1 Nephi 1

“Dihay Miabot nga mga Propeta”

Ang mga propeta dili kanunay mopaambit og mga mensahe nga sikat sa kalibotan, apan ang ilang mga pagtulon-an ug mga pasidaan nagpakita sa gugma sa Ginoo alang sa Iyang katawhan. Si Lehi gitawag sa Dios aron sa pagsangyaw og paghinulsol ngadto sa mga katawhan sa Jerusalem. Bisan pa sa iyang mga hangyo ug mga pasidaan, ilang gisalikway ang iyang mga pulong ug mitinguha sa pagpatay kaniya. Kini nga leksiyon makatabang kanimo nga mobati sa kamahinungdanon sa pagdawat ug pagsunod sa mga propeta sa Dios.

Gigamit ang pagpamatuod sa mga propeta. Ang mga propeta gitawag ug namulong alang sa Dios (tan-awa sa Ang Giya ngadto sa mga Kasulatan, “Propeta”). Usa ka paagi sa pagpamatuod ni Jesukristo mao ang pagtugot sa pagpamatuod sa mga propeta nga madungog diha sa atong mga lawak tunghaan. Samtang magsiksik ka sa mga kasulatan o magtuon sa mga pakigpulong sa komperensiya, pangitaa ang propetikanhong mga pagpamatuod ni Jesukristo. Tinoa ang angay nga mga paagi sa pagtabang sa mga estudyante nga makakita ug makadungog niini nga mga pagpamatuod isip kabahin sa ilang kasinatian sa pagkat-on.

Pagpangandam sa estudyante: Dapita ang mga estudyante nga motambong nga andam mopaambit sa bag-ohay lang nga mga pasidaan nga ilang nadungog gikan sa mga propeta ug sa pagpamalandong kon giunsa nila pagsanong niadtong mga pasidaan.

Mga Posibleng Kalihokan sa Pagkat-on

Mga pasidaan

Ipakita ang mosunod nga hulagway, paghulagway ug pangutana.

Hunahunaa nga aduna kay kahigayonan nga makalutaw o makasakay og bangka niini nga suba.

• Aduna ka bay mga kabalaka? Ngano o nganong dili?

Sa dihang hapit na ka magsugod sa imong pagsuroy, usa ka tawo nagpasidaan kanimo nga ang suba murag malinawon apan ang usa ka bahin mopamatuod sa kapeligro ug delikado sa kinabuhi.

• Mosalig ka ba sa tawo nga mipasidaan kanimo? Ngano o nganong dili?

Ang mosunod nga hulagway mao ang susamang suba nga adunay bahin nga imong nakita kaganina nga gimarkahan:

Ipakita ang mosunod nga hulagway ug dapita ang mga estudyante sa pagtubag sa may kalabotan nga mga pangutana.

• Unsa man karon ang imong nahibaloan ug bation mahitungod sa tawo nga mihatag sa pasidaan?

• Unsa ang matudlo kanato niining hinanduraw nga sitwasyon mahitungod sa tahas sa mga propeta sa Dios?

Pahinumdomi ang mga estudyante sa ilang pagpangandam alang sa klase samtang namalandong sila sa mosunod.

• Mga peligro nga gipasidaan kanato sa mga propeta sa atong panahon

• Ang mga panalangin sa pagsunod ug ang posible nga mga sangpotanan sa pagbalewala sa ilang mga pasidaan

• Ang imong mga pagbati mahitungod sa pagsunod sa ilang mga pasidaan

• Nganong kinahanglan nimo ang mga pasidaan sa Dios pinaagi sa Iyang mga propeta

Sa imong pagtuon, pangitaa ang mga kamatuoran nga makatabang kanimo nga mobati og mas dakong tinguha sa pagsunod sa mga propeta sa Dios.

“Dihay miabot nga mga propeta”

Ang basahon sa 1 Nephi gibanabana nga nagsugod sa mga 600 BC sa Jerusalem. Niining panahona, daghan sa mga Judeo ang mibiya sa Dios ug nagsimba sa dili tinuod nga dios nga si Baal, misalig sa mga pulong sa bakakon nga mga propeta, ug naghimo sa makasasalang kinaiya sama sa pagpangawat, pagpatay, ug grabeng imoralidad. (tan-awa Jeremiah 2; 7). Hunahunaa kon sa unsang paagi kini nga mga kahimtang susama sa kalibotan karon.

