Pasiunang mga Pahina sa Basahon ni Mormon

Pasiuna sa Basahon ni Mormon

Ang Sukaranan sa Atong Relihiyon

Si Joseph Smith mitawag sa Basahon ni Mormon nga tukuranang bato sa atong relihiyon. Sa sulod sa basahon adunay pagdapit sa pagpangutana sa Dios kon kini tinuod. Minilyon ka mga tawo ang misunod niini nga pagdapit ug nakadawat og saksi gikan sa Espiritu Santo sa katinuod sa Basahon ni Mormon. Kini nga leksiyon gituyo aron pagtabang kanimo nga madugangan ang imong tinguha sa pagtuon sa Basahon ni Mormon kada adlaw aron mapalig-on ang imong pagpamatuod sa katinuod niini.

Pagdasig og inadlaw nga pagtuon sa kasulatan.Ang batasan sa inadlaw nga pagtuon sa kasulatan makapanalangin sa mga estudyante sa tibuok nilang kinabuhi. Pangita og mga pamaagi sa pagtudlo sa mga estudyante mahitungod sa mga panalangin sa pagtuon sa mga kasulatan kada adlaw.

Pagpangandam sa estudyante: Dapita ang mga estudyante sa pagbasa o pagpaminaw sa pakigpulong ni Elder Gary E. Stevenson “Tan-awa ang Basahon, Tan-awa ang Ginoo” gikan sa Oktubre 2016 nga kinatibuk-ang komperensiya.

Posible nga mga Kalihokan sa Pagkat-on

Mga Panalangin gikan sa Basahon ni Mormon

Ikonsiderar ang pagpakita sa mosunod nga lista sa mga panalangin nga moabot gikan sa pagbasa sa Basahon ni Mormon. Hisgoti kon unsa nga mga panalangin ang labing gitinguha sa mga estudyante ug sa unsang paagi ang mga panalangin makaimpluwensiya sa ilang inadlaw-adlaw nga kinabuhi. Mahimo usab nga ipaambit sa mga estudyante kon unsay andam nilang buhaton aron madawat kini. Kini nga mga panalangin gilatid sa propetikanhong mga pamahayag.

Pipila niini nga propetikanhong mga pamahayag makita sa leksiyon, ug ang uban anaa sa seksiyon sa “Komentaryo ug Background nga Impormasyon”.

Basaha ug ikonsiderar ang pagmarka sa pamahayag ni Joseph Smith diha sa paragrapo 6 sa pasiuna sa Basahon ni Mormon.

• Unsa ang mipatigbabaw kanimo gikan sa pamahayag ni Joseph Smith?

Ang sukaranan sa atong relihiyon

Tabangi ang mga estudyante nga makasabot sa tahas sa usa ka sukaranan (ang bato sa ibabaw sa sentro sa usa ka arko. Usa sa kapilian mao ang pagpakita og hulagway sa usa ka sukaranan sa usa ka arko ug pahisgoti sa mga estudyante kon hain nga bato ang labing mahinungdanon sa arko.

Si Presidente Ezra Taft Benson (1899–1994) mitudlo:

Ang Basahon ni Mormon mao ang sukaranang bato sa atong pagsaksi kang Jesukristo, kinsa Siya Mismo mao ang bato sa pamag-ang sa tanan nato nga buhaton. Kini nagsaksi sa Iyang pagkatinuod uban sa gahom ug katin-aw. …

… Ang Basahon ni Mormon mao ang sukaranang bato sa atong pagpamatuod. Sama nga ang arko malumpag kon tangtangon ang sukaranang bato, mao usab ang tanan diha sa Simbahan mobarug o mapukan uban sa kamatuoran sa Basahon ni Mormon. (Ezra Taft Benson, “Ang Basahon ni Mormon—Sukaranang Bato sa Atong Tinuohan,” , Okt. 2011, 54-55)

Ang sukaranan nga bato sa atong saksi ni Jesukristo

• Unsa sa imong hunahuna ang buot ipasabot nga ang Basahon ni Mormon mao ang sukaranan nga bato sa atong saksi ni Jesukristo?

