Pasiunang mga pahina sa Basahon ni Mormon

Pag-angkon og Espirituhanong Kahibalo, Bahin 2

Susihon ang mga Konsepto ug mga Pangutana nga adunay Mahangtoron nga Panglantaw

Usa sa mga katuyoan sa doktrinal nga kahanas mao ang pagtabang kanimo sa pagkat-on ug paggamit sa mga baroganan sa pag-angkon og espirituhanong kahibalo aron mahimong mas mahisama kang Jesukristo. Kini nga leksiyon makatabang kanimo sa pagsusi sa mga konsepto ug mga pangutana nga adunay mahangtorong panglantaw ug mas makita kini sama sa pagabuhaton sa Manluluwas.

Pagsabot sa imong tahas sa doktrinal nga kahanas. Namulong sa mga magtutudlo sa seminary ug institute mahitungod sa doktrinal nga kahaans, si Presidente M. Russell Ballard sa Korum sa Napulog Duha ka Apostoles mitudlo: “Kini nga inisyatibo dinasig ug tukma sa panahon. Duna kini talagsaong impluwensiya sa atong kabatan-onan. Hinoon, ang kalamposan sa Doktrinal nga Kahanas, ug sa ubang mga programa sa pagtuon sa [seminaries ug institutes], mag-agad sa inyong paghatag og importansiya niini” (“Ang mga Oportunidad ug Responsibilidad sa mga Magtutudlo sa CES sa ika-21 nga Siglo” [gabii uban sa usa ka Kinatibuk-ang Awtoridad, Peb. 26, 2016], broadcasts.ChurchofJesusChrist.org).

Pagpangandam sa estudyante: Dapita ang mga estudyante sa pagpasalamat sa Langitnong Amahan diha sa ilang personal nga mga pag-ampo alang sa kahibalo nga aduna sila sa plano sa kaluwasan. Ikonsiderar ang pagdapit kanila sa pagpangutana usab Kaniya kon unsaon nila paggamit niana nga kahibalo alang sa kaayohan.

Mga Posibleng Kalihokan sa Pagkat-on

Mga baroganan sa pag-angkon og espirituhanong kahibalo

Kon makasinati kita og mga hagit sa kinabuhi o mag-atubang og wala matubag nga mga pangutana, ang mosunod nga mga baroganan sa pag-angkon og espirituhanong kahibalo makatabang nato:

1. Lihokon inubanan sa hugot nga pagtuo.

2. Susihon ang mga konsepto ug mga pangutana inubanan sa mahangtorong panglantaw.

3. Tinguhaa ang dugang nga panabot pinaagi sa balaang gitudlo nga mga tinubdan.

Niini nga leksiyon motutok kita sa pagsusi sa mga konsepto ug mga pangutana nga adunay mahangtorong panglantaw.

Usa ka limitado nga panglantaw

Paggamit og kalihokan sama sa mosunod aron matabangan ang mga estudyante sa paghisgot kon sa unsang paagi ang panglantaw ug konteksto importante sa panabot:

Pagdapit og duha ka boluntaryo sa atubangan sa klase. Hatagi ang matag usa og usa ka piraso sa papel nga adunay usa ka gamay nga lungag nga gibutang sa tunga. Hangyoa sila sa pag-isa sa papel ngadto sa usa ka mata, ug pangutan-a kon makakita ba sila lahos niini. Dayon hagita sila sa pagdula og saloa ang humok nga butang samtang nagtan-aw lamang lahos sa papel. Kon maglisod sila, pangutan-a sila nganong lisod kaayo kini nga ila naman untang gikonpirmar nga makakita sila.

• Giunsa kini pagkahisama sa paghimo og makapausab nga desisyon sa kinabuhi o pagtubag sa importante nga mga pangutana nga adunay limitado nga panabot sa plano sa kaluwasan?

Ang pagbaton ug mas kompletong panglantaw makatabang sa pakighalubilo sa kalibotan sa atong palibot. Sa samang paagi, ang mahangtorong panglantaw makatabang nato samtang kita moangkon og espirituhanong kahibalo.

