1 Nephi 4–5

“Ako Giubanan sa Espiritu”

Human sa duha ka pakyas nga pagsulay sa pagkuha sa mga palid nga tumbaga gikan kang Laban, si Nephi mikamang ngadto sa Jerusalem sa gabii uban sa hugot nga pagtuo sa Ginoo. Apan, gamay ra ang iyang ideya kon unsaon pagtuman ang iyang buluhaton. Ikaw ba, sama ni Nephi, mibati sukad og kusog nga pagbati mahitungod sa pagbuhat og usa ka butang apan dili segurado kon unsaon kini sa pagbuhat? Kini nga leksiyon gituyo sa paglig-on sa imong pagsalig sa Langitnong Amahan ug sa Iyang kaandam sa paggiya kanimo.

Pagtabang sa mga estudyante sa pagpangandam alang sa pagkat-on. Ang mga kasulatan naghisgot sa usa ka kahimtang sa pagkaandam sa mga kasingkasing ug mga hunahuna niadtong nagtinguha sa espirituhanong pagkat-on. Kanunay nga hisgoti uban sa mga estudyante ang kamahinungdanon sa pagpangandam sa tigkat-on ug awhagon sila sa pagkompleto sa pagpangandam sa estudyante kada adlaw.

Pagpangandam sa estudyante: Hatagi ang mga estudyante og kopya sa pamahayag ni Presidente Nelson nga makita sa sinugdanan sa leksiyon. Dapita sila sa pagtambong nga andam nga adunay mga ideya sa mga sitwasyon diin sila personal nga makabenepisyo gikan sa pagdawat sa giya sa Ginoo.

Mga Posibleng Kalihokan sa Pagkat-on

Pagdawat og giya gikan sa Langitnong Amahan

Ipakita ang mosunod nga pamahayag ni Presidente Nelson ug ikonsiderar ang pagdapit sa mga estudyante sa pagpaambit sa ilang mga hunahuna gikan sa pagpangandam sa estudyante.

Si Presidente Russell M. Nelson mipaambit og importante nga tambag mahitungod sa pagdawat og personal nga pagpadayag. Samtang nagtuon ka sa iyang pamahayag, ikonsiderar kon unsaon kini nga magamit nimo.

Maka-ampo kita sa atong Langitnong Amahan ug makadawat og giya ug direksiyon, mapahimangnuan mahitungod sa mga kakuyaw ug sa mga makabalda, ug makabuhat og mga butang nga dili gayod nato mahimo kon kita lang. Kon kita tinuoray nga modawat sa Espiritu Santo ug magkat-on sa pag-ila ug pagsabot sa Iyang mga pag-aghat, magiyahan kita sa mga sitwasyon nga dagko ug gagmay. (Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 95)

• Unsa ang pipila ka mga sitwasyon sa imong kinabuhi, dako o gamay, diin makatabang ang pagdawat sa giya sa Langitnong Amahan? (Ikonsiderar ang pagsulat sa imong mga tubag.)

Ikonsiderar ang pagpakita sa mosunod nga mga pangutana ug mga opsiyon sa pagtubag sa pisara sa dili pa magsugod ang klase o i-printa kini alang sa matag estudyante. Hatagi og panahon ang mga estudyante sa hilom sa pagsusi sa ilang mga pagbati ug pagrekord sa ilang mga tubag.

Pilia ang tubag nga labing mohaom sa imong mga pagbati mahitungod sa mosunod nga mga pamahayag.

1. Aktibo akong nagtinguha sa giya ug direksiyon sa Langitnong Amahan sa pagtabang kanako sa akong mga hagit, mga pangutana, ug mga desisyon.

   • Kasagaran

   • Usahay

   • Panagsa

2. Nagasalig ako sa abilidad ug tinguha sa Langitnong Amahan sa paggiya sa akong kinabuhi pinaagi sa Espiritu.

   • Kasagaran

   • Usahay

   • Panagsa

3. Nagpadayon ko uban sa hugot nga pagtuo ug naglihok sumala sa mga pag-aghat sa Espiritu Santo, bisan kon ang akong dalan dili klaro.