Ang mga manunulat sa Basahon ni Mormon kanunay nga nagpamatuod ni Jesukristo.

Anaay daghang mga pamaagi nga ang mga estudyante makaapil sa mga mosunod nga pagbansay. Pagmamugnaon, ug pangita og mga pamaagi aron maapil ang matag estudyante. Usa ka ideya mao ang paghatag sa matag estudyante og pahina nga gikopya gikan sa Basahon ni Mormon ug pamarkahe nila ang matag kasayoran sa Manluluwas diha sa ilang pahina. Ang mga pahina mahimo dayon nga i-display aron makita sa ubang mga estudyante.

Pagpili og bisan unsa nga pahina gikan sa Basahon ni Mormon, ug pangitaa ang matag kasayoran sa Manluluwas niana nga pahina.

• Unsay imong nakit-an mahitungod sa Manluluwas?

• Unsa ang natabang sa mga tudling nga imong nakit-an sa pagsabot o pagbati mahitungod sa Manluluwas?

Hunahunaa kon sa unsang paagi ka mapanalanginan pinaagi sa pagbaton og mas lig-on nga pagpamatuod ni Jesukristo. Samtang magtuon ka sa Basahon ni Mormon, pangitaa ang mga kasayoran ni Jesukristo ug sa unsay imong nakat-onan mahitungod Kaniya. Samtang imong buhaton, ang imong kahibalo ug pagpamatuod sa Manluluwas motubo.

Ang sukaranan nga bato sa atong pagpamatuod

Hangyoa ang mga estudyante nga magtinagsa og pamalandong sa mosunod nga mga pamahayag.

• Hain sa mosunod nga mga pamahayag ang labing naghulagway sa imong mga pagbati mahitungod sa Basahon ni Mormon?

  • Misalig ko sa uban kinsa nakadawat sa ilang kaugalingong personal nga pagpamatuod ug mipasalig nako nga ang Basahon ni Mormon tinuod.

  • Dili ko sigurado kon nasayod ba ko nga ang Basahon ni Mormon tinuod.

  • Nakadawat ko og saksi gikan sa Espiritu Santo nga ang Basahon ni Mormon tinuod.

• Ngano kaha nga gusto sa Langitnong Amahan nga imong mahibaloan nga ang Basahon ni Mormon tinuod?

Basaha ang ikaduha-hangtod-kataposan nga parapo sa pasiuna, ingon man ang Moroni 10:3–5, nga mangita kon unsay imong buhaton aron makahibalo kon ang Basahon ni Mormon tinuod.

• Sumala sa imong nabasa, unsa ang kinahanglang buhaton sa usa ka tawo aron makahibalo kon ang Basahon ni Mormon tinuod?

Tabangi ang mga estudyante nga makaila og baroganan nga susama sa mosunod: Kon mobasa ko sa Basahon ni Mormon, mamalandong sa mensahe niini, ug mangutana sa Dios kon tinuod ba kini, kana makadawat ko og saksi gikan sa Espiritu Santo.

Si Elder Ulisses Soares sa Korum sa Napulog Duha ka Apostoles mipaambit kon sa unsang paagi nga ang iyang pagpamatuod sa Basahon ni Mormon milambo samtang mitambong siya sa seminary. Mahimo nimong tan-awon ang “Ang Pagtungha sa Basahon ni Mormon,” anaa sa ChurchofJesusChrist.org, gikan sa time code 12:03 hangtod 14:12.

Basaha ang kataposang parapo sa pasiuna sa Basahon ni Mormon, nga mangita kon unsa pa ang ubang kahibalo ang moabot uban sa pagpamatuod sa Basahon ni Mormon.

• Sa unsang paagi nga ang pagbaton og pagpamatuod sa Basahon ni Mormon makaapekto sa imong kinabuhi?

Ikonsiderar ang pagpaambit sa imong pagpamatuod sa Basahon ni Mormon ug pagdapit sa andam nga mga estudyante sa pagpamatuod usab.

