1 Nephi 3

Ang Dios Nag-andam og Paagi

Human sa pagbiyahe sulod sa mga adlaw sa kamingawan, si Nephi ug ang iyang mga igsoong lalaki miatubang og pagsulay sa ilang pagkamasulundon ug ilang hugot nga pagtuo sa Dios sa dihang gisugo sila sa pagbalik ngadto sa Jerusalem aron sa pagkuha sa mga palid nga tumbaga gikan kang Laban. Usahay, hangyoon ka usab sa Ginoo sa pagbuhat og lisod nga mga butang. Kini nga leksiyon makatabang kanimo sa pagpakita og hugot nga pagtuo sa Dios aron matuman ang Iyang gisugo kanimo nga buhaton.

Pagtabang sa mga estudyante nga makaila sa impluwensiya sa Ginoo sa ilang mga kinabuhi. Samtang magkat-on ang mga estudyante giunsa sa Manluluwas pagpanalangin ang mga kinabuhi sa mga tawo diha sa mga kasulatan, pangita og mga pamaagi aron matabangan sila nga makaila sa Iyang mga panalangin sa ilang kaugalingong mga kinabuhi. Dapita sila sa pagpamalandong kon giunsa tingali pagtubag sa Manluluwas ang ilang mga pag-ampo, pagpalig-on kanila, o pag-ayo kanila.

Pagpangandam sa estudyante: Dapita ang mga estudyante sa pagpaningkamot sa pagsag-ulo sa tudling sa doktrinal nga kahanas 1 Nephi 3:7 ug sa paghunahuna kon unsaon kini paggamit sa mga sitwasyon nga ilang giatubang sa ilang mga kinabuhi.

Mga Posibleng Kalihokan sa Pagkat-on

Lisod nga mga kasugoan

Aron matabangan ang mga estudyante nga makakita og kalambigitan sa asoy sa mga anak nga lalaki ni Lehi nga gisugo sa pagbuhat og lisod nga mga butang, ikonsiderar ang pagsulat ngadto sa pisara sa mga tubag sa mga estudyante sa mosunod nga mga pangutana ug i-refer kini sa tibuok leksiyon.

• Hain nga mga kasugoan, mga sumbanan, o ubang propetikanhong mga pagdapit ang pinakalisod nga sundon sa mga batan-on karon? Unsay mas nakalisod niini kay sa uban?

• Unsa ang imong isulti ngadto sa usa ka tawo kinsa mibati nga ang usa ka kasugoan o sumbanan lisod kaayo sundon?

Ang laing paagi sa pagsugod sa klase mao ang pagtabang sa mga estudyante nga makakita nga nagkinahanglan kita sa tabang sa Ginoo aron matuman ang Iyang gipangayo kanato. Usa ka paagi sa pagbuhat niini mao ang paghangyo sa usa ka estudyante sa pagbuhat og usa ka butang nga magkinahanglan og tabang sa magtutudlo. Pananglitan, isip kabahin sa usa ka buluhaton, tingali kinahanglan nilang ablihan ang usa ka butang nga nagkinahanglan og yawe gikan sa magtutudlo.

Kon adunay usa ka sugo nga lisod alang kanimo sa pagsunod, ibutang kini sa imong hunahuna samtang ikaw magtuon sa 1 Nephi 3. Tinguhaa nga makat-on gikan sa mga ehemplo nga imong gitun-an, ug pamalandong kon sa unsang paagi ang imong mga pagpili makaimpluwensiya sa imong relasyon ngadto sa Ginoo.

Ang Ginoo mihatag og sugo ngadto sa anak nga mga lalaki ni Lehi

Basaha ang 1 Nephi 3:1–6, nga mangita kon unsay gisugo ngadto sa mga anak nga lalaki ni Lehi nga buhaton.

• Ngano sa imong hunahuna nga ang mga igsoong lalaki ni Nephi husto sa pagtawag niini nga sugo nga usa ka “malisod nga butang”? (bersikulo 5).

Ang mosunod nga parapo makatabang kon ang mga estudyante dili segurado unsaon pagtubag sa nauna nga pangutana.