Basaha ang 1 Nephi 1:1–4, nga mangita kon giunsa ni Nephi pagsugod ang iyang rekord.

• Unsa sa imong hunahuna ang importante nga masabtan gikan niini nga mga bersikulo? Ngano man?

Ang mga propeta nga gihisgotan sa bersikulo 4 mahimong naglakip sa mga propeta sa Daang Tugon nga sila si Jeremiah, Habakkuk, Obadiah, Nahum, Zephaniah, ug uban pa.

Basaha ang 1 Nephi 1:5–15 ug pangita og mga detalye mahitungod sa tawag ni Lehi nga mahimong propeta. Mahimo nimong tan-awon “Ang Ginoo Misugo sa Pamilya ni Lehi sa Pagbiya sa Jerusalem” gikan sa time code 0:39 hangtod sa 5:53, anaa sa ChurchofJesusChrist.org.

• Unsa ang mipatigbabaw kanimo mahitungod sa kasinatian ni Lehi? Ngano man?

• Unsa ang nakat-onan ni Lehi mahitungod sa Langitnong Amahan ug ni Jesukristo gikan sa iyang nakita?

• Ngano nga kini nga mga kamatuoran mahitungod sa Langitnong Amahan ug ni Jesukristo importante nga mahibaloan sa imong mga kahimtang?

Basaha ang 1 Nephi 1:18–20 aron makita unsa ang gitudlo ni Lehi ug giunsa pagsanong sa mga katawhan sa Jerusalem. Mahimo nimong tan-awon ang “Ang Ginoo Misugo sa Pamilya ni Lehi sa Pagbiya sa Jerusalem” gikan sa time code 5:53 hangtod sa 7:26.

• Sa iyang mga paningkamot, sa unsang paagi si Lehi sama ni Jesukristo?

• Unsa ang imong nakat-onan mahitungod sa mga propeta gikan sa mga kasinatian ni Lehi?

Usa ka kamatuoran nga atong makat-onan gikan sa ehemplo ni Lehi mao nga ang Dios nagtawag og mga propeta sa pagpasidaan sa mga sangpotanan sa sala ug sa pagpamatuod kang Jesukristo.

Dapita ang mga estudyante sa paghisgot sa mosunod nga mga pangutana nga magkapares o diha sa gagmay nga mga grupo.

• Giunsa nimo pagkakita sa mga propeta nga nagtuman niini nga mga responsibilidad sa atong panahon?

• Sa unsang mga pamaagi nga ang ubang mga tawo karon nagpakita og kasuko ngadto sa mga propeta o nagsalikway sa ilang mga pulong? Ngano sa imong hunahuna nga sila misanong niini nga paagi?

Si Elder Neil L. Andersen sa Korum sa Napulog Duha ka Apostoles mipasabot sa kamahinungdanon sa unsay gitudlo sa mga propeta sa Dios:

Ang pag-angkla sa atong [mga] kalag ngadto kang Ginoong Jesukristo nagkinahanglan nga maminaw niadtong Iyang gipadala. …

Ang tingog sa propeta, samtang mabinationg gipamulong, kasagaran mahimong usa ka tingog nga manawagan kanato nga mag-usab, nga maghinulsol, ug mobalik ngadto sa Ginoo. Kon ang pagkorihir gikinahanglan, dili nato langayon. Ug ayaw kaalarma kon ang tingog sa propeta bahin sa pagpasidaan mosupak sa popular nga mga opinyon sa atong panahon. Ang pagbiay-biay sa nasuko nga mga dili tumutuo kanunayng isalibay sa higayon nga magsugod na sa pagsulti ang propeta. Samtang magpaubos kamo sa pagsunod sa tambag sa propeta sa Ginoo, mosaad ko kaninyo og dugang nga panalangin sa kaluwasan ug kalinaw. …

… Ang labing mahinungdanon nga responsibilidad ug labing bililhon nga gasa sa propeta ngari kanato mao ang iyang tinuod nga pagsaksi, ang iyang sigurado nga kahibalo, nga si Jesus mao ang Kristo. (Neil L. Andersen, “Ang Propeta sa Dios,” Liahona, Mayo 2018, 26–27)

• Ngano sa imong hunahuna nga ang labing dako nga responsibilidad sa propeta mao ang pagpaambit sa iyang pagsaksi kang Jesukristo?