   • Kasagaran

   • Usahay

   • Panagsa

Samtang magtuon ka sa panahon nga si Nephi dili segurado unsay buhaton, pangitaa ang mga kamatuoran nga makapalig-on sa imong pagsalig sa Langitnong Amahan ug sa Iyang kaandam sa paggiya kanimo.

“Kita mobalik”

Hinumdomi nga ang mga anak nga lalaki ni Lehi mihimo og duha ka wala molampos nga pagsulay sa pagkuha sa mga palid nga tumbaga gikan kang Laban ug nangahadlok alang sa ilang mga kinabuhi (tan-awa sa 1 Nephi 3:11–27). Unsa kaha ang imong bation kon ikaw anaa sa susama nga sitwasyon? Unsa kaha ang imong mga kabalaka? Bisan og nakasaksi og usa ka anghel, sila si Laman ug Lemuel mibati og kabalaka ug adunay mga pangutana kon unsaon paglampos sa unsay gihangyo kanila (tan-awa sa 1 Nephi 3:31).

Basaha ang 1 Nephi 4:1–3, nga mangita kon giunsa pagtubag ni Nephi ang mga kabalaka sa iyang mga igsoon.

• Unsay nakadani nimo niini nga mga bersikulo?

• Unsa nga ehemplo gikan sa mga kasulatan ang gigamit ni Nephi sa pagpamatuod sa kalig-on sa Ginoo ug pagdasig sa iyang mga igsoon? Unsa nga mga asoy gikan sa mga kasulatan ang nakahatag kanimo og kaisog ug kalig-on sa imong kinabuhi?

• Unsaon kaha sa hugpong sa mga pulong nga “Kita mobalik” nga magamit sa mga kahimtang ug mga hagit sa imong kinabuhi? (Ikonsiderar ang pagmarka niini nga hugpong sa mga pulong diha sa imong mga kasulatan matag higayon nga kini makita sa bersikulo 1–3.)

Ikonsiderar ang pagpasalida sa mosunod nga bidyo aron matabangan ang mga estudyante nga mas makasabot sa dagan sa istorya. Mahimong mapuslanon ang paghunong sa bidyo panagsa ug i-refer ang mga estudyante ngadto sa mga kasulatan. Sama pananglit, ang bidyo mahimong hunungon sa time code 1:07 aron mailhan sa mga estudyante kon unsay gibuhat ni Nephi. Mahimo dayong dapiton ang mga estudyante sa pagbasa ug pagmarka sa 1 Nephi 4:6–7 diha sa ilang mga kasulatan.

Basaha ang 1 Nephi 4:4–8, nga mangita sa unsay gibuhat ni Nephi sa ikatulo nga pagsulay sa pagkuha sa mga palid nga tumbaga. Mahimo ka usab nga motan-aw sa “Si Nephi Gisugo sa Espiritu sa Pagpatay ni Laban” (3:26), anaa sa ChurchofJesusChrist.org, isip kabahin sa imong pagtuon.

• Unsa ang nahibaloan ni Nephi ug unsa ang wala niya mahibaloi sa pagsugod niya niining ikatulo nga pagsulay?

• Unsa ang mipatigbabaw diha kanimo mahitungod sa hugpong sa mga pulong nga “Bisan pa niana Ako mipadayon” sa 1 Nephi 4:7?

• Unsa ang kamatuoran nga imong makat-onan gikan sa mga pulong ni Nephi?

Ania ang usa ka baroganan sa ebanghelyo nga tingali imong nahunahunaan: sa mga panahon sa kawalay kasegurohan, makadawat kita og giya gikan sa Langitnong Amahan pinaagi sa Espiritu samtang kita magpadayon uban sa hugot nga pagtuo.

Ikonsiderar ang pagrekord niini nga baroganan o sa usa ka baroganan nga imong gihunahuna diha sa imong mga kasulatan.