Hunahunaa kon unsa kaha ang gibati sa mga anak nga lalaki ni Lehi nga mibiya sa ilang panimalay ug mibiyahe og gatosan ka mga kilometro agi sa dili mabungahon [barren] nga nasod ngadto sa kamingawan unya hangyoon lang nga mobalik sa Jerusalem sa wala madugay aron kuhaon ang mga palid gikan kang Laban.

Basaha ang 1 Nephi 3:7–8 ug ilha ang rason nga gihatag ni Nephi sa iyang kaandam sa pagbuhat unsa ang gisugo sa Ginoo.

Ang 1 Nephi 3:7 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron dali nimo kining mapangita. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.

• Unsa ang nasabtan ni Nephi nga tingali wala masabti sa iyang mga igsoong lalaki?

Usa ka butang nga atong nakat-onan gikan sa bersikulo 7 mao nga ang Dios nag-andam og paagi alang kanato aron matuman ang bisan unsa nga Iyang ipabuhat kanato.

Ikonsiderar kon giunsa niining kamatuoran pagkakonektado ngadto sa mga kasugoan nga tingali mahagiton kanimo.

Bisan tuod ang Dios motabang kanimo nga matuman ang Iyang gipangayo, wala Siya misaad nga kini masayon o nga ang imong unang pagsulay magmalamposon.

Si Presidente Dieter F. Uchtdorf, kaniadto sa Unang Kapangulohan, mipasabot:

Ang pagsunod sa Manluluwas dili makakuha sa tanan ninyong mga pagsulay. Hinoon, mokuha kini sa mga babag tali kaninyo ug sa tabang nga gustong ihatag sa inyong Langitnong Amahan. Ang Dios magauban kaninyo. (Dieter F. Uchtdorf, “Tinguha alang sa Panimalay,” Liahona, Nob. 2017, 22)

• Unsa ang natabang niini nga pamahayag kanimo nga makasabot mahitungod sa Langitnong Amahan ug ni Jesukristo?

Paghunahuna og balik sa mga kasugoan, mga sumbanan, o ubang propetikanhong mga pagdapit nga imong giila sa sayo pa sa leksiyon nga pinakalisod nga sundon sa mga tinedyer.

• Unsa ang mga babag nga nakapalisod sa pagsunod niini nga mga kasugoan?

• Giunsa kaha sa Ginoo “[pag-andam] og paagi” aron pagtabang sa mga kabatan-onan sa pagsunod niini nga mga kasugoan?

Dapita ang mga estudyante sa pagpaambit og daghang mga tubag sa nauna nga pangutana.

Si Nephi ug ang iyang mga igsoong lalaki misulay sa pagkuha sa mga palid

Alang sa mosunod nga kalihokan, ang mga estudyante mahimong bahinon ngadto sa gagmay nga mga grupo, diin ang katunga sa grupo magtuon sa unang pagsulay ug ang laing katunga magtuon sa ikaduhang pagsulay. Ang matag grupo mahimong mangandam sa pagdrama kon unsay nahitabo sa ilang asoy ug ipakita alang sa laing grupo kinsa nagtuon sa laing asoy, o ang matag grupo mahimong mo-summarize sa ilang asoy alang sa laing grupo.

Mahimong tan-awon sa mga estudyante ang gisugyot nga mga bidyo imbes nga basahon o i-drama ang mga asoy.

Tun-i ang mosunod nga mga asoy sa unang duha ka pagsulay sa pagkuha sa mga palid nga tumbaga. Tan-awa kon sa unsang paagi mireak ang managlahing igsoon sa matag pagsulay. (Timan-i: Diha sa leksiyon sa “1 Nephi 4–5” imong makat-onan giunsa sa Ginoo sa kataposan nga mihatag og paagi aron sila magmalamposon.)

Unang pagsulay: Basaha ang 1 Nephi 3:10–15 o tan-awa ang “Si Nephi Gigiyahan sa Espiritu aron Makuha ang mga Palid nga Tumbaga” gikan sa time code 4:43 hangtod sa 8:18. Kini nga bidyo anaa sa ChurchofJesusChrist.org. (Mahimong makatabang ang pagkahibalo nga ang pagripa usa ka paagi sa sinalagma nga pagpili og usa ka opsiyon taliwala sa daghan.)

