1 Nephi 8:19–38

Hugot nga Mogunit sa Pulong sa Dios

Daghang mga tawo sa kalibotan ang gusto nga mobati og kalipay ug gugma apan wala mahibalo kon asa kini pangitaa. Pinaagi sa iyang panan-awon sa kahoy sa kinabuhi, si Lehi nakat-on mahitungod sa dalan nga kinahanglan natong agian ug unsaon sa pagpabilin niini aron makatagamtam sa mga panalangin sa gugma sa Dios. Kini nga leksiyon makatabang kanimo sa pagsunod sa pulong sa Dios sa paggiya kanimo ngadto sa Iyang labing dako nga mga panalangin.

Pag-ampo kanunay alang sa imong mga estudyante.Ang Langitnong Amahan nakaila sa matag usa sa imong mga estudyante. Sa imong pag-ampo Kaniya, makatabang Siya nimo nga makaila sa mga panginahanglan sa imong mga estudyante ug makadasig nimo og mga paagi sa pagtubag niadto nga mga panginahanglan. Paminaw sa mga pag-aghat samtang nangandam ka sa pagtudlo ug atol sa leksiyon.

Pagpangandam sa estudyante: Pag-ampo kanunay alang sa imong mga estudyante. Ang Langitnong Amahan nakaila sa matag usa sa imong mga estudyante. Sa imong pag-ampo Kaniya, makatabang Siya nimo nga makaila sa mga panginahanglan sa imong mga estudyante ug makadasig nimo og mga paagi sa pagtubag niadto nga mga panginahanglan. Paminaw sa mga pag-aghat samtang nangandam ka sa pagtudlo ug atol sa leksiyon.

Posibleng mga Kalihokan sa Pagkat-on

Panan-awon ni Lehi

Paggahin og panahon sa makadiyot sa pagtan-aw niini nga painting sa panan-awon ni Lehi. Naglakip kini sa kahoy, nga nagrepresentar sa gugma sa Dios, ug sa bunga niini, nga nagsimbolo sa mga panalangin nga gitanyag pinaagi sa Pag-ula ni Jesukristo (tan-awa sa David A. Bednar, “Damgo ni Lehi: Hugot nga Paggunit sa Gunitanan,” Liahona, Okt. 2011, 32–37). Naglakip usab kini og pipila ka dugang nga mga elemento.

• Unsa ang mahinungdanon kanimo mahitungod niini nga painting?

• Unsay imong makat-onan gikan sa imong giobserbahan?

Si Presidente Boyd K. Packer (1924–2015) sa Korum sa Napulog Duha ka Apostoles mipasabot:

Kamo mahimong magtuo nga ang damgo o panan-awon walay talagsaon nga kahulogan alang kaninyo, apan kini aduna. Kamo ania dinhi, kitang tanan ania dinhi. (Boyd K. Packer, “Pagkakaplag sa Atong Kaugalingon diha sa Damgo ni Lehi,” Liahona, Ago. 2010, 28)

Diha sa imong pagtuon niini nga leksiyon, pangayo og giya gikan sa Langitnong Amahan aron makasabot kon sa unsang paagi nga ang panan-awon ni Lehi mahimong may kalabotan sa imong kinabuhi. Pangitaa ang mga kamatuoran nga mahimong makatabang kanimo nga makadawat sa gisaad nga kalipay pinaagi sa Manluluwas, ingon man usab kon unsa nga mga babag ang gikinahanglan nimong likayan o buntogon.

Daghang mga tawo ang nagpadayon sa unahan

Sa iyang damgo, si Lehi nakakita og “dili maihap nga mga pundok sa mga katawhan” (1 Nephi 8:21) nga naningkamot nga makaabot ngadto sa kahoy sa kinabuhi. Nakasugat sila og daghang elemento nga nakaapekto sa ilang abilidad sa pagduol ngadto sa kahoy: gabon sa kangitngit, gunitanan nga puthaw, ug mga tawo sa dako ug lapad nga gambalay [building]. Imong makita kining tulo ka elemento diha sa painting sa ibabaw.