Si Presidente Dallin H. Oaks sa Unang Kapangulohan mitudlo mahitungod sa kamahinungdanon sa atong mga aksiyon samtang kita nagtinguha og pagpadayag ug giya:

Sa akong pagtuon sa mga kasulatan akong namatikdan nga kadaghanan sa mga pagpadayag ngadto sa mga anak sa Dios moabot kon sila naglihok, dili kay naglingkod lang diha sa ilang nahimutangan nga nagpaabot sa Ginoo sa pagsulti kanila sa unsay unang buhaton. …

Mao nga atong buhaton ang tanan natong mahimo. Dayon magpaabot kita sa pagpadayag sa Ginoo. (Dallin H. Oaks, “Sa Iyang Kaugalingong Panahon, sa Iyang Kaugalingong Paagi,” Liahona, Ago. 2013, 24–26)

Hunahunaa kon sa unsang paagi nga kining kamatuoran ug ang pamahayag ni Presidente Oaks may kalabotan sa mga sitwasyon nga imong naila bag-ohay lang.

• Ngano sa imong hunahuna nga gusto sa Ginoo nga mopadayon ka diha sa hugot nga pagtuo atol sa mga panahon sa walay kasegurohan?

Ang Ginoo nag-andam og paagi

Si Nephi gisugo sa Ginoo sa pagpatay kang Laban. Nasamok siya sa ideya sa paghunos sa kinabuhi, apan ang Espiritu nagpadayon sa pag-awhag kaniya sa pagpadayon. Si Nephi misunod sa “tingog sa Espiritu” (1 Nephi 4:18), nagtakuban sa iyang kaugalingon sa mga sapot ni Laban, ug nakombinsir si Zoram, ang suluguon ni Laban, sa pagkuha sa mga palid nga tumbaga gikan sa tipiganan.

Ikonsiderar ang pagbasa niini nga asoy sa 1 Nephi 4:9–24 ug pagmarka sa mga pulong o hugpong sa mga pulong nga makahuluganon kanimo. Mahimo usab nimong tan-awon ang “Nakuha ni Nephi ang Sagradong mga Talaan” (4:20), anaa sa ChurchofJesusChrist.org.

Sa unsang paagi ang kasinatian ni Nephi sa pagkuha sa mga palid may kalabotan sa pagpamatuod nga iyang gipaambit sa 1 Nephi 3:7?

Hatagi ang mga estudyante og panahon sa paghunahuna mahitungod sa ilang kaugalingong mga kahimtang nga mahimong magkinahanglan kanila sa pagpadayon uban sa hugot nga pagtuo. Awhaga sila sa pagpamalandong kon unsay ilang nakat-onan gikan sa kasinatian ni Nephi samtang hilom nilang girekord ang ilang mga hunahuna ug mga plano sa pagpadayon. Ikonsiderar ang pagdapit og pipila ka mga boluntaryo sa pagpaambit sa ilang mga hunahuna ug mga panabot human sila makahuman sa pagsulat.

• Unsay akong nakat-onan karong adlawa nga makatabang nako sa akong sitwasyon?

• Unsa ang akong gibati karon nga makapalig-on sa akong pagsalig sa abilidad ug tinguha sa Langitnong Amahan sa paggiya kanako?

• Unsa ang akong mahimo sa pagsunod sa ehemplo ni Nephi ug sa pagpadayon uban sa hugot nga pagtuo bisan kon ang akong dalan ingon og dili klaro?

Komentaryo ug Background nga Impormasyon

Unsa kaha kon dili ko segurado bahin sa pag-aghat nga akong nadawat gikan sa Espiritu Santo?

Si Elder Ronald A. Rasband sa Korum sa Napulog Duha ka Apostoles mitudlo:

Ang akong kasinatian mao nga ang Espiritu kasagaran makig-istorya pinaagi sa pagbati. Mabati ninyo kini diha sa mga pulong nga pamilyar ninyo, nga masabtan ninyo, nga moaghat ninyo. …

… Kinahanglan gayod nga masaligon kita sa atong unang mga pag-aghat. Usahay mangatarungan kita, maghunahuna kita kon mibati ba kita og espirituhanong impresyon o ato lang ba kining mga hunahuna. Kon magsugod na kita sa pagpangagpas sa ikaduhang higayon, gani sa pagpangagpas sa ikatulong higayon, sa atong mga gibati—ug nakahimo kitang tanan niini—atong gibaliwala ang Espiritu; atong gikwestyon ang balaanong tambag. …

