinautolu pē, faʻo ia ʻi ha sila kuo ʻosi silaʻi, pea tānaki mai. Talaange he ʻikai lau ʻa e tohí ka ʻe toe fakafoki atu ia kiate kinautolu ʻamui ange ʻi he semesitā ko ʻení ke tokoni ke nau vakaiʻi ʻenau fakalakalaká. Fakaafeʻi kinautolu ke fakakau ʻi he tohí ʻa e meʻa ʻoku nau ʻamanaki ke ako mo ongoʻi ʻi he seminelí pea mo e meʻa ʻoku nau loto fiemālie ke fai kimuʻa, lolotonga, mo e hili ʻa e kalasí ke fakahaaʻi ki he ʻOtuá ʻoku nau fie ako meiate Ia pea hoko ʻo hangē ko Iá.