Mahimo nimong dapiton ang mga estudyante sa pagdrowing og ilang kaugalingong representasyon sa panan-awon samtang sila nagtuon. Ang mga estudyante mahimong makadugang og mga detalye sa tibuok dagan sa leksiyon.

Ang mosunod nga kalihokan sa pagbasa kay taas. Dapita ang mga estudyante nga tingali maglisod sa pagbasa sa ilang kaugalingon sa pagbasa nga magpares. Awhaga ang mga estudyante sa pagpaambit sa unsay ilang nakit-an ug sa ilang mga impresyon sa usag usa.

Samtang nagbasa ka sa 1 Nephi 8:22–34, pangitaa kini nga mga elemento ug kon unsa sa imong hunahuna ang mahimo niining gisimbolo. Mahimo usab nimong tan-awon “Nakita ni Lehi ang usa ka Gunitanan nga Puthaw ug Kadtong mga Nahisalaag” (3:30), anaa sa ChurchofJesusChrist.org.

• Unsa sa imong hunahuna ang mahimong girepresentar niini nga mga elemento sa panan-awon ni Lehi?

Sa wala madugay, si Nephi nakakita sa panan-awon sa unsay nakita sa iyang amahan ug mipasabot niini nga mga simbolo. Basaha ang 1 Nephi 12:17–18 aron makita ang unsay gitudlo ni Nephi. Irekord ang imong nakat-onan.

Kon ang mga estudyante nidrowing sa ilang kaugalingong representasyon sa panan-awon, mahimo nilang sulatan ang ilang mga drowing sa unsay ilang nakat-onan gikan sa pagpasabot ni Nephi.

Aron matabangan ang mga estudyante nga mahisgotan ang ilang nakat-onan ug magamit kini sa ilang kinabuhi, ikonsiderar ang pagpangutana sama sa mosunod:

• Unsa ang hitsura sa dako ug lapad nga gambalay [building] ug sa mga gabon sa kangitngit sa atong panahon?

• Sa unsang paagi kining mga babag makapahisalaag sa mga tawo karon?

• Unsa ang imong nakat-onan nga importante nga masabtan mahitungod sa imong panaw sa kinabuhi?

Mahimong makaayo sa mga estudyante ang paghisgot pa gayod sa mga gabon sa kangitngit ug sa dako ug lapad nga gambalay [building] pinaagi sa pagpangutana sa mosunod:

• Ngano kaha nga ang Ginoo mirepresentar niini nga mga babag niining paagiha?

• Ngano sa imong hunahuna nga daghang mga tawo ang nagtinguha nga maanaa sa dako ug lapad nga gambalay [building]?

Hunahunaa ang mga tintasyon nga imong giatubang ug sa unsang mga paagi nga ang garbo makaapekto kanimo. Pagpamalandong kon unsaon niini pagbalda kanimo o pagbabag sa imong abilidad sa pagduol ngadto kang Kristo ug pagbati sa gugma sa Dios.

Ang tabang nga gitanyag sa Dios kanato

Sa panan-awon ni Lehi, ang Dios nag-andam usab og mga paagi sa pagtabang sa Iyang mga anak sa pagduol sa kahoy. Adunay “usa ka higpit ug pig-ot nga agianan” (1 Nephi 8:20) nga nagpadulong sa kahoy. Buyon sa agianan, Siya mihatag og “gunitanan nga puthaw” nga nigiya sa mga tawo (1 Nephi 8:19, 24, 30).

• Unsa kaha sa imong hunahuna ang kamahinungdanon mahitungod sa gunitanan nga hinimo sa puthaw?

Basaha ang 1 Nephi 15:23–25 sa pagdiskobre kon unsay gitudlo ni Nephi mahitungod sa kahulogan sa gunitanan ug sa iyang mga saad mahitungod niini.

• Unsay mipatigbabaw niining mga bersikulo alang kanimo?