Ang unang mga pag-aghat putli nga inspirasyon gikan sa langit. Kon kini mokumpirmar o mopamatuod kanato, kinahanglan kitang moila niini kon para sa unsa kini ug dili gayod kini palabyon. (Ronald A. Rasband, “Tugoti ang Balaang Espiritu nga mao ang Mogiya,” Liahona, Mayo 2017, 94–96)

1 Nephi 4:10–12. Nganong kinahanglan nga patyon ni Nephi si Laban?

Aron mas makasabot sa sugo sa Ginoo sa pagpatay ni Laban, makatabang ang paghinumdom sa mosunod:

1. Ang Ginoo mihatag ni Laban og duha ka higayon nga ihatag ang mga palid nga tumbaga sa wala pa kuhaa ang iyang kinabuhi. Si Laban usa ka bakakon ug kawatan, ug sa duha ka higayon buot siya nga mopatay. Ubos sa balaod ni Moises, ang pagpangawat ug pagsulay sa pagpatay mahimong silotan og kamatayon (tan-awa sa Exodo 21:14; 22:2; Deuteronomio 24:7).

2. Ang Ginoo gusto nga si Lehi ug ang iyang mga kaliwat makabaton sa rekord sa kasulatan, bisan kon “usa ka tawo mamatay” (1 Nephi 4:13) aron lang kini mahitabo. Ang mga palid nga tumbaga wala lamang mipanalangin sa mga kaliwat ni Lehi apan naghatag usab og pipila ka mga sulod alang sa Basahon ni Mormon (sama sa mga kinutlo gikan ni Isaias ug gikan sa pasumbingay ni Zenos sa maayo ug ihalas nga mga kahoy nga oliba). Ang Basahon ni Mormon, gihubad gikan sa bulawan nga mga palid, nakapanalangin sa minilyon ka mga tawo ug makapanalangin sa minilyon pa. Sa kataposan, kining tanan nameligro sa dihang si Nephi mibarog ibabaw ni Laban ug misunod sa direksiyon sa Espiritu.

Dugang nga mga Kalihokan sa Pagkat-on

1 Nephi 5:1–9. Ang gahom sa pagpamatuod ug pagpasalamat

Kon ang mga estudyante makabenepisyo gikan sa pagkat-on mahitungod sa gahom sa pagpamatuod ug sa kamahinungdanon sa pagpasalamat, ikonsiderar ang pagbasa sa 1 Nephi 5:1–9 o ang pagtan-aw sa bidyo nga “Si Sariah Nagmaya sa Pagbalik sa Iyang mga Anak” (4:05).

Ang mga pangutana sama sa mosunod mahimong gamiton alang sa panaghisgot:

• Giunsa ni Lehi pagtubag ang mga reklamo ni Sariah? (Mahimo nimong itudlo nga si Lehi mitubag uban ang pagpamatuod ug pagsalig sa Ginoo kay sa kahadlok o pagduhaduha. Wala siya mitubag nga masuk-anon o walay pasensiya.)

• Unsa ang atong makat-onan gikan sa tubag ni Lehi ngadto kang Sariah?

• Unsa nga kamatuoran ang atong makat-onan gikan sa bersikulo 9? (Tabangi ang mga estudyante nga makaila og kamatuoran sama sa mosunod: Kon makadawat kita og mga panalangin gikan sa Dios, makapili kita nga mohunong ug magpasalamat Kaniya.)

1 Nephi 5:10–22. Ang kamahinungdanon sa mga kasulatan

Aron mahatagan og gibug-aton ang kamahinungdanon sa mga kasulatan, ikonsiderar ang pagbasa sa 1 Nephi 5:10–22 uban sa mga estudyante o sa pagpakita sa bidyo nga “Si Lehi Mipamatuod sa Kaimportante sa Kasulatan” (1:41). Ang mga estudyante mahimong magsiksik diha sa mga bersikulo sa importante nga sulod nga anaa sa mga palid nga tumbaga. Mahimo silang mopaambit kon sa unsang paagi nga ang mga kasulatan nga nahimong “labi nga bililhon” (1 Nephi 5:21) ngadto kanila ug sa ilang mga pamilya.