Ikonsiderar ang pagmarka sa mosunod nga kapahayag gikan sa parapo 8 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022): Sa pagsusi sa doktrinal nga mga konsepto, mga pangutana, ug sosyal nga mga isyu inubanan sa mahangturong panglantaw, atong ikonsiderar ang kinatibuk-ang kahulugan niini sa plano sa kaluwasan ug sa mga pagtulun-an sa Manluluwas.

Sa dili pa basahon sa mga estudyante ang mosunod nga mga parapo, dapita sila sa pag-summarize unsay ilang nahibaloan mahitungod niini nga baroganan sa pag-angkon og espirituhanong kahibalo.

Tun-i ang mga parapo 8–10, nga mangita kon unsay makatabang nimo sa pagsusi sa mga konsepto ug mga pangutana inubanan sa mahangtorong panglantaw.

Dapita ang mga estudyante sa pagmarka og piho nga mga pulong ug mga hugpong sa mga pulong ug i-report ang ilang nakit-an. Pangutana og follow-up nga mga pangutana aron sa pagtabang kanila nga makasabot nga ang Langitnong Amahan ug si Jesukristo nakakita sa mga butang uban sa mahangturong panglantaw. Ang pagkat-on sa pagbuhat niini sa atong kinabuhi makatabang kanato nga mahimong mas mahisama Kanila. Ang mosunod nga mga pangutana tingali makatabang.

• Unsa ang pipila ka mga isyu ug mga pangutana nga sa imong hunahuna mahimong lahi ang pagtan-aw sa Manluluwas kay sa daghang mga tawo sa yuta?

• Sa unsang paagi nga ang pagsusi sa mga konsepto ug mga pangutana sa kinatibuk-ang kahulugan niini sa plano sa kaluwasan makatabang nato nga makakita sa mga butang nga susama sa gibuhat sa Langitnong Amahan ug ni Jesukristo? (tan-awa Mosiah 4:9).

• Ngano kaha nga kini usa ka importante nga kahanas alang kanimo nga makat-onan, mapraktis, ug magamit sa imong kinabuhi?

Usa ka ehemplo gikan sa mga kasulatan

Si Alma nga Batan-on mipakita kanato kon unsaon pagtan-aw sa mga butang uban sa mahangtorong panglantaw samtang iyang gitubag ang lisod nga mga pangutana nga gisagubang sa iyang anak nga si Corianton.

Basaha ang Alma 40:1; 42:1, nga mangita sa duha ka mga gikabalak-an ni Corianton. Ikonsiderar ang pagpasabot sa iyang mga kabalaka sa imong kaugalingong mga pulong.

Karon basaha ang mga ulohan sa kapitulo sa Alma 40; 41; 42 aron makita ang minubo nga asoy sa unsay gitudlo ni Alma kang Corianton samtang iyang gitubag ang iyang mga kabalaka. Pangitaa ang mga elemento sa plano sa kaluwasan nga gitudlo ni Alma.

• Unsa nga mga elemento sa plano ang imong nakita?

• Sa unsang paagi kaha kini nakatabang ni Corianton sa pagtan-aw sa iyang mga kabalaka gikan sa mahangtorong panglantaw?

Pagsusi og balik [Reframing]

Himoa ang porma sa picture frame gamit ang imong mga pangtudlo nga tudlo ug kumagko. Pagpili bisan unsa sa kwarto isip tema sa imong litrato.

• Unsa ang imong gipili nga ilakip sa imong kuwadro? Ngano man?

• Unsa ang wala nimo giapil sa imong litrato? Ngano man?