Tun-i ang Basahon ni Mormon kada adlaw

Si Presidente Russell M. Nelson mipaabot kanatong tanan og mga saad kon kita magtuon sa Basahon ni Mormon kada adlaw. Basaha ang mosunod nga pamahayag, o tan-awa ang video “Ang Basahon ni Mormon: Unsa Kaha ang Imong Kinabuhi Kon Wala Kini?” sa ChurchofJesusChrist.org gikan sa time code 11:52 hangtod 13:05.

Mosaad ko kaninyo nga kon mainampoon kamo nga magtuon sa Basahon ni Mormon kada adlaw, makahimo kamo og mas maayong mga desisyon—kada adlaw. Mosaad ako kaninyo nga kon mamalandong kamo unsay inyong gitun-an, ang mga bintana sa langit mobukas, ug makadawat kamo sa mga tubag sa inyong mga pangutana ug direksiyon sa inyong kinabuhi. Mosaad ako nga kon inyong isub-sob ang inyong kaugalingon sa Basahon ni Mormon, mapanalipdan kamo batok sa mga dautan niining panahona, bisan ang grabeng pagtakboy sa pornograpiya ug sa ubang matang sa adiksyon.

Sa higayon nga makadungog ko sa uban, lakip sa akong kaugalingon, nga moingon, “Nakahibalo ko nga ang Basahon ni Mormon tinuod,” gusto kong mosinggit, “Nindot na, apan dili pa igo!” Kinahanglan kitang mobati, sa “labing kinahiladman” sa atong kasingkasing [Alma 13:27], nga ang Basahon ni Mormon mao gayod ang pulong sa Dios. Kinahanglan ato gayud kining mabati og maayo nga dili ta gusto nga mabuhi bisan usa ka adlaw nga wala kini. (Russell M. Nelson, “Ang Basahon ni Mormon: Unsa Kaha ang Imong Kinabuhi Kon wala Kini?,” Liahona, Nob. 2017, 62–63)

• Unsay nakadani nimo niini nga pamahayag?

• Unsa ang imong gibati mahitungod sa pagdapit sa pagbasa sa Basahon ni Mormon kada adlaw?

Hisgoti ang mga babag sa inadlaw nga pagtuon sa kasulatan ug mga pamaagi sa pagbuntog niini.

Kon ang mga estudyante wala pa makahimo og personal nga tumong sa pagtuon sa kasulatan kay kini may kalabutan sa seminary credit alang sa paggradwar, mahimo kini nga oportunidad alang kanila sa pagbuhat sa ingon. Kon gusto sa mga estudyante, mahimo nilang ipaambit ang ilang tumong ngadto sa usa ka sakop sa pamilya, lider sa Simbahan, o magtutudlo sa seminary. Ikonsiderar ang pagpaambit og personal nga mga panalangin gikan sa pagbasa sa Basahon ni Mormon ug pagdapit sa andam nga mga estudyante sa pagbuhat sa ingon.

Komentaryo ug Background nga Impormasyon

Unsa ang usa ka sukaranan?

Aron makat-on og dugang mahitungod sa pulos sa sukaranan, tan-awa ang video “Tan-awa ang Basahon, Tan-awa ang Ginoo” gikan sa time code 5:16 hangtod 6:41.

Kapila gihisgotan sa Basahon ni Mormon si Jesukristo?

Si Elder Gary E. Stevenson sa Korum sa Napulog Duha ka Apostoles mitudlo:

Basaha ninyo ang mga tudling niining bililhon nga basahon ug inyong masugatan ang inyong minahal nga Manluluwas, ang Ginoong Jesukristo diha sa hapit matag pahina. Gibana-bana nga gigamit ang lain-laing porma sa Iyang ngalan sa kasagad nga kausa matag 1.7 nga mga bersikulo. (Gary E. Stevenson, “Tan-awa ang Basahon, Tan-awa ang Ginoo,” Liahona, Nob. 2016, 47)

Unsaon nako nga mapanalanginan pinaagi sa pagtuon sa Basahon ni Mormon?