Ang mga estudyante nga nagdrowing sa panan-awon mahimong makadugang sa agianan ug sa gunitanan nga puthaw ug unsa ang gisimbolo niini. Dapita ang mga estudyante sa pag-summarize unsay ilang nakat-onan mahitungod sa gunitanan nga puthaw ug sa unsang paagi kini makatabang kanila. Ang mosunod maoy usa ka kamatuoran nga mahimong makatabang.

Usa ka kamatuoran nga atong makat-onan mao nga kon kita mopatalinghog ug hugot nga mogunit sa pulong sa Ginoo, ang mga pagtintal sa kaaway dili makabuntog kanato.

• Sa unsang paagi nga ang mga pulong sa Ginoo diha sa mga kasulatan ug kadtong gipamulong sa Iyang mga propeta makahatag og kaluwasan ug kalig-on atol sa mga panahon sa tentasyon?

• Unsa ang pipila ka mga ehemplo kon giunsa sa pulong sa Dios paggiya kanato sa pagdawat sa mga panalangin ug kalipay nga gitanyag sa Manluluwas pinaagi sa Iyang Pag-ula?

• Unsa ang gitudlo niini nga kamatuoran kanimo mahitungod sa Ginoo?

Kon makaayo sa mga estudyante ang dugang nga paghisgot sa gunitanan nga puthaw, ang usa o daghan pa sa mosunod nga mga pangutana mahimong mapuslanon:

• Ngano kaha nga girepresentar sa Ginoo ang Iyang pulong isip usa ka gunitanan nga puthaw?

• Unsa kaha ang buot ipasabot sa “patalinghog sa pulong sa Dios, ug hugot nga mogunit niini”? (1 Nephi 15:24).

• Unsa ang pipila ka lain-laing mga pamaagi nga kita makabasa, makadungog, o makadawat sa pulong sa Dios?

Ang mga estudyante nga nagdrowing sa panan-awon mahimong makadugang og pipila ka mga kasayoran sa kasulatan subay sa gunitanan nga puthaw nga personal nga makatabang nila nga magpabilin sa dalan, makabuntog sa mga tentasyon, o makadawat sa mga panalangin sa Pag-ula sa Manluluwas. Kon nagkinahanglan sila og tabang sa pagpangita og kasulatan, mahimo silang mangita og mga pakisayran nga naggamit sa termino nga “pulong sa Dios” (Giya ngadto sa mga Kasulatan, scriptures.ChurchofJesusChrist.org). Ikonsiderar ang pagpaambit og personal nga ehemplo ngadto sa klase o paghangyo og estudyante nga moboluntaryo.

Sa pagtapos niini nga leksiyon, pagpamalandong kon asa ka niana nga panan-awon. Giunsa nimo pagduol sa Manluluwas, ug giunsa nimo pagpadayon sa pagpaningkamot sa pagduol ngadto Kaniya? Unsa nga mga makabalda ug mga tentasyon ang imong giatubang? Giunsa sa Ginoo pagtabang kanimo pinaagi sa Iyang pulong?

Ikonsiderar ang pagtimbang-timbang sa imong tumong sa pagtuon sa kasulatan ug giunsa niini pagtabang kanimo, ingon man sa bisan unsang mga kalamboan o kausaban nga gusto nimong himoon. Kon wala kay tumong sa pagtuon, ikonsiderar ang paggahin og pipila ka gutlo sa paghimo niini.

Komentaryo ug Background nga Impormasyon

Unsaon nako paggunit og hugot sa gunitanan nga puthaw?

Si Elder David A. Bednar sa Korum sa Napulog Duha ka Apostoles mipasabot:

Pasugyota ko nga ang hugot nga paggunit sa gunitanan nga puthaw naglakip, labi na gayud, sa mainampoon, makanunayon, ug kinasingkasing nga paggamit sa balaang mga kasulatan isip sigurado nga tinubdan sa gipadayag nga kamatuoran ug isip masaligan nga giya sa panaw diha sa higpit ug pig-ot nga dalan paingon ngadto sa kahoy sa kinabuhi—gani ngadto ni Ginoong Jesukristo. (David A. Bednar, “Damgo ni Lehi: Hugot nga Paggunit sa Gunitanan,” Liahona, Okt. 2011, 36)

Unsaon nako sa paglikay nga mabutaan sa mga gabon sa kangitngit?

