1 Nephi 1–5

Kinatibuk-ang Pagpasabot

Si Lehi gitawag sa Dios aron sa pagsangyaw og paghinulsol ngadto sa mga katawhan sa Jerusalem. Misunod siya sa pagpadayag gikan sa Ginoo sa pagbalhin sa iyang pamilya ngadto sa kamingawan. Ang iyang anak nga si Nephi midangop sa Ginoo alang sa dugang nga pagsabot ug gipahumok ang iyang kasingkasing. Human sa pagbiyahe sulod sa mga adlaw sa kamingawan, si Nephi ug ang iyang mga igsoong lalaki miatubang og pagsulay sa ilang pagkamasulundon ug ilang hugot nga pagtuo sa Dios sa dihang gisugo sila sa pagbalik ngadto sa Jerusalem aron sa pagkuha sa mga palid nga tumbaga gikan kang Laban.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

1 Nephi 1

Katuyoan sa leksiyon: Kini nga leksiyon makatabang sa mga estudyante nga mobati sa kamahinungdanon sa pagdawat ug pagsunod sa mga propeta sa Dios.

• Pagpangandam sa estudyante: Dapita ang mga estudyante nga motambong nga andam mopaambit sa bag-ohay lang nga mga pasidaan nga ilang nadungog gikan sa mga propeta ug sa pagpamalandong kon giunsa nila pagsanong niadtong mga pasidaan.

• Mga hulagway: Ang mga hulagway sa suba ug busay gikan sa leksiyon

• Bidyo: “Ang Ginoo Misugo sa Pamilya ni Lehi sa Pagbiya sa Jerusalem” (18:14; tan-awa gikan sa time code 0:39 hangtod 5:53 ug gikan sa time code 5:53 hangtod 7:26)

• Sugyot sa pagtudlo pinaagi sa videoconference: Atol sa kataposang kalihokan, sa higayon nga ang mga estudyante nangandam sa ilang tubag sa text message gikan sa usa ka higala, dapita sila sa paghulat sa pagpaambit niini hangtod nga ang tanan mahuman. Gamita ang chat feature aron matugotan ang tanan sa pagsumiter sa ilang mga tubag sa parehas nga oras. Niining paagiha ang mga estudyante makahimo sa ilang kaugalingon nga tubag apan makabaton usab og kahigayonan sa pagrebyo sa panghunahuna sa uban.

1 Nephi 2

Katuyoan sa leksiyon: Kini nga leksiyon gituyo aron sa pagtabang sa mga estudyante nga mobati og mas dakong tinguha sa pagdangop ngadto sa Ginoo kon Siya mohangyo kanila sa pagbuhat og lisod nga mga butang.

• Pagpangandam sa estudyante: Pangutana og higala o sakop sa pamilya, “Kanus-a ka midangop ug nakadawat sa tabang sa Ginoo sa pagtuo ug pagsunod sa Iyang mga pulong, bisan kon kini lisod?”

• Hulagway: Mapa sa posibleng rota nga agian sa pamilya ni Lehi pagawas sa Jerusalem

• Mga bidyo: “Nakigtambag si Lehi sa Iyang Pamilya sa Pagbiya sa Jerusalem” (2:27); “Si Nephi Nag-ampo alang kang Laman ug Lemuel” (6:02); “Ang Propeta sa Dios” (16:04; tan-awa gikan sa time code 11:51 hangtod sa 12:37)

• Sugyot sa pagtudlo pinaagi sa videoconference: Human mapakita ang mapa sa posibleng rota nga giagian sa pamilya ni Lehi ngadto sa kamingawan ug sa pagpasabot sa gilay-on nga hayan ilang gibiyahe, ikonsiderar ang paggamit og online map application aron ipakita sa mga estudyante ang pipila sa mga lokasyon nga susama og gilay-on gikan sa ilang gipuy-an. Mahimong dapiton ang mga estudyante sa paghanduraw kon unsa kaha ang pagbiyahe didto nga walay de-motor nga sakyanan, nga nahibalo nga kinahanglang magdala sila og bisan unsang mga butang nga gusto nilang dad-on.

1 Nephi 3

Katuyoan sa leksiyon: Kini nga leksiyon makatabang sa mga estudyante sa pagpakita og hugot nga pagtuo sa Dios aron matuman ang Iyang gipabuhat kanila.

• Pagpangandam sa estudyante: Dapita ang mga estudyante sa pagsulay sa pagsag-ulo sa tudling sa doktrinal nga kahanas sa 1 Nephi 3:7 ug sa paghunahuna kon unsaon kini paggamit sa mga sitwasyon nga ilang giatubang sa ilang kinabuhi.