Si Presidente Ezra Taft Benson (1899–1994) mipamatuod:

Ang Basahon ni Mormon wala lamang magtudlo kanato sa kamatuoran, bisan tuod naghimo kini niana. Ang Basahon ni Mormon wala lamang magpamatuod kang Kristo, bisan tuod naghimo kini niana, usab. Apan adunay mga butang nga mas labaw pa. Adunay gahom sa basahon nga magsugod sa pagdagayday diha sa inyong mga kinabuhi sa higayon nga sugdan ninyo ang tinuoray nga pagtuon sa basahon. Makaplagan ninyo ang mas dako nga gahom sa pagpakigbatok sa pagsulay. Makaplagan ninyo ang gahom sa paglikay sa panglingla. Makaplagan ninyo ang gahom nga magpabilin sa higpit ug pig-ot nga dalan. Ang mga kasulatan gitawag og “ang mga pulong sa kinabuhi” [Doktrina ug mga Pakigsaad 84:85], ug walay laing mas tinuod pa kay sa Basahon ni Mormon. Kon kamo magsugod sa pagkagutom ug pag-uhaw niadto nga mga pulong, kamo makakaplag sa kinabuhi nga mas mabungahon. (Ezra Taft Benson, “Ang Basahon ni Mormon—Sukaranang Bato sa Atong Tinuohan,” ,Okt. 2011, 56-57)

Si Presidente Thomas S. Monson (1927–2018) mipamatuod:

Mohangyo ko natong tanan nga mainampoong magtuon ug mamalandong sa Basahon ni Mormon kada adlaw. Kon buhaton nato, anaa kita sa posisyon nga makadungog sa tingog sa Espiritu, sa pakigbatok sa tentasyon, sa pagbuntog sa pagduhaduha ug kahadlok, ug sa pagdawat sa tabang sa langit sa atong mga kinabuhi. Niini ako mopamatuod sa tibuok nakong kasingkasing. (Thomas S. Monson, “Ang Gahom sa Basahon ni Mormon,” Liahona, Mayo 2017, 87)

Unsaon nako paggahin og panahon sa pagtuon sa Basahon ni Mormon?

Si Elder Gary E. Stevenson sa Korum sa Napulog Duha ka Apostoles mitudlo:

Aron sa pagtabang sa Basahon ni Mormon nga mahimong sukaranan sa imong pagpamatuod, mohatag ako kaninyo og usa ka hagit. Bag-o lang nakong nasayran nga daghang kabatan-onan kasagaran mogahin og pito ka oras kada adlaw nga magtan-aw sa mga screen sa TV, computer, ug smartphone. Sa paghunahuna niini, mohimo ba kamo og gamay nga kausaban? Ilisan ba ninyo ang pipila nianang inadlaw nga panahon sa pagtan-aw sa screen—ilabi na kanang gigahin sa social media, sa internet, pagdula, o telebisyon—ngadto sa pagbasa sa Basahon ni Mormon? Kon sakto ang mga pagtuon nga akong gihisgutan, dali ra kamong makakita og oras alang sa inadlaw nga pagtuon sa Basahon ni Mormon bisan kon sulod lang sa 10 ka minutos matag adlaw. Ug makatuon kamo sa paagi nga kamo malingaw niini ug makasabot niini—sa inyo ba nga device o sa basahon mismo. (Gary E. Stevenson, “Tan-awa ang Basahon, Tan-awa ang Ginoo,” Liahona, Nob. 2016, 46)

Dugang nga mga Kalihokan sa Pagkat-on

Pag-drowing og hulagway sa usa ka arko nga anaay sukaranan. Sulati ang sukaranan og “Basahon ni Mormon.” Dapita ang mga estudyante nga markahan ang ubang mga bato sa arko sa mga elemento sa ebanghelyo sa Manluluwas. Dayon hisgoti kon sa unsang paagi nga ang pagpamatuod sa Basahon ni Mormon makatabang kanato nga makabaton usab og pagpamatuod sa ubang mga elemento sa ebanghelyo sa Manluluwas. Kon gikinahanglan, tan-awa ang kataposang parapo sa pasiuna sa Basahon ni Mormon.

Ang mga estudyante mahimong mobuhat og arko nga susama niini: