Ngaahi Naunau Fakafeʻiloakí

Vakai Fakalūkufuá

Te ke ako ʻa e Tohi ʻa Molomoná he taʻú ni ʻi he seminelí. ʻE tokoni ʻa e ngaahi lēsoni ko ʻení ke mahino lelei ange kiate koe ʻa e mahuʻinga ʻo e palani ʻa e Tamai Hēvaní mo fakalakalaka hoʻo malava ke ako fakaʻaho ʻa e folofolá. Te ke ako foki e founga ke ʻiloʻi ai e ngaahi fatongia mahuʻinga ʻo e Laumālie Māʻoniʻoní, founga ke ngāue ai ʻi he tui kia Sīsū Kalaisí ʻi hoʻo fekumi ki he tali ki hoʻo ngaahi fehuʻí, mo e founga ke maʻu lahi taha ai mei hoʻo aʻusia ʻi he seminelí.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha. Fakatokangaʻi ange: ʻE lava ke akoʻi ha niʻihi pe kotoa ʻo e ngaahi lēsoni ko ʻení ʻi he kamataʻanga ʻo ha taʻu fakaako pe ʻi ha taimi kehe ʻe ʻaonga ki he kau akó.

Ko e Palani ʻo e Fakamoʻuí

Taumuʻa ʻo e lēsoní: ʻE lava ke tokoni e lēsoni ko ʻení ke mahino mo ongoʻi ʻe he kau akó e mahuʻinga ʻo e palani ʻa e Tamai Hēvaní.

• Teuteu ʻa e tokotaha akó: Fakaafeʻi e kau akó ke nau fakakaukau ki ha meʻa ʻoku nau ongoʻi he ʻikai ke nau lava ʻo moʻui taʻe maʻu ia pea mateuteu ke fakamatalaʻi hono ʻuhingá. Te nau lava foki ʻo ʻomi ia pe ko hano fakatātā ki he kalasí, kapau ʻoku feʻunga.

• Meʻa ke fakaʻaliʻali atú: Ko e ngaahi fehuʻi ʻoku tali ʻe he Tohi ʻa Molomoná (ʻoku hiki ʻi he palakipoé, hiki ʻi ha ngaahi laʻipepa pea fokotuʻu ʻi he ngaahi holisí, pe fakaʻaliʻali ʻi ha founga kehe)

• Fokotuʻu ki he akoʻi ʻi he konifelenisi vitioó: Fakaʻaliʻali e ngaahi fehuʻi ʻoku tali ʻe he Tohi ʻa Molomoná. Fakaafeʻi e kau akó ke nau fakahaaʻi pe ko e fehuʻi fē ʻoku nau mahuʻingaʻia taha ke ako ki aí. Faʻu ha fanga kiʻi loki fakakulupu ki he ngaahi fehuʻi takitaha ke lava e kau akó ʻo aleaʻi ʻa e meʻa ʻoku nau ako fakatahá, pea ʻoange ha taimi fakangatangata. ʻI he ʻosi ʻa e taimí, fakangata ʻa e ngaahi loki fakakulupú ke lava ʻa e kau akó ʻo aleaʻi fakataha mo e kalasí ʻa e meʻa ne nau akó.

Ko Hono Ako ʻo e Ngaahi Folofolá

Taumuʻa ʻo e lēsoní: Ko e taumuʻa ʻo e lēsoni ko ʻení ke fakatupulaki ʻa e vivili mo e malava ʻa e kau akó ke ako fakaʻaho ʻa e folofolá pea maʻu ʻa e ngaahi tāpuaki kuo talaʻofa mai ʻi hono ako ʻo e folofolá.

• Teuteu ʻa e tokotaha akó: ʻOange ki he kau akó ʻa e laʻipepa tufa ki he “Vakaiʻi ʻo e Ako Folofolá” mei he lēsoni ko ʻení ke nau foki mo ia ki ʻapi pea fakafonu. Fakakaukau ke fakaafeʻi e kau akó ke nau kole ki he kau mēmipa ʻo e fāmilí ke nau tali foki mo e ngaahi fehuʻí pea mo aleaʻi fakataha ʻenau ngaahi talí.

• Laʻipepa tufa: “Vakaiʻi ʻo e Ako Folofolá”

Ko e Ako ʻi he Laumālié

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau ʻiloʻi ʻa e ngaahi fatongia mahuʻinga ʻo e Laumālie Māʻoniʻoní, ʻa ia ʻoku mahuʻinga ki heʻenau tupulaki fakalaumālié mo ʻenau fakalakalaká.

• Teuteu ʻa e tokotaha akó: Fakaafeʻi e kau akó ke nau fakakaukau ki ha ngaahi aʻusia ‘a ia ne nau ongoʻi ai e ivi tākiekina ʻo e Laumālie Māʻoniʻoní. Fakalotolahiʻi kinautolu ke nau tokanga taha ki he ngaahi fakakaukau, ngaahi ongo, pe ngaahi fakakaukau naʻe hoko fakataha mo e ngaahi aʻusiá pea haʻu mateuteu ki he kalasí ke vahevahe.