Si Elder Jeffrey R. Holland sa Korum sa Napulog Duha ka Apostoles mitudlo:

Makadasig usab nga masayran nga kining gabon sa kangitngit mitabon sa tanang mga nagpanaw––sa mga matinud-anon ug sa may determinasyon (mga pinili, nga ingnon ta) ingon man sa huyang ug sa mga kulang og baroganan. Ang buot gayud ipasabot sa istorya mao nga ang malamposong nagpanaw mibuntog sa tanang babag, lakip na ang pangdani sa gidili nga mga dalan ug pamugal-bugal gikan sa kawang ug kamahitas-on kinsa misubay niadto nga mga agianan. (Jeffrey R. Holland, “Kasiguroan alang sa Kalag,” Nob. 2009, Liahona, 88)

Si Elder Kevin W. Pearson sa Seventy mitambag:

Gawas kon kita “sa kanunay naggunit” [1 Nephi 8:30]sa pulong sa Dios ug nagsunod niini,mahimo kitang buta sa espirituhanon imbis nga mahunahunaon sa espirituhanon. Siksika ang Basahon ni Mormon ug ang mga pulong sa buhi nga propeta kada adlaw, kada adlaw, kada adlaw! Mao kini ang yawe sa espirituhanong pagpakabuhi ug makalikay sa pagpangilad. Kon wala kini, espirituhanon kitang mawala. (Kevin W. Pearson, “Pagpabilin diha sa Ebanghelyo,” Liahona, Mayo 2015, 115)

Unsa ang ubang mga kapanguhaan nga makatabang kanako sa paghanduraw ug pagsabot sa panan-awon ni Lehi sa kahoy sa kinabuhi?

Ang mosunod nga mga bidyo anaa sa ChurchofJesusChrist.org ug makatabang nimo sa paghanduraw ug pagsabot sa mga bahin sa panan-awon ni Lehi: “Gidapit ni Lehi ang Iyang Pamilya sa Pagkaon sa Bunga sa Kahoy” (3:23) ug “Ang mga Matinud-anon Mikaon sa Bunga sa Kinabuhi [Kahoy]” (3:28).

Dugang nga Pagkat-on

Usa ka alternatibo nga pagsugod sa leksiyon

Pag-drowing og kahoy sa pisara. Hangyoa ang mga estudyante sa paghanduraw sa usa ka tawo nga kinahanglang mobiyahe gikan sa luyo sa lawak [room] ngadto sa kahoy aron pagsimbolo sa pagduol ngadto kang Kristo. Mahimong ibalhin sa mga estudyante ang mga butang ug mga tawo sa lain-laing mga parte sa kwarto aron magsimbolo sa tabang nga gihatag sa Ginoo kanato aron makaabot sa kahoy, ingon man usab sa mga babag nga mahimo natong atubangon nga mahimong makapugong kanato.

Mga pangutana sa panaghisgotan mahitungod sa mga tawo sa panan-awon ni Lehi

Aron matabangan ang mga estudyante nga mogahin og panahon sa paghunahuna kon unsay makat-onan gikan sa lain-laing grupo sa mga tawo sa panan-awon ni Lehi, ikonsiderar ang pagpangutana og pipila ka mga pangutana sama sa mosunod:

• Unsa nga tambag ang imong ihatag ngadto sa usa ka tawo kinsa nahisalaag sa dalan human mawala sa mga gabon sa kangitngit? Ngano man?

• Ngano sa imong hunahuna nga ang ubang mga tawo mangawala human makakaon sa bunga sa kahoy sa kinabuhi?

• Unsa ang imong mahimo aron mapugngan ang imong kaugalingon sa pagkawala human makasinati og espirituhanong mga kasinatian?

• Unsa ang nasabtan sa mga tawo nga nagpabilin sa kahoy nga wala nasabtan sa kadtong namiya?