• Unsa ang makatabang nimo nga matinud-anong mosanong sa tambag ug mga pasidaan sa mga propeta sa Dios sa atong panahon?

Ang tahas sa mga propeta ug ang kamahinungdanon sa pagsunod kanila

Ipakita ang mosunod nga mga instruksiyon. Hatagi ang mga estudyante og pipila ka minuto sa pagrekord sa ilang mga hunahuna.

Hunahunaa nga ang imong higala nga dili miyembro sa Simbahan nagpadala kanimo sa mosunod nga mensahe sa text:

“Nahinumdom ko nga naghisgot ka mahitungod sa imong simbahan nga adunay mga propeta. Tinuod ba gyod kana? Unsay gibuhat sa inyong mga propeta? Susama ba sila sa mga propeta sa Biblia?”

Gusto nimong segurohon nga ang ilang mga pangutana matubag og klaro. Pag-andam og tubag gamit ang matag usa sa mosunod:

Ang mga estudyante maka-access sa mosunod nga mga kapanguhaan diha sa Gospel Library nga app. Kon gikinahanglan, paghatag og giprinta nga mga kopya aron rebyohon sa mga estudyante.

1. Mga tudling ug mga ehemplo gikan sa 1 Nephi 1 (ug uban pang mga tudling sa kasulatan mahitungod sa mga propeta nga tingali imong nahibaloan) nga makatabang nila nga masabtan ang tahas sa propeta.

2. Mga ehemplo kon sa unsang paagi ang modernong mga propeta nakatabang nimo nga maduol kang Jesukristo. Ikonsiderar ang pagpaambit og mga ehemplo diin ang mga propeta nakaimpluwensiya kanimo gikan sa bag-o nga mga pakigpulong sa kinatibuk-ang komperensiya, mga artikulo sa magasin sa Simbahan, o ang Alang sa Kalig-on sa mga Kabatan-onan nga booklet.

3. Mga ehemplo gikan sa imong kinabuhi o sa kinabuhi sa uban nga nagpakita og positibo nga mga sangpotanan sa pagpaminaw sa mga propeta. Ikonsiderar ang pagdugang sa imong personal nga pagpamatuod sa mga propeta.

Human sa igong panahon sa pagpangandam, ipares-pares ang mga estudyante. Dapita sila sa paghunahuna nga nakahukom sila sa pagtubag sa pangutana sa ilang higala sa personal kay sa pinaagi sa text message. Ang matag estudyante mahimong magpuli-puli isip ang miyembro sa Simbahan nga nagpasabot ngadto sa iyahang higala.

Ikonsiderar ang paghisgot og mga ehemplo sa bag-ong tambag, pagkorehir, ug paggiya nga niabot gikan sa buhing mga propeta ug apostoles.

Pagkahuman, ipaambit ang personal nga pagpamatuod kon giunsa sa mga propeta pagtabang kanimo nga maduol kang Jesukristo. Ikonsiderar ang pagdapit sa andam nga mga estudyante nga mopaambit sa ilang mga pagpamatuod.

Pamalandongi kon giunsa nimo pagsanong ang bag-ohay lang nga mga pasidaan gikan sa mga propeta. Tinguhaa ang panabang sa Langitnong Amahan pinaagi sa Espiritu Santo sa pag-ila sa mga pamaagi nga mas magmaampingon ka nga makatuman sa ilang tambag. Isulat kadto nga mga ideya sa imong journal sa pagtuon ug mainampoong mopili og usa nga gamiton sa imong kinabuhi.

Komentaryo ug Background nga Impormasyon

Sa unsang paagi nga ang mensahe sa paghinulsol nga gipaambit sa mga propeta malaomon ug makatabang?

Si Presidente Russell M. Nelson mipasabot sa posible nga mga tubag. Tan-awa “Kita Makabuhat og Mas Maayo pa ug Mahimong Mas Maayo” gikan sa time code 0:22 hangtod sa 2:37, anaa sa ChurchofJesusChrist.org.

1 Nephi 1:20. Unsa ang “malumo nga mga kaluoy sa Ginoo”?

Si Elder David A. Bednar sa Korum sa Napulog Duha ka mga Apostoles mipasabot:

Ang malumo nga mga kaluoy sa Ginoo mao ang labing personal ug indibidwal nga mga panalangin, kalig-on, proteksyon, pagpasalig, paggiya, mahigugmaong kaluoy, paghupay, pag-abag, ug espirituhanong mga gasa diin atong nadawat gikan ug tungod sa ug pinaagi ni Ginoong Jesukristo. (David A. Bednar, “Ang Malumo nga mga Kaluoy sa Ginoo,” Liahona,Mayo 2005, 99)

Ngano nga ang mga propeta nagtudlo sa kamatuoran bisan kon kini dili popular?