• ʻĪmisí pe ko ha meʻa: Ngaahi ʻīmisi ʻo e faʻahinga kehekehe ʻo e ngaahi meʻangāue fetuʻutakí, kau ai ha telefoni toʻotoʻo fakaonopooni

•  

•  

Ako ‘i he Tui kia Sīsū Kalaisí

Taumuʻa ʻo e lēsoní: ʻE lava ke tokoni ʻa e lēsoni ko ʻení ke maʻu ʻe he kau akó ʻa e lelei tahá mei heʻenau aʻusia ʻi he seminelí ʻaki ʻenau maʻu ha mahino ki he ʻuhinga ʻo e ako ʻi he tui kia Sīsū Kalaisí.

• Teuteu ʻa e tokotaha akó: Fakaafeʻi e kau akó ke nau lau e palakalafi 1–2 ʻi he konga “Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Taukei Fakatokāteliné (2022) pea teuteu ke vahevahe e meʻa te tau lava ʻo fai ke ako ai e ngaahi moʻoni fakalaumālié.

• Ngaahi Vitioó: “Ko ha Uiuiʻi Fakaʻeiʻeiki Makehe” (11:25; kamta sio ʻi he taimi 2:16 ki he 3:49)

• Meʻa ke fakaʻaliʻali atú: Ko e lea ʻa Palesiteni Lāsolo M. Nalesoni ʻi he kamataʻanga ʻo e lēsoní; ko ha ʻīmisi ʻo ha tokotaha ako ʻi he seminelí

• Fokotuʻu ki he ako konifelenisi fakavitioó: Kapau ʻe lava, fakakaukau ke fakaafeʻi ha toko taha pe toko ua ʻo e kau ako ne toki ʻosi mei he seminelí ke kau atu ki he konifelenisi vitioó pea vahevahe e meʻa naʻá ne tokoniʻi kinaua ke ako e ongoongoleleí ʻi he seminelí. ʻE lava foki ke na vahevahe ʻa e meʻa ʻokú na fakaʻamu ne kehe ʻena fakahokó pe ʻiloʻi ʻi he taimi ne na fuofua kamata ai ʻena aʻusia ʻi he seminelí.

Ko Hono Maʻu ʻo e ʻIlo Fakalaumālié, Konga 1

Taumuʻa ʻo e lēsoní: ʻE lava ke tokoniʻi ʻe he lēsoni ko ʻení ʻa e kau akó ke nau ngāue ʻi he tui kia Sīsū Kalaisi ʻi heʻenau fekumi ki he ngaahi tali ki he ngaahi fehuʻi mo e hohaʻa ʻi heʻenau moʻuí.

• Teuteu ʻa e tokotaha akó: Fakaafeʻi e kau akó ke nau ʻeke ki ha mēmipa ʻo e fāmilí pe taki ʻo e Siasí ʻokú ne fakahaaʻi ha tui lahi kia Sīsū Kalaisi pe ko e hā ʻokú ne fai ke kei mālohi ai pē ʻi heʻene fehangahangai mo e ngaahi fehuʻi pe hohaʻa fekauʻaki mo e ongoongoleleí.

•  

• Meʻa ke fakaʻaliʻali atú: Ko e ngaahi fakamoʻoni fakafolofola mo e ngaahi fakamatala nounou mei he 1 Nīfaí ki ha maʻuʻanga tokoni maʻá e kau akó lolotonga e ʻekitivitī akó

• Fokotuʻu ki he akoʻi ʻi he konifelenisi vitioó: Fakakaukau ke fakaafeʻi e kau akó ke nau fili ʻi ha founga mahino e tali takitaha ʻe ala maʻu ki he fehuʻi “ʻOkú ke pehē ʻoku ʻuhinga ki he hā kapau ʻoku ʻi ai ha ngaahi fehuʻi ʻa ha taha fekauʻaki mo e ongoongoleleí pe ko e Siasi ʻo Sīsū Kalaisí?” Hangē ko ʻení, te nau lava ʻo tamateʻi ʻenau meʻafaitaá kapau ʻoku nau pehē ʻe ala tonu e talí pea tuku moʻui pē meʻafaitaá kapau ʻoku ʻikai. Kiʻi taʻofi ʻi he ʻosi ʻa e fili takitaha ke fehuʻi ki ha niʻihi ʻo e kau akó pe ko e hā ne nau fili ai ʻa e meʻa ne nau fakahokó. Tokoni ke mahino kiate kinautolu ʻe lava ke tonu pe hala ha taha ʻo e ngaahi talí ʻo makatuʻunga ʻi he ngaahi fiemaʻu mo e ngaahi fili ʻa ha taha.