1 Nephi 6–10

Kinatibuk-ang Pagpasabot

Si Lehi adunay panan-awon diin siya nakakita og usa ka matahom nga kahoy. Kini nga kahoy ug ang mga bunga niini mirepresentar sa gugma sa Dios, ug kini “mipuno sa kalag [ni Lehi] sa tumang hingpit nga kalipay” (1 Nephi 8:12). Pinaagi sa iyang panan-awon, si Lehi nakat-on mahitungod sa dalan nga kinahanglan natong agian ug unsaon sa pagpabilin niini aron makatagamtam sa panalangin sa gugma sa Dios. Human makadungog kang Lehi nga nagtudlo mahitungod sa kahoy sa kinabuhi ug sa panagna sa pag-abot ni Kristo, si Nephi mitinguha nga makat-on sa kamatuoran sa mga pulong sa iyang amahan sa iyang kaugalingon.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

1 Nephi 6–7

Katuyoan sa leksiyon: Kini nga leksiyon makatabang sa mga estudyante nga makasabot kon sa unsang paagi nga ang mga katuyoan sa Basahon ni Mormon makatabang kanila sa ilang pagtuon ug sa ilang mga kinabuhi.

• Pagpangandam sa estudyante: Awhaga ang mga estudyante sa paghimo sa ilang inadlaw nga personal nga pagtuon sa Basahon ni Mormon. Dapita sila sa pagpamalandong sa ilang kasinatian sa pagtuon sa Basahon ni Mormon ug unsay ilang nakat-onan.

• Video: “Ang Pamilya ni Ishmael Miuban sa Pamilya ni Lehi” (12:24)

• Sugyot sa pagtudlo pinaagi sa videoconference: Ikonsiderar ang pag-role-play sa sitwasyon sa sinugdanan sa leksiyon pinaagi sa pagpangutana sa mga estudyante sa mga pangutana ug pagdapit kanila sa pag-type sa ilang mga tubag diha sa chat. Mahimong makatabang ang pag-assign og usa ka estudyante nga mahimong moderator sa chat ug sa pagbasa sa mga tubag sa pagsulod ini. Pasalamati ang mga estudyante sa ilang mga tubag ug pangutana og bisan unsang follow-up nga mga pangutana nga mahimong mosangpot sa dugang nga mga panabot.

Pag-angkon og Espirituhanong Kahibalo, Bahin 3

Katuyoan sa leksiyon: Kini nga leksiyon makatabang sa mga estudyante sa pagsabot sa kamahinungdanon sa pagpangita sa kamatuoran gikan sa mga tinubdan nga mahigugmaong gihatag kanato sa Langitnong Amahan ug ni Jesukristo.

• Pagpangandam sa estudyante: Dapita ang mga estudyante sa paghunahuna mahitungod sa importante nga mga pangutana o mga kabalaka nga anaa kanila ug sa nagkalain-laing mga tinubdan nga mahimo nilang dangpan alang sa mga tubag. Awhaga sila nga mangandam sa pagpaambit og ehemplo sa usa niini nga mga tinubdan o gani magdala og usa ngadto sa klase.

• Mga butang: Usa ka pitsel sa limpyong mainom nga tubig ug usa ka tin-aw nga baso; alternatibo, usa ka planggana sa tubig, sabon sa kamot, ug usa ka tualya

• Handout: “Paggamit sa Balaanong Gitudlo nga mga Tinubdan”

• Sugyot sa pagtudlo pinaagi sa videoconference: Alang sa kalihokan ubos sa “Paggamit sa balaanong gitudlo nga mga tinubdan,” ikonsiderar ang pagpakita sa mga instruksiyon diha sa screen ug pagdapit sa mga estudyante sa pagkuha og screenshot. Isip alternatibo nga paagi, ikonsiderar ang pagbutang sa mga instruksiyon diha sa chat feature ug dapita ang mga estudyante sa pag-copy ug sa pag-paste niini ngadto sa usa ka dokumento sa ilang kaugalingong himan [device]. Dayon bahina ang mga estudyante ngadto sa mga breakout room aron dungan nga hisgotan ug kompletohon ang kalihokan sa pagkat-on.

1 Nephi 8:1–18

Katuyoan sa leksiyon: Kini nga leksiyon gituyo aron matabangan ang mga estudyante nga madugangan ang ilang tinguha nga mobati og kalipay pinaagi sa gugma sa Dios ug sa Pag-ula ni Jesukristo.