• Bidyo: “Si Nephi Gigiyahan sa Espiritu aron Makuha ang mga Palid nga Tumbaga” (25:44; tan-awa gikan sa time code 4:43 hangtod sa 8:18 ug gikan sa time code 8:18 hangtod sa 15:10)

• Sugyot sa pagtudlo pinaagi sa videoconference: Usa ka posible nga paagi sa pagsugod sa leksiyon mao ang pagdapit sa mga estudyante sa pagpakita sa ilang camera og usa ka butang nga mahinungdanon kaayo kanila o sa ilang pamilya tungod sa paningkamot nga gikinahanglan aron makab-ot o makuha kini. Dapita ang pipila ka mga estudyante sa paghisgot mahitungod sa kamahinungdanon sa ilang butang ug sa unsang paagi kini nakab-ot o nakuha. Dayon ipakita ang hulagway sa pamilya ni Lehi nga nagkupot sa mga palid nga tumbaga, ug dapita ang usa ka estudyante sa pagpasabot kon unsay gikinahanglang buhaton sa pamilya ni Lehi aron maangkon kini ug nganong determinado sila sa pagbuhat sa ingon.

Doktrinal nga Kahanas: 1 Nephi 3:7

Katuyoan sa leksiyon: Kini nga leksiyon makatabang sa mga estudyante sa pagsag-ulo sa pakisayran ug sa mahinungdanon nga hugpong sa mga pulong sa kasulatan alang sa 1 Nephi 3:7, makapasabot sa doktrina, ug makagamit sa mga baroganan sa pag-angkon og espirituhanong kahibalo sa tinud-anay nga mga senaryo.

• Pagpangandam sa estudyante: Dapita ang mga estudyante sa paghunahuna og mga kasinatian nga nasinati nila o sa mga minahal nga nagpakita nga ang Ginoo nag-andam og paagi aron matuman ang Iyang gipangayo ngare kanato.

• Hulagway nga ipakita: Si Nephi nakig-istorya sa iyang amahan, si Lehi

• Hilisgotan nga ipakita: Ang mga instruksyon ug mga pangutana kalabot sa tulo ka mga baroganan sa pag-angkon og espirituhanong kahibalo (nagsugod sa “Lihokon inubanan sa hugot nga pagtuo” sa seksyon sa “Pagbansay sa paggamit”)

• Sugyot sa pagtudlo pinaagi sa videoconference: Imbes nga gamiton ang gisugyot nga mga sitwasyon sa “Pagbansay sa paggamit” nga seksiyon, ikonsiderar ang pagdapit sa mga estudyante nga i-post sa chat ang tinuod nga mga sitwasyon diin ang usa ka sugo lisod sundon. (Pahinumdomi sila nga dili i-post ang bisan unsa nga hilabihan ka personal o sagrado mahitungod sa ilang kaugalingon o sa uban.) Mahimo dayon nga mopili ang mga estudyante og usa sa mga post sa ilang mga klasmeyt nga tutokan samtang ilang gamiton ang mga baroganan sa pag-angkon og espirituhanong kahibalo.

1 Nephi 4–5

Katuyoan sa leksiyon: Kini nga leksiyon gituyo sa paglig-on sa pagsalig sa mga estudyante sa Langitnong Amahan ug sa Iyang kaandam sa paggiya kanila.

• Pagpangandam sa estudyante: Hatagi ang mga estudyante og kopya sa pamahayag ni Presidente Russell M. Nelson nga makita sa sinugdanan sa leksiyon. Dapita sila sa pagtambong nga andam nga adunay mga ideya sa mga sitwasyon diin sila personal nga makabenepisyo gikan sa pagdawat sa giya sa Ginoo.

• Mga bidyoo: “Pagpadayag alang sa Simbahan, Pagpadayag alang sa Atong Kinabuhi” (20:28; tan-awa gikan sa time code 9:14 hangtod sa 9:40); “Si Nephi Gisugo sa Espiritu sa Pagpatay ni Laban” (3:26); “Nakuha ni Nephi ang Sagradong mga Talaan” (4:20)

• Sugyot sa pagtudlo pinaagi sa videoconference: Sa dili pa magpundok ang mga estudyante alang sa klase, ikonsiderar ang pagdapit og pipila kanila sa pagtambong nga andam sa pagpaambit og mga kasinatian nga nagiyahan sa Espiritu Santo. Pangita og mga kahigayonan sa tibuok panaghisgotan nga motugot sa mga estudyante sa pagpamatuod sa gahom sa Ginoo nga mogiya kanila.