Ikaduhang pagsulay: Basaha ang 1 Nephi 3:22–31; 4:1, o tan-awa ang “Si Nephi Gigiyahan sa Espiritu aron Makuha ang mga Palid nga Tumbaga” gikan sa time code 8:18 hangtod sa 15:10.

• Unsa kaha ang nakat-onan niini nga managsoon bahin sa ilang kaugalingon gikan sa mga hagit nga ilang nasinati samtang naningkamot sa pagsunod sa kasugoan sa Dios?

• Ngano sa imong hunahuna nga ang atong mahigugmaong Dios mahimong motugot kanato nga makigbisog usa sulod sa panahon una pa Niya ihatag ang paagi aron matuman ang Iyang kabubut-on?

• Sa imong hunahuna sa unsang paagi nga ang managlahing reaksiyon sa managsoon sa unsay nahitabo nakaimpluwensiya sa ilang hugot nga pagtuo ug relasyon ngadto kang Jesukristo? Ngano?

Ang paggamit niini nga asoy sa imong kinabuhi

Ang Manluluwas makatabang nimo sa pagbuntog sa mga babag nga makapalisod sa pagsunod sa Iyang mga sugo ug pagsunod sa tambag sa Iyang mga propeta. Aron matabangan ka nga magamit kini sa imong kinabuhi, tubaga ang mosunod nga mga pangutana sa imong journal sa pagtuon.

Ikonsiderar ang pagpakita sa mosunod nga mga kapilian nga pangutana alang sa kasayoran sa estudyante.

Kon mahuman na ang mga estudyante, pagdapit og mga boluntaryo sa pagpaambit og bahin sa unsay ilang gisulat ngadto sa klase. Ipamatuod nga ang Ginoo kanunay nga mohimo og paagi aron matuman nato ang Iyang gisugo kanato.

1. Hunahunaa nga si Nephi naghatag kanimo og tambag mahitungod sa usa ka sugo o sa tambag sa propeta nga imong nakita nga lisod sundon. Unsa sa imong hunahuna ang tingali iyang isulti kanimo?

2. Unsa ang piho nga mga aksiyon ang imong buhaton aron mas hingpit nga masunod ang usa sa mga sugo sa Ginoo o mga tambag sa propeta?

3. Unsa ang imong nakita o nasinati nga naghatag kanimo og pagsalig nga ang Ginoo moandam og paagi alang kanimo sa pagsunod sa Iyang mga sugo ug pagsunod sa Iyang propeta?

Kon ang mga estudyante makabenepisyo gikan sa pagtuon sa nahabilin nga asoy ni Nephi nga nagkuha sa mga palid sa dili pa sila tudloan sa leksiyon sa doktrinal nga kahanas alang sa 1 Nephi 3:7, mahimo nimong ihuwat ang pagtudlo sa leksiyon sa doktrinal nga kahanas hangtod human sa “1 Nephi 4–5” nga leksiyon. Ang laing opsiyon mao ang pagpa-summarize sa usa ka estudyante sa mga panghitabo nga narekord sa 1 Nephi 4 aron matabangan ang klase nga makakita kon giunsa sa Ginoo paghatag og paagi sa pagsunod sa Iyang mga kasugoan.

Komentaryo ug Background nga Impormasyon

Asa ko magsugod kon ako nanlimbasog sa pagsunod sa daghang mga kasugoan?

Si Presidente Harold B. Lee (1899–1973) mitudlo:

Ang labing importante sa tanang mga sugo sa Dios mao kana ang pinakalisud ninyong sundon karon. … Buntuga kana ug dayon sugdi ninyo ang sunod nga pinakalisod ninyong sundon. Mao kana ang paagi sa pagkabalaan sa inyong kaugalingon pinaagi sa pagsunod sa mga sugo sa Dios. (Mga Pagtulun-an sa mga Presidente sa Simbahan: Harold B. Lee [2000], 36)

Nganong ang Langitnong Amahan naghatag kanato og mga sugo?