Sama sa mga litrato, ang mga pangutana adunay kuwadro o konteksto usab. Ang kuwadro mahimong magrepresentar sa mga gituohan ug mga pangagpas sa usa ka tawo nga nagdala kanila sa pagtan-aw sa mga pangutana sa usa ka piho nga paagi. Usahay kana nga mga pagtuo ug mga pangagpas gibase sa usa ka sayop nga nasabtan o usa ka butang nga dili tinuod. Sa maong mga kaso, kini makatabang sa pagsusi pag-usab kanila. Ang pagsusi og balik mao ang higayon nga atong susihon kadtong mga pagtuo o mga pangagpas sa kinatibuk-an sa plano sa kaluwasan ug sa mga pagtulun-an sa Manluluwas.

Si Presidente Dallin H. Oaks sa Unang Kapangulohan mitudlo:

Tungod sa atong kahibalo sa plano ug sa ubang kamatuoran nga gibutyag sa Dios, nagsugod kita sa lahi nga mga pangagpas kay sa niadtong wala mahibalo sa atong nahibaloan. Isip resulta, nakab-ot nato ang lain-laing mga konklusyon sa daghang importante nga mga hilisgotan nga gihukman lamang sa uban sumala sa ilang mga opinyon mahitungod sa mortal nga kinabuhi. (Dallin H. Oaks, “As He Thinketh in His Heart” [gabii uban sa usa ka Kinatibuk-ang Awtoridad, Peb. 8, 2013], broadcasts.ChurchofJesusChrist.org)

Handurawa nga aduna kay higala nga ginganlag Adry kinsa nangutana, “Kon aduna gayoy mahigugmaong Dios, nganong gitugotan Niya ang mga tawo nga mag-antos?”

Sa pag-usab sa pangutana ni Andry, una ilha ang mga pangagpas o mga pagtuo nga tingali midala kaniya sa pagpangutana niini nga pangutanaha.

Pananglitan, siya nagtuo nga wala gayoy bisan unsang bili ang pag-antos. Pag-ila og usa o duha pa.

• Tabangi ang mga estudyante sa pag-ila sa ubang posible nga mga pangagpas o mga pagtuo, sama sa “kinahanglang hunongon sa Dios ang tanang pag-antos,” “ang Dios wala nagpakabana,” o “dili tinuod nga dunay Dios.”

Ang mga pangutana sama sa mosunod mahimong magamit aron sa pagtabang kanimo nga makita kon unsa ka maayo ang pagsabot sa mga estudyante sa kahanas sa pagsusui og balik.

• Ngano sa imong hunahuna nga makatabang ang paghunahuna mahitungod sa mga pagtuo o mga pangagpas nga tingali nakaimpluwensiya sa pangutana ni Adry mahitungod sa Dios?

• Sa unsang paagi nga ang kinatibuk-an sa unsay atong nahibaloan mahitungod sa Langitnong Amahan ug sa Iyang plano nagtugot kanato nga makakita sa pangutana sa lahi nga paagi?

• Unsay imong gibati mahitungod sa imong abilidad sa pagsulbad sa lisod nga mga pangutana pinaagi sa pagsusi og balik? Unsang mga pangutana o mga kabalaka ang naa nimo bahin niini, kon naa?

Kon aduna pay oras, ikonsiderar ang pagtugot sa mga estudyante nga magpraktis sa kahanas sa pagsusi og balik sa ilang kaugalingon nga mga pangutana o mga kabalaka. Tan-awa ang seksiyon sa “Dugang nga mga Kalihokan sa Pagkat-on” alang sa mga ideya kon unsaon kini pagbuhat.

Ikonsiderar ang pagpaambit og personal nga kasinatian sa pagtan-aw sa mga problema o mga kabalaka uban sa mahangtorong panglantaw.

Aduna kay daghang mga oportunidad sa pagpraktis sa pagsusi og balik diha sa seminary ug sa imong kinabuhi. Samtang mangayo ka sa tabang sa Espiritu Santo ug mopalapad sa imong panabot sa plano sa kaluwasan ug sa doktrina ni Kristo, ang imong abilidad sa pagsusi sa mga konsepto ug mga pangutana uban sa mahangtorong panglantaw molambo. Makapalig-on usab kini sa imong pagsalig sa pagpaambit sa imong nahibaloan ug pagtabang sa uban nga adunay lisod nga mga pangutana ug mga kabalaka.