Giunsa sa mga propeta pagpamatuod ni Jesukristo karon?

Ikonsiderar ang pagtan-aw sa pagpamatuod ni Presidente Russell M. Nelson kabahin kang Jesukristo sa “Espesyal nga mga Saksi ni Kristo—Presidente Russell M. Nelson” (5:47).

Dugang nga mga Kalihokan sa Pagkat-on

1 Nephi 1:1. “Ug nakasinati sa daghan nga mga kasakit … , bisan pa, gipangga sa Ginoo”

Dapita ang mga estudyante sa pagpamalandong sa mga kasakit (usa ka butang nga hinungdan sa kasakit o pag-antos) nga ilang nasinati o tingali gisinati karon. Dapita sila nga mobasa sa 1 Nephi 1:1. Hangyoa sila sa pagpaambit kon unsaon nato nga mahimong “pinangga sa Ginoo” taliwala sa atong mga kasakit. Ikonsiderar ang pagtan-aw sa “Hingpit nga Kalipay ug Espirituhanon nga Pagsugakod” (17:01) gikan sa time code 5:13 hangtod sa 6:18 aron makita ang pagpasabot ni Presidente Russell M. Nelson kon unsaon nato pagbaton og kalipay panahon sa kasakit.

Ang mga estudyante mahimong mobasa sa 2 Nephi 2:2 ug Doktrina ug mga Pakigsaad 90:24 aron makita kon unsaon paghimo sa Dios ang atong mga kasakit alang sa atong kaayohan. Dapita sila sa pagpamalandong kon giunsa sila pagpangga sa Ginoo diha sa ilang mga kasakit ug sa unsang paagi ang Dios mitabang sa ilang mga kasakit nga mahimong alang sa ilang kaayohan. Dapita sila sa pagpaambit kon sa unsang paagi nga ang pagkakita niining maayong mga butang sa ilang mga kasakit makatabang nila sa paglahutay niadtong mga kasakit nga matinud-anon.

1 Nephi 1:20. “Ang malumo nga mga kaluoy sa Ginoo”

Human magtuon sa asoy ni Lehi nga gitawag isip propeta ug gisalikway sa iyang katawhan, dapita ang usa ka estudyante sa pagbasa sa 1 Nephi 1:20, nga mangita sa unsay gitinguha ni Nephi nga masabtan sa iyang mga magbabasa mahitungod sa Ginoo.

Aron matabangan ang mga estudyante nga masabtan unsa ang pasabot sa “ang malumo nga mga kaluoy sa Ginoo,” ikonsiderar ang pagpaambit sa pamahayag ni Elder David A. Bednar sa Korum sa Napulog Duha ka Apostoles nga makita sa “Komentaryo ug Background nga Impormasyon” nga seksiyon.

Sunod, dapita ang mga estudyante sa pagbasa sa Moroni 10:3 ug pangitaa ang usa sa kataposang imbitasyon ni Moroni sa mga magbabasa sa Basahon ni Mormon sa kataposan sa rekord.

Ipasabot nga gikan sa sinugdanan hangtod sa kataposan, ang Basahon ni Mormon naglangkob og daghang mga ehemplo ug mga pagtulon-an nga naghulagway sa maluluy-on nga kinaiya sa Ginoo. Ikonsiderar ang pagdapit sa mga estudyante sa paghunahuna ug pagpaambit sa pipila niini nga mga ehemplo.

Dapita ang mga estudyante diha sa ilang pagsugod sa pagtuon sa Basahon ni Mormon karong tuiga sa pagpangita og ebidensiya sa kaluoy sa Ginoo. Mahimo gani nga makatabang kanila ang paggahin og usa ka pahina sa ilang journal sa pagtuon o paghimo og piho nga tag diha sa Library sa Ebanghelyo nga makatabang nila pag-organisar sa ilang mga nadiskobrehan. Ikonsiderar ang pag-follow up matag karon ug unya ug dapita ang mga estudyante sa pagpaambit sa mga ehemplo nga ilang nakit-an.