Ang Dios motabang sa pagtubag niini nga pangutana diha sa Doktrina ug mga Pakigsaad 82:8–9.

Si Sister Carole M. Stephens, kanhi sa Kinatibuk-ang Kapangulohan sa Relief Society, mipasabot:

Samtang kita nagtugot sa atong Amahan sa pagtudlo kanato, magsugod kita sa pagkahibalo nga ang Iyang mga balaod mga timaan sa Iyang gugma alang kanato ug ang pagkamasulundon ngadto sa Iyang mga balaod maoy usa ka pahayag sa atong gugma alang Kaniya. (Carole M. Stephens, ““Kon Nahigugma Kamo Kanako, Inyong Pagatumanon ang Akong mga Sugo,” Liahona, Nob. 2015, 119)

Dugang nga mga Kalihokan sa Pagkat-on

“Ang Kaisog ni Nephi”

Aron ipaila ang linya sa istorya sa 1 Nephi 3, ikonsiderar ang pagdapit sa mga estudyante sa pagkanta o pagpaminaw sa “Ang Kaisog ni Nephi” (Songbook sa mga Bata, 64). Dayon pagdapit og usa ka boluntaryo sa pagpaambit sa mga detalye sa asoy nga gihisgotan sa unang bersikulo sa kanta.

Dapita ang mga estudyante sa pagpaambit og mga hunahuna, mga pagbati, o mga pulong nga mipatigbabaw nila samtang naminaw sila sa kanta.

Ang kamahinungdanon sa atong kinaiya

Dapita ang mga estudyante sa pagtubag sa mosunod nga mga pangutana:

Hain sa mga anak ni Lehi ang mibiya sa ilang panimalay aron mopuyo sa kamingawan uban sa ilang mga ginikanan? mibalik sa Jerusalem aron sa pagkuha sa mga palid nga tumbaga? misakripisyo sa ilang mga bahandi agig baylo sa mga palid nga tumbaga? (Ang tubag sa matag pangutana mao silang upat.)

Dapita ang mga estudyante sa pagbasa sa 1 Nephi 3:6 sa pagpangita og usa ka rason ngano nga ang Ginoo mipabor kang Nephi labaw pa kay kang Laman ug Lemuel bisan og ang tanan nga mga igsoon misunod sa pagbuhat.

Dapita ang mga estudyante sa pagpaambit og mga kasinatian sa dihang mibati sila nga napanalanginan tungod kay andam silang misunod nga walay pagreklamo.

Ubang mga ehemplo sa pagkamasulundon ngadto sa Dios

Hangyoa ang mga estudyante sa pagpaambit og mga ehemplo gikan sa mga kasulatan o sa kasaysayan sa Simbahan ngadto kanila kinsa mipakita og dakong hugot nga pagtuo sa Dios pinaagi sa pagkamasulundon panahon sa lisod nga mga kahimtang. Kon ang mga estudyante nagkinahanglan og tabang, ipakita ang mga hulagway sa mga tawo sama nila ni Noah, Moises, o Joseph Smith.

Dapita ang mga estudyante sa pagpaambit kon unsa ang andam nga agian sa tawo aron sundon, unsa nga mga babag ang ilang giatubang, ug giunsa sa Ginoo pag-andam og paagi aron matuman nila ang Iyang gisugo kanila.

Seguroha ang paggiya sa diskusyon ngadto sa ehemplo sa Manluluwas sa hingpit nga pagkamasulundon ngadto sa Iyang Amahan. Ikonsiderar ang paggamit sa mosunod nga pamahayag:

“Sa tanang mga leksiyon nga atong nakat-onan gikan sa kinabuhi sa Manluluwas, walay mas tin-aw ug gamhanan kaysa sa leksiyon sa pagkamasulundon.” (Robert D. Hales, “Kon Nahigugma Kamo Kanako, Inyong Pagatumanon ang Akong mga Sugo,” Liahona, Mayo 2014, 35).