Komentaryo ug Background nga Impormasyon

Sa unsa nga paagi kini makatabang nga adunay panabot sa plano sa kaluwasan?

Si Presidente Dallin H. Oaks sa Unang Kapangulohan mitudlo:

Tungod kay ang mga Santos sa Ulahing mga Adlaw nahibalo sa plano sa Langitnong Amahan para sa Iyang mga anak, atong nahibaloan nga kining mortal nga kinabuhi dili usa ka hugna nga dula nga gitaliwad-an sa wala mahibaloi nga kagahapon ug sa walay kasigurohang umaabot. Kining kinabuhia sama og maoy ikaduhang akto sa tulo ka akto nga drama. Ang katuyoan niini gipasabot pinaagi sa gipadayag mahitungod sa atong pagpuyo isip mga espiritu diha sa akto 1 ug ang mahangtoron natong destinasyon diha sa akto 3. (Dallin H. Oaks, “As He Thinketh in His Heart” [gabii uban sa usa ka Kinatibuk-ang Awtoridad, Peb. 8, 2013], broadcasts.ChurchofJesusChrist.org)

Si Presidente M. Russell Ballard sa Korum sa Napulog Duha ka Apostoles mitudlo:

Pinaagi ni Propeta Joseph Smith, gihatag sa Dios ang Basahon ni Mormon, ang Doktrina ug mga Pakigsaad, ug daghan pang dugang nga mga pagtulun-an sa Simbahan. Naglakip kini sa kahibalo mahitungod sa plano sa kaluwasan, nga mao ang mapa kon diin ta gikan, unsay atong tuyo dinhi sa yuta, ug asa ta paingon human ta mamatay. Ang plano naghatag sab nato og lahi, mahangtorong panglantaw nga kita espiritung mga anak sa Dios. Pinaagi sa pagkasabot kinsa ang atong Langitnong Amahan ug unsay atong relasyon Kaniya ug sa Iyang Hinigugmang Anak, si Jesukristo, atong madawat ang Ilang mga sugo ug mohimo og mga pakigsaad uban Kanila nga modala nato og balik ngadto sa Ilang mahangtorong presensiya. (M. Russell Ballard, “Dios ang Nagtimon,” Liahona, Nob. 2015, 25)

Dugang nga mga Kalihokan sa Pagkat-on

Paghimo og pasulit

Bahina ang klase ngadto sa gagmay nga mga grupo ug i-assign ang matag grupo sa parapo8,9,o sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022).

Dapita ang matag grupo sa pagsulat og usa ka pangutana nga gitubag sa ilang gi-assign nga parapo. Iapud-apod ang mga pangutana ngadto sa ubang mga grupo, ug dapita ang mga estudyante sa pagpangita sa mga tubag sa mga pangutana.

Pagpraktis sa pagsusi og balik

Daghang kabatan-onan ang galisod sa pag-ila sa nagpahiping mga pangagpas ug kapasikaran. Mahimong mas dali silang makakat-on gikan sa mga ehemplo nga adunay klaro nga elemento sa sayop nga pagsabot o pagka dili tinuod. Kon magpraktis og pagsusui og balik uban sa mga estudyante, seguroha nga mogamit og mga pangutana nga may kalabotan kanila, ug pag-andam sa pagtabang kanila sa pag-ila sa sayop nga pagsabot o sayop nga mga pangagpas.

Kon magpraktis, ikonsiderar ang paglista sa potensiyal nga mga pangutana diha sa pisara ug tugoti ang klase sa pagbuhat niini nga magtinabangay o diha sa gagmay nga mga grupo. Kon sila nagbuhat niini diha sa mga grupo, ikonsiderar ang pagtugot sa usa ka grupo sa pag-ila sa mga kapasikaran o mga pangagpas ug dayon ipasa ang pangutana ug mga pangagpas ngadto sa laing grupo aron sa pag-analisar inubanan ang mahangtorong panglantaw.