• Pagpangandam sa estudyante: Dapita ang mga estudyante sa pagpamalandong sa mosunod nga mga pangutana: Sa unsang mga paagi nga ang usa ka tawo mobati sa gugma sa Dios? Kanus-a nimo gibati ang Iyang gugma alang kanimo? Ang mga estudyante mahimo usab nga makig-istorya sa usa ka miyembro sa pamilya o sa lider sa Simbahan mahitungod kon giunsa nila pagbati ang gugma sa Dios alang kanila.

• Mga bidyo: “Kristo: Ang Kahayag nga Nagdan-ag sa Kangitngit” (11:29; tan-awa gikan sa time code 0:00 hangtod sa 0:54 ug gikan sa time code 9:09 hangtod sa 10:02); “Ang Kahayag Mounong ngadto sa Kahayag” (11:11; tan-awa gikan sa time code 0:32 hangtod sa 2:33); “Nadiskobrehan ni Lehi ang Kahoy sa Kinabuhi” (4:32; tan-awa gikan sa time code 1:52 hangtod sa 4:32)

• Hulagway: Usa ka hulagway ni Maria nga nagkugos sa batang Jesus

• Sugyot sa pagtudlo pinaagi sa videoconference: Alang sa kalihokan 2 ubos sa “Pagbati sa gugma sa Dios ug dakong kalipay pinaagi ni Jesukristo,” ikonsiderar ang pag-download sa mga bidyo ug tugoti ang mga estudyante sa pagpili kon hain nga bidyo ang tan-awon. Isip alternatibo nga paagi, bahina ang mga estudyante ngadto sa mga breakout room, ug i-assign ang usa sa mga bidyo sa matag grupo. Usa ka estudyante sa matag grupo kinahanglan nga mo-play sa bidyo ug mopaambit sa iyang screen alang sa ubang mga miyembro sa grupo. Dapita ang mga estudyante sa pagpamalandong ug paghisgot sa mga panalangin nga anaa pinaagi ni Jesukristo. Ang matag grupo mahimo dayon nga mopaambit ngadto sa klase unsay ilang nahisgotan.

1 Nephi 8:19–38

Katuyoan sa leksiyon: Kini nga leksiyon makatabang sa mga estudyante sa pagsunod sa pulong sa Dios aron sa paggiya kanila ngadto sa Iyang labing dako nga mga panalangin.

• Pagpangandam sa estudyante: Awhaga ang mga estudyante sa pagbasa sa 1 Nephi 8:19–34 aron mahimong pamilyar sa mga simbolo sa panan-awon ni Lehi ug mangandam sa paghisgot niini sa klase.

• Hulagway nga ipakita: Usa ka Hulagway sa panan-awon ni Lehi

• Bidyo: “Nakakita si Lehi og Gunitanan nga Puthaw ug Kadtong Kinsa Nangahisalaag” (3:30)

• Sugyot sa pagtudlo pinaagi sa videoconference: Imbes nga hangyoon ang mga estudyante sa pagdrowing og mga bahin sa panan-awon, ikonsiderar ang pagpasalida sa bidyo ug ihunong kini sa matag higayon nga mapakita ang usa sa importanteng elemento. Ang mga estudyante mahimong hangyoon sa pagpaambit sa ilang mga hunahuna mahitungod sa simbolismo ug mangita kon unsay gitudlo sa mga kasulatan mahitungod niini. Aron makapangandam alang sa klase, ikonsiderar ang pagsulat sa time code sa matag gutlo nga ang bidyo kinahanglang ihunong.

1 Nephi 10; 11:1–6

Katuyoan sa leksiyon: Kini nga leksiyon makatabang sa mga estudyante sa ilang mga paningkamot sa makugihong pagpangita og kahibalo gikan sa Ginoo.

• Pagpangandam sa estudyante: Dapita ang mga estudyante sa pagpangutana sa usa ka ginikanan o lider sa kabatan-onan kon unsay ilang gibuhat aron makugihong mangita sa kamatuoran gikan sa Dios o kon giunsa sa Espiritu Santo pagpadayag sa kamatuoran ngadto kanila. Awhaga ang mga estudyante sa pagtambong nga andam sa pagpaambit og ideya ngadto sa klase.

• Sugyot sa pagtudlo pinaagi sa videoconference: Ikonsiderar ang paggamit og digital whiteboard aron ang mga estudyante magtinabangay sa paglista og mga paagi sa makugihong pagpangita sa kamatuoran gikan sa Dios ug sa mga paagi nga ang Dios mopadayag sa kamatuoran pinaagi sa Espiritu Santo.